DevGuide

دردشة سريعة عن الـ Interface Segregation Principle 💯 . . تخيل أنك في شغلانة معينة وكل شوية حد يطلب منك تاسكات ملهاش علاقة ببعض ولا ليها علاقة بالشغلانة...طبيعي هتلاقي نفسك مشتت بين التاسكات كلها ومفيش فرصة تركز في الشغلانة الأساسية اللي جاي علشانها وكمان مش هتعملها بأفضل شكل. نفس السيناريو ده بالضبط ممكن يحصل في البرمجة لما الكود يبقى مضطر يلتزم بحاجات هو مش محتاجها. وهنا هتلاقي دور الـ Interface Segregation Principle، واحد من أهم المبادئ الخمسة لمفهوم SOLID، عشان يحل المشكلة دي. ——— يعني إيه Interface Segregation Principle؟ 🤔 الـ ISP بيقول ببساطة: "مينفعش تخلي الكود يلتزم بحاجات هو مش محتاجها." لو عندك Interface فيه مليون وظيفة (methods) لكن الكائن (object) اللي هيستخدم الـ Interface ده هيحتاج كام حاجة بس، يبقى كده أنت بتحمّله شغل ملوش لازمة، وده هيعمل مشاكل في الكود بعدين. ——— مثال بسيط 👇 لو عندك Interface اسمه Bird

interface Bird {
  fly(): void;
  swim(): void;
}

لو عملت كائن (object) زي Duck هيبقى منطقي جدًا إنه يقدر يطير (fly) ويعوم (swim). لكن لو عندك كائن زي Penguin؟ البطريق بيعوم بس، ومش بيعرف يطير! في الحالة دي الـ Penguin هيضطر يطبق (implement) وظيفة ملوش علاقة بيها وهي fly، حتى لو مش هيستخدمها. ——— ✅ الحل؟ افصل الوظائف بتاعت الـ Interface على حسب الاحتياج الفعلي:

interface FlyingBird {
  fly(): void;
}

interface SwimmingBird {
  swim(): void;
}

وكده لما تيجي تعمل Duck، هيطبق الاتنين:

class Duck implements FlyingBird, SwimmingBird {
  fly() {
    console.log('Duck is flying');
  }
  
  swim() {
    console.log('Duck is swimming');
  }
}

أما الـ Penguin، هيطبّق بس اللي له علاقة به:

class Penguin implements SwimmingBird {
  swim() {
    console.log('Penguin is swimming');
  }
}

——— 📌 ليه المبدأ ده مهم؟ - لما كل كائن يكون مرتبط بالوظائف اللي فعلًا محتاجها، بيبقى أسهل تعمل تغييرات من غير ما تسبب مشاكل لباقي الكود. - الكود بتاعك هيبقى منظم "Organized" أكتر ومفهوم لأي حد يشتغل عليه بعدك. - مش هتضطر تضيف دوال (methods) مش مستخدمة، وده بيقلل الـ Bugs اللي ممكن تظهر. ——— 📍 دائمًا خليك حريص إن أي Interface يكون متخصص ومحدد الوظائف. 📍 لو لقيت Interface كبير ومعقد، افصله لعدة Interfaces أصغر. 📍 فكر كويس قبل ما تعمل أي implements، واسأل نفسك: الكائن ده فعلًا محتاج كل اللي موجود في الـ Interface؟ ——— وفقكم الله لكل خير 🌿

الـ OOP أو Object-Oriented Programming 🔻 الـ OOP بتقوم على أربع أعمدة أساسية: Abstraction، Encapsulation، Inheritance، وPolymorphism. طيب، إيه معناهم؟ ———

🟠 Abstraction

الفكرة في الـ Abstraction هي إنك تخفي التفاصيل اللي تخص الـ implementation وتعرض بس الحاجات المهمة اللي المستخدم محتاج يعرفها. زي مثلًا لو عندك class اسمه Vehicle وفيه method اسمها stop، الـ method دي ممكن تكون abstract يعني محدش يعرف إزاي بتشتغل من جواها، كل اللي باين إنها بتوقف الـ Vehicle. ———

🟠 Encapsulation

الـ Encapsulation معناه إنك "تغلف" البيانات (اللي هي الـ fields) والوظائف (اللي هي الـ methods) في وحدة واحدة اللي هي الـ class. وكمان، إنك تحدد مين يقدر يوصل للبيانات دي عن طريق الـ access modifiers. زي إنك تخلي الـ fields بتاعتك private، وتعمل لها getters و setters علشان تتحكم في الوصول لها. ———

🟠 Inheritance

الـ Inheritance بيسمح لك تعمل class جديد (child class) يورث الـ attributes والـ methods من class موجود بالفعل (parent class). الميزة هنا إنك بتقدر تعيد استخدام الكود بدل ما تكتبه من أول وجديد. مثال: عندك class اسمه Vehicle، تعمل منه class اسمه Car، والـ Car هيبقى عنده نفس صفات وسلوكيات الـ Vehicle. ———

🟠 Polymorphism

الـ Polymorphism معناه إن الـ methods بتشتغل بشكل مختلف بناءً على الـ object اللي بتتطبق عليه. وده بيخليك تستخدم نوعين ليهم نفس الـ inheritance chain مع بعض من غير مشاكل. يعني لو عندك method بتاخد Vehicle كـ parameter، ممكن تبعت لها Car أو Bike وهتشتغل عادي طالما إنهم بيورثوا من Vehicle. ——— وفقكم الله لكل خير 🌿

System Performance Metrics Every Engineer Should Know 💯

يعني إيه Cross-Site Scripting (XSS)؟ ⚠️ . . الـ XSS هو نوع من أنواع الثغرات الأمنية اللي ممكن تكون موجودة في المواقع، وبيستغلها الهاكرز علشان ينفذوا أكواد ضارة داخل صفحة الويب اللي بيستخدمها الضحية، وكده الهاكر يقدر يتحكم في الموقع أو حسابات المستخدمين، أو حتى يسحب بياناتهم الخاصة. ——— 📌 الثغرة دي بتشتغل إزاي؟ خليني أشرحلك السيناريو البسيط اللي ممكن يحصل: 1- الهاكر بيكون عنده كود JavaScript ضار وعايز يزرعه في الموقع. 2- بيستغل ثغرة في المدخلات (Inputs) الموجودة في الموقع زي الـ Forms أو الـ Comments، أو حتى في URL لو الموقع مش مؤمّن كويس. 3- المستخدم العادي، اللي هو الضحية، بيفتح الصفحة من غير ما يعرف، والكود الضار اللي كتبه الهاكر بيبدأ يشتغل تلقائي، وده بيدّي الهاكر صلاحيات كبيرة داخل حسابات الضحية أو حتى بيتمكن من سرقة البيانات اللي موجودة على الموقع. 💥 يعني الكود الضار اللي كتبه الهاكر ممكن يتحكم في أي حاجة بتظهر للمستخدم على الموقع، وده ممكن يكون من خلال: - سرقة الكوكيز: اللي هي زي ملفات صغيرة بتحتفظ بمعلومات تسجيل الدخول والتفضيلات. الكود الضار ممكن ياخدها ويبعتهاله، والهاكر يستخدمها علشان يدخل بحساب الضحية. - تغيير محتوى الصفحة: ممكن الهاكر يحط حاجات أو رسائل وهمية في الصفحة تخلّي المستخدمين يدخلوا بياناتهم الشخصية، زي رسائل "تسجيل الدخول" أو "تحديث الحساب". - إعادة توجيه المستخدم: لو الهاكر عايز ينقلك لموقع ضار تاني فيه فيروسات أو برامج خبيثة، ممكن يخليك تروحله وأنت مش واخد بالك. ——— 🔐 أنواع الـ XSS: فيه أكتر من نوع يخص الـ XSS، وكل نوع له طريقة مختلفة في التنفيذ وأثر مختلف، خليني أقولك الأنواع الرئيسية: 📍 الـ Stored XSS: النوع ده بيحصل لما الكود الضار بيتخزن في الموقع نفسه، يعني بيكون ثابت وكل مرة حد يفتح الصفحة يتنّفذ على طول. 📍 الـ Reflected XSS: النوع ده بيشتغل لما الكود بيتنّفذ فورًا في الصفحة اللي اتضاف فيها، زي لما حد يبعته في رابط URL، والمستخدم يفتحه فيلاقي الكود شغال. 📍 الـ DOM-based XSS: ده نوع أذكى شويه لأنه بيشتغل على مستوى الـ DOM بتاع الصفحة، يعني بيتعامل مباشرة مع العناصر اللي بتتغير في واجهة المستخدم، وده بيخلي الثغرة أصعب شوية في الاكتشاف. ——— 💡 إزاي نمنع الـ XSS؟ عشان تحمي موقعك أو تطمّن إنك متأمن ضد الثغرة دي، لازم تركز على كام حاجة: 📌 أي حاجة بيضيفها المستخدم في الموقع (زي النصوص أو التعليقات) لازم يتعمل عليها فلتر و Validation وتتأكد إن مفيهاش أكواد ضارة. 📌 استخدام Content Security Policy (CSP): ده زي طبقة حماية إضافية بتمنع تنفيذ الأكواد اللي جايه من مصادر غير موثوقة. 📌 تشفير المدخلات والمخرجات: عن طريق استخدام HTML encoding عشان تحول الرموز اللي ممكن تسبب مشاكل (زي < و >) لرموز آمنة. 📌 منع الكوكيز من السرقة: باستخدام حاجة زي HttpOnly اللي بتحمي الكوكيز من الوصول المباشر عبر JavaScript. ——— ✋ الـ XSS ثغرة خطيرة جدًا ممكن تهدد خصوصية المستخدمين وتضر بسمعة الموقع كمان. عشان كده لازم تكون فاهم تفاصيلها كويس وتقدر تأمن موقعك منها....

لو بتدور على شغل عن بُعد في مجال الـ Tech 💯 . . قائمة تحتوي على مجموعة شركات بتوفر فرص شغل جزئي أو كلي عن بُعد. ———

Remote-Friendly Companies 💯

A list of semi to fully remote-friendly companies (jobs) in tech. https://github.com/remoteintech/remote-jobs

Master Hydration in React 19.2 💯

As a React.js developer, Please learn: 1. Advanced State Management - Redux & Redux Toolkit - Context API - Recoil or Zustand 2. React Performance Optimization - Memoization (React.memo, useMemo, useCallback) - Code Splitting - React Profiler 3. Component Design Patterns - Higher-Order Components (HOCs) - Custom Hooks 4. Server-Side Rendering (SSR) - Next.js - Hydration 5. TypeScript with React - Type Safety - Advanced Types and Generics 6. Testing - React Testing Library - End-to-End Testing (Cypress, Playwright) - Mocking and Stubbing 7. React Ecosystem and Tooling - Webpack and Babel - ESLint and Prettier 8. API Integration - GraphQL (Apollo Client, Relay) - SWR and React Query - WebSockets and Real-Time Updates 9. Authentication and Authorization - OAuth and JWT - Role-Based Access Control (RBAC) 10. Code Architecture - Monorepos (Nx, Lerna) - Micro-Frontends - Atomic Design 11. Web Performance Optimization - Lazy Loading - Progressive Web Apps (PWA) - Service Workers

Event Emitters in JavaScript 💯

Event emitters decouple components, enabling scalable, event-driven architectures.

——— 📌 Ideal For: - UI interactions (clicks, form submissions) - APIs/HTTP servers (request/response handling) - Real-time apps (chat, notifications) - Modular systems (plugins, micro-services)

كلام خفيف عن الـ SOLID Principles 💯 . . ليه بعض المشاريع البرمجية بتفضل ثابتة وقوية مهما زاد حجمها وتعقيدها، بينما مشاريع تانية أول ما تكبر شوية بتنهار وكل شوية يحصل فيها مشاكل والدنيا بتبقى مدعكة؟ 🤔 الحقيقة السر مش بس في الكود، لكن كمان في طريقة التفكير وكتابة وتنظيم الكود. وهنا ييجي دور مبادئ الـ SOLID اللي تعتبر زي خريطة طريق لأي مهندس برمجيات عايز يكتب كود نظيف، قابل للتطوير، وسهل الصيانة. كلمة SOLID اختصار لـ 5 مبادئ أساسية في البرمجة كائنية التوجه (Object-Oriented Programming)، وكل مبدأ فيهم له دور كبير في تحسين جودة الكود. تعال نفهم كل مبدأ بشكل مبسط: ———

📌 الـ Single Responsibility Principle (SRP) - المسؤولية الواحدة

ده معناه ببساطة إن كل كائن (class) في الكود بتاعك لازم يكون عنده وظيفة واحدة بس، وما يعمل أكتر من حاجة. علشان لو حصل تغيير في أي جزء، ما تضطر تعدّل كل الكود، وبالتالي تقل الأخطاء وتبقى الصيانة أسهل. 📍 مثال عملي: تخيل معاك موظف في الشغل بيعمل كل حاجة من الحسابات لخدمة العملاء لتوصيل الطلبات. لو الموظف ده تعب، كل حاجة هتقف! لكن لو كل موظف عنده وظيفة محددة، الدنيا هتبقى منظمة أكتر. ———

📌 الـ Open/Closed Principle (OCP) - مفتوح للتوسع ومغلق للتعديل

المبدأ ده بيقولك خلي الكود بتاعك جاهز للتطوير أو إضافة مميزات جديدة من غير ما تعدّل في الكود الأساسي. علشان ما تكسر حاجات شغالة بالفعل وتبقى الميزة الجديدة زي طبقة إضافية فوق النظام القديم. 📍 مثال عملي: زي إنك تبني بيت وتسيب أماكن للتوسعات، بدل ما تضطر تهد الحيطان كل ما تحتاج تضيف أوضة جديدة. ———

📌 الـ Liskov Substitution Principle (LSP) - استبدال الأنواع الفرعية بالأساسية

لو عندك (Parent Class) و (Child Class)، الـ child class لازم يقدر يحل محل الأساسي من غير ما يحصل أي مشاكل في الكود. علشان تضمن إن الكود بتاعك يشتغل بشكل متماسك وسلس حتى لو استخدمت كائنات مختلفة. 📍 مثال عملي: زي إنك تشتري عربية جديدة، وأيًا كان الموديل، لازم تقدر تسوقها بنفس الطريقة من غير ما تتعلم حاجة جديدة تمامًا. ———

📌 الـ Interface Segregation Principle (ISP) - تقسيم الواجهات

المبدأ ده بيقول: مينفعش تجبر الـ classes إنها تستخدم حاجات مش محتاجاها. لو فيه واجهة (Interface) كبيرة ومعقدة، قسمها لواجهات صغيرة خاصة بوظائف محددة. علشان ما تخلي الكود مليان حاجات مش ضرورية أو ملهاش علاقة بااـ class. 📍 مثال عملي: زي إنك تطلب اشتراك في صالة جيم علشان تتمرن، مينفعش تلاقي نفسك مجبر إنك تدفع رسوم لحاجات زي الساونا وحمام السباحة وأنت أصلًا عايز تتمرن بس! ———

📌 الـ Dependency Inversion Principle (DIP) - عكس التبعية

هنا المبدأ بيقول إنك لازم تخلي الكود بتاعك يعتمد على واجهات مجردة (Abstractions) بدل ما يعتمد على تفاصيل محددة (Implementations). علشان التعديلات تبقى أسهل وماتربط الكود بتفاصيل صغيرة ممكن تتغير في أي وقت. 📍 مثال عملي: زي إنك تستخدم شاحن USB عام بدل ما تعتمد على شاحن نوع معين، لأن أي شاحن تاني ممكن يشتغل على نفس الجهاز. ——— ⚡️ ليه مبادئ الـ SOLID مهمة؟ - بتخلي الكود بتاعك سهل القراءة والفهم. - بتقلل من الأخطاء اللي بتحصل لما تضيف مميزات جديدة. - بتوفر وقت كبير في الصيانة والتعديلات. - بتخليك جاهز لأي تحديات جديدة أو تغييرات في المشروع. ——— وفقكم الله لكل خير 🌿

دردشة سريعة عن الـ Message Queueing 🔻 . . عمرك سألت نفسك إزاي الأنظمة الكبيرة بتتعامل مع كميات مهولة من الطلبات في نفس اللحظة من غير ما تنهار؟ 🤔 الموضوع أبسط مما تتخيل… والسر في مفهوم صغير لكنه قوي جدًا اسمه Message Queueing. الفكرة إن بدل ما السيستم يشيل الحمل كله مرة واحدة ويبدأ يتوتر، بنرتّب الشغل في طابور منظم، وكل حاجة بتتم واحدة واحدة. تعال نفهم ليه الـ Message Queueing من أهم الأساليب اللي بنعتمد عليها في بناء أنظمة مرنة وقابلة للتوسع. ——— 📌 إيه هي فكرة الـ Message Queue؟ تخيل أنك صاحب مطعم وطلبات الزبائن كتير جدًا. لو كل الطلبات دخلت المطبخ مرة واحدة، الطباخين مش هيعرفوا يشتغلوا، وهتلاقي الدنيا باظت. فأنت كمدير، بتعمل نظام طابور (queue) قدام المطبخ. الطلبات تدخل واحد واحد على حسب أولوية كل طلب، والمطبخ يشتغل بالترتيب. هو ده بالضبط اللي بيحصل في الـ Message Queueing. بدل ما السيستم بتاعك ينفّذ كل المهام في نفس اللحظة، بيحطها في طابور، ويسيب جزء معين من السيستم يعالجها واحدة واحدة. ——— 📌 استخدامات الـ Message Queueing: ✅ الإشعارات (Notifications): لما تبعت إشعار لعدد كبير جدًا من المستخدمين، مش كلهم لازم يوصلهم الإشعار في نفس اللحظة. بدل ما السيستم ينهار، بنبعت الإشعارات للطابور، وكل إشعار يتبعت في دوره. ✅ طلبات الدفع (Payment Processing): لما يجي طلب دفع، بتحطه في الطابور علشان يتحقق منه ويتنفّذ بشكل آمن بدون ما يحصل تضارب. ✅ تحليل البيانات (Data Processing): سيستم زي Google Analytics مثلًا، بيحتاج يتعامل مع مليارات الطلبات. الطابور هنا بيخلّي كل طلب ياخد دوره في التحليل. ——— 📌 إيه مميزات الـ Message Queue؟ - المرونة (Scalability): لو الطابور طويل، نقدر نزود عدد "الطباخين" بسهولة (workers) علشان يخلصوا الشغل أسرع. - الثبات (Reliability): حتى لو حصل مشكلة في جزء معين من السيستم، الطابور بيضمن إن البيانات متسجلة ومفيش حاجة هتضيع. - الفصل بين الأجزاء (Decoupling): كل جزء من السيستم بيشتغل لوحده. اللي بيبعت الرسائل مش محتاج يعرف التفاصيل بتاعة اللي بيعالجها، والعكس. ——— 📌 أمثلة على الـ Message Queue Tools: - الـ RabbitMQ: أداة قوية وسهلة الاستخدام. - الـ Apache Kafka: مثالية للتعامل مع البيانات الكتيرة اللي بتيجي في وقت واحد. - الـ Amazon SQS: خدمة بسيطة وسحابية من AWS. - الـ Redis: مناسب لو بتدور على حاجة خفيفة وسريعة. ——— وفقكم الله لكل خير 🌿

أداة NotebookLM 💡 . . من ضمن الأدوات اللي بقيت معتمد عليها بشكل كبير الفترة الأخيرة خصوصًا في قراءة الكتب وتحديدًا كتب البرمجة، هي NotebookLM. بصراحة… الأداة فرقت معايا في طريقة مذاكرتي وفهمي للمواد التقنية بشكل رهيب جدًا. ——— أول حاجة، بقت بتوفر عليّ وقت كبير جدًا. بدل ما أقعد أقرأ كتاب 300 صفحة أو أكتر وأدوّر على كل جملة عايز أفهمها أو أرجع لها، بقيت برفع الكتاب على NotebookLM وهي بتلخص لي أهم الأفكار، وتديّني إجابات سريعة لأي سؤال يخطر في بالي. كمان اللي عاجبني فيها إنك بتتعامل مع الكتاب أو المحتوى كأنك بتكلم واحد صاحبك شات، تتكلم معاه ويشرحلك ويوضحلك الحاجات اللي مش فاهمها في الكتاب. وكأن عندك Mentor قاعد جنبك بيشرحلك ويجاوبك على أي نقطة مش واضحة. ——— كمان الأداة بتربطلك الأفكار ببعض، يعني لو بتذاكر كتاب Backend ومحتوى Frontend في نفس الوقت، تقدر تسأل سؤال يقارن بين فكرة هنا وفكرة هناك… والأداة بتفهم السياقين وتجمعلك إجابة مترتبة ومفهومة. ——— هل ده خلاني أستغنى عن القراءة العادية؟ طبعًا لا... ولكن القراءة بقت أذكى وأسرع وأسهل خصوصًا في الكتب الكبيرة اللي فيها رغي كتير خارج المجال. بدل ما أضيع وقت في الفصول اللي مش مهمة، الأداة بتوجّهني لأهم الأجزاء، وتخلّي تركيزي على اللي فعلًا يفيدني. ——— عن تجربة شخصية لمدة شهور، أنصحك تبدأ تستخدم الأداة دي وتعتمد عليها خلال رحلتك في عالم البرمجة. ——— 📌 رابط الأداة: https://notebooklm.google

مفهوم الـ KISS (Keep It Simple, Stupid) 💯

. . مفهوم الـ KISS (Keep It Simple, Stupid) ببساطة يعني "خلي شغلك بسيط قدر الإمكان"، وده مش معناه إنك تتنازل عن الجودة أو الكفاءة، لكن يعني إنك تبعد عن التعقيد اللي ملوش لازمة. في عالم البرمجة، لو عرفت تبسط الكود وتخليه سهل للفهم، ده هيخليك تقدر تدير الشغل بشكل أسهل وأسرع، وهيساعدك تقلل الأخطاء. في المقال ده هنتكلم عن إزاي تطبق المبدأ ده في الكود بتاعك، وأمثلة بسيطة باستخدام TypeScript عشان تقدر تفهمه بشكل عملي. KISS (Keep It Simple, Stupid): The Art of Simplicity in Software Development 💯 https://dev.to/alisamir/kiss-keep-it-simple-stupid-the-art-of-simplicity-in-software-development-124l ——— وفقكم الله لكل خير 🌿

إشكالية الـ Problem Solving 🔻 إن شاء الله تعالى هنتكلم في كام نقطة تخص مهارة حل المشكلات أو الـ Problem Solving - يعني إيه Problem Solving؟ - أنواع الـ Problem Solving؟ - هل الـ Problem Solving أهم من التكنولوجي (Technology)؟ - إزاي تنمي مهارة الـ Problem Solving؟ - بعض مواقع الـ Problem Solving. - نصيحة من سوق العمل. ——— خلينا نبدأ من الصفر بتعريف المشكلة بعيدًا عن البرمجة...بصفة عامة المشكلة هي كل موقف غير معهود لا يكفي لحلهِ الخبرات السابقة والسلوك المألوف، ويضطر الفرد للبحث عن حل للتخلص من المشكلة وبلوغ الهدف المنشود. (سيبك من التعريف وكمل)... خلينا نُسقط الكلام ده على البرمجة...يعني إيه Problem Solving؟ عملية بناء أي مشروع في مجال السوفتوير سواء موقع أو تطبيق أو حتى سكربت معين بتمر بمراحل معينة وطبيعي جدًا إن فيه مشاكل هتحصل في أي مرحلة من المراحل ولكن خلينا نركز على الجزء الخاص بالأكواد (Coding)، والمشاكل هتكون مختلفة ومتنوعة سواء مشكلة في إضافة ميزة جديدة للمشروع أو حتى تعديل على ميزة موجودة أو حتى حذفها من المشروع ممكن يأثر على باقي المشروع كله وهنا تيجي مهارة حل المشكلات وتساعدك في إنك توصل لأفضل حل ممكن للمشكلة من حيث الأداء وسهولة قراءة الكود وسهولة استخدامه في أكتر من مكان في المشروع وهكذا...يعني الـ Problem Solving مش بس مسائل من الشيتات ومن LeetCode أو غيره من المواقع؟ الحقيقة لا، المسائل ما هي إلا جزء من الـ Problem Solving وتعتبر عامل مساعد في تنمية مهارة حل المشكلات عندك والتفكير المنطقي (Logic Thinking) ——— 📌 نيجي بقى لأنواع الـ Problem Solving والصراحة إنها كتيرة وملهاش أنواع محددة، باختصار أي مشكلة هتقابلك وأنت شغال في مجال البرمجة وحليتها فهي تعتبر Problem Solving وطبعًا ده بعد معرفتك باللغة أو إطار العمل اللي بتستخدمه، يعني مينفعش تبقى متعرفش إزاي تستخدم حاجة معينة في اللغة أوطريقة كتابتها وتروح تدور عليها وتكتبها وتقول دي Problem Solving - لو أنت فرونت إند وعندك Layout معين مطلوب منك تعمله زي التصميم وتخليه responsive ولكن هيكون له Layout مختلف شوية - لو أنت فرونت إند وبتشتغل على حاجة فيها داتا وتعامل مع باك اند ومطلوب منك تعمل عرض لداتا بطريقة معينة أو تعمل معادلة ما على القيم اللي راجعه من الباك إند وتحط شروط معينة وحوارات كتيرة..دي تعتبر مشاكل - لو أنت موبايل ديفلوبر وعندك تاسك تعمل integration مع بوابة دفع إلكترونية معينة - لو أنت باك إند ومحتاج تعمل عمليات حسابية زي إنك تشوف السعر الكلي للأوردر كام وهل فيه كوبون خصم مستخدم أو فيه sale على المنتج ولا لا وهكذا - وغيرها من المشاكل اللي ممكن تقابلك وأنت شغال في البرمجة بغض النظر عن تخصصك ——— 📌 هل الـProblem Solving أهم من التكنولوجي؟ تابع التعليقات...👇

Scrolling doesn’t need JavaScript anymore. ⚡️

دردشة عن مفهوم الـ ACID في الـ Database ⚡️

📌 LinkedIn: https://www.linkedin.com/posts/dev-alisamir_database-softwaredevelopment-acid-activity-7401279151065866241-pHFo

دردشة سريعة عن الـ Semantic Versioning 🔻 . . لو أنت شغال على مشروع، وفجأة قررت تعمل تحديث لمكتبة بتستخدمها...كل حاجة كانت شغالة تمام، لكن بمجرد ما عملت التحديث، المشروع كله ضرب وحلف ما يشتغل. علشان الموقف ده ميحصلش معاك لازم تكون فاهم الـ Semantic Versioning كويس، وهي دي اللي بتخلّيك تفهم التغييرات اللي حصلت في أي إصدار جديد قبل ما تعمل التحديث والدنيا تبوظ منك. تعال نفهم الموضوع ببساطة... ——— 📌 يعني إيه Semantic Versioning؟ الـ Semantic Versioning مش مجرد أرقام زي 1.2.3، لكنها طريقة منظمة لتسمية الإصدارات (versions) بتساعدك تعرف هل الإصدار الجديد آمن ولا لا، وهل التغييرات اللي حصلت بسيطة ولا جذرية. وكمان لو حبيت تغير إصدار المشروع نفسه تبقى فاهم هل التغيرات اللي عملتها تبع أي قسم في الـ Semantic Versioning وده شكل الـ Semantic Versioning: MAJOR.MINOR.PATCH ——— 📍 الـ MAJOR: يعني تغيير كبير بيكسر التوافق مع الإصدارات القديمة (breaking changes). 📍 الـ MINOR: يعني إضافة features جديدة بس بدون ما نكسر التوافق. 📍 الـ PATCH: يعني إصلاح bugs أو تحسينات صغيرة بدون أي تغيير في الـ features. ——— 📌 تعال نفهم كل جزء بالتفصيل: ✅ الـ PATCH: لو عندك إصدار 1.2.3 وطلع فيه bug صغير واتصلّح، الرقم هيبقى كده: 1.2.4 مثال: لو مكتبة بتحسب الضرائب وكانت بتغلط في الحسبة، التغيير هنا ما بيأثرش على حد بيستخدم المكتبة بشكل عام، ده يعتبر Patch. ——— ✅ الـ MINOR: لو أضفت feature جديدة بس من غير ما تغيّر حاجة في الـ features اللي كانت شغالة قبل كده، الرقم هيبقى: 1.3.0 مثال: لو المكتبة بتاعت الضرائب أضافت خاصية جديدة لحساب الضرائب الدولية، ده تغيير بيضيف ميزة جديدة بس مش هيكسر الكود. ——— ✅ الـ MAJOR: لو حصل تغيير كبير بيأثر على الناس اللي بيستخدموا المكتبة، الرقم هيبقى كده: 2.0.0 مثال: لو قررت تغيّر الـ API تمامًا وتطلب من الناس يكتبوا الكود بتاعهم بشكل مختلف عشان المكتبة تشتغل، ده يعتبر Breaking Change. ——— 📌 ليه نستخدم الـ Semantic Versioning؟ - توضيح التغييرات: لما تشوف الإصدار الجديد، تقدر بسهولة تعرف هل التغيير بسيط ولا كبير. - تسهيل التحديث: لو عرفت إن التحديث مجرد Patch أو Minor، هتكون مطمن إن مفيش حاجة هتتكسر لما تعمل update. - إدارة الشغل مع فريقك: لما تلتزم بـ Semantic Versioning، بيكون سهل على كل الفريق يتابع التغييرات اللي بتحصل. ——— 📌 نصائح وإرشادات مهمة: - التزم بالقواعد: متزودش رقم MAJOR عشان تضيف ميزة صغيرة! خلي الأرقام تعبر فعلًا عن التغييرات اللي بتحصل. - اختبر كويس: لو هتعمل تغيير MAJOR، لازم تتأكد إنك مجرب كل حاجة عشان الناس اللي هيستخدموا الكود مش يعانوا. - اكتب changelog: خلي فيه توثيق واضح عن إيه اللي اتغير في كل إصدار. ——— وفقكم الله لكل خير 🌿

كلام في البرمجة (47) | DevOps & Infrastructure | كيف تصبح ديف أوبس ناجح؟ - محمد موسى https://youtu.be/zPKyL8mnSkA