Najmiddin Turon

ЧИН ДЎСТ Шоир укам, дўстим Нажмиддин ЭРМАТОВга Ҳали ёш эдимку буни англашга, Ҳали орзуларга тўла юрагим. Қай вақт адашдим мен йўлни танлашга, Борар манзилимни кимдан сўрадим?! Девлар борар эмиш кўҳи қоф сари, Парилар чорлармиш Беҳишт томонга. Муштдай вужудимда руҳим сарсари, Питирлар тушгандай худди зиндонга. Лабларим шивирлаб сўрар қатим нур, Зулматга кўниккан нигоҳда не ғам? Зулматдошим менинг, сизга ташаккур, Асодошим менинг – умримга ҳамдам. Ўттиз йил ўткир тиғ устида юрдим, Яхшиям товонда эмаскан жоним. Ўлмадим, ўзимни оловга урдим, Кўзёш пардасидай бу хонимоним! Неки хато бўлса ўзимдан ўтган, Неки ютуғим бор, сабаби ўзим. Дераза ортида дунёни ютган Ким эди, тополмай ўртанар кўзим. Омон қолар эмиш кемадагилар, Бўронга дош бериб ўтолса елкан. Елканга ёпишган денгизчи мисол – Чин дардкаш бўлса ким, яқин дўст экан. ©Баҳодир БАҲРОМ 19.03.2021 йил Шаҳрисабз

Унинг қайтар вақти бўлди, ёронлар Э. Шукур Намхуш ноябрнинг ниҳоясида, Кўлмаклар изингни санашга тушди. Мотамда сочини юлган кампирдай, Мажнунтол бошидан рўмоли учди. Қайтар вақтинг бўлди, ёрижон. Ҳилолнинг юзини тўсди булутлар, Маёғин ёқотган хаёлим дайдир— Кимсасиз боғларнинг қўйнида шамол, Изғийди қадимий бир сирни айтиб. Қайтар вақтинг бўлди, ёрижон. Тун ярми, бемаҳал қичқирди хўроз, Худойим, чироғим қолмасин ўчиб— Минг йиллик мусаллас топган майхўрдай, Дарчадан тамшаниб боқмоқда кеча. Қайтар вақтинг бўлди, ёрижон. Ғамбода тунларда сени кутяпман, Эй, ғамнок ватаннинг ғамгузор қизи. Қўрқиб мўралайман, туман тушибди, Топа олармисан қайтишга изни?.. Қайтар вақтинг бўлди, ёрижон. Сен кетгандан бери шундайдир ҳаёт, Сен йўқ кунларимда шунга қаст қилдим. Не бўлса бўлар деб, чироқ ўчириб, Қанча кечаларни минг бор маст қилдим. Қайтар вақтинг бўлди, ёрижон. Намхуш ноябрдай тугаб боряпман, Қаҳратон келса гар ниҳоя тайин. Сенинг кетганингни кўрганман, етар, Сенинг келмаслигинг кўриб қолмайин. Қайтар вақтинг бўлди, ёрижон. ноябрь 2020 Н. Э.

#mulohaza "Negadir ularga aloqam yoʻqdek, Yomgʻir boʻlsam kerak aslida... " Najmiddin Ermatov she’ri. Mahliyo Asqaraliyeva @yosh_kinematografistlar

Сўров Ҳайронман, ким кимга отаяпти ўқ, На ўқни тўхтатдим, на бўлдим қалқон. Кеча oкопидан чиқмаган аскар, Бугун тирикман деб бўлса қаҳрамон... Ҳайронман, не учун Ҳақ демас тилим, Ёки ўчирдимми дилдаги чўғни? Нега кўнаяпман ҳақсизликка жим, Менга бир қаранглар, ўлганим йўқми? ©Нажмиддин Эрматов

Nihoyat, "Adil"ning ikkinchi sonini ham Youtube kanalimizga joylashtirdik! Marhamat, ko‘ring va fikrlaringizni qoldirding! Bu safargi mehmonimiz - Suhrob ZIYO https://youtu.be/v_HyCcn6KUU Videoni oxirigacha ko‘ring, va (videoroligimizni ko‘proq odamlar ko‘rishi uchun) "like" tugmasini bosishni, fikrlaringizni yozib qoldirishni unutmang... Kanalga obuna bo‘lib qo‘yingizlar Youtube.com/c/sheriylahzalar @sheriylahzalar

*** Жонтемирга Балки яна келгайдир баҳор, Балки яна гуллар дарахтлар. Балки яна булбуллар тўккан, Кўзёшидан унгайдир бахтлар. Балки яна масъум келинчак, Сойга бориб айтар тушини. Бу сафар ҳам сувлар айтмайди, Тушда юрган ул ёт кишини. Балки рашкдан увлайди бўри, Ой қилмишин ошкор этса доғ. Балки яна кофир хаёллар, Ҳаётимга тўқийди сиртмоқ. Балки ўлган оҳу кўзидан, Сачраб кетар борлиққа чирой. Балки яна қиздай бокира- Оғринмасдан оқа бошлар сой. Балки яна кутган, кутмаган Ҳар жон учун келгайдир баҳор. Аммо бунинг баҳордан ҳоли, Симёғочга нима даҳли бор?.. ©Нажмиддин Эрматов май, 2018.

Демак, мен Ўлмайман! Эээээй, яшаб бўлмай қолдику! Бунча зўр ёзасизлар? Ёзганларингизни қайта-қайта ўқиб ўзимга “Бу шеърларни нега сен ёзмадинг?” деб дакки бердим. Афсуски, СЎЗ эҳтиёжга кўра ёғади. Туйғулар таниш, ҳаяжонлар таниш, иқрорлар, хулосалар таниш. Устозлар “Китобдан китобга ўсинглар” деб дуо қиладику. Илоҳим, айтганлари келсин. Аммо энди Сизларга осон бўлмайди! Бўйини тоғдай қилиб ёзиб қўйган шеърларингиздан ҳар сафар ошиб ўтишингизга тўғри келади. Ажаб бўлсин! Товуш чиқарса бўлдида, деб ҳисоблайдиганлар учун шиқилдоқ ҳам мусиқа асбоби. “Шиқ-шиқ” қиляптими, қиляпти. Болани овутяптими, овутяпти. Шеър борасида ҳам шундай ўйлайдиганлар кўп. Қофияси борми, бор. Қатор-қатор, чиройли. Аммо ҳақиқий НАЙнинг ноласини эшитган одам энди шиқилдоқларга алданмайди. Мен шу НАЙларга мурожаат қилмоқчиман. Тўра Сулаймон “Ўлмасликка ишора – ўланга ошиқлигим” дейди. Демак, мен ўлмайман! Нажмиддин ака, ассалому алайкум! “Бўзтўрғай”ингизни варақлар эканман, дугоналаримнинг телефонига келган “смс”лар эсимга тушиб кетди. Шўрликлар “Келма” деб бошланувчи шеърингизни “Мен учун ёзилган шеър” деб мақтаниб юришарди. Ҳайриятки, уларнинг биронтаси ёнинггизга келмаган. Шукрки, гўзал шеърлар ёзиб юрибсиз. Мана уларнинг биииттаси: Қарсак бу Олқиш эмасдир балки Балки у исёндир етганча мажол Минбардан учган сўзларни Қўймасдан қўнишига Ҳуркитишга уринишдир эҳтимол. Қарсак чалишни яхши кўрадиган халқмиз. Балки шундандир, қарсак ҳақида турли хулосаларимиз бор. Матназар Абдулҳакимда: Қарсаклар Сен ишондинг бу қарсакларга Ва кеккайдинг бамисли хода. Сотдинг, сотиб қўйдинг ўзингни Яна – жуда арзон баҳода. Фаросатинг етмади, афсус, Бу қўллар қарсиллаб толмайди. Талтайтириб отар осмонга, Лекин – ҳеч вақт илиб олмайди. Шавкат Раҳмонда: Қарсак нима ўзи? ...Ўжар шоирликни ташлаб ўшал пайт, эпчил бир югурдак каби замонда. қарсак чаладиган хизматчи бўлиб ишга кирар эдим Ўзбекистонга. Шу шеърларни эсга олдимми, демак сизнинг шеърингиз ҳам улар қаторига кирди! Ака! Китобдан китобга ўсаётганингизда сиёҳдонингиз қуриб қолмаслигини тилайман! *** Салом, Шаҳриёр! “Барибир тинмайди бу муқаддас жанг” дебсиз. Илоҳим, тинмасин! Сўзда шундай ботир экансизки, оғзи ботирлар ўрнак олса арзийди. Бизда шундай тоифа пайдо бўлди: жунунини сўзга кўчиролмасдан, ўзини тутиши, юриш-туриши, кийинишига кўчирадиганлар! Сиздаги ҳалимлик, босиқликни кўриб ҳайрон қолдим. Яна бизда шундай кайфият пайдо бўлган: Норизолик! Замондан, очундан, Худодан. Сиз эса баралла дебсиз: Мен дунёни нега ёмонлай, Ахир, тангрим яратган уни?! Ҳар битта қиз шундай севилишни орзу қилса керага? Шамдек милтиллайди кўзларинг... Нафасим ўчириб қўймасайди дейман! Шеърларингиздан топган ҳайратларим мўл! Топганларим Колумбникидан кам эмас! Ука! Гўзал санамларни Кешга олиб келишни буюрган бобомизнинг яна қанча буюрганлари бор. Уларни адо этиш ҳар биримизга насиб қилсин! Биринчи китоби чоп этилган барча тенгдошларимни қутлайман! Устоз Қозоқбой Йўлдошев айтдиларку “Катта адабиёт яралиши учун ўқирман ҳам бўлиши керак” деб. Ўқирманларингиз кўп бўлсин! Кумуш Абдусаломова @kumush_abdusalomova

Ўттиз қуш қонимни бўзадай ичди, Оҳулар кўзига сиғмади умрим. Менинг осмонимда учмаган ҳурни, Бир тунда алафлар пойида кўрдим. Бўзла энди, бўзтўрғай. Кафтимнинг чизиғин талади йўллар, Пиллақурт касбидан бермади улгу. Қопқонда чорасиз ётган қашқирдай, Бўғзимни йиртгудай увилладим "у-у-у-ув’’, Бўзла энди, бўзтўрғай. Кечалар ожизман, кечалар - хунбор, Куздузлар кифтимга қўнмаган бахтқуш. Ҳар оқшом бўғзимда уяласа мунг, Ҳар сахар кўзимдан сачраб кетар туш. Бўзла энди, бўзтўрғай. Булбул сайроғида висолга умид Куйган кўкайимга ботмоқда тиғдай. Эртамни кўролмай қурига ўша Кўзим косасида узатаман май. Бўзла ўзинг, бўзтўрғай. Олдинда нима бор - илон ютган йўл, Имкон йўқ, қайтиб ҳам бўлмайди изга. Андуҳга чайилган узу-у-ун умрда Ўлув битталиги кам бўлди бизга. Бўзла энди, бўзтўрғай. Ҳар лаҳза - косадай азобга тўла, Тушун, қисмат бўлди симирмоқ жабри. Бутун ҳаётини шундай куйдириб, Бўзлаб ўтар одам айтяпти. Бўзлагин-ай, бўзтўрғай. Нажмиддин Эрматов сентябрь, 2019

Ислом Қўчқoровга Бизга берилган замон, Сузмакка саёз келди. Эрк деб уруғ қададик, Тинмасдан аёз келди. Тил қантариқ келди ва Тори узук соз келди. Умримиз шундай ўтса, Яшаш бекордир, жўра. Шоир йиғлаб шеър айтса, Кулиб бораётирмиз. Бирор мард нара тортса, Қувиб солаётирмиз. Не зотлар ўтди тур деб, Тизза букиб ётирмиз. Бундай қавм қулликка, Мудом дучордир, жўра. Босолмасдан ўмганин, Кўкка чиқди ҳар султон. Пастга тушгин де унга, Кетса кетсин битта жон. Машраб осилган дорнинг, Оғочи бутун ҳамон. Эгилмаган ҳар бошга, Дорлар хумордир, жўра. Бир ватан кўрдим бунда, Кўзи тўла жиққа ёш. Бир туйғу туйдим унда, Йўқлигимни қилди фош. Илдизи узук келса, Дорга ҳам арзимас бош. Бугунимиз ёр эмас, Қурган ағёрдир, жўра. Бўзтўрғай бўзлаб учган, Даштимда дайдиб келдим, Этак силтаб кетгандим, Элни деб қайтиб келдим, Куюк келди кўкайим, Кўзёшдай қалқиб келдим. Шоир бўлсанг қисматинг, Наҳот равондир, жўра. Чилвир чўлнинг йўлида, Ғиротдан из қолгандир, Бахши ўшал йўл томон, Кўзин тикиб толгандир. Ё пирим, дегин, қўзғал, Кураш бизга қолгандир... Ё эл учун алп туққан, Фақат мозорми, жўра. феврал, 2021 Н.Э.

Yomg‘ir yog‘sa, umid gulday unar bo‘lsa, Kemtik ko‘ngil xalqobdayin to‘lar bo‘lsa. Yo‘l chetida yomg‘irpo‘shsiz turgandir deb, Ketgan yoring qaytishiga ko‘nar bo‘lsa. Ko‘lob yo‘llar yag‘rinida yo‘l ko‘rsatib, Yolg‘izlikning azobini cho‘ng ko‘rsatib. Pinhon tutgan sog‘inchini etib oshkor, Boshlab kelsa ro‘molchasin ho‘l ko‘rsatib. Nigohidan yomg‘ir yuvgan so‘z taralsa, Ifor sochib barmog‘ingda soch taralsa. Peshonangga bitgan taqdir bo‘lib mulzam, Ul yor bilan bir ketgulik yo‘l yaralsa. Xovuchida gulgun gulob quyib bersa, Tag‘in yomg‘ir tinmay battar quyib bersa. Tosh ko‘chada chopsalaring qo‘l ushlashib, Oh, bu dunyo o‘z holingga qo‘yib bersa. Olib borsang, qo‘rg‘oningda issiq tancha, Ostonada oyoq ilsa rafiq kecha. Derazadan borligini etib isbot, Yomg‘ir tinmay yog‘aversa jon chiqquncha. Bir tong kelsa avvaliga o‘xshamayin, Yengillashib borsang quyosh chiqqan sayin. Yomg‘ir tingan dunyosiga etak siltab, Uchib ketsang ul yor ila bir bug‘dayin. Yomg‘ir yog‘sa... N. E. fevral, 2021

*** Tun. Yomg'ir. Qorishiq ifor. Uchqur xayol, qadamlar asta. Borliqqa sochilib keladi ketging, Yomg'ir bo'lsam kerak, aslida. Sen yo'qsan. Hech kim yo'q. Nimalardir bor. Nenidir tuyarsan yomg'ir ostida. Men axir osmonda yashaganman-ku, Ne qilib yuribman zamin ustida?.. Shayton. Taqiq. Va o'sha meva. Afsus bor quvg'indi odam naslida. Negadir ularga aloqam yo'qdek, Yomg'ir bo'lsam kerak, aslida. N. E.

​​#предзаказ #олдиндан_буюртма Янги адабиёт - янгича дунёқараш! Жавлон Жовлиев: Қўрқма. Ўзбек адабиётида янги қадам! Asaxiy Books лойиҳасининг ўзбек адабиётида илк иши. ✍🏿 Роман ўтган асрнинг йигирманчи йилларида Германияда таҳсил олган ва собиқ Совет Иттифоқи томонидан шафқатсизларча қатл этилган миллат йигит-қизларининг хотирасига бағишланади. Роман воқеаларини қисқача сўзлар билан ифода этиб бўлмайди. Барчаси шу қадар тиғизки, шошириб қўяди. Мажоз, образ, ифода, ўт, ҳеч кимникига ўхшамаган лиризмни ҳис қиласиз. Миллият, соф муҳаббат, кўринмас ва ошкор фожиалар, тарих, бугун ва эртанинг бир-бирига кавшарланган ҳалқаси, ростлик даъвосидаги ёлғонлар, руҳ ва қондаги парадокслар сизни ўтмиш ва келажак куйига асир қилади, ўйлатади, йиғлатади ва аччиқ-аччиқ кулдиради. Ўтган аср бошида Германияда ўқиган талабалар, улар маслаги ва фожиали қисмати бугунги ёшлар мақсади билан бир тарозига тортилади. 📌 Олдиндан буюртма қилган биринчи 100 кишига 3 февральда, кейинги 100 кишига 5 февральда, 7 февральда эса навбатдаги 300 кишига китоб етказиб берилади. 10 февральдан эса эркин савдога чиқарилади. Шошилинг, биринчилардан бўлиб кўпчилик учун номаълум бўлган тарихимизга назар солинг. 📓 Муқова: Қаттиқ 💰 Нархи: 39 000 сўм Буюртма бериш 👉🏿 http://bit.ly/39YmGec 📲Тел: +998 71 200 01 05 📧Телеграм: @asaxiybook

Ertak aytmang bolalarga siz, Shoirlardan uzoqroq oling. -mana bu yoʻl, deng: mana bu qorin, shu gʻam deya tolsin oyogʻing. Ertak aytmang bolalarga, oh, Kimligini bilib qolmasmi: Farogʻiydek yigʻlabon, e voh, Gulxaniydek kulib qolmasmi?.. Ertak aytmang, kitobni yoping, Boqmasin dil tilkalariga. Axir u bolaku, Vatanning gʻami, Ogʻirlik qiladi yelkalariga. Hali bir kun oʻzni taniydi, Vatanni taniydi, taniydi alar. U kun bizga la'nat aytadi, Ertak tinglab oʻsgan bolalar. ©Najmiddin Ermatov @Najmiddin_Ermatov

* * * 1. Кўрасан, кўкиш баданини осмонга очиб, зулматда чўзилиб ётибди кўча. Сезасан, Панжасини совуқ урган қашқирдай, инграниб, имиллаб одимлар кеча. 2. Бўшалди, тушовини судраганча боради хаёл, кўчадан уялиб, кечадан чўчиб. Кўради, Ул таниш дераза, ётибди сулув, бегона сувратни бағрига босиб. Билади, бу гапни бўлмайди ўзингга айтиб, адашган ит каби кетади дайдиб. билмайсан, кутасан тонг отар, лекин-чи энди, ул хаёл ҳеч қачон келмайди қайтиб. 3. Кўрмайсан, кўкиш баданини осмонга очиб, зулматда чўзилиб ётаркан кўча. Сезмайсан, панжасини совуқ урган қашқирдай, исканиб, ирганиб кетаркан кеча. 4. Севасан. ©Нажмиддин Эрматов @Najmiddin_Ermatov

Булбуллар бош олиб кетгандай боғдан, Фанога кўчгандай сабуҳий саслар. Боғ аҳли энтикиб қулоқ осадир, сайраётир қафаслар. Тулпор туёғини тупроқ унутган, Ҳурлик шиддатини мавҳ этган ғовлар. Боғ аҳлин эрк дея топингани ул - чопаётир тушовлар. Қушлар самосини ишғол айлабон, Парвоз тасаввурин этганча бадар, Боғ аҳлин кафтида кучга тўйиниб, учаётир қарсаклар. Боғда боғ қолмайдир, тўрт тараф қолар, Тўрт тараф қибладир, шу эрур самар. Боғ аҳлин кўксидан аста бош олиб, кетаётир юраклар. Нажмиддин Эрматов июль, 2019