بَـابِـل 🌿"..

علاقات الأرتباط التي بيقوم مفهومها على السهر والحديث بالساعات وكلمات الغزل الرقيقة وأقولك صوتك حلو وحشتني عيونك وهكذا هي علاقات ناقصة وفى غالب الأحوال لا تستمر وإن استمرت فتواجدها بيكون بصورة إكلينيكية فقط بعد ما بتفقد كل مقومات الشغف . اما علاقات الأرتباط القوية هي اللي يمتلك المرءُ فيها كتف يميل عليه وقت ما تميل الدنيا عليه ويكون عند كل حد فينا شخص واحد قادر على الإختباء فيه من سخافات أفكاره وان ميحاربش الإنسان مننا لوحده وان مينتهيش يوم حد فينا منغير ما يلاقي حد يقوله : كم أن قسوة الحياة كانت لتقتله لولا وجوده ❤️.

بعد محادثة تجاوزت الخمس ساعات مع نفسي اكتشفنا أنا ونفسي بأننا نعاني من نفسي وهذا شئ يصعب شرحه .

- عمرو دياب 1990 : متخافيش لو مين ناداني مش هعيش من غير عينيكي . - عمرو دياب 2004 : هو اللي عيونه نادوني من العالم كله خادوني .

من شوية لقيت موبايلي مفيهوش مساحه وانا بصور قولت امسح من عليه اي حاجه لقيت إن كل الابلكيشنز مهمه وبستخدمها وانا من طبيعتي بنسي أمسح الصور فدخلت الجاليري وبدأت امسح الحاجات اللي ملهاش لازمه فضلت بحدد وامسح لحد ما الصور بدأت تقدم ورجعت سنه سنتين تلاته ونسيت اصلا انا كنت داخل اعمل إيه واتسحلت في الذكريات لقيت صور ليا مع ناس مبقوش في حياتي ومن المستحيل ان الصور اللي معاهم تتكرر تاني ولقيت اسكرينات قمة اللطف لشات بيني وبين ناس بقي في بينا بلوكات دلوقتي لقيت صور ليا وانا شكلي باهت وملامحي متغيره فيها وبجد لما افتكرت سبب زعلي ساعتها ضحكت شوفت صوره مع حد كنت بعتبره اقرب حد ليا وحاليا مبقيتش احب اسمع سيرته وشوفت صوري مع ناس تانيه سابوا حياتنا وسبقونا عند ربنا شوفت صور كتير خليتني اقول سبحان مغير الأحوال ومُبدل القلوب . مكنتش اعرف إني يوم لما أقرر افضي مساحة الموبايل هتتملي مساحة عقلي بالذكريات .

ما أردته لنفسي ليس الذي حدث لي بالفعل ولكنني غيرت خططي ألف مرة لأفرح وألف مرة لأتحمل وألف مرة لأعيش .

كنت بقول إني مش بحبّ الـ Physical touch بس افتكرت إن فيه ناس ممكن أحضنهم خمس مرات لو قعدت معاهم ساعة ، وكنت بقول إني بتضايق من الكلام الكتير لحد ما لقيتني ممكن أقعد ساعتين كاملين بسمع حد بيحكي في أي حاجة حتى لو مش هنوصل لفايدة ف تقريبًا إحنا مش بنحب أو بنكره أفعال لذاتها بقدر ما بنقيسها على أشخاص مختلفة واللي نحبّه نحبّ له كل حاجة ونحبّ منه أي حاجة ❤️.

عارف لما تبقى قاعد في أمان الله يروح أمير عيد يخبطك سؤال : أنا عُمري كام عشان تكونلي الذكري اسلوب حياه ؟ اللي هو لما في السن ده وبعاني من كل الذكريات ديه اومال لما اوصل خمسين سنه مثلا ؟

مؤخرا سعادتي مبقتش متعلقة بسبب لكن بقيت أخدها من حاجات قد تبدو بسيطة زي اني اعمل كوباية شاي بالنعناع وإني اقضي وقت مع نفسي او مع شخص بيحبني وبحبه ونفضفض باللي جوانا ونرغي في حاجات نفسنا نعملها أو اني ابص للسما و اشوف قد اي واسعة وملهاش نهاية وبيزينها القمر مع شوية نجوم بالليل ويا سلام علي حبة سحاب الصبح والبهجة اللي قادرين بكل بساطة يعملوها جوايا أو شوية وقت مع اهلي واحنا رايقين إبتسامة طفل ف المواصلات شوية ميوزك مع تمشية خفيفة أكلة مفضلة مع مسلسلي او الكارتون بتاعي . حقيقي اتعلمت اني اخلق لنفسي اوقات حلوة برغم اي صعوبة في الأيام واني استغل اي وقت ف اني اخد نصيبي من السعادة فيه حتي لو مش هتدوم المهم اتبسط لحظتها والأهم من كل دا احس بالامتنان لربنا علي كل النعم دي من اصغرها لاكبرها واحمده دايما عليها ❤️. - مريم البرنس .

كنت عايز اسأل هو انتوا لسه بتقدروا تحسوا المشاعر ؟ يعني بتتفاجئوا وكده ؟ او بتزعلوا بقي وتفرحوا يعني ؟ اصل انا حاسس انه عادي كل شي عادي حواليا وخايف اكون فقدت الشعور علي الاحساس بكل الاشياء من حولي .

بجد يا بخت أي حد عنده شخص بيعرف يكلمه ف أي وقت وهو متدايق أو مبسوط ويحكيله أي حاجة بتحصل معاه وهو ضامن إنه هيسمعه ومهتم إنه يشاركه اللي بيحصله ❤️.