Ҳийла-и фармойишлар ҳақида
Ҳукумат фармойиши билан "Шаҳидлар хотираси" ҳиёбонини таъмирлаш учун Mimar Group компанияси
танлаб олинган.
Биз кўникиб қолганимиздек, яна лойиҳа йўқ, қурилиш-таъмирлаш ишлари лойиҳа билан баравар олиб борилади. Лойиҳанинг қиймати ҳам йўқ, яъни бемалол ишлар ҳажмини каррасига шишириб ўзлаштириш мумкин. Яъни коррупцион схемаларни қўллаш учун барча қулай шароитлар бекаму-кўст яратиб қўйилган. Дарвоқе, Mimar Group компанияси таъмирдан кейин бузиб юборилган "Наврўз" қабуллар уйини бир неча ўн миллиард сўмга таъмирлаган пудратчи эмасмиди? Хафа бўлишмасин, дейишган бўлса керак-да.
Ҳозир гап бунда эмас.
Гап Ҳукумат қарори билан белгиланиши лозим бўлган вазифалар ва масалалар Фармойиш билан расмийлаштирилаётганида. Фармойишлар биз биламиз, ҳеч бир жойда расман эълон қилинмайди, эълон қилиниши талаб ҳам этилмайди. Яъни, халқ, жамоатчилик, рақобатчилар, танқидчилар кўзидан панада, кўрпа остида ими-жимида иш битириш мумкин. Бошқасча айтганда Фармойиши-ҳийла ёки Ҳийла-и-Фармойиш. Эътибор берсангизлар бундай йўл билан расмийлаштирилаётган ҳужжатлар янги даврда потирлаб кўпайиб бормоқда.
Энди савол:
Кам сонли Сайланган депутатларимиз, Адлия вазирлиги, Коррупцияга қарши кураш агентлиги аслида Ҳукумат Қарори шаклида қабул қилиниши ва эълон қилиниши лозим бўлган вазифа ва ижро масалаларини, Фармойиш ўлароқ ёпиқ ҳужжат билан расмийлаштирилишига қандай қарайдилар? Бу билан коррупцион восита ва амалларга йўл очиб олишмаяптими?
@the_bakiroo
P.S. Нега парламент ва Конституцион судга мурожаат этмайсан дейишингиз мумкин. Эркин сайловсиз шаклланган, мустақил бўлмаган, фалажлантирилган ва амалда институт ўлароқ формаллаштирилган, ижро ҳокимиятининг дастёрига дўнган муассасалар қандай жавоб беришини мен эмас, бутун ўзбекистонликлар жуда яхши билади.
Kanalga a'zo bóling: