Dr.Suzan El-Shaf3y...د.سوزان الشافعي

"*أكل مال النَّاس "* --------------- إيَّاكُم وأكل مال النَّاس.. *هو إزاي ممكن حد ياكل مال حد؟ -ممكن مثلاً أخ ياكل على إخواته الميراث.. عَم يحرم بنات أخوه الأيتام مِن ميراثهم.. اشتريت حاجات من السُّوبر ماركت وبعدين الكاشير بيحطلي الحاجات في الكيس فحط بالغلط حاجة زيادة وأنا روحت البيت واكتشفتها ومارجعتهاش للسُّوبر ماركت.. في واحدة مرة حكيتلي إن لمَّا والدها تُوفِّي، أخوها خلَّاها هي وأختها يمضوا على ورق تنازل عن ميراثهم وفهِّمهم إنُّه حاجة تانية وهما وثقوا فيه ومضوا من غير مايقرأوا بيمضوا على إيه.. واكتشفوا الكلام ده بعدها، وطالبوه بميراثهم ورفض يرجَّعوا لهم؛ وطبعاً بالورق اللي هما ماضيين عليه هو متأمِّن قانونًا.. الأخ ده بعد كام سنة جاله مرض نفسي وربَّى دقنه وقال أنا المهدي ودخل المستشفى.. هو ظلم أخواته وأكل فلوسهم.. والظُّلم عقوبته بتبقى في الدُّنيا والآخرة.. قال رسُول اللَّه -صلَّى اللَّه عليه وسلَّم- "كُلُّ الذُّنُوب يُؤَخِرُ اللَّهُ مِنْهَا مَا شَاءَ إلَى يَومِ القِيَّامَةِ إلَّا البَغيَ وعُقُوقَ الوَالدَينِ ، أَو قَطِيعَةَ الرَّحِمِ ، يُعَجِّلُ لصَاحِبِها فِي الدُّنيَا قَبلَ المَوتِ" (البَغْي= الظُّلم والتعَدِّي على حقوق الآخرين).. فأكل أموال النَّاس خطيرة.. ربنا يكفينا بحلاله عن حرامه ويغنينا بفضله عمن سواه.. #دكتورة_سوزان_علمتني

*"حاجات صغيرة"* ---------------- في عندنا شوية حاجات دَارجة في كلامنا عايزين نغيَّرها.. ١. لمَّا بتلاقي حد مش شاطر في حاجة أو في حاجة مش عارفها خالص، ده بنقول عليه إيه؟ بنقول مِيح أو مَاحي.. دي مِيح في الكيمياء، ده مَاحي في الشَّوارع.. مع إن كلمة مَاحي دي معناها إيه؟ المَاحي اسم من أسماء رسُول اللَّه -صلَّى اللَّه عليه وسلَّم- لإن اللَّه -عزَّ وجَلَّ- محَى به ظُلُمات الكفر. قال رسُول اللَّه -صلَّى اللَّه عليه وسلَّم: "لِي خَمْسَةُ أَسْمَاء: أَنَا مُحَمَّد، وَأَحْمَد، وَأَنَا المَاحِي الَّذِي يَمْحُو اللَّهُ بِي الكُفْرَ، وَأَنَا الحَاشِر الَّذِي يُحْشَرُ النَّاسُ عَلَى قَدَمِي، وَأَنَا العَاقِب" (رواه البخاري). ٢. الشِّبشِب اللي بصباع، مش في ناس بتقول عليه شبشب "زنُّوبة"؟!! طيب وزنُّوبة ده مش دلع زينب.. واسم زينب عندنا كمُسلمين اسم مهم وقدره عالٍ قد إيه!!! ٣. الشِّبشب اللي وشه عريض، في ناس بتقول عليه "خَدُّوجة"، اللي هو دلع خديجة، والاسم ده عزيز علينا قد إيه!! ينفع بقى نقول اسم زينب وخديجة على حاجات بنلبسها في رجلنا.. أرجوكم خلوا بالكم من الحاجات الصُّغيرة دي لإنُّه رغم إنَّها تبان صغيرة لكنَّها مقصودة.. مقصود إنَّها تفرقع وسط المسلمين، إهانة لناس مُعينة.. وإحنا كمسلمين لازم نصحصح كده ومانقبلش الكلام ده.. #دكتورة_سوزان_علمتني

فيه حاجات صغيرة بتتقال من غير قصد بس ييبقى ليها أغراض آخرى عشان تقدح في الإسلام

*"العريس شكله مُتدين"* --------------------- *لمَّا يجيلك عريس، تعرفي إزاي إنُّه مُتدين؟ -يبقى بيصلِّي.. *معلش -أنا آسفة- ده تفكير غبي.. -إزاي؟ *مش كتير تقابلي واحد بيصلِّي لكن بيشتم!! واحدة مُنتقبة بس بتكذب!! واحد بيقوم الليل بس غشَّاش!! الدِّين عبارة عن عبادات ومُعاملات.. عبادات زي الصَّلاة، والصِّيام، والزَّكاة… إلخ مُعاملات يعني أخلاقيات، يعني أمانة، يعني مش بيخلف الوعد، مش بيكذب، لمَّا بيدِّي ميعاد مش بيتأخَّر عنه…إلخ في ناس مواعيدها مظبوطة ومابتكذبش بس مش بتصلِّي.. وفي ناس بتصلِّي الخمس فرائض في المسجد وبتغش وتكذب.. العملية مش باللبس والهيئة واحنا للأسف بنقيِّم بس باللبس والذَّقن والحجاب والنِّقاب.. فلانة أحسن عشان لابسة نقاب مش حجاب عادي.. فلان أحسن علشان مربِّي ذقنه وفلان لأ.. فلانة أحسن علشان لابسة الإيشارب كويس ومش رابطاه سپانش.. قال رسُول اللَّه -صلَّى اللَّه عليه وسلَّم- : -"إنَّمَا بُعِثْتُ لأُتمِّمَ مَكَارِمَ الأَخْلَاق." ماقلش -صلَّى اللَّه عليه وسلَّم- لأُقيم الصَّلاة ولا قال لأفرض الحجاب، لأ قال -صلَّى اللَّه عليه وسلَّم- :- "لأُتَمِّمَ مَكَارِمَ الأَخْلَاق".. وبالتَّالي في حياتك بصفة عامة، إزاي تُحكمي على شخص عنده دين ولَّا لأ؟ مش بشكله ولا بلبسه… "بأخلاقه".. "إنَّ اللَّهَ لَا يَنْظُرُ إلَي صُوَرِكُم وَلَا أَجْسَادِكُم وَلَكِن يَنْظُرُ إلَى قُلُوبِكُم" طيب وأنا إزاي أشوف قلب اللي أُدَّامي؟ بُصِّي على أخلاقه.. بتعاملي جوزك إزاي؟ اللي بيغلط فيكِ بتعامليه إزاي؟ مع اللي إداكِّ ثقة واستأمنك، عملتِ إيه؟ العريس اللي متقدم ده، لمَّا بيدِّيكِ ميعاد بييجي فيه ولَّا لأ؟ بيتكلم عن مامته إزاي؟ بيكذب ولَّا لأ؟ بيشتم؟ بيقعد أُدَّام باباكِ حاطط رِجل على رِجل؟! طيب إنتِ شايفها بتتعامل مع أهلها إزاي؟ بتقعد إزاي؟ بتضحك إزاي؟ علشان ماتجوش تعيطوا بعد كده؛ وتقولي أصْلِي أخدت المُتدين ولا أخدت المتدينة!! كلنا عارفين دلوقتي إن الأزمة أزمة أخلاق.. وعلشان يبقى الكلام واضح.. أنا مش بقول الصَّلاة مش مهمة ولا الصِّيام مش مهم ولا النِّقاب مش لازم.. أنا ماقلتش كده.. ربنا بيقول: - "إنَّ الصَّلَاةَ تَنْهِي عَنِ الفَحْشَاءِ والمُنْكَر" فإذا الصَّلاة ماظبطتش أخلاقك يبقى في حاجة غلط.. يبقى صلاتك مش خالصة لوجه اللَّه.. يبقى مش بتخشعي في الصَّلاة.. يبقى في حاجة غلط في صلاتك.. فالرِّياء والخشوع والكلام ده ماتقدريش تعرفيه في اللي أُدَّامك.. لكن تقدري تعرفي انعكاس صلاته وعلاقته بربنا على أخلاقه ومُعاملاته.. وساعتها تقدري تعرفي ده مُتديِّن فعلاً ولَّا لأ.. #دكتورة_سوزان_علمتني