E3dady Channel

*الميكانيكا* - مادة من المواد الممتدة - الترم الاول استاتيكا والترم التاني ديناميكا وبتمتحن على كله اخر السنة في ورقة واحدة - مادة لذيذة وصعبة لو اهملتها لاخر السنة *الدرجات* - الميكانيكا 150 درجة - 100 درجة فاينل - 50 درجة اعمال سنة - اعمال السنة بتكون على امتحانات الميد تيرم غالبا بيبقوا اتنين ويمكن الدكتور يطلب منكم شيتات - غالبا مفيش درجات غياب بس مهم جدا تحضر - وغالبا مفيش سكاشن ميكانيكا وبتكون مع المحاضرة *دكتور المادة* - دكتور حمدي احمد (من افضل الدكاترة الي هتقابلهم في الكلية سواء كشرح او كتعامل) *المذاكرة والملاحظات* - المنهج كله بالانجليزي - طبعا في الاول هتواجه صعوبة في فهم الكلمات والمصطلحات الجديدة فأي كلمة متعرفهاش تدور على معناها وتكتبه في ورق او كشكول عشان تبقى معاك على طول لو قابلتك تاني وهتحفظها مع الوقت من التكرار فمتقلقش - ممكن تستخدم تطبيق يو دكشنري او https://www.almaany.com/ar/dict/ar-en/ الموقع ده حلو جدا عشان بيجيب للكلمة اكتر من معنى حسب معنى المصطلح في التخصصات المختلفة - دكتور حمدي شرحه كويس جدا جدا (من وجهة نظري افضل دكتور في شرح المادة) وبيحل جزء كبير من الشيتات وبيحل اسئلة بيجيب نفس افكارها في امتحانات وخصوصا الميد حاول تستفيد من محاضرة دكتور حمدي على قد ما تقدر هتفرق معاك جدا - مهم تحضر المحضرات وتركز مع الدكتور اوي في كل حاجة بيقولها وتصور المحضرات - اول ما تروح تذاكر وتبيض صور المحاضرة وتحل الاسئلة من غير ما تبص على حل الدكتور - لو عاوز تراجع او ناسي فقدامك دكتور احمد زكي الافضل على اليوتيوب - الدكتور بيديكم شيتات على المنهج وسواء طلبها منكم او لا لازم تحلها ومهم جدا تحلها عشان تعرف تحل في الامتحانات وهتلاقي ملازم حل الشيتات ل م.عبدالمعز مهمة جدا - لازم تحل كتير بإيدك وخصوصا قبل الميد او الفاينل - ذاكر المنهج اول بأول عشان صعب تلمه لو راكمته لاخر السنة *اجازة نص السنة* - للاسف اجازة نص السنة بتاعتك هتذاكر فيها برضو عشان المواد الممتدة - مهم اوي تلم الجزء الي خدته الترم الاول في الميكانيكا في الاجازة وخصوصا لو اهملتها اول ترم وتحل الشيتات لو مكنتش حليتها ولو كنت حليتها قبل كده تراجعها هيفرق معاك جدا وخصوصا لو الدكتور حدد معاد اول ميد بعد الاجازة على طول - الشيتات الي على الجزء بتاع الترم التاني تحاول تحلها أول بأول برضو مع مذاكرة المحضرات وتبيضها ومتراكمهمش *الميدتيرم* - بيكون في امتحانين ميدتيرم واحد على الاستاتيكا  وواحد على الديناميكا ممكن يبقى ميد الترم الاول وميد الترم التاني او الاتنين الترم التاني - اهم حاجة تذاكر المحضرات كويس او ملازم شرح د.حمدي - وبعدين تحل الشيتات وهتلاقي ملازم حل للشيتات ل م.عبدالمعز - لو خلصت تحل امتحانات وهتلاقي ملازم حل امتحانات ل م.عبدالمعز - لو خلصت ممكن تبص على الكتاب او السولفيد لو في افكار جديدة عليك - لازم تخلي بالك إن امتحان الميد معتمد على الوقت فلازم تتعود على الحل من قبليه عشان تبقى سريع *الفاينل* - نفس الكلام تذاكر ملازم شرح د.حمدي او المحضرات - بعدين الشيتات حتى لو حاللها قبل كده راجعها تاني - بعدين لو خلصت تشوف الامتحانات - بعدين لو خلصت تشوف السولفيد والكتاب - ولازم تبقى مركز كويس اوي في الامتحان عشان بتبقى فيه حجات بتلغبط وراجع اكتر من مرة الخطوات والنواتج لما تخلص - يستحسن يوم الامتحان سواء ميد او فاينل تصحى بدري تراجع القوانين كلها والحجات الي بتلغبطك #بوستات_تعريف_لاعدادي #المواد

*مواقع وقنوات وجروبات مهمة* - قناة اعدادي تليجرام https://t.me/e3dady21 - جروب اعدادي تليجرام https://t.me/+CT6rz1ptjboyM2U0 - جروب اعدادي فيس https://www.facebook.com/groups/e3dady/?ref=share - موقع الكلية https://eng-azhar.net/ - منصة الحرم الجامعي https://azulearn-sys.alazhar.edu.eg/paymentaaib/epay3/index.php - منصة الكلية التعليمية (لما تحتاجوها الكلية هتعملكم ايميلات فيها اما دلوقتي مش هتعرفوا تخشوا عليها) https://lms.azhareng.com/ #بوستات_تعريف_لاعدادي

*مواقع وقنوات وجروبات مهمة* - قناة اعدادي تليجرام https://t.me/e3dady21 - جروب اعدادي تليجرام https://t.me/+CT6rz1ptjboyM2U0 - جروب اعدادي فيس https://www.facebook.com/groups/e3dady/?ref=share - موقع الكلية https://eng-azhar.net/ - منصة الحرم الجامعي https://azulearn-sys.alazhar.edu.eg/paymentaaib/epay3/index.php - منصة الكلية التعليمية (لما تحتاجوها الكلية هتعملكم ايميلات فيها اما دلوقتي مش هتعرفوا تخشوا عليها) https://lms.azhareng.com/ #بوستات_تعريف_لاعدادي

*فيزياء 1* - مادة من مواد الترم الاول - مادة الفيزيا مادة الاغلب بينجح فيها والدكتور بيساعدك تنجح فيها بس الصعب فيها التقدير بس عدد مش قليل بيجيب ج.ج و م فمتقلقش وذاكر بس - الفيزياء فيها عملي *الدرجات* - فيزياء 1 100 درجة - 60 فاينل - 40 اعمال السنة - اعمال السنة بتتقسم - 20 على الشيتات وبحث الدكتور بيطلبوا منكم تعملوه وتسلموه - 20 على الفزياء العملي - مفيش سكاشن فيزياء في عملي بس - مفيش درجات غياب للمحضرات غالبا *دكتور المادة* - دكتور محمود فرج *المذاكرة والملاحظات* - المنهج عبارة عن (الوحدات والابعاد-المرونة-الموائع المتحركة-الموائع الساكنة-الاهتزازات والموجات-الحرارة والانتقال الحراري) - المنهج كله بالعربي - محاضرة الفيزيا قد تكون طويلة ومملة والشرح مش احسن حاجة بس احضرها عشان تكتب ورا الدكتور لانه بيجيب اسئلة من المحاضرة بتاعته مش في الكتاب ممكن تتفق انت وصحابك كل مرة واحد فيكم يروح ويقعد قدام الدكتور على طول ويكتب كل الكلام الي بيقوله بس الاضمن ليك تروح انت وتكتب - مهم جدا تهتم بحضور العملي وامتحان العملي وتحل الشيتات والبحث عشان درجتهم شبه مضمونة إن شاء الله فمتضيعهاش - حتى لو حضرت المحاضرة ممكن متفهمش فعليك باليوتيوب والافضل في الشرح على اليوتيوب دكتور محمد اسماعيل ودكتور ياسر البطاوي - الامتحان اغلبه معتمد على الفهم حتى الحجات النظري بتيجي معتمدة على الفهم يمكن بس يجيب سؤال او اتنين حفظ زي سؤال تعريف - نظام الامتحان الدكتور بيقوله بالتفصيل فمتقلقش وسعات بيغيره بس بناء على اخر كام سنة الترم الاول غالبا بيكون mcq والترم التاني غالبا بيكون اسئلة ومكان للاجابة النهائية بس وحوالي سؤالين تعريفات - افضل مصدر للمذاكرة محاضرات اليوتيوب وإن كانت الفيديوهات شرح للفيزيا بالانجليزي واحنا منهجنا عربي بس الشرح واحد وهتفهم - بعدها الكتاب والمحضرات - وانت بتذاكر في الكتاب يستحسن يبقى معاك ورق او كشكول تلخص فيه كل القوانين عشان هتفيدك جدا - بينطلب منك شيتات بتسلمهم يوم امتحان العملي اخر الترم اهتم بيهم وحلهم بعد ما تذاكر عشان مهمين جدا *الفاينل* - اول حاجة لازم تكون فاهم بإنك تكون بتحضر المحضرات او بتشوف يوتيوب - لو خلاص فاهم ذاكر من الكتاب وشوف المحضرات والحجات الي الدكتور بيزودها وذاكر البحث الي الدكتور اخر السنة هيبعتوا وحل الاسئلة الي فيه عشان عليه اسئلة في الفاينل كمان - بعدين تحل كتاب السولفيد بيكون فيه مسائل الشيتات ومسائل زيادة وبيجي منه في الامتحان فمهم تحله - يوم الامتحان تصحى بدري تراجع القوانين الي لخصتها *العملي* - مهم جدا الحضور وتجرب بإيدك - في كتاب بيبقى مطلوب تشتروه ومينفعش تخشوا من غيره وبيكون فيه شرح التجارب وبتحط فيه النتايج وانت بتجرب - بيبقى فيه امتحان عملي قبل الامتحانات باسبوع نظام الامتحان بيبقى نظري وعملي فلازم تفهم وتحفظ النظري بتاع كل تجربة #بوستات_تعريف_لاعدادي #المواد

مواقيت المحاضرات مدة المحاضرة بتكون ساعه ونص بين كل محاضرة والتانية ربع ساعه بريك

جدول بنات

جدول بنين

*رياضيات 1* - مادة من مواد الترم الاول *الدرجات* - رياضيات 1 100 درجة - 70 فاينل - 30 اعمال سنة - اعمال السنة بتتوزع على الميدتيرم والكويزات والشيتات الي بتطلب منكم كل سيكشن وحضور السكاشن وسعات المحضرات *دكاترة المادة* - دكتور محمد مهنا (عميد الكلية) - دكتور احمد عطية - دكتور محمد زكريا بقى معاهم السنة اللى فاتت - دكتور بيدي نص الدفعة ودكتور بيدي النص التاني *المذاكرة والملاحظات* - المنهج عبارة عن (الدوال ورسم الدوال-الكسور الجزئية-النهايات-التفاضل-تطبيقات التفاضل) - المنهج كله بالانجليزي بس يعني كام كلمة بس جداد هتحفظهم مع الوقت والتكرار يمكن درس التطبيقات الي تحتاج تحفظ في شوية كلمات بس إن شاء الله سهلين - مهم تحضر المحضرات والسكاشن وتكتب كل حاجة ورا الدكتور والمعيد او تصور السبورة (ماعدا دكتور مهنا ممنوع تصور) ولما تروح تذاكر وتبيض المحاضرة او السيكشن (يعني تكون كاتب في اي كشكول او ورق او مصور ولما تروح تكتبه تاني في كشكول بطريقة كويسة ومنظمة وتذاكره والاسئلة الي الدكتور او المعيد حلها تكتب رأس السؤال وتحله انت من غير ما تبص لحل الدكتور بعدين تتأكد من حل الدكتور) - دا هيخليك فاهم المنهج بنسبة كويسة طول الترم وناقص بس الحل - المحاضرة هي الشرح والي بيدي المحاضرة الدكتور اما السيكشن هو تطبيق على المحاضرة وحل والي بيدي السيكشن المعيد - بيبقى في كويز وشيت كل سكشن سلم الشيتات كلها ومتفوتش حاجة منها وسلم برضو الكويز حتى لو مش حالل فيه - راجع المحاضرة والسيكشن قبل الكويز وحل في الكويزات على قد ما تقدر وركز فيها عشان الباشمهندسين بيجيبوا اسئلة محتاجة تفكير شوية - لو مش فاهم حاجة معينة او نسيت وعاوز تفتكر يبقى ساعتها شوف المحاضرات يوتيوب والافضل في الشرح على اليوتيوب د.عماد عبدالحفيظ و م.محمود البيلي - الدكتور بيديكم شيتات بيكون فيها اسئلة كتير على الشابتر ومبيطلبهاش منكم حاول تحلها مع نفسك - بيبقى في ملازم شرح حجات مهمة دكتور مهنا بيديهالكم بتكون مهمة جدا جدا لازم تذاكروهم *الميد تيرم* - قبل الميد تيرم حاول تبدأ تلم الرياضة قبلها باسبوع مثلا - وهيكون اهم حاجة بالنسبالك ملازم م.فايز تذاكرها كويس جدا هي والاسئلة الي فيها وبرضو لو في ملازم لدكتور مهنا ذاكرها بعد ملازم م.فايز - اول ما تخلصها تشوف امتحانات الميدتيرم القديمة وهتلاقي ملزمة ل م.فايز محلول فيها الامتحانات القديمة - ولو خلصتها ولسه في وقت ممكن تراجع الشيتات او لو مكنتش حليتها قبل كده تحلها - اعمل كل الي عليك قبل الميد ولو قدر الله ومتوفقتش في الميد متتحبطش وتزعل معاك الفاينل اهم وعليه درجات اكتر فتعمل اقصى ما عندك عشان تعوض في الفاينل *الفاينل* - نفس الكلام قبل الفاينل بأسبوعين تلم الرياضة كلها - وبرضو اهم حاجة ملازم م.فايز وملازم دكتور مهنا - لو خلصتها تشوف امتحانات الفاينل القديمة وهتلاقي ملزمة ل م.فايز محلول فيها الامتحانات القديمة - لو خلصتها برضو تراجع الشيتات او تحلها لو محلتهاش قبل كده - يوم الامتحان سواء ميد او فاينل تصحى بدري شوية وتراجع القوانين والحجات الي بتنساها - لازم تحل كتير وخصوصا قبل الامتحان سواء ميد او فاينل - ذاكر المنهج اول بأول عشان صعب تلمه لو راكمته #بوستات_تعريف_لاعدادي #المواد

*الفقه* - مادة من مواد الترم الاول - الفقه مادة سهل تجيب فيها مجموع عالي بإذن الله لو ذاكرتها كويس *الدرجات* - الفقه 100 درجه كلهم في الفاينل *دكتور المادة* - السنة الي فاتت كان دكتور محمود سعد *المذاكرة وملاحظات* - المحاضرة مش مهمة اوي كشرح المهم فيها بس إن الدكتور بيقول على الحجات المهمة الي تركزوا عليها والحجات الي مش مهمة وبرضو إن الدكتور بيقول سعات تعليمات للامتحان - الدكتور بيحدد المنهج الي هتمتحنوا فيه اخر محاضرة خالص فلازم تحضرها - يفضل تذاكر من الكتاب مش من ملخصات  وخصوصا لو الامتحان mcq وممكن تبص بعد ما تذاكر على الملخصات والاسئلة لو في وقت وممكن تعمل انت ملخص لنفسك لو ذاكرت بدري ومزنقتش نفسك - بالنسبة للمذاكرة فمثلا بعد ما الدكتور يشرح حاجة تروح تحفظها او تقرأها على الاقل ومتضيعش وقت كبير في الفقه وقبل الامتحانات بفترة حاول تلمه كله وليلة الامتحان برضو تلمه تاني ويوم الامتحان اصحى بدري قبل الامتحان ب ٦ سعات على الاقل راجع المنهج كله تاني - ممكن تلم المنهج ليلة الامتحان بس منصحكش خالص عشان المنهج بيكون طويل وهيتعبك في الحفظ وعشان لو حصل ظروف وقتها - الحجات دي مش لازم تمشي عليها لو كنت بتذاكر المواد الشرعية في ثانوي واعدادي بطريقة معينة وماشية معاك كويس ذاكر بنفس الطريقة الي كنت بتذاكر بيها وسيبك من الكلام ده #بوستات_تعريف_لاعدادي #المواد

*الانجليزي* - مادة من مواد الترم الاول - الانجليزي مادة سهلة إن شاء الله ومادة امتياز ترفع بيها مجموعك *الدرجات* - الانجليزي 50 درجة - 35 فاينل - 15 اعمال سنة - اعمال السنة بتتوزع على الشيتات الي الدكتور بيطلبها منكم وعلى حضور المحاضرات *دكتور المادة * - غالبا هيكون دكتور محمود وممكن دكتور تاني والدكتور غالبا بيبدأ متأخر *المذاكرة وملاحظات* - يستحسن تحضر المحاضرات حتى لو مش هتستفيد اي حاجة خالص من الشرح عشان تاخد الغياب وتسلم الشيتات وكمان عشان الدكتور بيقولكم المقرر من المنهج في المحاضرات وكده كده بتبقى محاضرة صغيرة - الدكتور هيعمل لكم جروب تليجرام بينزل عليه الحجات المهمة والاسئلة المهمة ونظام الامتحان وحل الشيتات بعد ما تسلموهم وحل تدريبات الكتاب - احسن طريقة مذاكرة تذاكروا الدروس من الكتاب او ملزمة الدكتور واخر الكتاب فيه القطع مترجمين او لو معاكم ملزمة الدكتور هتلاقوهم مترجمين برضو وحلوا الاختر والترجمة الي بعد كل درس والجرامر ذاكروه من الكتاب او ملزمة الدكتور - المنهج بيكون اسلاميك ولو فيه اي حاجة مختلفة او اختلاف في المنهج متقلقوش الدكتور بيوضح كل حاجة والامتحان بيكون سهل جدا إن شاء الله - المنهج ممكن تلمه ليلة الامتحان بس يفضل تذاكره بدري عشان تبقى عارف هتذاكره ازاي ومتتفاجئش #بوستات_تعريف_لاعدادي #المواد

==> داتا اعدادي 2023 ==> 21 جيجا ==> المواد https://drive.google.com/drive/folders/1gHPRJ4dpZZeokZw1gP340mjITFdsJ_ck?usp=s ==> الميكانيكا https://drive.google.com/drive/folders/11iwZOdPmgvUfwQi9SP2A7cu1KnSJRIx4?usp=sharing

*الامتحانات طول السنة* *الرياضيات* - امتحان ميدتيرم كل ترم (ساعة او ساعة ونص) - امتحان فاينل كل ترم (٣ ساعات) - كويز صغير كل محاضرة *الفيزياء* - امتحان عملي كل ترم (ساعة) - امتحان فاينل كل ترم (٣ ساعات) *الانجليزي* - امتحان فاينل الترم الاول (ساعتين) *الفقه* - امتحان فاينل الترم الاول (٣ ساعات) *الميكانيكا* - امتحان ميد تيرم استاتيكا (ساعة او اقل من ساعة) - امتحان ميد تيرم ديناميكا (ساعة او اقل من ساعة) - امتحان فاينل الترم التاني (٣ ساعات) *الرسم الهندسي* - امتحان ميدتيرم الترم التاني (ساعة ونص او ساعتين) - امتحان فاينل الترم التاني (اربع ساعات) *مقدمة الحاسب* - امتحان عملي الترم التاني (نص ساعة او اقل) - امتحان فاينل الترم التاني (٣ ساعات ) - ممكن يبقى في كويزات في العملي سعات *هندسة الانتاج* - امتحان ورشة الترم التاني - امتحان فاينل الترم التاني (٣ ساعات) - ممكن يبقى في ميد تيرم *الهندسة الوصفية ومنظور * هنبقى نتكلم عنهم بالتفصيل إن شاء الله *الكيمياء* - امتحان عملي الترم التاني (ساعة) -امتحان فاينل الترم التاني (٣ ساعات ) - ممكن يبقى في كويزات في العملي سعات او ميدتيرم *العقيدة والاخلاق* - امتحان فاينل الترم التاني (ساعتين) *تطور التكنولوجيا* - امتحان فاينل الترم التاني (٣ ساعات) *قرآن* -امتحان تحريري الترم التاني (ساعتين) -امتحان شفوي الترم التاني #بوستات_تعريف_لاعدادي

*اختيار القسم* - عشان تختار القسم الي انت عاوزه حاجة من اتنين : - إما إنك داخل حاطط قسم معين هدف ليك او لسه محددتش القسم الي انت عاوزه - لو انت محدد قسم من الاول فكويس وخد فكرة برضو عن باقي الاقسام يمكن يعجبك حاجة تانية فيهم - لو انت لسه محتار او مش محدد اصلا فشوف ميولك طول السنة لقسم ايه ومتستعجلش - في بعض المواد لو بتحبها ممكن تحب قسم معين - يعني لو حبيت الرياضة والفيزيا الكهربية فممكن تحب كهربا ونظم - لو حبيت الرسم الهندسي والانتاج والفيزيا الحرارية وفيزيا الموائع فممكن تحب ميكانيكا - لو حبيت الميكانيكا وبتحب الرسم فممكن تحب مدني - لو بتحب الرسم عموما فممكن تحب عمارة وتخطيط - لو بتحب الكيمياء فممكن تحب بترول - طبعا الكلام ده مش شرط والمفروض تسأل وتدور عن الاقسام كلها كويس على مدار السنة والجامعة إن شاء الله هتعمل محضرات تعريف لكل الاقسام ومجالات شغلها ودراستها فاحضرها عشان مهمة وممكن تفيدك في اختيار القسم - دا تعريف بسيط جدا لاقسام الكلية من الدكاترة https://youtube.com/playlist?list=PLAVkguADveCZYBSVhX0m7CablP4hk_f46 #بوستات_تعريف_لاعدادي

*الاقسام* اقسام هندسة الازهر بنين : ١- قسم كهربا - اول سنة تخصص عام بعدها بتتخصص في شعبة من اتنين : أ- قسم كهرباء القوى والالات ب- قسم كهرباء اتصالات ٢-قسم نظم وحاسبات (مفيهوش شعب) ٣- قسم ميكانيكا - اول سنتين تخصص عام بعدها بتتخصص في شعبة من اتنين : أ- قسم ميكانيكا انتاج ب- قسم ميكانيكا قوى ٤- قسم بترول وتعدين - اول سنة تخصص عام بعدها بتتخصص في شعبة من اتنين : أ- بترول ب- تعدين وفلزات ٥- قسم مدني - اول سنتين تخصص عام بعدها بتتخصص في شعبة من تلاتة : أ- اشغال عامة ب- إنشائات ج- ري ٦- قسم عمارة ( مفيهوش شعب) ٧- قسم تخطيط عمراني (مفيهوش شعب) #بوستات_تعريف_لاعدادي

*التقديرات* - كل مادة ليها تقدير حسب درجة المادة وفي الاخر بيبقى في تقدير عام حسب مجموعك الكلي تقديرات المواد او التقدير العام : - الامتياز (م) ٨٥-١٠٠٪ - جيد جدا (ج ج) ٧٥-٨٥٪ - جيد (ج) ٦٥-٧٥٪ - مقبول (ل) ٤٨-٦٥٪ - ضعيف (ض) ٣٠-٤٨٪ - ضعيف جدا (ض ج) ٠-٣٠٪ - ض او ض ج يعني راسب (لو في التقدير العام) او شايل مادة (لو في تقدير مادة) ولو عليهم شرطة يبقى راسب في اعمال السنة كمان - النجاح في مادة من ٤٨٪ من درجات المادة او اعلى (مقبول او اعلى) - بتعدي للسنة الي بعد كده لو نجحت صافي او شلت مادة او مادتين بس غير كده بتعيد السنة فلازم تشد حيلك عشان مفيش دور تاني ولا تأجيل زي ثانوي - الانجليزي والفقه بس الي تقديراتهم بتطلع بعد امتحان الترم الاول اما باقي المواد والمجموع الكلي بعد امتحانات الترم التاني #بوستات_تعريف_لاعدادي

*المجوع ودرجات المواد* - المجموع الكلي ١٧٠٠ درجة - الرياضيات ٢٠٠ درجة (١٠٠ درجة كل ترم) ٣٠ درجة اعمال سنة كل ترم ٧٠ درجة امتحان كل ترم - الفيزياء ٢٠٠ درجة (١٠٠ درجة كل ترم) ٤٠ درجة اعمال سنة كل ترم ٦٠ درجة امتحان كل ترم - الفقه ١٠٠ درجة (كلهم لامتحان الترم الاول ومفيش اعمال سنة) - الانجليزي ٥٠ درجة  ١٥ درجة اعمال سنة ٣٥ درجة امتحان الترم الاول - الميكانيكا ١٥٠ درجة ٥٠ درجة اعمال سنة ١٠٠ درجة امتحان اخر السنة - الوصفية بجانب المنظور ٢٠٠ درجة ١٢٠ للوصفية + ٨٠ للمنظور - الرسم الهندسي ٢٠٠ درجة ٨٠ درجة اعمال سنة ١٢٠ درجة امتحان اخر السنة - هندسة الانتاج ١٠٠ درجة ٥٠ درجة اعمال سنة (الورش) ٥٠ درجة امتحان اخر السنة - مقدمة الحاسب ١٠٠ درجة ٣٠ درجة اعمال سنة ٧٠ درجة امتحان اخر السنة - الكيمياء ١٠٠ درجة ٤٠ درجة اعمال سنة ٦٠ درجة امتحان اخر السنة - قرآن ١٠٠ درجة ٥٠ درجة تحريري اخر السنة ٥٠ درجة شفوي اخر السنة - العقيدة ١٠٠ درجة (كلهم لامتحان الترم التاني ومفيش اعمال سنة) - تطور التكنولوجيا ١٠٠ درجة (كلهم لامتحان الترم التاني ومفيش اعمال سنة) - لو قدر ربنا ونقصت في ميدتيرم او كويز او شيت او اتمينصت اوعى تحبط او تزعل دا شيء طبيعي وبدل ما تزعل على الي فاتت ركز في الي جاي وهتالاقي فرص كتير تعوض فيها إن شاء الله وإن شاء الله خير #بوستات_تعريف_لاعدادي

*الجدول والتقسيم* - الدفعة بتتقسم مجموعتين أ و ب - بتتقسموا ٢٠ فصل كل مجموعة ١٠ فصول - التقسيم بيتأخر شوية -التقسيم حسب ترتيب الاسماء الابجدي - الجدول بينزل اول اسبوع دراسة - اول اسبوع كل الدفعة هيحضروا مع بعض من غير تقسيم - حاولوا تختاروا المناديب من اول اسبوع عشان يتواصلوا مع الدكاترة والمعيدين وتعرفوا عندكم ايه كل يوم لحد ما الجدول يتظبط والدكاترة يكونوا بدأو كلهم - الجدول بيبقى فيه مواعيد المحضرات والسكاشن والعملي والورش - بيبقى فيه جدولين جدول لجروب أ وجدول لجروب ب كل جدول من فوق بيبقى متقسم جدول أ من ١ ل ١٠ وجدول ب من ١١ ل ٢٠ الارقام دي معناها ارقام الفصول - يهمك الفصل بتاعك وتشوف عليك ايه كل يوم - الخانة الي بتبقى واخدة كل فصول الجروب بتبقى محاضرة على الجروب كله اما الي بتكون على فصل بس او اكتر بتكون سيكشن او عملي للفصول دي بس والباقي مش معاهم - الشرطة الي على بعض الخانات معناها المحاضرة بتكون اسبوع عليكم واسبوع لا - البنات قريبين من البنين في الكلام ده ما عدا بعض الاختلافات زي إنهم بيبقوا 10 فصول كل مجموعة 5 فصول وإن البنات عندهم جدول واحد فيه المجموعتين #بوستات_تعريف_لاعدادي

يا شباب اللى عايز يعرض اى أدوات للبيع يكون من على جروب الفيس مش من على جروب التيليجرام بعد اذنكم

*المواد* - المواد الي هتدرسها في اعدادي هندسة ١٣ مادة : ١- فقه ٢- انجليزي ٣- رياضيات ٤- فيزياء  ٥- ميكانيكا ٦- هندسة وصفية بجانب المنظور ٧- كيمياء ٨- مقدمة حاسب ٩- هندسة انتاج ١٠- رسم هندسي ١١- عقيدة واخلاق ١٢- تطور التكنولوجيا ١٣- قرآن - اول حاجة مواد الترم الاول (بتدرسها الترم الاول وتمتحن عليها الترم الاول) ١- رياضيات ١ ٢- فيزياء ١ (نظري وعملي) ٣- انجليزي ٤- فقه - اما مواد الترم التاني (بتدرسها الترم التاني وتمتحن عليها الترم التاني) ١- رياضيات ٢ ٢- فيزياء ٢ (نظري وعملي) ٣- عقيدة واخلاق (توحيد) ٤- تطور تكنولوجي - المواد الممتدة (بتدرسها الترم الاول والتاني وتمتحن عليها كلها الترم التاني اخر السنة) ١- ميكانيكا (استاتيكا وديناميكا) ٢- هندسة وصفية بجانب المنظور ٣- رسم هندسي ٤- كيمياء (طبيعية وصناعية وعملي) ٥- هندسة الانتاج (نظري وورش) ٦- مقدمة حاسب (نظري وعملي) ٧- قرآن #بوستات_تعريف_لاعدادي