AJ.

وانا يا فاتنة نجد العذيه ما علي خلاف ‏لاقفيتي على فال الغلا وانا على فالي ‏بداية كل ثورة كبرياء من نظرة استعطاف ‏وش اسوي وانا راسي عزيز وقلبي موالي ‏دفعنا بالمشاعر كلها في حرب الاستنزاف ‏ما باقي غير يفصَل في الامور ويلحق التالي -صالح النشيرا.

قل ما طرا لك ولا تحسب لحكيك حساب ‏مات الغلا اللي لو انه حي كان منعك ‏يشفع لك القدر تغلط ي عزيز الجناب ‏اغلط بقدرك عقبه .. رح بقدرك معك -عبد الله اللزيوح.

ما جاد الزمان بـ مثلك ومستحيل يجود ‏يا وجهً يشوفونه حقيقه .. واشوفه حلم ‏انا إللّي غدا في وجهي اللّوم ٫ والمنقود ‏وأراجع شريط الذاكره .. وأستعيد الفلم ‏ما لازم بعدها تكشف البال يا أبن عبود ! ‏بعد ما أنكشف وجه الحقيقه و وجه العلم ما خلّا ( قرايحنا ) تلاحي .. هبوب النود ‏إلّا حزةٍ فيها يغيب " العقل .. والحلم ‏و على كثر ! ما فينا شراسه .. وفينا زود ‏على سلمنا المعهود في حرب ولّا سلم ‏لكن ما سلمنا من سهوم ، العيون السّود ‏وحنّ بيوتنا ياما دخلها الدخيل .. وسلم -جابر النشيرا.

ليل كله صخب لكن صخب بـ شويش ‏فيه وقت ابركته الطول وانت ابرك ‏و فيه ضوً تشب وفيه يا لبييش ‏شي صادق شعور وشي متفبرك ‏انا كني معك دورية التفتيش ‏تسبر الناس وانا احس من سبرك فيه حاجه مزعّلتك ولا ادري ويش ‏أشعر بكتله من الحزن في نبرك ‏ على كلن عط ظروف الزّمن تطنيش ‏لو تكبر عليك ف ورها كبرك لا تحسب ان المعارك كلها للجيش بين الاشبار لابد يحظر شبرك -محمد بن الذيب.

اضبط لحزة لقانا عقرب الساعه ‏جمر انتظارك من البارح ملوعني ‏تعال ماعاد ابي للعذر شماعه ‏فاحت دلال الغلا والصبر ودعني مبطي وانا في ظلال السمع والطاعه ‏واليوم يمك رياح الشوق تدفعني ‏ مشتاق اعانق جبين الصبح واشعاعه ‏اليا انفهق عن دجى ليلً مروعني ملهوف اشم الزهر لاهب ذعذاعه ‏بأزكى عبيرً على وصلك يوزعني ‏ يازاهي الكحل لك نظرات بتاعه ‏علمني الرمش والنظرات وش تعني ما دونك ودون سور القلب فراعه إطعن بحد العيون السود و أوجعني فدوتك خآفّقي اللي عندك وداعه ‏ما دام نبضه على حَبك يشجعني ‏يفداك من راحته لاا قمة أوجاعه ‏وان كان مقنعك في سوق الوفا بعني جيتك بمركب لقا واللهفه شراعه ‏ابحرت للوصل واللحظات تنفعني ‏وطالبك لو للموآدع دقت الساعه ‏بآحاول اغفى وصد ولا تودعني -عبد الله الخالدي.

ليلة بدون مْلامس إيديك : تبذير ‏يومٍ ما يحسبه العمر من شبابه! ‏أنّي ادوّر ضحتك؟ حاجة تْصير ‏أنّي أكافح لجلها؟ .. لاغرابه طلِّي علي من شرفة الجرح، تقدير ‏أنتِ قديمي، في رِضاه، وعِتابه ! ‏أشياء واجد تنتظر منك تفسير ‏لكن مجيك بحد ذاته إجابة ! هذي العيون الصامتة؟ كل تأخير ‏منها ؛ يعلمني فنون الخطابة ‏قد لي سنة، وأنا أذكر الشعر بالخير ‏خليته : إحساس،وطقوس ورتابة ‏عدا العيون اللي خطاها : معاذير ‏ما شفت حاجة ..مغرية للكتابة! ⁃ صالح بن حمد.

طاح من صهوة اماله عريب الجدود ‏كيف راحت مراكيض الهقاوي هدر ؟ ‏اعذري وافيٍ خْذه الزمن لـ الصدود ‏مثل ما ياخذ الدمع العيون بغدر ‏ارحلي من ردى الواقع و عجز الوعود ‏و اسكني بين هاجوس و محاني صدر ‏مستحيلة فؤادي ما ورا الصبر فود ‏عيّت توافق الدعوات ليلة قدر ⁃ عبد الله اللزيوح.

أنا ليه أكترث للشمس لا هفّت ورا المشراف ‏وهي لاهفّت أول مايقفّي عني ظلالي ‏على كثر العباد اللي على مترامية الأطراف ‏ما يجذبني حنين إلا الحنين لربعها الخالي ‏اوّقف وأتباهى لا دعتني ساعة الميقاف ‏حسب مبدأ الثقة ماني بمتغطرس ومتعالي ما عفت من الطلوع إلا الطلوع اللي على الأكتاف ‏ولا أحب من النزول إلا النزول لرغبة الغالي! ⁃ صالح النشيرا.

اجمل من عيونك السود الوساع الكبار ‏ثميييييك اللي ماغيره ودك انه ثغر ‏ٓ ‏انا مالوم النساء تشعر بـ خيبة دبار ‏لا شافو عيونك الخدره ووجهك الاغر ‏سببّت لـ العايله ذنب و قطيعه و ثار ‏اربع رياجيل . . كلٍ حاجرك من صغر ‏قدام بيتك مصاقل شلّف و إطلاق نار ‏لـ الموت قدام بيبانك وظايف شغر ⁃ فارس الحشار.

ياصاحبي ياناسي الي فوقي الوزن الثقيل ‏لد النظر فالعالم الي ماتبل حلوقها ‏العمر مره والقلوب البيض ماتبغى دليل ‏والناس لاطابت نوايها تطيب وفوقها ‏صحيح انا ممكن اسويها واسوي المستحيل ‏لكن رجلي في هواء نفسي ماعدت اسوقها ‏وشلون ابرر موقفي واجزاء كثيرك بالقليل ‏وانا يديني في فم الحيه ورجلي فوقها ⁃ ضيدان بن قضعان.

ادري ان حبك مضرّه ولا منه خراج تهت في حبك ولا لي دليل يدلّني احسب ان الحب قبل اعرفك فلّة حجاج ما دريت انّك على ادناة شي تخلّني نظرتك فيها حكي جارح وفيها علاج يوم تبعدني بكلمة ويوم تتلّني لا تحرّك باب قلبي وقلبي من زجاج اعترف لي يابن الاجواد ولّا خلّني ⁃ جابر ال خجيم (العمدة)

اي والله تمون وزين وجهك جعلك تمون يا اجمل من عبير الورد و الطف من النسمه احبك بمنظور الغلا اللي بدون عيون من مقبلات الحب ل الوجبه الدسمه انا مثل راعي السكر اللي معه مخزون ما يبغي العلاج يبين الضعف في جسمه. ‏- عبد الله الحول .

‏انا من .. كثر مازاد حزني عن المعقول ‏اشوفه .. مثالٍ ينضرب ويتمثل به ‏ابي .. واحد قد لاوع الحزن عرض وطول ‏يطبطب .. على قلبي واطبطب على قلبه -جابر ال دجران.

‏"ضحكت يوم ان اكثر الناس يبكون ‏وبكيت يوم انه ضحك لي زماني ‏الناس ونجوم المجرات والكون ‏تروح وتعوّد وانا في .. مكاني" ‏-عبدالمجيد الذيابي

الايام راحت بالعمر وش بقى يافلان فهقت الكثير وقدني لنصفه مشارف تعبنا .. وراها ما خذيناه بـ المجان لكن فالنهاية .. عملة مالها صارف سقى .. الله ليال ٍغيمها بالفرح ودان تقافت وانا كان احسب ان ظلها وارف لو ان .. السنين ترد ولا تبدل كان تبدلت .. فيها باقي العمر من طارف ‏- جابر ال دجران.

راودتها .. مثل الشكوك وجيتها مثل اليقين ‏يوم ضحكت قلت : ' الكبر لله يا متكبّره ' واقفيت وانا أكبر من من التبرير و العذر السمين ‏حتى لوني خاطري ماكل شي . . يصبرهه ‏ماني بظالم يوم اقول اقبالها ماهوب بزين ‏الظلم والله كيدها الي كل يوم . . تدبرهه ‏القلب يكسره اللسان ولا تجبره اليدين ‏ماهوب عظمٍ .. كل يوم تكسّره ، وتجبّره ‏- صالح النشيرا.

‏قد زبنها صويبٍ يشتكي من صوابه ‏ولاذ فيها خصيمٍ يحتجي من خصيمه ‏ الشعر ذنبي اللي مابغيت ارتكابه ‏ودي ان مسرحه ماهوب بمسرح جريمه ‏ اقدر امدح به الرجال واخذ ثيابه ‏واقدر انصف به اللي موجعته الظليمه ‏ كل بيتٍ عظيم ويستحق الكتابه ‏ ماتعين وراه الا محبه عظيمه . . ‏- صالح النشيرا.

الجادل اللي في حب الوضح منهبله ‏مدري وش اللي رماني بين أياديها..! ‏. ما تحفظ الا ( قصايد ) جدها فـ ابله ‏وتضيع ( أبياتي ) اللي قلتها فيها ‏- حزمي بن سعد.

يحبّك اللي ينتظر منْك : تبرير ! واللي يعلّمك الخطا، لـ إجتنابه دوبك على الغصن الندي يا عصافير ما كل يومٍ يعطي "الما" نِصابه ! علَّه إلى مالت به النسمة عْصير يملا النسيم بـ ريحةٍ من ترابه ! يا اللي على بابك .. تميل النواوير ؛ والليل ينطر [ضحكتك] لـ إنسحابه لو شاعرك يسكن قلوب الجماهير لا زال قلبك : رحلته، وإغترابه ! عادي تلاحظ رجعته دون تفكير المؤلم أنّك ما تلاحظ : غيابه ! نبضك يضمّ الجار الأول، والأخير؛ ومرعى صبا، وأهل، وعشيرة، ولابه رعبوبتي، طالت عليّ المشاوير والليل ما لي في ربوعه : قرابه ماني محاول أطوي النود وآطير وأنزل على بيتك، أو أدقّ بابه ! أنا سحابة ماطرة، ماني بْـ طير ! حطّي رحالك، وأنطريني سحابة للحين أشوفك في شروق التباشير نورٍ يعمّ، ويعتريني : صبابة ! كل الوجيه العابرة، تشبه الغير؛ وأنتِ إختلاف لْكل حاجة تشَابه ‏- صالح بن حمد.

مامثل الحبيب الى صفا الودّ من يمّه يصايد هواك منين ماهب ذعذاعه الى جيت وانت تعذرب الفال وتذمّه تعجبّت كيف اغواك وارضاك في ساعه خذانا هوى اللي يوخذ المسك من دمّه بعد مانوينا نعتق الصيد بـ انواعه علينا المشاغل والضغوطات ملتمّه لكن ماجعلنا عامل الضغط شمّاعه ياكم من نشيطٍ قد سبقناه لـ القمه وهو يحسب ان ماحدٍ طلع مثل مطلاعه لاسلم الغريم وجات في راس ابن عمه طرى له كلام اللي يعذله ولا طاعه الى استوعب اللي غدر الايام ماهمّه غدت عنده الدنيا مهيب اكبر طماعه درى انه ماينفع عظمه الا حليب امه الى صار ماله نجده الا من ذراعه ظروف الدهر من مرّته غثربت جمّه لولاها ماقام المستحي يشرح اوضاعه ولا شال ابن وسام همٍ مع همّه ولا ونّ ابن جدلان من لايعٍ لاعه ‏- جابر النشيرا.