🌹✨Muhammad Sollallohu alayhi va sallam Ummatlari🤗🤗

Жаноби Ҳақ жалла шаънуҳу Пайғамбарига "Ҳабибим" дея хитоб этганига қараганда, Ислом ишқ ва муҳаббат динидир. Муҳйиддин ибн Арабий қуддиса сирруҳу

ҲАРОМ ЛУҚМА ЕГАН КИШИНИНГ НАМОЗИ ҚАБУЛ ЭМАСМИ? #ҳалол ва ҳаром ❓ CАВОЛ: Ҳаром луқма еганини билган одам қирқ кун намози қабул бўлмайдими? Aгар шундай бўлса қирқ кунлик намозини қайта ўқийдими? 💬 ЖАВОБ: Бисмиллаҳир Роҳманир Роҳим. Ҳаром луқма сабаб намоз қабул бўлмаслиги борасида баъзи ҳадислар келган. Жумладан: "من أكل لقمة من حرام لم تقبل منه صلاة أربعين ليلة" (رواه الامام الديلمي). яъни: “Ким ҳаром луқма еса, қирқ кун намози қабул қилинмайди” (Имом Дайламий ривояти). "من شرب الخمر لم يقبل له أو لم يتقبل الله له صلاة أربعين صباحا" (رواه الامام الطبراني) яъни: “Кимки ароқ ичса, унга қирқ кун эрталаб намози қабул қилинмайди” (Имом Табароний ривоятлари). Имом Нававий раҳимаҳуллоҳ ушбу ривоятларни изоҳлаб: “Бу ҳадисларда зикр қилинган намоз қабул қилинмаслигидан унинг савоби қабул бўлмаслиги тушунилади. Лекин банданинг зиммасидаги фарз соқит бўлади”, деганлар (“Шарҳи саҳиҳи Муслим” китоби). Шундай экан, аввало Аллоҳ ҳаром қилган таом ёки ичимлик истеъмол қилишдан сақланиш ва юқорида зикр қилинган Пайғамбаримизнинг ҳадисларни доим ёдда сақлаш лозим. Зеро, мўмин-мусулмон учун битта намозининг ажридан маҳрум бўлиши улкан мусибатдир. Мабодо, бандалик қилиб, бир марта ароқ ичган ёки ҳаром луқма еган киши қирқ кун намозим қабул бўлмас экан, деб намозини ўқимасдан юрмайди. Балки, ҳар бир намозни ўз вақтида ўқиши фарздир. Ушбу ўқиган намозлари зиммасидан соқит бўлади ва қайта ўқиши шарт бўлмайди. Аллоҳ янада билувчидир. Ўзбекистон мусулмонлари идораси фатво ҳайъати

🪴Энг оғир жазо Ҳар бир жиноятнинг жазоси бор. “Шунча одам гуноҳ қиляпти-ю, лекин жазо олмаяпти-ку?” дейишга шошилманг. Жазо деганда ҳар бир гуноҳкорнинг бошига самодан тушадиган бир чақмоқ ё шунга ўхшаш бало назарда тутилмаган. Ҳамма жазо ҳам Фиръавнники сингари денгизда чўкиш, Қорунники сингари ер ютиш бўлавермайди. Фиръавн ва Қорунга берилган жазолар Жабборнинг интиқомидир. Булардан ҳам баттар жазолар бор. Шулардан бири Аллоҳ бандасининг гуноҳи туфайли унинг қалбини Ўзидан тескари қилиб қўйишидир. Бунда банда тирик бўлса-да, қалби ўлади. Олдидан жаноза кўтариб ўтилса-да, титрамайди, тафаккур қилмайди. Қуръон оятларини эшитса-да, таъсирланмайди. Йиллар ўтади-ю, аммо ибодат қилмайди. Азонни эшитади, лекин масжидга бормайди. Рамазонлар келиб-кетади, аммо уни ғанимат билмайди. Истиғфор айтиб, кўздан надомат ёшлари оқмаслиги, қўллар дуога кўтарилмаслиги, тиллар тасбеҳ, зикр айтмаслиги – булардан ортиқроқ жазо борми?! Раббимизнинг эшиги бизга ёпилиб қолиши энг қаттиқ жазодир, аслида! Аллоҳ асрасин! ©Rumiy

«ҲEЧ КИМ АСЛ ҲОЛЛАРИДА КЎРМАДИ...» Нақл қилинадики: «Юсуф алайҳиссаломни Яъқуб алайҳиссалом ва Зулайходан бошқа ҳеч ким ўз асл сифатлари ва ҳуснларида кўрмаган эди. Яъқуб алайҳиссалом кўздан қолдилар, Зулайхо эса моли, жамоли ва ҳолидан айрилди. Жаноб Мустафо соллаллоҳу алайҳи ва салламни Абу Бакр Сиддиқ (розияллоҳу анҳу) ҳазратларидан бошқа ҳеч ким (ўз асл ҳолларида) кўрмади. Мусо алайҳиссаломни (денгиз бўйида хизматда бўлган йигит – бўлажак пайғамбар) Юшаъ ибн Нун алайҳиссаломдан бошқа ҳеч ким (асл ҳолларида) кўрмади. Ийсо алайҳиссаломни Шамъундан бошқа ҳеч ким (асл ҳолларида) кўрмади». "Баҳрул-маҳабба" асаридан.