سعود الشطيطي

ياللله بمطلوبن يكف المطاليب وبدعوة منها تحل الدعاوي حنا عبيدك مالنا عنك تجنيب ومعلقين في عطاك الرجاوي والله ماندري ويش ينقل لنا الغيب من لوحك المحفوظ وامرك سماوي اجعل لنا في حبال لطفك مقاضيب من فتنة فيها تضيع الفتاوي ويالله بغراً كن في وجهها شيب من ثقل مافيها ثقيلة خطاوي وسميةٍ ماها يجي من فري جيب مدة غنيٍ عن عباده غناوي بروقها مثل السيوف المحاديب ولرعودها منها وفيها تعاوي مجر ماها مع مجر الاداعيب مجر بوزٍ مع مطف المهاوي يا جعلها على هوى شمخ النيب من نجد الانجد لين حدر الصداوي واشمل لدار مكملين المواجيب للجوف وسكاكا وهاك الحراوي عشرين لليل ولا بقى روض وشعيب الا من المدات والخير راوي لين العشوب ترتب الارض ترتيب ولا عاد للناقه حنين جزواي تلقى النفل ريحه مثل ريحة الطيب من خنته يجلا عمس كل خاوي ولا اومت بروس القيقلان الهباهيب سبيب صفرا في نهار العزاوي شهرين مافيها شديد وهناديب من وين وجهت الربيع متساوي واللي يجي ويروح ويعود ويغيب ومن كثرة الاشغال ماهو فضاوي عقب البطا لا جاء يشوف التعاجيب وفيما يشوفه ماتفيد الحكاوي اليا نشدوه عن الديار الاصاحيب يقول ذي وصفة طبيب مداوي من المرا .. كن العبس فالعراقيب دبسٍ على التمر الخلاص الحساوي

البارحه ما للمعاذير مخراج وكل الكلام اللي على البال .. بالي عدلتها لين انعدل كل منعاج وانا ورى البرج المطل الشمالي فوقي مصابيح السما كنها عاج لو معكست فوق البسيطه ظلالي رجلي على مله وقلبي على صاج وخلتني احداث الزمان انفعالي محتاج لي حاجه ومحتاج واحتاج وقفة رفيقٍ للرفيق الموالي لو ان مابين المعاليق مزلاج علقت مشروهي على كل غالي اللي دفنته فالبحر تحت الامواج واللي كشفته ماكشفَتْه الليالي لاشفت لي لوحات ممنوع الازعاج ذكرت شي يصطفق في خيالي ضجيج واحداث ومواقيف واحراج وعقدة شغف جتني مع الوقت تالي ولا زال ابو سيره وابو عين وحجاج طاريه يشرح خاطري لا طرالي لو شاف مطروه اليا جا وانا ساج علي مامارس غرور التعالي جرحه بقلبي مايبي طب وعلاج اليا هداه الله ورد اتصالي محتاج لي مع صوته العذب منهاج مليت من كثر المساري لحالي

في ليلة كان فيها فص ضحكه وذاب من يمسح الدمع من عيني ومن يحبسه سريتها والمساري ماتحن الركاب ولا يحن الشعور جروحه المرمسه اخطاي بين الخطا واول طريق الصواب تحطني بين حد العقل والهلوسه لا ياوجودي وياكبر الوجع والمصاب تبطي عليه السنين تمر ماتطمسه على سمية مطر و اول عزيزة جناب فراقها جمرةٍ حمرا ورى الاقوسه مالله كتب للبلوغ وعمر سن الشباب تمر له بالدلع والكبر والغطرسه ريحانةٍ يوم فاح الطيب منها وطاب على اول الالف باء واول سنه مدرسه كان القدر يحتريها اسبوع مع كل باب الين غابت وغيّب شمسها المشمسه فستانها الابيض اللي مثل لون السحاب مالله كتب في زواج اخت امهّا تلبسه كنت احسبني ماشوف الابيض من الثياب الا عليها ف ليلة عرسها معرسه ماكنت احسب الكفن بيصير قطعة عذاب واغلا ماغطا جسد ديم المطر وانفسه حطو عليها النصايب لين صار التراب يحول بيني ومن بين الكفن لا المسه والله يلولا الصبر والاجر والاحتساب لا اقعد على قبرها اللي ضمها واحرسه

لاتشره ترا مشروه مثلك ثقيل ولاتوصي والى جتك القصيده توّص كم غدا من كثير وكم غدا من قليل وكم غدالي ثمين وكم غدالي فرص احمد الله ماهي من تحت يمنى بخيل واحدٍ كل ماجات المواقف ملص القلوب النبيله والشعور النبيل وجهه ابيض من المبدا ماهو من برص من يدور وفانا نبذل المستحيل في رضا كل راعي طيبه ونحرص ولاندور ورا بذل المكارم حصيل للحى دهن عود وللشوارب مقص لاسرينا مانبغى فالمساري دليل ولاضربنا يوقع ضربنا في مفص والمهونه على راس الردي والذليل حاشرته العلوم الخايبه في قفص حطها قدم عينك لاتحط وتشيل شجرة ماتظلل قصها وتخلص اعتبرها خطا وانا اعتبرها جميل شرها مايعم وخيرها مايخص

وشلون اسوق لك المعاذير وانت تعرف ثقلي وخفّي انا على مافات وبخير والمقبّل اللي مايقفّي ان غبت في شف المغاتير وان جيت في شفك وشفي عطني مايُعطون المسايير من الكرامه والتحفّي كرامة الاحباب تقدير والكلمتين اللي تدفي اما المعاميل المباهير مقابلك عنها يكفي واللي عليهّن الازارير البّينات من التخفّي ودي لاجيت من المشاوير اول مخامسها بكفّي

ماعاد لا ايامك ولا سيرتك ذوق عليك من صوت المشاريه داعي كانت ممراتك على الارض من فوق اتزين من ماطا حميد المساعي وهالحين لا منطق ولا منك منطوق وضحكك ليا جيتك بوجهي صناعي ماتدري ان لي عام من جمرة الشوق وانا على وجهي ووجهت ضياعي لو مانكسر من حزن الايام معلوق ماكان ذا طبعي وهذا انطباعي

لا اخطيت في حق العيون المظاليل منك السموحه يالغزال المذيّر انا ماعرف الا علوم الرياجيل ومن الصلف ماني ب اعرف اتغيّر خشونتي جتني من الحط والشيل ماهو ب من تبع الظلال القصير الحق مساريح النهار اخر الليل حتى عرفني كل خطٍ مقيّر من وادي العجمان لين اصل السيل ومن كل دار وديرتن تنديّر تربطني علوم الوفا بالحلاحيل وخير واحب اللي من الناس خيّر واليا لقيت من الفرص للتعاليل قضيتها في مرتع ام الحويّر من وين اجيب من النعومه محاصيل وانا لا شفت الناعمين اتطيَر لو اني ارجع للغزل والمراسيل صيرت لك شي ماهو ينتصيّر مع انك معنق ووجه وتفاصيل يحير معها اللي ماعمره تحيّر لكن لوعات الهوى والبهاذيل متشبعن منها يوم اني صغير

يالله بجودٍ منك ياراعي الجود خزاينك عن مد غيرك ملايا يامدبر افلاكك ويامسير النود ياواحدٍ مانت ب تمن العطايا باللي قديحتها مثل قدح بارود ولرعودها لجه من اربع زوايا غراً مقادمها وطرافها سود تسوقها رحمتك سوق المطايا تستر ذوايبها علو شامخ الطود و تروح منها الارض مثل المرايا لا أنهل مافيها من الثقل والزود يظهر من بيوت الخشاش الحيايا جعله على دار يبس فوقها العود ومن الظما حتى شجرها عرايا عشرين ليلٍ ماعن الخير منشود مداقشه فيها مداقش سرايا وسم تباشيره لها وقع وشهود ومن رحمة الله رحمةٍ للبرايا اول خضاره في مطامين وحيود ومسايل الماء مع مجر الشغايا واليا اشتبك مع كل عنقود عنقود وجاء للربيع اللي يبشر تهايا تقول وجه الارض بالزل ممدود على زماليقه تطيش الرعايا مخلي حوار البدو تقل مفرود ومن الطغى كن الحقايق لقايا تفرح به البدوان قناية الذود اللي يحبون الولع والمعايا في شفها تبذل لها كل مجهود وعلى وناستها ماتبغى وصايا بدو بدواتها على عد وجدود من يوم كانت فوق جرد السبايا واللي ورثها ورث من جده العود ماهو ب مثل اللي جمعها هدايا

يانجد عذري لك على الوجه مشروح ان ماقبلتي به فلا تنكرينه عندك خبر لاجيت الاطلال ماروح الا بصدري جرح ولا غبينه وانا ادري ان مالك ورا الوضع مصلوح وسليمة الثنتين ظلم وضغينه اعاملك معاملة مبعد الشوح يشوفك بقلبه قبل شوف عينه وتعامليني مثل طيرٍ لطاروح وعلاقته بينه وبينه متينه ان طار معواده على ماكر اللوح وان عاد قفى برقعه في يدينه يملا عيونك كل طيب وطحطوح واللي ماهو رجال تستحقرينه مادري وش أعيّن من الوجد والبوح وانتي غلا الشعار تستاهلينه جعل امنيات العمر وأيقونة الروح غيداً تمرك من جنوب المدينه لا مرتك جاء لي على بالها ضوح وتذكرت لو ذكرياتي حزينه حبيتها وانا عن الحب منصوح وبريتها بر الولد والدينه لكن جاء فالحب والوصل ساموح والحب زين وعزة النفس زينه ماودي اجرحها ولو كنت مجروح قلت الغلا سوي به اللي تبينه وراحت وخلت باب الامال مفتوح حتى كلا قلبي عليها حنينه وراع الهوى لو يستر الحب مفضوح ادنات شي يمر يظهر خزينه معلمك مامر الاطلال واروح الا بجرح وضيق صدر وغبينه

غاب نور الشمس والليل الطويل من الليالي اعرفه لا هو ب لاهادي ولا انسامه لطيفه عاد انا اللي مامعي حيله ولاصدري شمالي واقدر اصغّر مساحاته وسطوته العنيفه ودي ان شخصيتي شخصية الشخص المثالي ماتغير فالامور الكايده ولا الخفيفه صايرٍ من صكة الدنيا يروعني ظلالي دمعي اسبق من وميض البرق وعروقي صخيفه واقعي فالواقع اللي صرت اعيشه في خيالي الوهم فالواقع الملموس واشياه السخيفه حدة الاحداث حدتني على العيشه لحالي لين حدت من طموحاتي وانا احلامي شريفه ياوجودي ياول ايامي وياشيً طرالي وذكرياتن ضربها في داخلي مضرب قذيفه ياعفيفه لاتحسبينه جفا ولا تعالي وانتي ادرا وش معي من كثر حبك ي عفيفه اسمحي من بعض ماعندي ومن قل اتصالي لا ترجّين السنين المجدبه وانتي مريفه لو أبضمن ضحكة شفاهك تمرك من خلالي سقت عمري في رضا وجهك وسيرتك النظيفه مير انا جرحي ماهو خافي وميلي واعتدالي تعرفيني زين لاهافي ولا نفسي ضعيفه ويش اقول وعقب مات ابوي واعزي لحالي طايحٍ من جملة احلامي عقب مات النصيفه

ياضيفنا حقك من البن والهيل واللي نحطه ماندور مديحه على السلوم الاوله جيل من جيل الطييه والواضحه والصريحه ولا لنا ورا الكرامه محاصيل الا نبا الستر ونخاف الفضيحه من خوف لا يلقى علينا مداخيل الناس ماهي من بعض مستريحه لاتحسب انك للسمر والتعاليل اغلا نديمٍ يستثير القريحه لاخذت ماجوبك ف اسر ف اول الليل واسرج حصانك فوق الارض الفسيحه حنا مجالسنا مجالس رياجيل ماهيب للمترديه والنطيحه لاتقعد تحط السواليف وتشيل وتصب في بطن الجميله قبيحه أللي يحب النم والقال والقيل يقطع لسانه مثل راس الذبيحه