Беларускі ПЭН

Старшыня Беларускага ПЭНа Таццяна Нядбай на 100-годдзі Васіля Быкава ✨ 19 чэрвеня споўніцца 100 гадоў з дня нараджэння народнага пісьменніка Беларусі і аднаго з заснавальнікаў Беларускага ПЭНа Васіля Быкава. Цэнтр Беларускай Салідарнасці запрашае адзначыць гэтую дату 23 чэрвеня ў таварыстве беларускага літаратара Уладзіміра Арлова. Спадар Уладзімір, які добра асабіста ведаў Быкава, правядзе захапляльную экскурсію па творчым свеце беларускага класіка. Падчас імпрэзы Таццяна Нядбай прачытае фрагменты ўспамінаў Карласа Шэрмана пра Васіля Быкава з кнігі «Блуканец. Апошнія ўспаміны». Пра саму кнігу можна прачытаць на старонцы Таццяны. Таксама вас чакаюць: 〰️ Новыя факты і нечаканыя ракурсы жыцця і творчасці Васіля Быкава; 〰️ Жывы голас народнага пісьменніка Беларусі; 〰️ Быкаў як мастак; 〰️ Прэзентацыя новай кнігі Быкава «Бліндаж» з удзелам выдаўца, кіраўніка фонду Kamunikat.org Яраслава Іванюка; 〰️ Кніжны кірмаш. ⏰ 23 чэрвеня, 17:00 📍 Цэнтр беларускай салідарнасці, Oleandrów 6/2, Варшава ❤️ Уваход вольны!

👩‍🎓 Вакансія ў Германіі: PhD даследчыца ці даследчык па ЛГБТК+ літаратуры падчас сацыялізму Даследчая група «Light On! Квір-літаратура і культура пры сацыялізме» прымае заяўкі на пасаду PhD даследчыцы ці даследчыка па ЛГБТК+ літаратуры падчас сацыялізму. Фокус: квір-сацыялістычная літаратура Ўсходняй Еўропы 1950-1980-х гадоў. Магчымыя краіны: Грузія, Арменія, Азербайджан, Украіна, Малдова, Беларусь, Эстонія, Латвія, Літва, Югаславія, Албанія, Польшча, Венгрыя, Балгарыя, Чэхаславакія, Румынія. Заяўнікі павінны добра ведаць мову(-ы) сваёй мэтавай краіны(-н) і размаўляць на адной з працоўных моў даследчай групы (англійскай або нямецкай). Для гэтай пасады абавязковы пераезд у Германію. Няпоўны працоўны дзень (65%), тэрмін найму — 3 гады. 👉 Падрабязнасці шукайце тут. 🥐 Дзякуй за інфармацыю тэлеграм-каналу Birananka.

Алесь Бяляцкі на пасяджэнні Камітэта перакладаў і моўных правоў Міжнароднага ПЭНа У Фінляндыі праходзіць штогадовае пасяджэнне Камітэта перакладаў і моўных правоў Міжнароднага ПЭНа. Камітэт падтрымлівае ўсе мовы і літаратуры, спрыяючы ўзаемадзеянню паміж культурамі і дапамагаючы мовам, якія знаходзяцца пад пагрозай знікнення. ❤️ На сустрэчы ў бібліятэцы мястэчка Івала прысутнічаў і Алесь Бяляцкі з дапамогай традыцыі ПЭНа «Empty Chairs» («пустыя крэслы») для тых, чый голас не можа, але павінен гучаць. Дзякуем Міжнароднаму ПЭНу за падтрымку беларускіх Людзей Слова ў няволі і за магчымасць гучаць іх галасам па ўсім свеце. 🔖 Даведацца больш пра Алеся Бяляцкага. 💌 Адрас для ліставання: Аляксандру Віктаравічу Бяляцкаму, ПК № 9, вул. Дабралюбава, 16, 213410, г. Горкі, Магілёўская вобласць.

Прадстаўляем удзельніц і ўдзельнікаў літаратурнай сцэны! Анхела Эспіноса Руіс прэзентуе свой новы зборнік вершаў «Астралябія Божых таямніц». Анхела – паэтка з Малагі (Іспанія), якая піша паэзію па-беларуску. Як так атрымалася? Чытай наша нядаўняе інтэрв’ю з Анхелай на сайце. На музыку вершы Анхелы пакладуць Юстына Карпіловіч і Зміцер Бартосік: гэта будзе касмічна! «БЛІЖЭЙ ДА ЦЯБЕ» – літаратурная сцэна на Hučna Fest. Сёлета яна прысвечаная беларускай жаночай і квір-літаратуры. Чаму? Жаночая і квір-літаратура гучыць БЛІЖЭЙ ДА ЦЯБЕ, бо яна смелая і разнастайная, лёгка эксперыментуе з новымі формамі, ідзе на нестандартныя калабарацыі, працягвае табе руку там, дзе ты ёсць. Чытай пра ўвесь фэст тут. Захоўвай дату і сустрэнемся на фэсце. Пачуй сваю літаратуру! ❤️ ⏰ 29 чэрвеня, 13:00-17:00 📍 Варшава, на беразе Віслы каля Музея сучаснага мастацтва (Wybrzeże Kościuszkowskie 22) 💃 Музычная праграма будзе доўжыцца да 22:00

У паэткі і сябры ПЭНа Юлі Цімафеевай выходзіць новая кніга 🥑 Кніга на беларускай і польскай мовах «Аўтапартрэт у выглядзе костачкі авакада» выходзіць напрыканцы чэрвеня ў люблінскай выдавецкай серыі Wschodni Express. Пераклад на польскую мову зрабіў паэт Богдан Задура. Гэта другая польская кніга-білінгва Юлі Цімафеевай. У яе ўвайшлі вершы са зборніка «Воўчыя ягады», а таксама новыя вершы, якія не друкаваліся нават па-беларуску. 🎈 Прэзентацыя кнігі з удзелам Юлі Цімафеевай і перакладчыка Богдана Задуры адбудзецца 30 чэрвеня ў Любліне ў межах фестывалю Inne Brzmienia.

🔏Працягваем хроніку парушэнняў правоў чалавека ў сферы культуры. На 31 траўня 2024 года: Людзей Слова ў няволі – не менш за 38, дзеячаў культуры ў няволі – не менш за 158. 📍 Следчы камітэт распачаў крымінальную справу ў дачыненні да 104 удзельнікаў святкавання Дня Волі за мяжой. 📍 Затрымана доктарка, пісьменніца, перакладчыца Алена Церашкова. 📍 У дачыненні да палітзняволенага Змітра Дашкевіча распачалі новую крымінальную справу. 📍 У Магілёве пачаўся суд паводле крымінальнай справы мастачкі-керамісткі Алены Карпенкі. 📍 Пачаўся завочны разгляд крымінальнай справы ў дачыненні да 20 незалежных мысляроў і даследчыкаў. 📍 Затрыманы акцёр Тэатра юнага гледача Аляксандр Гладкі. 🗝 Больш інфармацыі пра затрыманні і арышты дзеячаў культуры, умовы ў месцах пазбаўлення волі, звальненні за грамадзянскую пазіцыю, катаванні зняволеных чытайце на сайце ПЭНа. Падтрымаць нашу дзейнасць на Patreon🔖

Тры творчыя магчымасці для літаратарак і літаратараў І. Рэзідэнцкая праграма ў Ісландыі Працягваецца набор на рэзідэнцыі ў «Гарады літаратуры ЮНЕСКА». Гэтым разам можна правесці пару тыдняў у кастрычніцкім Рэйк’явіку. Неабходна мець прынамсі адну выдадзеную кнігу і добра валодаць англійскай. Абяцаюць аплату праезду, пражывання і стыпендыю 650 еўра. ⌛️ Дэдлайн: 14 чэрвеня 👉 Падаць заяўку. ІІ. Incubate – рэзідэнцыя ў Вялікабрытаніі Шукаюць дынамічных і сацыяльна заангажаваных мастакоў-пачаткоўцаў з любой дысцыпліны, у тым ліку літаратуры, на рэзідэнцыю ў Leith Hill Place. Працягласць – 3 месяцы са жніўня па кастрычнік 2024 года. Прапануюць пражыванне, стыпендыю 1000 фунтаў і падтрымку ў прасоўванні створаных прац. ⌛️ Дэдлайн: 23 чэрвеня 👉 Падаць заяўку. ІІІ. Witkacy pod strzechy – тэатральна-літаратурны фестываль у Польшчы Міжнародны конкурс інтэрпрэтатараў твораў Станіслава Ігнацыя Віткевіча «Witkacy pod strzechy» запрашае да ўдзелу. Конкурс мае грашовую прэмію! ⌛️ Дэдлайн: 9 жніўня 👉 Падаць заяўку

Новая кніга Віктара Жыбуля 🍊 У паэта і перформера Віктара Жыбуля пасля вялікага перапынку выйшла новая кніга «Аранжавы». Папярэдняя выдавалася восем гадоў таму. Кніга выйшла ў выдавецтве Дзмітрыя Строцава «hochroth Minsk». Ілюстрацыю намаляваў Кастусь Жыбуль. Некаторыя вершы з кнігі спачатку з’явіліся ў тэлеграм-канале «Viktar z Bum-Bam-Litu», у якім паэт выкладае свае творы розных гадоў. 📮 Замовіць кнігу «Аранжавы» можна ў выдаўца, напісаўшы на адрас: [email protected]

Сёння дзень народзінаў адзначае сябра Беларускага ПЭНа Кася Іофэ! Кася Іофэ – паэтка, перакладчыца, псіхатэрапеўтка, арганізатарка мерапрыемтваў у сферы культуры. Аўтарка паэтычных кніг «Белы леў» (2011), «Калі дрэвы растуць з галавы» (2013), «Шыба без шкла» (2023). Таксама Кася – заснавальніца фэсту «Культура ў эміграцыі». Адна з галоўных арганізатарак фэсту Letucień. Ад 2023 года заснавальніца і старшыня Беларускага таварыства «Крок» у Кракаве. Каб больш даведацца пра творчасць Касі Іофэ: ⭐️ чытайце інтэрв'ю з ёй у часопісе сучаснай беларускай паэзіі «Taubin»; ⭐️ слухайце песні на словы Касі ў аўтарскім выкананні; ⭐️ чытайце яе пераклады паэзіі для праекта «Rozstaje». Фота: Gosia Kawka

БЛІЖЭЙ ДА ЦЯБЕ. Літаратурная сцэна на Hučna Fest 🔥 29 чэрвеня ў Варшаве пройдзе вялікі Hučna Fest з сучаснай літаратурай і мастацтвам, актуальнай беларускай музыкай і актывізмам. Арганізатар – Free Belarus Center. Беларускі ПЭН ладзіць сёлета на фэсце літаратурную сцэну «БЛІЖЭЙ ДА ЦЯБЕ», прысвечаную беларускай жаночай і квір-літаратуры. Вядоўцай стане актрыса, сузаснавальніца праекта «Кніжны воз» Крысціна Дробыш. 🍀 У літсцэне бяруць удзел Света Бень, Анхела Эспіноса Руіс, Ганна Кандрацюк, Наста Кудасава, Ганна Янкута, Уладзь Гарбацкі, тоні лашдэн і Артур Камароўскі. Чытай падрабязней у картках і сачы за абнаўленнямі на нашым сайце. На фэсце будуць працаваць кніжныя стэнды беларускіх выдавецтваў і стэнды НДА. На музычнай сцэне выступяць «Разбітае Сэрца Пацана», «LEIBONIK», «NOCHI» і «Syndrom Samazvanca». Захоўвай дату і сустрэнемся на фэсце! ❤️ ⏰ 29 чэрвеня, 13:00-17:00 📍 Варшава, на беразе Віслы каля Музея сучаснага мастацтва (Wybrzeże Kościuszkowskie 22) 💃 Музычная праграма будзе доўжыцца да 22:00