Bugun.uz — LIVE

Учтепа тумани ҳокими Фарҳод Абдуллаев лавозимидан озод этилди. Туман ҳокими вазифасини биринчи ўринбосар Жамшид Алимжонов вақтинча бажариб туради.

Шавкат Мирзиёев бугун, 11 июль Фарғона вилоятига ташриф буюради.

⚡️Сергели тумани, Қипчоқ кўчасида 9 июль куни соат 19:40 ларда содир бўлган даҳшатли автоҳалокат оқибатида Spark йўловчиси, 33 ёшли аёл ҳалок бўлган. Spark’нинг 40 ёшли аёл ҳайдовчиси аёл ҳамда Honda йўловчиси 22 ёшли аёл касалхонага ётқизилган.

Ургут туманидаги Сойғўс маҳалласида 3 та қўнғир айиқ тўрт бош эчкини еб қўйган. Ҳолат Самарқанд ва Қашқадарё вилоятлари чегарасида жойлашган Кункўрмас довонининг Қашқадарё ҳудудида содир бўлган. Чўпонлар ва айиқларга талафот етмаган. Икки кун олдин кечаси айиқлар шу Сойғўс маҳалласига 2-3 км яқинликдаги тоғ бағридаги мевали дарахтларни ейиш учун тушиб келган.

Қашқадарёнинг Кўкдала туманида катта сержант Элбек Примов 8 июль куни соат 19:00лар атрофида Lacetti’ни тўхтатиб текширганида, 58 ёшли ҳайдовчи маст экани аён бўлади. Ҳайдовчи машинадан тушиб қочишга уринади, инспектор билан олишади ҳамда ёнида бўлган ошхона пичоғи билан инспекторни қорнига бир неча марта уриб жароҳати етказиб, воқеа жойидан қочади. Катта сержант шифохонада, оғир жароҳатлар оқибатида кўп қон йўқотиб, вафот этган. Инспекторни ўлдиришда айбланаётган шахс Кўкдалада ҳибсга олинган.

❗️Энергетика вазирлиги яқин истиқболда истеъмолчиларга қўлланилаётган ойлик 200 KW·h’гача бўлган миқдори оширилишига асос йўқлигини маълум қилди. Қайд этилишича, Ўзбекистондаги 1 KW·h электр энергиясининг таннархи 895 сўмни (ҚҚС билан 1 002 сўмни) ташкил этмоқда. Аҳолига етказиб берилаётган ҳар бир KW·h учун 552,4 сўм, 201 KW·h’дан 1000 KW·h’гача эса 102,1 сўм давлат томонидан қоплаб берилмоқда.

Тошкентда 8 июль соат 11 атрофида 5 қаватли 1-сонли шаҳар клиник шифохонасининг биноси ўртасидаги асосий устун дарз кетган. Устунлардан бири эгилишда давом этмоқда, деб ёзмоқда Kun.uz. Одамлар эвакуация қилинган.

Бўстонлиқ тоғларида Қулосой шаршараси яқинига 8 июль куни сайрга борган уч кишидан бири эҳтиётсизлик оқибатида чап оёғидан жароҳат олиб, қутқарувчиларга хабар берган. Қутқарувчилари айтилган манзилга етиб бориб, жароҳат олган эркакка биринчи тиббий ёрдам кўрсатиб, уни хавфсиз ҳудудга олиб тушиб тез тиббий ёрдам ходимларига топширган. Эркакнинг умумий аҳволи яхши бўлганлиги сабаб, шифокорлар унга уйга кетишга рухсат берган. Фото: ФВВ

Тошкент шаҳар Учтепа туманида 8 июль куни 6 ёшли бола йўқолиб қолган. Ҳуқуқни муҳофаза қилувчи органлар ҳамда UzAlert кўнгиллилари болани тирик топиш умидида соатлаб пиёда юриб, уни қидиришган. Бугун, 9 июль куни, боланинг жасади отаси ишлайдиган цех ҳудудидаги сувли люкдан топилган.

Москва суди «Матч ТВ» телеканалининг журналистини зўрлаганликда айбланаётган уч нафар ўзбекистонликни ҳибсга олиш бўйича қарор чиқарди. Ўзбекистондан Москвага ишлашга борган 22, 24 ва 25 ёшли эркаклар «Матч ТВ» ходимини зўрлаганликда айбланмоқда. Улар 6 июль куни соат 02:30 да Останкино ҳовузи яқинида ишдан қайтаётган аёлга ҳужум қилиб, уни зўрлашган.