تحضيري kau 23

وعموما ياجماعة مو من حق اي احد ينشر رقمك لانو امس انتشرت ارقام طلاب حقيقيين من خصوصيين. ولا من حق احد يتهمكم في شي ولا من حق احد يسولك ازعاجات و رسايل ب الخاص ولا من حق احد يضيفوكم في قروبات بدون موافقتك و من اشخاص وارقام وهمية ودا المهم ، لاتسمح لاحد انوا يستغفلك ويستغلك او يزعجك. اما هرجة خصوصيين كلها كم شهر وبالنسبة لكم تروحو التخصصات ومارح يكون فيها كذا ابدا. وبالنسبة للي قاعدة تشتغل مع خصوصي فلان ياريت لا تقعدي تسرقس الملفات لانه والله جالسة اتعب عليها لو مرة مرة سوي لنفسك ملفات ولا تسرقي وتشيلي اسمي من الملفات!

يجماعة عشان نختصر الهرجة كلها بكلمتين بدون اللي جالس يصير من القروبات الخصوصيين مجموعات ،كل مجموعة بمكتبة، بعضهم اصحاب مع بعض وبعضهم ضد بعض يعني مثلا شلة مكتبة التفوق فيها: معاذ - وواحد اسمو صفطاوي والثاني الالفي شلة مكتبة المستقبل : خير الله - محمود سعيد - مجدي والشلتين دولا اصحاب يعرفو بعض شخصيا ً وهما الاثنين ضد الثالثة: شلة مكتبة برنتلي : طلعت - ليالي- كرشيان -فارس - سامية - ملك وطبعاً في ناس كذا جانبية مرات يصيرو مع دولا ومرات مع دولا حسب ماتجريه الرياح وتشتهي الأنفس فالهرجة كلها كيف كل احد ياخذ رزق الثاني باختصار، وكل سنة ناس تقلب على ناس شكلو السنة دي ، مكتبة التفوق والمستقبل حابين يقلبو على الثالثة ، شكلو طاح سوقهم والا قلت فلوسهم ودخلهم فقامو يرسلو خاص و يرسلو كلام وهروج و يسوا قروبات ويضيفو قروبات ويحذفو من قروبات يعني مشاكل لا اول ولا اخر لها... ف صارت حركات غريبة ... فلو تلاحظوا كل اللي جالس ينرسل عنهم رسايل وسب وكلام طويل كلهم في مكتبة وحدة فنصيحة يجماعة لا احد يهتم، كل الهرجة مين يتشطر و ياخذ رزق الثاني ويشوه في سمعة الثاني في ناس تسكت وناس اخلاقها سيئة يسبو بعض فالاخير ترا انت مالك اي فايدة من انك تعرف دا مين ودا بالاخير انت ماحتروح تتزوج منهم انت همك تشترك عندهم وتدفع اللي في جيبتك وفلوسك عشان شي تباه.. وعشان نكون صريحين دا اللي يبوه هما كلهم اللي في جيبتك الفلوس ويضاربو بعض عشان اللي في جيبتك لا حباً فيك ولا غيره. دا مشاكل حقد على ارزاق لا اكثر ولا اقل ودا من ايام سيدنا ادم عليه السلام وهو موجود ، الناس تضرب في بعض وتقتل بعض عشان الرزق ... بس ، الكلام الغريب والتصرفات الغريبة رسايل فضايح و هروج فضايح بالخاص و كأنه احد مهتم بالاخير المضاربة عليك انت وعلى اللي في جيبتك اي نعم ، مدري ايش جابني بينهم ، او ليه حشروني بينهم ، يمكن لانو دي السنه بعضهم ماقدر يوصل للقروبات وبعضهم وصل فحقدوا ولبسوني فيهم، بس عموما انا بريئة منهم اما بالنسبة لهرجة تسويق ماتسويق كل الخلق عندهم تسويق ياهو ماهو موجود بس بالقروبات، من ايام كنت تحضيري ، كانو اقسم بالله بنات طالبات شخصياً يجوني وجها ً لوجه يحاولو يقنعوني اشترك عند فلان وعند علان.. ماهي هرجة جديدة تقدروا تسألو الدفعات السابقة،، من يوم يومهم وهما يضاربو في بعض وما هي الا وساخة ودنائة نفس عشان الرزق لا اكثر ولا اقل.. واقلكم شي ، الجامعة ما اضافت كلاسات المساند ووفرت شروحات مجانية من الدكاترة نفسهم الا عشان يحاولو يحاربو الحرب اللي من الخصوصين،، بالاخير انت عندك المجاني المتوفر في كل مكان وترا ماهو ناقصه شي ، ولو على التست بانك عندك ملفات البلاك بورد.وعندك تست بانك في المكتبات وانا جالسة احاول اوفرلكم المجاني قد ما اقدر طبعا ماهو المجاني حق الخصوصي لانو اصلا وراه نية تسويق اقصد المجاني اللي مالو علاقة ب الخصوصي وبرضو عندك المدفوع اللي هو حرب الخصوصين وانت تختار الشي اللي تباه.. والله العظيم ماحد همه فيهم الا فلوسك اللي في جيبتك.. ف رجاء اميتوا الباطل ب السكوت عنه ، واشتروا دماغكم من القذراة اللي جالسة تصير اقل من 4 اشهر و السنة التحضيرية تنتهي بكل سلام ان شاء الله ساعتها لا همك خصوصي ولا غيره.

. . .

لو ماقدرت اخلص مواد السنة التحضيرية خلال الفترة اللي طالبينها ايش ممكن يصير؟🤔 في هذي الحالة حتوصلكم رسالة انتهاء فترة 🔻 طيب ايش يعني انتهاء فترة الدراسة؟ يعني ملفكم في الجامعة حينقفل خلاص ( توقيف من الجامعة) ‼️ من أسباب التوقيف ¦ ١. أما انوا معدلك اقل من ٢ لمدة ٤ اترام متتالية. ٢. او انوا عديت ٤ اترام تحضيري و برضو ما نجحت في كل المواد. ‼️ملاحظة ¦ الترم الصيفي يعتبر فرصة و ماينحسب من ال ٤ اترام اللي إجباري تخلص فيها كل مواد التحضيري. ‼️ في حال وصلك رسالة انتهاء فترة كيف ممكن تتصرف؟ حاول قد ماتقدر تتواصل مع الجامعة ارفع معاملة الكتروني عن طريق موقع المعاملات الإلكترونية ers او روح ل عمادة القبول والتسجيل قسم الطلاب ( ولو طالبة ارسلي احد ل قسم الطلاب) وحاول تشرح لهم انوا عندك ظرف ما خلاك تجتاز الترم بنجاح او في عذر معين كان سبب انوا معدلك يقل عشان يتعاونو معاك ويعطونك اخر فرصة ( ترم خامس) تكمل فيها مواد السنة التحضيرية. #RANDA🐣

🔻اخوي اول ترم تحضيري و بيعتذر و يحول هل اول شي يعتذر و لا اول شي يحول؟ هو يطلب تحويل والجامعة راح تعتذرله تلقائي بعد ماتوافق على الاعتذار.. 🔻في الترم الثاني رح يكون فيه تحديد مستوى الانجليزي واقدر احجز وانا اختبرت قبل؟ الترم الثاني في تحديد مستوى لكن للناس اللي ما اختبرت اول ترم او تنقبل جديد او تم تأجيل قبولها وحتبدأ الترم الثاني.. 🔻لو أخذت حرمان واعتذرت عن الترم يروح الحرمان؟ ايوا يروح الحرمان عادي والمادة كلها تتلغى.. #RANDA🐣

...

📌جدول مذاكرة للاختبارات النهائية حسب الخطط الثلاثة✨

. . .

💡 النسبة العامة والخاصة 🌿 ‼️النسبة العامة من ١٠٠٪ هي اللي تنحسب في التسكين وليس المعدل التراكمي من ٥. - لمشاهدة النسبة المئوية تقدروا اما تحسبوها بنفسكم او تشوفوها من الاودس الاودس - الطالب - سجلات الطالب - المعدل التجريبي - (النسبة العامة وليس الخاصة). او لو تبوا تحسبوها بنفسكم الطريقة ⬇️ ( اضرب درجتك في المادة الأولى في عدد ساعاتها) + ( اضرب درجتك في المادة الثانية في عدد ساعاتها) +..... الخ واقسم الناتج على مجموع عدد ساعات المواد كلها واضرب في ١٠٠ ‼️المعدل التراكمي من ٥ مهم في التحويل والتخصيص وليس التسكين يعني التحويل الداخلي من كلية ل كلية او اختيار رغبات التخصصات داخل الكلية. ‼️( هام ) لو معدلك التراكمي نزل عن ٢ حتووقف المكافأة. #RANDA🐣

. . .

. . .🖇✨

‎✨متى اقدر انسحب من الجامعة؟ ‎تقدر تنسحب في اي وقت وبعض الاحيان يقفل الانسحاب اوقات الاختبارات النهائية ويفتح بعدها حتى لو بعد الفاينل واحيانا مايتقفل اصلاً ، لكن خلو ببالكم نقطة مهممة جداً في حال بتنسحبوا من الجامعة وبترجعوا تقدموا من جديد لجامعة الملك عبد العزيز لازم تنسحبوا قبل بداية الدراسة للسنة الجديدة ب٣ شهور على الاقل . ‎✨طيب هل ينفع انه اسجل بالجامعة مرتين؟؟ ‎يس ، انت تنفع تسجل بالجامعة مرتين يعني طول فترة حياتك او طول وقتك ماينفع تسجل في جامعة الملك عبد العزيز اكثر من مرتين حيكون لك رقمين جامعيين مختلفة ومنفصلة بمعنى اخر في كثير يسألوا هل بعد ما انحسب درجاتي ومعدلي بتكون نفسها او تقعد معايا .. لا انت ملفك بمجرد ماتنسحب نهائي ملفك تمام انقفل ودرجاتك انمسحت وكل اللي سويته خلال الجامعة انتهى وانقفل ف انت وقت مابتقدم من جديد ك انك متخرج من الثانوي دحين ودرجاتك جديدة بمواد جديدة وتعيد السنة التحضيرية بمعدل مختلف تماماً. ‎✨هل لو سحبت وقدمت السنة الجاية قبولي بيكون مضمون؟ ‎الله اعلم ، حسب الدفعة اللي بتقدم درجاتهم مرتفعة ولا نازلة او كم عدد اللي بيقدموا بيكونوا اقل او اكثر يعني حسب القبول والدرجات والمعدلات وهذا كله مايبان الا وقت ماتطلع النتايج حق القبول. ‎✨كيف طريقة السحب النهائي او اخلاء الطرف من الجامعة؟ الطريقة: ‎📍تسوي الاخلاء ‎الاودس-الطالب-معاملات الطالب-الانسحاب النهائي من الجامعة إلكترونيًا ‎📍طباعة الاخلاء ‎الاودس-الطالب-شهادات و افادات ‎الطلاب-افادة انسحاب نهائي #Randa🐣

🖇 الرسوب❌ ▫️ اول شيء راح نتكلم عنه هو متى يحصل الرسوب ومن كم تحسب درجته؟ الرسوب انك تأخذ درجة ٥٩ واقل /١٠٠ في المادة نهاية السنة هنا يكون حالة رسوب وتنزلك علامة F .. ▫️ متى راح ادرس المادة اللي رسبت فيها؟ طبعاً عشان تتسكنوا في الكليات العلمية لازم تكونوا اجتزتوا جميع مقررات ومواد السنة التحضيرية بنجاح يعني في حال رسبتوا في مادة معينة لازم تدرسوها من جديد وتنجحوا فيها حتى تتسكنوا والمواد هذي حتدرسوها اما في: ١-الفصل الصيفي لو الجامعة اعلنت فيه فصل صيفي هنا تقدروا تدرسوا هذي المواد ( الفصل الصيفي اختياري وماينحسب ضمن المدة الدراسية لطلبة التحضيري).. وبعد ماتجتازوا المادة يفتحلكم التسكين وتتسكنوا مع دفعتكم.. ٢- الترم الاول من السنة الجاية وهنا المواد راح تنزلك تلقائياً ولازم تنجح فيها وبعدها يفتحلكم التسكين بين الاترام.. ▫️ هل صحيح انه الساعات تصير اكثر وايش السبب؟ ايوه يوم ترسب في مادة وتدرسها يصير ك انك درست المادة مرتين او ك انك درست مادتين ف تصير الساعات دبل يعني على سبيل المثال: طالب رسب في المادة الاولى وعدد ساعات هذي المادة ٤ ساعات ف وقت مايعيد هذي المادة بتكون الساعات ٨ ساعات (المادة الاولى اللي رسب فيها ٤ساعات والمادة الثانية الاعادة ب٤ ساعات). ف لو الطالب جاب في المادة الثانية نسبة ١٠٠ ٪؜ حتكون هذي الدرجة ل٨ ساعات مو ٤ ساعات فقط..لانها لمادتين. ▫️ كيف بيأثر الرسوب على الطالب؟ الرسوب يأثر على النسبة من ١٠٠ لانه يتم فيها حساب عدد الساعات وبالتالي يأثر في التسكين وكمان الرسوب يأثر في المعدل ويخسف فيه مرا كثير.يعني انك تجيب في مادة D افضل بكثير من انك ترسب في المادة وتيعديها من جديد وانك تتسكن في نهاية السنة افضل من انك تتسكن بين الترمين لانه الفرص تكون اكثر.. وبالتوفيق جميعاً💫 #RANDA🐣

الغيابات في الجامعة صح ماعليها درجات لكن هي نظامها شوي مختلف عن المدارس في حد معين للغيابات ماتقدروا تتجاوزوه والحد هذا هو 25% من عدد المحاضرات خلال الترم كامل وبعطيكم مثال⬇️ لو عندك ١٠٠ محاضرة على سبيل المثال لمادة الرياضيات خلال الترم كامل اذن ما يزيد عن ٢٥ غياب لكن هو عادة يكون قليل لانه انتم ما راح تأخذوا ١٠٠ محاضرة هذا بس على سبيل المثال عادة بتوصل من ٦ الى ٨ محاضرات واذا تجاوزتوا ٨ محاضرات بدون ماتجيبوا اعذار راح تدخلوا في مرحلة اسمها الحرمان من المادة .. 📌 ايش يعني الحرمان؟🤔 الحرمان هو اني ما اقدر ادخل الاختبار النهائي وراح ينزلكم في كشف الدرجات حقكم (كل واحد حيكون عنده كشف الدرجات تشوفونه من حسابكم ) قدام المادة رمز DN وهذا الشيء راح يخسف في معدلكم مرة ويصير ك انه ما اخذتم المادة ابداً ويصير لازم تعيد هالمادة.. #RANDA🐣