المخفي | تجارب القدرات

وقت الاختبار 🔻 : • اليوم : الخميس • التاريخ : ٦/١٥ • الدرجة : ٩٣ • المصادر : اللفظي ايهاب فقط تدريب والكمي تاسيس وتدريب مع عماد طبعا العراب بيجي منه كثيرررر انصحكم فيه انا اهملته ولما طلعت نسخ لصق • التجربة : اول شي قبببل كل شي علاقتك مع ربك طبعا بيفرق بكللل شي والله ان لو على تعبي ما كان اخذت هذي الدرجه .. انا كنت اذاكر من اجازه اول ثانوي وكنت اناظر التجارب لما كنت ف التاسيس ماكان احد يتكلم عن التعب كانو كلهم يتكلمون عن الناحيه الإجابية والسلبيه والتعب معقوله بس انا احس فيها ؟ لما تعمقت وتعمقت لحظت انا لما الي ف الدورات يختبرون ويقولون تعبهم عرفت ان ذا الشي طبيعي ف انا والله تعبت جداااً اول محاوله جبت ٨٩ ماكانت حلوه مره ثاني محاوله ٩٣ كنت ادعي ب ١٠٠ لكن لعلها خيره مع ان نفسي فيها ادعولي اجيبها فالتحصيلي • نصيحة/ملاحظات : انا كنت اسوف كثييير والله نصيحه هي شهرين التزمو فيها وبتمشي اموركم وبترتاحون والله القدرات سهل اذا تمكنتو من تاسيسه ثاني نصيحه لاتاااااااجلوووون انا وصلت ثالث وكنت اجل واضطريت اختبر غصب عني رغم ان كنت بثاني نماذج ثابته وكان يجوني ناس الله يبيحهم بيمرون عليكم تووو الناس ثاني ! عيدي النماذج مره ومرتين وثلاث الى متى يعني ؟ انا كنت غبيه اسمع كلامهم وااجل ثالث نصيحه واهمهم صلاة الوتر والحوقله وفعل بالاسباب الحمدلله تكفووون ادعولي اجيب ١٠٠٪؜ بالتحصيلي #تجارب_المخفي

وقت الاختبار 🔻 : • اليوم :الاربعاء •التاريخ :  1445/7/26 • الدرجة : 97 ماشاء الله💕 • المصادر : تأسيس وتدريب لفظي : إيهاب تأسيس وتدريب :عماد+المنصف • التجربة : الحمدلله أولا وأخيرا هذا من فضل الله ثم جهدي - القدرات سهل واللي يقول صعب يكذب بس لي الاسف كانت تجربتي سيئه لأني مريت بظروف قويه وقتها بس الحمد لله. كانت مده دراستي سنتين بديت من إجازه اول ثانوي رايح لثاني بديت ادرس اختبرت ورقي ماجبت درجه كويس رجعت ادرس من جديد عدت التاسيس ثلاث مرات و درست لين ما حسيت نفسي توب وكنت حاجزه بشهر 11 قبل اختباري بثلاث اسابيع تعبت مرا ماقدرت اروح اختبر اجلت اختباري لشهر 2 واخذت فتره جدا صعبه وثقيله علي والحمدلله عدت اختبرت وجبت بال80 طبعا كنت متوقعه اكثر بس مرا زعلت ورجعت حجزت مرا ثانيه ورجعتادرس من جديد وتوقعت هالمره تقفيله خلاص لإسف طلعت درجتي 77 زعلت ماتوقعت هالشي يسير وانا بثالث اخر الترم الاول يعني كنت ناويه ادرس التحصيلي بس القدرات خربت علي رجعت حجزت بشهر 7 وانا متأكده انو بربي بعوضيني رجعت ادرس من جديد كاني ما درست من قبل وسويت جدول جديد وغيرت مصادري كتبتها فووقق وتدربت  لين حسيت اني تمام وخشيت الاختبار والحمد لله قفلت • نصيحة / ملاحظات : الصلاه متأكده انه هذا سبب توفيقي 😢 وصلاه والوتر وسنه الفجر حافظو عليها ولاتهجرو القرآن ياجماعه والله انه الله شفاني وفوق ذالك رزقني بالهدرجه 🛑والتأسيس مههمممم جججددااااا 💗💗ولاتنسون تدععوليي بالتححصيلللييي 💗💗 #تجارب_المخفي

ماشاءالله تبارك الرحمن هذا من فضل ربي، اللهم لك الحمد والشكر حتى ترضى وقت الاختبار 🔻 : • اليوم : الاثنين • التاريخ : 29يناير 2024 • الدرجة : ٩٧ • المصادر : الكمي: كتاب المنصف اللفظي: الرابح • التجربة : بدأت أذاكر من كتاب المنصف وكان جميل وشامل وحلو👌🏻، بس نقدر نقول له عيب وحيد وهو: مافي شرح ولو فيه يكون سؤالين في الصفحة مو أكثر، بس لو أنت شخص متمكن من الرياضيات التعليم الذاتي فيه مررة كويس👌🏻👌🏻 افضل شيء في المنصف انه القسم فيه اسئلة تدريب كثيييرة تخلي المعلومة تثبت بالاضافة انه محيط بكل الافكار اللي ممكن تواجهك خلصت تأسيس في شهر وشوية تقريبًا (ضغطت على نفسي وكان اجازة) وقفت فترة لما بدأت المدرسة بعدين بدأت اتدرب على الكتاب الملحق مع كتاب التأسيس كان تجميعات من ١ إلى ١١ خلصت الكتاب وطبيعي جدًا بعد التأسيس تضيع بعض المعلومات بس مع كثرة الحل تثبت‼️ بعدها بدأت اذاكر لفظي غلطت في اللفظي اني شتت نفسي ببعض المصادر بعدين قررت اذاكر من الرابح لان كانت تواجهني مشاكل في دفع دورة ايهاب😢 ما اقول انه قرار سيئ بس مو أفضل شيء! الرابح كويسين بس مو ملمين بجميع الاسئلة رجعت اتدرب كمي لان لو انقطع التدريب رح تتبخر المعلومات👌🏻 اتدربت على ال١٥٠٠ المجانية حقت المنصف وكان خيار جيييد🤩 جاتني افكار مشابهة كثيرة وبعض الاسئلة نفسها بالضبط! بعدها اتيسر لي موعد واختبرت والحمدلله❤️ • نصيحة/ملاحظات : - صلااااة الوتررر أهم شيء‼️. - أدعوا بيقين الاجابة! مافي شيء مستحيل على الله سبحانه وتعالى، وأكثر دعاء كنت ادعيه (اللهم اسألك علمًا نافعًا ورزقًا طيبًا وعملًا متقبلا). - لا تقارن نفسك بغيرك أنت مو هو!، يعني لو انا ناسبني التعلم الذاتي يمكن أنت لا فاعرف نقاط قوتك وبناءً عليها ذاكر. - المذاكرة تأخذ جهد ووقت، لا تستخسر تعب في مستقبلك!، واحتسب اجر طلب العلم. ختامًا، أتمنى اني افيدكم بتجربتي، والله ولي التوفيق دعواتكم لي بال١٠٠ ولأختي ب +A لأنها كانت داعمي الأكبر بعد الله عز وجل❤️ اللهم صلِ وسلم وبارك على سيدنا محمد #تجارب_المخفي

وقت الاختبار 🔻 : • اليوم : - • التاريخ: 1445/7/9 • الدرجة : 98 (ماشاءالله تبارك الله) • المصادر : التأسيس المعاصر ٧ التدريب المنصف اللفظي دورة ايهاب • التجربة : (ماشاءالله تبارك الله❤️) معكم اخوكم محمد حصلت على درجة ٩٨ بعد عناء دام لاكثر من سنة اول شي بتكلم عن مصادري : الكمي التأسيس / كتاب المعاصر ٧ الكمي التدريب / المنصف اللفظي / افضل استاذ لفظي ايهاب عبد العظيم دورة اغسطس ثاني شي بتكلم عن اول فرصة بعد المذاكرة : بعد ما ذاكرت المنصف و ايهاب مذاكرة جّدية و ب إلتزام اختبرت بعد المذاكرة بشهرين و انحجبت درجتي عدت الاختبار بعدها بشهر وبصراحة كنت محبط لاني تعبت بالاخير محجوبة و اختبرت الاعادة بدون مذاكرة معتمد على المذاكرة الي قبل وجبت ٧٤ نستفيد من الاختبارين ذي انه الاستمرارية مهمة ولا تعتمد على مذاكرتك الي قبل بعدها الفرصة الي قفلت فيها ٩٨ ❤️ (ماشاءالله) الفرصة ذي كنت حاس انها التقفيله و واثق اني بقفل على الاختبار بالفرصة ذي جددت الثقة بنفسي بعد الاحباط من الدرجة المحجوبة وذاكرت بجد واجتهاد لمدة شهر ونص وعوضني الله بدرجة اعلى من المحجوبة الي هي ٩٨ وتأكدت انها كانت خيره بعد ما انفكت المحجوبة وطلعت ٨٩ • نصيحة / ملاحظات : بختم قصتي مع القدرات بنصائح سريعة : 🛑صلاة الوتر و الالتزام بالصلاة صدقوني انها سبب من اسباب التوفيق بكل شي التزم فيها وبتشوف التوفيق بعيونك 🛑 عدم التسويف ، صدقوني الاستمرارية سبب من اسباب اي درجة عالية بالقدرات استمر واذا بتقطع لاتقطع اكثر من يومين 🛑 التدريب التدريب للقسم الكمي حاول تتدرب على اكبر قدر ممكن من الاسئلة ومع الوقت بيسهل عليك الكمي 🛑 القسم اللفظي حاول انك تحفظ وتفهم بنفس الوقت وتكرر اختبارات ايهاب و تحل كويزات كثيره وبكذا ان شاء الله ماراح تنسى اي سؤال جاوبت عليه ……… هذا وصلى الله وسلم على نبينا محمد 🤍 #تجارب_المخفي

وقت الاختبار 🔻 : • اليوم : - • التاريخ : 1445/7/17 • الدرجة : ٩٢ • المصادر : ايهاب ركزوااا عليه مره كل الاختبار منه اما الكمي تأسيس من المعاصر وتدريب من المنصف واهم شي تراجع التأسيس بشكل مبسط من فتره لفتره ذا الي ساعدني • التجربة : اول اختبار لي كان ٧٥ والحمدلله جبت الدرجة الي ابيها بفضل الله ثم الالتزام بالصلاة خاصة الوتر واكثر شي كان يخرب علي التشائم وعدم الايمان ان ربي راح يرضيك ولا الاختبار بسييطط مره • نصيحة/ملاحظات : اشتغلوا وانتم ساكتين مره اذا حجزت لا تقول لاحد واذا ذاكرت لا تقول لاحد اذا محد سأل عنك ولا تقول الدرجة الي ودك تجيبها لأحد والحمدلله قفلت على القدرات في اخر محاولة #تجارب_المخفي

وقت الاختبار 🔻 : • اليوم : - • التاريخ : 1445/7/13 • الدرجة : 93 • المصادر : عماد - المنصف - ايهاب • التجربة : السلام عليكم مصادري كانت: تأسيس كمي عماد و تدريب منصف و لفظي كان ايهاب طبعاً تدربت لكتاب المنصف مرتين و النماذج الجديده عدتها مرتين و عماد نماذجه الجديده ايضاً راجعتها مرتين و راجعت كل الاسئله اللي كان عندي اشكاليه فيها ايهاب ذاكرت البنوك و ملفات الاضافه و راجعتهم. وبنسبه لاختباري اللفظي جاني من ايهاب و الكمي جاني من المنصف و لكن فيه كم سؤال جديد علي بس كانو نوعاً مع سهلين. • نصيحة/ملاحظات : نصحيتي: لا تستسلمون لا تستسلمون لا تستسلمون (ربي ما يعطي اصعب معاركه الا لقوى جنوده) حولو حولو حتى لاخر رمق مهما كثرت المصادر و كثرت الضغوطات صدقوني ربي بيسوها لكم 🛑🛑🛑🛑🛑 لا تسوفون ابداً حطو لكم جدول و افضل شي ما يكون فيه ايام راحه لان راح تتثاقلون تكملون 🛑🛑🛑🛑🛑 صلاة الوتر صلاة الوتر والله انها علاج نفسي و راحه نفسيه لكم و تصدقو و كونو على يقين الله ماراح يضيع تعبكم اذا انا قدرت فا باذن الله كلكم تقدرون (الله يوفقكم و يسهل امركم) #تجارب_المخفي

وقت الاختبار 🔻 : • اليوم : الاحد. • التاريخ : 1445/7/09 • الدرجة : 99 لفظي : 97.5 كمي : 100 • المصادر : القسم الكمي : 1-تأسيس من كتاب عماد الجزيري المعاصر 7 بلس 3-تدريب من 140 نموذج بس اول 10 نماذج 2-تدريب من دورة المنصف القسم اللفظي : دورة ايهاب عبدالعظيم اغسطس فقط • التجربة : بسم الله الرحمن الرحيم انا رواد من دفعة 2006 حاصل على درجة 99 في القدرات العامه علمي ماشاء الله تبارك الله ، مدة مذاكرتي ٤ شهور خالصة ، طبعا بدايتي مع القدرات كانت في اول ترم ثاني ثانوي كنت اسمع بالقدرات وانه اختبار تعجيزي مايجيب فيه درجة فوق 90 الا العباقرة والنوابغ ومن ذا الكلام ودخلت الاختبار الاول من دون مذاكرة او علشان الدقه ذاكرت من التيك توك قبل الاختبار بيومين وما استفدت كثير وجبت ٨١ وكانت حافز لي اني ابدأ واشتريت المعاصر ٧ وكنت اذاكر كل يوم ٥ صفحات لين ماخلصته نهاية الترم الثالث ثاني ثانوي وبعدين عدته كامل بالاجازة وبعد ماتغيرت النماذج وكانت صدمه لي لاكن مايأست. محاولة ال٩٥ : بعد نزول النماذج الجديدة ذاكرت اول ١٠٠٨ سؤال بالكمي من عند المنصف وفي نفس الوقت اشتركت مع ايهاب وكانت طريقتي كمي احل الملف في الايباد بحكم اني متأسس صح والسؤال الي استصعبه اشوف الشرح واصوره علشان اراجع وفادتني ذا الطريقة مره ، واما ايهاب كنت اشوف الشرح وثم اختبر الاختبار المحاكي بعده على طول علشان تترسخ المعلومه والسؤال الي اغلط فيه اصوره وعلى هذا الحال الا ان خلصت البنك الثاني وخشيت الاختبار ولله الحمد جبت ٩٥ ورضيت فيها بس سألت نفسي : مادام اني مذاكر صح مالمانع من اني اجيب ١٠٠؟ وحطيت ال١٠٠ براسي لاني حسيت اني اقدر. محاولة ال٩٩ : بعدها سحبت شهر نوفمبر كامل وبعد السحبه ذي كملت المنصف على نفس الطريقة الى سؤال ٢٣٠٠ وكملت ايهاب بنفس الطريقة وخلصت البنوك الثلاثه وملفات الاضافات الاربعة واختبرت ولله الحمد جبت ال٩٩ بفضل الله. • نصيحة/ملاحظات : •الكمي تأسيس ثم تدريب اذا تأسست من حديد وتدربت بشكل مستمر تضمن ال١٠٠ بالراحة والكمي اصحك تسحب لو يوم عليه . •اللفظي ، الاختبارات في دورة ايهاب مهمه جدا جدا انا تقريبا عدت كل اختبار فوق ٨ مرات وترسخت المعلومات بشكل عظيم وتصير تحل بالنظر. •لاتلتفت للي يقول نزلت نماذج جديده والاختبار كان صعب والانحراف المعياري ظلم الي يحطون تبرير لفشلهم انت اسعى والباقي على ربك الشيء الوحيد الي يسوونه انهم يثبطونك. •النوم قبل الاختبار والاكل قبل الاختبار مهمه لازم تروح وانت في عز تركيزك. وبس والله بالتوفيق للجميع دعواتكم لي بالتحصيلي❤️💯 #تجارب_المخفي

وقت الاختبار 🔻 : • اليوم : ٣١/١/٢٠٢٤ • تاريخ الاختبار : ٢٤/١٢/٢٠٢٣✨✨✨ • الدرجة : 92 • المصادر : اللفظي :دورة ايهاب يناير -الكمي:المنصف • التجربة : بسم الله اخيرا جا اليوم الي اقدر اكتب فيه محاولتي انا طالبه ثالث ثانوي و الحمدالله قدرت اقفل ع قدرات بـنسبة فوق ٩٠ بحكم اني ابي مسار صحي و كان حلمي فوق ٩٠ وانبسطت وفرحتتت مره يوم جبت هالدرجة يعني ماتوقعت للامانه بصير بتسعين مع نماذج الجديده حرفيا فا بديت اتاسس بشهر ٧ والي هو يوليو ب اجازه ثالث ثانوي ولاسف بديت اذاكر للقدرات ع باب نماذج الجديده و كنت ناويه اختبر بدري و زمان بس كان ايهاب اذكر كل مره منزل بنك جديد و اروح أجل اختباري و اختبرت يوم نزل الاضافات ٤ بعده ب ٤ ايام بس الحمدالله لحقت عليه وذاكرته😭 لامانه المنصف ختمته مرتين و ايهاب ختمته ثلاث مرات بس مشكلتي بلفظي اني انسى و محد جاب فيني العيد غير اللفظي لاني انسى كثيرر بس الحمدالله قدرت ادخل تسعين و هاذا شي مره مبسوطة فيه باقي لي محاوله وافكر اعيد دعواتكم لي و اني اجيب ب تحصيلي فوق ٩٨💞💞💞💞💞 • نصيحة/ملاحظات : اول نصيحة تكفون لا تسمعون كلام ناس او نماذج جديده وصعب و معياري اجتهدو وربي يرزقكم الدرجة💙 #تجارب_المخفي

وقت الاختبار 🔻 : • اليوم : - • التاريخ : 1445/6/22 • الدرجة : 94 • المصادر : ايهاب - المنصف - المعاصر • التجربة : طبعاً صدمة وانهم ماحجبوها الحمدالله اول شي المصادر ايهاب المنصف وتاسيس المعاصر مدة المذاكره للاخيره شهرين فقط ذاكرات البنوك اكثر من مره والاختبارات مهمه المنصف فهمته فهم وذاكراته ٣ مرات • نصيحة/ملاحظات : حابه اقولكم لاتستسلمون الموضوع يبي له وقت وصبر وايمان قوي خلوكم واثقين من نفسكم اهم شي والوتر والوتر والوتر مره من اسباب السعي دعواتكم لي في التحصيلي 💯 #تجارب_المخفي

وقت الاختبار 🔻 : اليوم : الخميس • التاريخ : 1445/5/27 • الدرجة : 92 • المصادر : ايهاب عبدالعظيم للفظي, عماد الجزيري للكمي, المنصف للتدريب • التجربة : بسم الله الرحمن الرحيم ( يرفع الله الذين آمنوا منكم والذين اوتوا العلم درجات ) صدق الله العظيم ياطلاب القدرات, يا ابطال المخفي, يانور امتنا وياسراجها المنير, وياشمسها المضيئة, وياقمرها العاكس..في ليلتها المظلمة السلام عليكم ورحمة الله وبركاته, اما بعد, انا الطالب علي. الحاصل على درجة 92 في المحوسب و90 في الورقي ولله الحمد واني ما حصلت على هذه الدرجة بما عملت, بل بما وُفقت اليه, وللامانة انا تاخرت جدا في البدا واختبرت في ثاني ثانوي "تجربة" وللامانة ما انصح احد يسويها وطنشت القدرات لبرهة من الزمن "ريثما استعد" بينما كنت اضحك على نفسي مستهزئا بها فبينما كان زملائي يدرسون كنت غارقا في لهو عقيم. مع بداية ثالث ثانوي شحذت نفسي واتخذت الحزم والعزم وخلصت التاسيس ( معاصر 8 ) وتدربت على النماذج 140 + اصدارات عماد + بنوك المنصف, وايضا حفظت جميع بنوك ايهاب + ملفات الاضافات فأنجزت في ذلك الكثير والكثير, فذهبت للاختبار وكان زملائي يعدونني اني لن اتعدى ال90 وقد وعدوني انني لن اتجاوز ال90 لان القدرات صعبة "بحجة تغيير النماذج" والله جل جلاله وعدني بأن اتخطى حاجز ال90 واحصل على مرادي من الدرجات (وكان وعد ربك اصدق قيلا) فلا تجعل الانحراف معياري عذرا ولا اهمال معلميك في تلقينك للمعلومة حجة تتحجج بها ولا ظروفك الحياتية سببا تستعمله ولو ان ماسبق ذكره قد يعيقك من الوصول للدرجة التي تريدها, الا انها لاتستطيع كسر جناحي طالب واثق بالله, ونعمًا بالله. والله اكبر فوق كيد المعتدين والسلام خير ختام. • نصيحة/ملاحظات : اني لانصحكم-يامعشر الطلاب- بنصائح ثلاث: ان لاتهنوا ولا تحزنوا واعلم-يارعاك الله- ان المذاكرة سبب, وان اجتهادك سعي, وان عملك طلب. فلاتعتمد على السبب وتترك رب السبب ( سبحانه وتعالى ) فالثقة بالله نجاح. فأما فيمن اراد ان انصحه او اوجهه, او ان ياخذ مني رأيًا في مسالة ما, فلاتجد في صدرك ضيقا ان تراسلني على معرفي: @alihajim22 #تجارب_المخفي