HAILE GEBRIEL - በማለዳ ንቁ

#የሕሊና_ጸሎት ጌታዬና መድኃኒቴ ኢየሱስ ክርስቶስ ሆይ፤ ከሁሉ አስቀድሜ ስለ እስትንፋሴ አመሰግንሃለሁ። ይህች አየር ወደ ሳንባዬ ስትገባና ስትወጣ ያንተን ስም በምስጢር እንድትጠራ እርዳኝ። በእያንዳንዱ ትንፋሼ ውስጥ አንተን ማሰብን ስጠኝ። አእምሮዬ እንደ ባዘነ ወፍ ከቦታ ቦታ ሲባክን፣ አንተ በቸርነትህ ወደ ሰላምህ ጎጆ መልሰው። አምላኬ ሆይ፤ ካንተ ውጭ የምታስበው ነፍስ ሰላም የላትምና፣ በሕሊናዬ ዙፋን ላይ አንተ ንገሥ። በሥራዬ መካከል ሳለሁ አብረኸኝ ሥራ። እጆቼ ቁሳቁሱን ሲነኩ፣ ልቤ ግን ያንተን ቅድስና ይንካ። በድካሜ መካከል ብርታት፣ በውጤቴ መካከል ደግሞ በረከት ሁነኝ። ስሠራ አብረኸኝ ሥራ፤ ያለ አንተ ረዳትነት ድካሜ ሁሉ ከንቱ ነውና። በላቤ ውስጥ ያንተን ምሕረት፣ በጥረቴ ውስጥ ደግሞ ያንተን ፈቃድ እንዳይ እርዳኝ። አቤቱ፥ በሕይወት መንገድ ስጓዝ አንተ መሪ ሁነኝ። የትኛው መንገድ ወደ አንተ እንደሚወስደኝ አላውቅምና፣ እንደ ብርሃን መብራት ከፊቴ ቅደም። ስሄድ መንገዱን ምራኝ፤ ስደክም ምርኩዝ ሁነኝ። ሕይወት በከበደችኝና ጉልበቶቼ በዝሉ ጊዜ፣ የማልወድቅበት ጽኑ ዓለት ሁነኝ። በፈተና አረንቋ ውስጥ እንዳልሰጥም እጅህን ዘርግተህ ያዘኝ። ጌታ ሆይ፤ በምድራዊ ሕይወቴ ግዴታዎች ቢበዙብኝም፣ እነዚያ ግዴታዎች ከአንተ ጋር እንዳያጋጩኝ ጠብቀኝ። ምድራዊ ስኬቴና ባለጠግነቴ አንተን እንዳያስረሳኝ አጥር ሁነኝ። በሰው ፊት ከፍ ስል በልቤ ውስጥ አንተን ዝቅ እንዳልል ሰውረኝ። ስም ስገኝ ስምህን፣ ሀብት ስገኝ ባለቤቱን እንዳልረሳ የትሕትናን ልብስ አልብሰኝ። ዓለም በውሸት ውበቷ ስታታልለኝ፣ አንተ እውነተኛው ውበቴ መሆንህን አስታውሰኝ። በሰዎች መካከል ስሆን ፍቅርህን እንድገልጥ ርዳኝ። አንደበቴን ከሐሜት፣ ዓይኖቼን ከክፋት፣ ልቤን ከምቀኝነት ጠብቅ። ብቻዬን በሆንኩበት ሰዓት ደግሞ፣ የሰዎችን ጫጫታ ትቼ ያንተን ቅድስና እንድናፍቅ አድርገኝ። በብቸኝነቴ ውስጥ ሙላቴ፣ በዝምታዬ ውስጥ ቃል ሁነኝ። በምንም ሰዓት፣ በምንም ሁኔታ አንተን ከመዘንጋት ሰውረኝ። ሕይወቴ ሁሉ ያንተ መታሰቢያ ይሁን። አቤቱ፤ ጸሎቴን እንደ መዓዛ እጣን ተቀበልልኝ። በእመቤታችን በቅድስት ድንግል ማርያም አማላጅነት፣ በቅዱሳን መላእክትና በጻድቃን ሁሉ ጸሎት ልመናዬን ስማኝ። አእምሮዬን ቀድሰህ፣ ልቤን አሳርፈህ፣ ሕይወቴን ባርከህ እስከ መጨረሻው አጽናኝ። ወስብሐት ለእግዚአብሔር። አሜን።