𝑅𝑒𝑒𝑚'𝑠 𝐿𝑎𝑏 👩‍🔬

ملفات دكتور عبد الله بما ان كتير طلبها

الرسالة المثبتة فيها اللي هتحتاجوه لكل مادة ان شاء الله

ودول للعولمة

انا بس حابة أقول حاجة ان بجد المعظم معدلهم قل الترم ده والامتحانات كانت أصعب فهونوا على نفسكم واصبروا وافتكروا ان أكيد ده الخير🤍 واللي مش عارف يحسب نتيجته يبعتلي أساعده ان شاء الله والمعدل هوا التراكمي لكن المعدل الفصلي هوا بتاع الترم ده

الف مبرووك بقيتو سنة تالتة ادعولي بقا ربنا يجبرني في النتيجة انا وانتو يارب🥹🤍

شوية أرقام للدكتورين حد كان باعتهم مشكورا

لا يفوتك ”

مشكلتي مع الدفعة

أنا بجد بفضل الله معنديش مشكلة مع حد في الدفعة ودايما كنت بقول الجملة المثيرة للجدل اني بحب الدفعة بجد ومعظمهم كانوا زوق معايا وده انا مقدراه جدا🤍 ونفسي بجد تقل العداوة اللي طايرة في الجو دي ونتمنى الخير لبعض ونتقبل بعض

اغتياب شخص

لو أي حد جه حكالي عن حد في غيابه هدافع عنه قدر الإمكان طول ما أنا مشفتش الغلط ده بعيني أو مشفتش انه يستدعي التضخيم للدرجة دي وده مش علشان انا منحازة لطرف من الاتنين انا محايدة قدر الإمكان بس علشان اي اللي هيحصل لو كل ما حد يشتكيلنا نقوله اه معاك حق ده كذا وكذا وكذا؟ استفدنا كده اي غير زرع الفتنة انا بجاهد نفسي اني مغتبش حد بس أتمنى لو في يوم أخطأت وعملت كده تسامحوني

الهزار

بالنسبة لجروب الدفعة انا شايفة ان الهزار محتاج يقل علشان {فلا تخضعن بالقول فيطمع الذي في قلبه مرض} فهي مش أختك ولا هو أخوك وإرسال القلوب تعبيرا عن الامتنان ملوش داعي لما حد يقولك شكرا قول الشكر لله حاول تقفل دايما مداخل الشيطان انت أدرى الشاتات عندك فيها كام بنت/ولد وواخدين على بعض ازاي وأكيد ده ميرضيش ربنا قبل وبعد الامتحان البنات والولاد يقفوا مع بعض ويحكو ويضحكو أكيد ده ميرضيش ربنا حفاظا على كرامتك وسمعتك كبنت خليكي بعيدة عن التجمعات دي، وكولد والله

اني أكون هايف

في ناس فخورة انها هايفة وبتحاول تلفت النظر دايما أو تعمل شو بيبذلوا مجهود دايما انهم يبانوا مفيش زيهم بس بجد مش هيا دي الطريقة انك تلفت النظر الناس الملفتة للنظر هيا الناس التقيلة اللي بتحاول تحافظ على احترامها اللي حاطة حدود لنفسها الناس الزوق واللي بتحاول تتمسك بدينها

كونك قدوة

بالنسبالي الناس اللي عرفتهم في الجامعة كانوا أكبر مثال ازاي ان الشخص بيتحول لقدوة من غير ما ياخد باله في ناس أثروا عليا جدا وخلوني أتطلع اني أكون زيهم مشكلتنا اننا بنشوف صحابنا بيعملوا اي ونحس ان احنا مجبرين نقلدهم في الغلط ، لي منعملش العكس؟ لي متبدأش انت تشوف انت بتعمل اي وتحسن نفسك فَصحابك يقلدوك في الخير اللي هيتريق عليك انك بتحاول تبقى شخص أفضل يبقى ده ملوش لزوم في حياتك نهائي

كلماتك

وانت خارج النهردة من البيت حط في دماغك -مش هقول كلمة آخد عليها ذنب -مش هقول كلمة تزعل أو تكسر حد -هقول كلمة لكل اللي أقابله تجبر بخاطره كلماتك بتفرق أوي في يوم اللي قدامك [حبك ، دعواتك بالتوفيق ، اعتذارك لما تغلط ، سؤالك حتى عن الحال ، انك تحسس اللي قدامك انك موجود علشانه فأي وقت محتاجك] الكلمة الطيبة صدقة [أمسك عليك لسانك!]

اعتذار

لأي حد زعلته عن غير قصد أو بقصد وأتمنى لو حد شايل في قلبه ذرة زعل مني يجي يكلمني

لما نُسأل

عدا سنتين وباقي سنتين وهنسأل عن كل يوم في الأربع سنين دي فحاول تجدد نيتك كل يوم -طلب العلم لوجه الله -الصبر على النزول وعالمشوار وعالتعب -أحاول أنفع نفسي وغيري -أكون قدوة -مجرش حد للأسوأ -أكون محتشمة

ختاما

مبسوطة جدا بوجودي معاكم وأتمنى لحد يوم التخرج نبقى فعلا طورنا نفسنا للأحسن واشتغلنا على مشاكلنا وبنينا علاقات حلوة ونخرج منها من غير عداوات نتعلم ازاب نكبر دماغنا علشان احنا نرتاح قبل أي حد وأتمنى تذكروني بدعوات حلوة 🤍

سلام عليكم كنت حابة أتكلم عن كذا حاجة بما أنه آخر يوم هيا رسالة طويلة بس لخصت وجودي معاكوا في السنتين دول جمعت فيها حاجات كتير كنت عاوزة أقولها فهبقى ممتنة لو قرأتوها للآخر 🫡