مِهاد مكاوي | Mehad Makawi

أسوأ حاجة ممكن تعمليها في حق نفسك هي #التبرير إنك تبرري عدم إلتزامك للآن بإنك لسة صغيرة ودي فترة الشباب الما بتتكر ولازم تعيشيها ! إنك تبرري تفويتك لصلاة الضهر والعصر عشان إنتِ عاملة ميكب فماف مشكلة تفوتي صلاة واحدة بدل تمسحي ميكب قعدتي فيه ساعة ! أو لأنو ملابسك ما مناسبة للصلاة فيلا أحسن أجمع الصلاتين بدل أصلي بملابسي دي ! أو لأنو المكان الإنتِ قاعدة فيه ما فيه محل للصلاة ! إنك تبرري علاقتك معاه بإنو نحن كدا كدا حنتزوج او هو شايفني زي أختو وهو زي أخوي الكبير ! إنك تبرري عدم مذاكرتك وتقصيرك في حق نفسك ومستقبلك بإنك ما قادرة تحاربي كسلك ! إنك تبرري إستسلامك وهوان نفسك عليك بإنو الدنيا جاية عليكي و كل الناس كسرتك ! إنك تبرري إخطلاتك والتجاوزات البتحصل بسببو تحت مُسمى عادي كل الناس بتعمل كدا ! إنك تبرري سكوتك لمن زول يتعدى عليك بإنو الناس حتقول عليك إنك بت ما كويسة أو لأنك خايفة من نظرة الناس ليك ! إنك تبرري تبريرك لنفسك بإنك لسة ما وصلتي مرحلة تواجهي نفسك وتتخذي قرار او لأنو ما عندك الشجاعة الكافية ! بعيد عن الإستغباء البنمارسو في حق نفسنا ما تبخلي علي نفسكِ في يوم بإنك تكوني صريحة معاها أسهل حاجة إننا نلقى تبرير لأي فعل نحن بنعملو ، حتى الحرامي بشوف إنو سرقتو حلالو ! فعشان ما تصلي مرحلة تصدقي الكذبات البتقوليها لنفسك وتسوقي فيها لحد ما تبقى عادي وأسلوب حياة ، خليك شجاعة وما #تبرري #ماهي

نصيحة كدة علي الماشي🚶‍♀ .. وإنت في طريق التغيير للأفضل حتلاقي كتير من الصعوبات والعقبات حتحس إنك ما قادر تكمل حتحس بالكسل والضيق حتفكر توقف ، حتيأس وتزهج الطريق صعب اي بس أوعا تستسلم حتخسر أشخاص و حاجات بتحبها بس المهم إنك ما تخسر نفسك و مبادئك الإتربيت عليها ، الحرام والحلال ، إحترامك لذات لأنو دي من الحاجات الثابتة الما ينفع تتغير ، غير كدا كلو قابل للتغير والتبديل . وكقاعدة مهمة : "ما تتغير عشان زول ، ما تتغير إلا اذا كنت عاوز التغير دا من جواك" #ماهي

إن أردتَ أن تحيا حياة سعيدة فإربطها بهدف وليس بأشخاص أو أشياء

السلام عليكم إذا في القناة هنا أدمن لقنوات الرجاء يتواصلو معاي t.me/MAHY17

📢 الفشل والنجاح وجهان لعُملة واحدة ▪︎كل تجربه فاشلة أو خلونا نقول ما موفقة في حياتك حتصنع منك إنسان ناجح بيثق في قراراتهُ و قادر علي تحمل المصاعب مواجهتها. ▪︎كل مشكلة بتواجهها بتكون جواك خِبرات متراكمه حتفيدك في مستقبلك . ▪︎كل عقبة حتتعرف معاها علي نفسك عن قرب وتعرف منها إذا إنت شخص قوي ذي ما بتتدعي أم طلعت قوتك مجرد شعارات؟ 📌وإنت قاعد متحسر ومنتظر زوال العقبات دي ، عمرك بمُر عشان كدا لازم تعرف إن الصعوبات جزء من الحياة وما حتنتهي إلا مع نهاية الحياة. العقبات وجدت عشان نتعلم منها وتقوينا ما عشان تكسرنا وتصنع مننا أشخاص ضعاف. المشاكل وجددت عشان نتحدها ونواجهها ونتغلب عليها ونتعلم منها ، ما عشان نقيف ونستسلم ليها ! واجهه مشاكلك وإتغلب عليها وما تسمح ليها تتغلب عليك . وأعرف إن التجارب السيئه في حياتك ليست محطه للوقوف عليها ، بل هي دروس عشان تتعلم منها وتنقلك لمكان أفضل من الإنت موجود فيه حالياً #ماهي.

#بيئة_النجاح وإنت شغال في تطوير نفسك وإخراج النسخة الأفضل منك في حاجة مهمة لازم تنتبه ليها وهي [البيئة الحوليك] بيئتك كل ما كانت إيجابية/محفزة وناجحة كل ما ساعدتك تتطور وتنجح والعكس كل ما كانت سلبية/هادمة وفاشلة كل ما صنعت منك شخص سلبي خامل . الكتير بستهين بتأثير البيئة عليه والأكتر فاكر إن البيئة مهما كانت سلبية ما حتأثر عليه وإنو هو أقوى منها الحاجة البتكون ما منتبه ليها إنها ما حتأثر بين يوم وليلة بس بتأثر بطريقة غير مباشرة مع الوقت وممكن يتمثل التأثير بإنك تتأقلم مع سلوكياتهم اليومية وتشوفها عادية ومن بعدها حتبدأ تتقبل السلوكيات دي ومع الوقت ممكن تصل لإنك تمارسها الرسول صلي الله عليه وسلم قال ( المرءُ علي دين خليله ، فلينظر أحدكم من يخالل) حتي في كتب تطوير الذات دائماً بيتم ذكر إن نجاحك حيكون قريب لنجاح أكتر 5 أشخاص إنت بتتواجد معاهم . ● تغير البيئة ما عندو شكل معين كل شخص ممكم يغير بيئتو بالطريقة المناسبة معاه ، ودا كم شكل للتغير -مكان مذاكرتك او عملك/ تغير البيئة فيه ممكن يكون بإنو يكون بعيد عن الضوضاء ، مرتب ، فيه حاجات تحفز للعمل أو المذاكرة -التلفون/ بإنك ترتب شكل ومكان ايقونات الأبلكيشنات البتستخدمها _ الفيس بوك / بإنك تعمل فلترة للحسابات المتابعها وتنقي المحتوى الحتتابعو وتلغي متابعة اي محتوى سلبي او غير هادف ممكن يشتتك -الجامعة / بإنك تنتقي الناس البتقعد وتضيع معاهم زمنك -الحِلة او مكان السكن /بإنك تقللي من قعدات الجبنة او تقلل قعاد المصاطب -نوع الكتب البتقراها ، المسلسلات والأفلام البتتابعها نوع الأغاني البتسمعها (وياريت هنا ولو استبدلتها بالإستماع للقراءان الكريم) شوف أكتر ناس بتقعد معاهم ونقي منهم منو البساعدك تحقق أهدافك ومنو بأخرك ، ما تقطع علاقتك بس اقتطع التأثير وقلل وجودك مع الشخص وما تخلي أفكارو تأثر عليك ركز دائما علي تواجدك أكبر وقت ممكن مع الناس الإيجابية وإجعل لنفسك شخص مميز في مجال إنت بتحبو نافسو او إتعلم منو خليك شخص إنتقائي في اي حاجة بتعملها او مكان بتتواجد فيه وحتي مع الأشخاص المحيطين بيك #مااهي

(دي ورقة الإجابات النموذجية أحفظوها وخشو الإمتحان ) (ما تتفلسفو وتكتبو حاجة ما مذكورة في كتاب الوزارة عشان يدوكم الدرجة الكاملة) (زح أداة السؤال_WH question_ وفتش الجملة دي في القطعة وابدأ انقل لحد ما تجيك نقطة ووقف) معظمنا إذا ما كنا كلنا إتقالت لينا الجمل دي في فترة من فترات الدراسة ، وبطريقة غير مباشرة إتكونت جوانا عقلية التلقين والتلقى فبقينا راجين الوصفة السحرية لأي مشكلة او عقبة تحصل معانا لمن زول يسأل كيف أكون إنسان ناجح في حياتي؟ فتكون الإجابة مثلا أقرأ كتير أو إكتسب عادة القراءة وكرد فعل طبيعي لعقلية التلقين الأتعودنا عليها بكون رد فعلنا كمية من الأسئلة ، أقرأ كيف؟ أقرأ شنو؟ وهل أقرأ اليوم كلو ولا جزء من اليوم ؟ وهل وهل ولو ما لقى إجابة مرضية لكل اسئلتو دي معاناها القراءة بالنسبة ليه إتصنفت ما حل فيبدأ يفتش حل آخر ويسأل تاني نفس الأسئلة وما يلقى إجابة ويفضل يلف في حلقة مفرغة المشكلة في عقلية التلقين إنك بتكون راجي إجابة ترضى العقلية دي ، وفي الحقيقة ماف إجابة ممكن ترضيها لأن الحياة فيها احتمالات وخيارات كتيرة و مختلفة ، وماف زول حيديك خريطة حياتك لأنك إنت البترسمها وفي يدك القلم فأصنع الإجابة المناسبة بنفسك. فتجربة شخص من شخص بتختلف وقدرة شخص من شخص بتختلف وإمكانية شخص من شخص بتختلف وظروف شخص من شخص بتختلف إذاً ما كل الحلول حتنفع معاك والنفع مع غيرك ما شرط يدي نتيجة معاك . الحل الوحيد عشان تعالج العقلية دي وتلقى إجابة لكل أسئلتك هو ( البحث/المرونة) إتعلم تكون شخص باحث مرن غير متلقى فقط إتعلم تكون فعل ما رد فعل والحلول البتجيك ما تطبقها بحزافيرها فلترها بالطرقة البتنفع معاك و أخلق لنفسك حلول مختلفة وما ترجى إجابة كاملة لأي سؤال في حياتك أبحث وكمل الإجابة الناقصة بالحاجة البتناسبك إنت . #ماهي

السلام عليكم تم تغيير إسم القناة من (إفراط) إلي مِهاد مكاوي وحنبدأ من الليلة إن شاء الله نواصل في سلسلة المقالات الوقفناها، واي شخص طلب مني إتكلم في موضوع معين ما ناسية بإذن الله حينزل في مقبل الأيام .

والأشدُّ من المعصية، أن ينزعَ اللهُ استقباحَها من قلبِك.