پرویز شاهمرسی

با سلام. در دور اول به آقای مسعود پزشکیان رأی دادم. در دور دوم نیز چنین خواهم کرد. انتظار معجزه ندارم و از همه دوستانم خواهش می کنم در شرایط کنونی، با رأی دادن به ایشان، کورسوری امید را روشن نگهدارند.

#داستانلاریمیز «شو» داستانی (3): بو دوروم ائلی چاشیرتدی. خاقانین، گوندوزون هئچ بیر گؤتوره لیکده ‏اولمادان بئله گئجه چاغی کؤچو باشلاتماسی اوزرینه قوخدولار. اللرینه نه ‏کئچدی ایسه توپلاییب، تاپدیقلاری آتا آتلایان ائل، خاقانلا بیرلیکده یولا ‏دوشدو. ‏ دان آغاراندا بایلادا هیچ کیمسه قالمامیشدی. بوم بوش، دوم دوز بیر اووا ‏گؤرونوردو. ‏ بوتون ائلین، خاقان «شو» نون آردیندان گئتمیش اولماسینا دورا دورا ، گئجه ‏چاغی مینه جک هئچ بیر مینیک تاپمایان ایگیرمی ایکی کیشی، نه ائده جگینی ‏بیلمه دن «شو» قالاسیندا قالمیشدیلار. ‏ بو ایگیرمی ایکی کیشی، نه ائده جکلرینی دوشونرکن، یانلارینا داها ایکی ‏کیشی گلدی. قاب قاجاقلارینی توپلاییب، سیرتلارینا یوکله ییب، ائله ‏داشیییردیلار. یورقون ایدیلر. آنجاق هئچ دوراجاغا بنزه میردیلر. اؤنجه کی ‏ایگیرمی ایکی کیشی، بو یئنی گلنلره دئدیلرکی بیر یئره گتمه ییب، اونلار ‏کیمی بورادا قالیب گؤزله سینلر. آیریجا:‏ ‏-اسکندر دئدیکلری هر کیم ایسه بورادا اوزون سوره قالا بیلمز. گلدیگی ‏کیمی گئری دؤنوب گئدر. بوراسی بیزیم یوردوموز، یئنه بیزه قالار، دئیه ‏برکیدیلر. ‏ بو اوزدن بو ایکی کیشینین آدی (قالاچ) اولوب قالدی. بو ایکی کیشیدن ‏اولان اوشاقلاری تورونلاری (قالاچی) آدی ایله تانیندیلار. آنجاق بو ایکی ‏کیشی، اؤتگی ایگیرمی ایکی کیشینین سؤزلرینی دینله مه دیکلری، بوراخیب ‏گئتدیکلری اوچون اسکندرین گلدیگینی گؤرمه دیلر. ‏ اسکندر گلیب ده، اوزون ساچلی ایگیرمی ایکی کیشینی گؤرونجه: «تورک ‏مانند» دئدی. «بونلار تورکه بنزه ییرلر.» دئمیشدی. بو اوزدن ایگیرمی ایکی ‏کیشینین سویلارینین آدی، تورکمن اولاراق قالدی. گئدن ایکی کیشی ‏گئتدیکلری اوچون تامی تامینا تورکمن ساییلمادیلار. ایگیرمی دؤرد بویدان ‏ایگیرمی ایکیسی تورکمن، قالا ایکیسی قالاج دئیه بیلیندی. ‏ بو اولایلار گلیشه دورسون، اؤته یاندان «شو» خاقان اوردوسو ایله یانیندا ‏گئندلرله بیرلیکده چین سینیرینا ‏ کیمی یوروموشدولر. چینه یاخین اویغور ‏ائلینه واردیقلاریندا «شو»، اسکندری آرتیق قارشیلایا بیله جک دورومدا ‏اولدوغونو، اونو اؤز اؤبگینده ‏ چوخ اوزاقلارا چکدیگینی، اؤز سویداشلاری ‏آراسیندا اولدوغو اوچون اسکندردن داها گوجلو بیر دوروما گلدیگینی ‏دوشوندو.‏ @parvizshahmarasi

#داستانلاریمیز «شو» داستانی (2): خاقان «شو» نون بیر قالقا ‏ وار ایدی، گوموشدن ایدی. بو ایشدن چوخ ‏یاخشی آنلایان اوستالارا یاپدیرمیشدی. هر یئره داشینابیله جک بیچیمده ‏ایدی. بونون اوچون خاقان دا گوموش قالقانی، سفره بئله چیخسا یانینا آلیر، ‏قوناقلادیقلاری یئرلرده اوچون سو دولدورور، قازلاری اؤردکلری سو دولو ‏گوموش قالقایا سالار، اونلارلا اویالانیب، اگله نیردی. ‏ قازلارین اؤردکلرین گوموش قالقادا اوزوشلرینی سئیر ائتمک خاقانی ‏دینلندیریر. دینله نیر ایکن سفرله، ائلینین گله جگی ایله ایلگیلی تاساریلاری ‏ ‏قوروردو.‏ چووچولار گلدیکلری چاغدا، گوموش قالقاسیندا اوزن اؤردکلری ‏قازلاری سئیر ائدیب، دینله نیردی. چووچولارین:‏ ‏-نه بویورورسان؟ اسکندرله ساواشاق می؟ دئیه سوروب بویروق گؤزله ‏دیکلری اوزرینه اونلارا قالقانی، قالقادا اوزن قازلاری اؤردکلری گؤستردی:‏ ‏- گؤرورمیسینیز؟ قازلارلا اؤردکلر سودا نه گؤزل اوزورلر، نئجه دالیب دالیب ‏چیخیرلار؟ دئدی. ‏ چووچولار، خاقانلارینین بو سؤزونو تانقاق ‏ قارشیلادیلار. اونا قوشقو ‏ ایله ‏باخدیلار. «هر حالدا خاقانیمیزین هئچ بیر گؤتوره لیگی ‏ یوخ. نه ائده جگینی ‏بیلمیر.» دئیه دوشوندولر.‏ آنجاق او سیرادا، اسکندر خجند ایرماغینی کئچمیشدی. گئجه یارییا دؤنوردو. ‏خجند ایرماغینین قیییلاریندا گؤزچولوک ائدیب کئشیک وئرن گنج خاقانین ‏ان گووندیگی قیرخ ایگیت، ایلدیریم کیمی آتلانیب «شو» قالاسینا گلدیلر. ‏گئجه چاغی اسکندرین خجند سویونو کئچیب، بالاساغون یولوندا ایره لیله ‏مکده اولدوغونو «شو» یا یئتیردیلر. ‏ داها اؤنجه کی چووچولارین چوولارینی دینلرکن، توکو بئله ترپشمه ین ‏خاقان «شو»، ایگیتلرین سؤزو اوزرینه چال چاپیق ‏ گئجه یاریسی کؤچ ‏داوولونو چالدیردی. داوولون چالینماسی ایله بیرلیکده، دوغویا دوغرو یئیین ‏یولا چیخدی.‏ @parvizshahmarasi

#داستانلاریمیز «شو» داستانی (1): ‏«شو» قالاسی، بالاساغون یاخینلاریندا، گنج بیر خاقان اولان «شو» الی ایله ‏دوزلمیش بیر قالا ایدی آنجاق خاقانین سارایی بالاساغوندا ایدی. قالا ایله ‏بالاساغون دا، او چاغلارین ان گوجلو، ان بؤیوک اوردوسو اولوردو. بایلا ‏ ‏زنگین ایدی. ائله کی هر گون، شو قالانین سارایی نین اؤنونده، اوردو بیگلری ‏اوچون 365 نؤبت وورولوردو. ‏ بو سیرالاردا، بیر آدینا دا ذوالقرنین دئییلن مقدونیه شاهی اسکندر اونلو ‏دوغو سفرینه چیخمیش، اؤن آسیادان ایران ایچلرینه دوغرو اؤنونه هاراسی ‏گلمیشسه اوردوسونو یئنمیش اؤلکه سینی اللریندن آلمیشدی. ‏ اسکندر سمرقنده کیمی گلمیش بورانی ده کئچیب تورکلرین یاشادیغی ‏اؤلکه لره دوغرو ایره لیله میشدی.‏ اسکندرین، بالاساغونا و شو قالاسینا دوغرو یاخلاشماقدا اولدوغونو، گنج ‏خاقان «شو» نون گؤزچولری ‏ گلیب خبر وئردیلر. دئدیلر کی:‏ ‏«اسکندر دئییلن، گون باتیسیندان قوپوب گلن بیر شاه اوردوسو ایله بیزه ‏یاخلاشماقدادیر. اؤنونه گلن اؤلکه لری دیزه گتیرمیش، یئرله بیر ائتمیشدیر. ‏بیزه نه بویورورسان؟ ساواشاق می؟»‏ گنج خاقان، اوردو چووچولرینی ‏ دینله مز کیمی گؤروندو. نییه کی ‏چوخ داها اؤنجه، ان گووندیگی ایگیتلریندن قیرخ کیشینی سئچمش، خجند ‏ایرماغی قیییلارینا گؤزچولوک ائتسین دئیه گؤندرمیشدی. ‏ ایگیتلر کیمسه یه گؤرونمه دن، گیزلیجه گئدیب خجند ایرماغینین ‏قیییلارینا ‏ یئرلشدیکلری اوچون اوردو گؤزچولری دورومو بیلمه ییردیلر. ‏گتیردیکلری چوودان ، خاقانلارینین تالاشیب ‏ یئریندن قیمیلدامادیغینی ‏گؤردوکلری اوجون ده چاشمیشدیلار. خاقانین کؤنلو دینج ایدی.‏ @parvizshahmarasi

#داستانلاریمیز ارکنه قون داستانی (2): ‏ قایانلا توکوزون بورادا یاشامی سوروب، بیر چوخ اوشاقلاری اولدو. ‏قایانین اوشاغی داها چوخ، توکوزون اوشاغی ایسه داها آز اولدو. قایاندان ‏اولان اوشاقلارا قایات دئدیلر، توکوزدن اولان اوشاقلارا ایکی آیری آد ‏وئردیلر: بیر پاراسینا توکوزلر دئییلدی، آیریلارینا دا تورولکن دئییلدی. ‏ ایللر ایلی بو ایکی ایگیدین اوشاقلاری ارگنه قوندا قالدیلار. چوخالدیلار، ‏چوخالدیلار، چوخالدیلار. ‏ آرادان دؤرد یوز ایل کئچدی. ‏ دؤرد یوز ایل سونرا ارگنه قوندا هم اؤزلری هم ده سورولری ائله جه ‏آرتدی کی اؤلکه یه سیغماز اولدولار. بو اوزدن توپلانیب قونوشدولار، چارا ‏تاپماق ایسته دیلر. دئدیلر کی:«آتالاریمیزدان ائشیدردیک، ارگنه قونون ‏ائشیگینده گئنیش یئرلر، گؤزل یورتلار اولارمیش. اسکیدن اورالار بیزیم اؤز ‏یوردوموز ایمیش. داغلارین آراسیندان بیر چیخیلاجاق یول آختاریب تاپاق. ‏چیخیب بوردان کؤچک. ارگنه قونون ائشیگینده کیم بیزیمله دوست اولورسا ‏اولاق، دوشمان اولورسا ووروشاق.»‏ بئله قونوشوب سؤز کسیلینجه، ارگنه قوندان چیخماق اوچون بیر یول ‏آختارماغا باشلادیلار، تاپا بیلمه دیلر. ‏ او زامان بیر دمیرچی دئدی کی:«بو داغدا بیر دمیر سوخورو ‏ وار. یالین ‏قاتا ‏ بنزر. سوخورون دمیرین اریتسک بیر یول اولار.»‏ هامی بیرلیکده گئدیب دمیر سوخورونو گؤردولر. دمیرچینین سؤزلرین ده ‏بگندیلر. داغین گئنیش یئرینه بیر قات اودون بیر قات کؤمور دوزدولر. داها ‏سونرا داغین اوستونو، آرخا یانینی، اؤته یانینی، بری یانینی بیر سیرا اودون بیر ‏سیرا کؤمورله دولدوردوقدان سونرا یئتمیش دریدن یئتمیش کؤروک یاپیب، ‏یئتمیش یئرده قوردولار. اودونلارلا کؤمورلری آلیشدیریب، کؤروکله دیلر. ‏ تانری نین یاردیمی یئریتی ‏ ایله اود قیزدی. قیزدیقجا دمیر داغین دمیری ‏اریمگه باشلادی. اریییب آخدی. داغ دلیندی. یوکلو بیر دوه کئچه بیله جک ‏بویدا یولدا اولدو. او قوتسال ایلین، قوتسال آیین، قوتسال گونون، قوتسال ‏چاغیندا گؤگ تورکلر، ارگنه قوندان چیخدیلار. ‏ او گونو، او آیی، او چاغی یاخشی بلله دیلر. بو قوتسال گون، او گوندن ‏سونرا گؤگ تورکلر اوچون بایرام اولدو. هر ایل او گون گلینجه، بؤیوک ‏تؤرنلر ‏ یاپیلدی. بو تؤرنلرده بیر پارچا دمیر آلینیب، اوددا قیزدیریب، سونرا ‏آل دمیری ‏ اؤنجه گؤگ تورک خاقانی قیسقاجلا ‏ توتوب، اؤرسه ‏ ‏قویوب، چکیشله دؤگوردو. اوندان سونرا آیری تورک بیگلری باینا ‏ ایشی ‏گؤره رک، بایرامی باشلاداردیلار. ‏ اركنه قوندان چیخدیقلاری سیرادا گؤگ تورکلرین خاقانی قایان (قایی ‏خان) سویوندان گلمه «بؤرته چینه» ایدی. «بؤرته چینه» بوتون ائللره ائلچیلرین ‏گؤندریب، اركنه قوندان چیخیب گلدیکلرینی بیلدیردی.‏ @parvizshahmarasi

#داستانلاریمیز ارکنه قون داستانی (1): تورک ائللرینده گؤگ تورک اوخو اؤتمه ین، گؤگ تورک قولو یئتمه ‏ین بیر یئر یوخ ایدی. بوتون اؤلکه یه گؤگ تورکلر اگه من ‏ ایدی. بو ‏دوروم ایسه، باشقا اؤتگی ائللره آجی گلیردی. اوسته لیک گؤگ تورکلری ‏ده قیسقانیردیلار. بیر آرایا گلیب بیرلشدیلر. تورکلردن اؤج ‏ آلماغا سؤز ‏کسدیلر. اونلارین اوزرلرینه یورودولر. ‏ بونون اوزوندن، گؤگ تورکلر چادیرلارینی، سورولرینی بیر یئره ‏توپلادیلار. چئوره سینه قاریم ‏ قازیب گؤزله دیلر. دوشمان گلینجه ساواشا ‏باشلادیلار. ساواش، اون گون سوردو. سونوندا گؤگ تورکلر اوستون گلدی. ‏ بو یئنیلگی اوزوندن، گؤگ تورکلره دوشمان اولان ائللر بوسبوتون اؤفکه ‏لندیلر. آو یئرینه توپلانیب، بیر آرادا قونوشدولار. دئدیلر:«گؤگ تورکلره ‏قورقو ‏ قورماساق، ایشیمیز سونوندا چوخ یامان اولاجاق.»‏ بو قونوشمادان سونرا، دان آغارینجا، سانکی باسقینا اوغرامیشلار کیمی، ‏ایسه یارامایان ماللارینی بوراخیب قاچدیلار. بونو گؤرن گؤگ تورکلر؛ ‌‏«دوشمانلاریمیزدا ساواشاجاق گوج قالمادی، قاچیرلار» دیه دوشونه رک، ‏قاچانلارین آرخاسینا دوشدولر. ‏ دوشمانلار، گؤگ تورکلری گؤرونجه داباندا ‏ گئری دؤندولر. گؤگ ‏تورکلری گوشک بیر دورومدا یاخالادیلار. ووروشماغا باشلادیلار. گؤگ ‏تورکلر یئنیلدیلر. ‏ دوشمان، گؤگ تورکلری وورا اؤلدوره، چادیرلارینا کیمی گلدی. ‏چادیرلارینی ماللارینی ائله بیر یاخیب یاغمالادیلار کی بیرجه قارا قیل چادیردا ‏قالمادی. بؤیوکلرین هامیسینی قیلینجدان کئچیردیلر. کیچیلرینی قول ائتدیلر. ‏هر بیرینی آلیب اؤز ائولرینه آپاردیلار. ‏ او زامان گؤگ تورکلرین باشیندا ایلخان خاقان ایدی. ایلخانین دا بیر ‏چوخ اوغلو وار ایدی. اوشاقلارین هامیسی بو ساواشدا اؤلدو. یالنیز قایان ‏آدیندا ان کیچیک اوغلو ساغ قالدی. قایان (قایی خان) او ایل ائولنمیشدی. ‏ایلخانین «توکوز» (دوققوز اوغوز) آدیندا بیر یئگنی ده وارایدی. ‏ قایان ایله توکوز (قایی خان ایله دوققوز اوغوز) هر ایکیسی ده دوشمانا ‏توتساق اولموشدولار. آنجاق اون گون کئچمه دن قاچیب، توتساقلیقدان ‏قوتولدولار. گؤگ تورک یوردونا گلدیلر. ‏ بورادا دوشماندان قاچیب گلن بیر چوخ دوه، آت، اؤکوز و قویون ‏تاپدیلار. اوتوروب دوشوندولر. «دؤرد بیر یانیمیز دوشمان دولو، بیزی ‏یاشاتمازلار» دئدیلر. «ان یاخشیسی داغلارین ایچینده آدام یولو دوشمز ساپا بیر ‏یئر تاپیب اورادا یئرله شک.» دیه سؤز کسیب، سورولرینی ده آلاراق داغا ‏دوغرو گئدیب کؤچدولر. ‏ گئده گئده، گلدیکلری یولدان باشقا کئچیله جک بیر یولو اولمایان بیر ‏اؤلکه یه واردیلار. بو یول ائله بیر سارپ، ساپا یول ایدی کی دوه اولسون، ‏آت اولسون مین گوجلوکله یوروردو، یانلیش بیر یئره آیاغینی باسسا پارام ‏پارچا اولوردو. ‏ گؤگ تورکلرین واردیقلاری اؤلکه ده آخار سولار، بونگولدکلر ، ‏تورلو بیتکیلر، یئمیش آغاجلاری و آو وار ایدی. بئله بیر یئری گؤرونجه، ‏تانرینی آلقادیلار ‏. قیشدا حیوانلارین اتینی یئدیلر، یازدا سودونو ایچدیلر، ‏دریسینی گئیدیلر. اؤلکه نین آدینی «ارگنه قون» دئدیلر.‏ @parvizshahmarasi

#داستانلاریمیز بوزقورد داستانی (ایکینجی دئییم): هونلارین بیر بویو اولان، آدینا «آشینا» دئییلن تورک بویو، خزر دنیزینین ‏باتی یانلاریندا یئرلشمیشدی. تورکلرین ایلک آتاسی اولاراق بیلینیردی. ‏دینجلیک ایچینده اوتورارکن، بیر گون آنسیزین دوشمانلارین باسقینینا ‏اوغرادیلار. باسقینین سونوندا کیسمه ساغ قالمادی. ‏ نئجه اولورسا، کیچیک بیر اوشاق بو باسقیندان ساغ قالمیش، بیر بوجاغا ‏سیغینمیشدیر.دوشمانلار اونو دا گؤردولر. آنجاق کیچک جیلیز بیر اوشاق ‏اولدوغو اوچون کیمسه اوندان قورخمادی، اونو آلدیرمادی. اونلارین ایچیندن ‏آجییانلار بئله چیخدی. آنجاق دوشمن یئنه ده هر ساییمی ساییب، اوشاغی ‏اؤلدورمکدنسه قولونو باجاغینی کسیب اورادا ائله جه بوراخماغی اویغون ‏گؤردو، دوشوندوکلری کیمی ائله دیلر. ‏ قولونو باجاغینی کسیب، یاری اؤلو دورومونا گتیردیکلری اوشاغی آلیب ‏باتاقلیقدا بیر سازلیغا آتدیلار، بوراخیب گئتدیلر. ‏ بو آرادا، هارادان چیخدیغی بیلینمه ین بیر بوزقورد گؤروندو، گلدی، ‏کؤرپه نی امیزدیردی. یارالارینی یالاییب، توختالتدی. او گونده سونرا دا، ‏آولانیب گتیردیگی یئیه جکلرله اوشاغی بسله ییب بؤیوتدو، گوجونو ‏گیرجینی آرتیردی. ‏ کئچدیکجه بوزقوردون بسله دیگی اوشاق گوربوزلشدی. گونلرین بیر ‏گونو، باسقین یاپیب، آشینا سویونو قیران دوشمان باشبوغو، قولونو باجاغینی ‏کسه رک سازلیغا آتدیقلاری اوشاغین یاشادیغینی بیلدی. آداملار گؤندریب، ‏دورومو اؤگرنمک، ساغ قالدی ایسه اؤلدورمک ایسته دی. ‏ دوشمان باشبوغونون گؤندردیگی سالدات گلدیگینده، قولو باجاغی ‏کسیک گنجین یانیندا بیر دیشی بوزقورد گؤردو. دیشی بوز قورد قادانی ‏سئزمیشدی، دیشلریله گنجی یاخالادیغی کیمی دنیزین اؤته یانینا کئچیردی. ‏اورادا دا دورماییب آلتای داغلارینا دوغرو آپاردی. اورادا هر یانی یوکسک ‏داغلارلا چئوریلی بیر یایلادا بیر ماغارایا یئرلشدیردی. اونونلا ائولندی، اون ‏اوغلان دوغوردو. ‏ ماغارانین اولدوغو یایلا یاشیللیق ایدی. سرین گور سولاری، میوه ‏آغاجلاری، آو حیوانلاری وار ایدی. اوغلانلار اورادا بؤیویوب، ائولندیلر. هر ‏بیریندن بیر بوی توره دی. بونلاردان بیرینین آدی دا آشینا بویو ایدی. ‏ آشینا قارداشلارینین ایچینده ان اوسلو، ان گؤزوآچیق، ان ایگیت اولانی ‏ایدی. بو اوزدن تورک خاقانی او اولدو. سویونو اونودمادی. چادیرینین اؤنونه ‏قاشاندا ، تپه سینده بیر قورد باشی اولان بیر توغ تیکدی. ‏ آرادان چوخ ایللر کئچدی. آشینا بویونا آشینچا آدلی بیر باشقا ایگیت ‏خاقان اولدو. بونون دؤنمینده ایسه آشینا بویو، اولدوغو یئردن چیخیب داها ‏گؤزل یورتلارا یئرلشدیلر.‏ @parvizshahmarasi

#داستانلاریمیز بوزقورد داستانی (بیرینجی دئییم): هون اؤلکه سینین قوزئیینده «سو» آدی وئریلن بیر اؤلکه وارایدی. بورادا، ‏هونلارلا بیر سویدان اولان گؤی تورکلر اوتوروردو. بیر گون گؤی تورکلر ‌‏«سو» اؤلکه سیندن آیریلدیلار. بو سیرادا باشلاریندا «پو» آدلی بیر ایگیت وار ‏ایدی. بو ایگیدین اون آلتی قارداشی وارایدی. اون آلتی قارداشدان بیرینین ‏آناسی بیر قورت ایدی. ‏ آناسی گؤی تورکلرجه ان قوتسال یارادیقلاردان بیر اولاراق بیلینن و بئله ‏ساییلان بیر قورت اولدوغو اوچون، دلی قانلی، یئللره یاغیشلارا سؤزو کئچیر. ‏بو ایکی گوجو بویروغو آلتیندا توتوردو. ‏ ‏ بئله ایکن، «سو» اؤلکه سینده کی یورتلاریندان آیریلان گؤی تورکلر ‏دوشمانلارینین باسقینینا اوغرادیلار. بو باسقیندا دوشمانلار بوتون گؤی ‏ترکلری یوخ ائتدیکلری کیمی، اون آلتی قارداشدان تکجه بیریسی قورتولا ‏بیلدی. قورتولان دلی قانلی، آناسی قورت اولان ایدی. ‏ بو دلی قانلینین دا، بیریسی یاز، باشقاسی قیش تانریسینین قیزی اولان ‏ایکی باجیسی وارایدی. باسقیندان سونرا هر ایکیسیندن ایکیشر اوغلو اولدو. ‏کئچدیکجه آرتیب چوخالان ائل، اوشاقلاردان ان بؤیوگونو، اؤزلرینه خاقان ‏سئچدیلر. اونون اونداکی آدی گؤی تورک دیلینده دگیلدی. خاقان سئچیلر، ‏سئچیلمز، گؤی تورکجه اولمایان بو آدینی بوراخیب، تورک آدینی آلدی. ‏ اوندان سونرا تورک 10 قادینلا ائولندی، بیر چوخ اوشاقلاری اولدو. ‏ایچلریندن «آسئنا» آدینی داشییان بیری، خاقانلیق اورناغینا کئچینجه، بویون ‏آدی دا «آشینا» اولدو.‏ @parvizshahmarasi

#داستانلاریمیز اوغوزخان داستانی. اسلامدان سونراکی دئییم. (3): ‏ سالقینی ‏ آلان اوغوز، اؤزونه باغلی قالان، اؤزونو سئونلری توپلار. آتاسینین ‏اوستونه یورر. ساواش اولار. اوغوز یئنر. بو سیرادا هاردان گلدیگی بیلینمه ین ‏بیر اوخ، قاراخانین اورگینه ساپلانیب، اونو اؤلدورور. ‏ قاراخانین اؤلومو اوزرینه اوغوز، خان اولور. ائلینی حق دینینه چاغیریر، ایچیننلر ‏اؤلکه ده قالیر، ایچینمه ینلر اؤلکه دن سورولور. بیرلیگی قورور. هامینی اؤز ‏باغینین چئوره سینده توپلاییر. چورجوتلرین اوستونه یورور، تاتارلاری ‏بویروغو آلتینا آلیر. ‏ چینه دوغرو یورور. چوخ قانلی ساواشلار اولور. سونوندا داشینمایاجاق بویدا ‏سویقا الده ائدیلیر. اوردونون ایچینده قانقلی آدیندا بیری چیخیب قاقنینی ‏دوزلدیر، سویقانی اونونلا داشییر. بو اوزدن اوغوز اونون آدینی اوندن گلن ‏سویا وئریر. ‏ ساواشلار بیربیرینی قووالار، ساواشلارا اولاشماق ایچین یوللار، داغلار، آخار ‏سولار کئچیلیر. بو سیرالاردا اورتایا چیخان هر چتینلیگی، اوسلو بیر کیشی ‏اورتادان قالدیریر. دوروما گؤره آد وئریلیر. بو آدلاردان یئنی سویلار باشلانیر. ‏ سونوندا اوغوز موغوللارلا ساواشیب، حق دینینی اونلاریندا بوینونا قویور. داها ‏بیر چوخ اؤلکه لر آلیندیقدان سونرا، اؤز یوردونا دؤنور. یاشلی دانیشمان ‏ایرقیل آتانین تاپشیریغینا اویار. قوتلونلاریندان ‏ دولایی تانرییا آلقاماق ‏ ‏اوچون ساییسیز سونقولار ‏ وئریر. اؤلکه لری شنلندیریر. باغیشلار ائله ییر. 116 ‏ایل خاقانلیق ائدیر. سونوندا قورولتای قوروب، اوغوللارینا اؤگوتلرده وئریر. ‏اؤلکه سینی آلتی اوغول آراسیندا پایلاشدیریر. اوندان سونرا دا روحونو ‏سونور ‏. ‏ @parvizshahmarasi

#داستانلاریمیز اوغوزخان داستانی. اسلامدان سونراکی دئییم (2): اوغوزون یومونا ‏ باخیلیر، چوخ اوزون یاشاملی اولاجاغی، شنلر سانلار ‏ ‏قازاناجاغی آنلاشیلیر. شؤلن بیتیر، هامی ائوینه، یوردونا، یوواسینا داغیلاجاغی ‏سیرادا اوشاق اوغوز:‏ ‏-‏ ‏«آللاه!» دئیه باغیریر. ‏ دویانلارین هامیسی چاشیر. اوشاغین نه دئدیگینی آنلایامازلار. اوشاغین ‏قونوشدوغو دیلی بیلمزلر.‏ اوغوز بؤیویور. ائولنه جک چاغا گلدیگینده آتاسی قاراخان، اوغلونا، اؤز ‏کیچیک قارداشینین قیزی اؤزخانی آلماق ایسته ییر. اوغوز بونا قاناماندیر ‏آنجاق آباقاسینین ‏ قیزینی بیر بوجاغا چکیب، حق دینینی ایچینیرسه ‏ اونونلا ‏ائولنه بیله جک یوخسا ائولنمه یه جگینی سؤیلر. اوغوزون آباقاسینین قیزی ‏اؤزخان بونو بگنمیر. اوغوزدا اونونلا ائولنمز، اوندان آیری یاشار. ‏ بیر گون آوا چیخار. دؤنرکن بیر سو قیراغیندا ان کیچیک آباقاسی اولان ‏گورخانین قیزینی گؤرور. قیزی سئویر، قانی قایناییر. اونو دا بیر بوجاغا ‏چکیب، حق دینینی ایچینمه سینی، اولو تانری یا اینانماسینی ایسته ییر. ‏دئدیکلرینی ائدرسه اونونلا ائولنه جگینی ده سؤیلر. قیز:‏ ‏-«سنین یولون کؤتو یول دگیلدیر، ایچینیرم» دئیینجه دؤنوب آتاسینا گلیر، ان ‏کیچیک آباقاسی گورخانین قیزی ایله ائولنمک ایسته دیگینی آنلاتیر. ‏ بؤیوک بیر شؤلن سونوندا ائولنیرلر. اوغوز، قادینینی لاپ چوخ سئویر. ‏ آنجاق بیر گون بیلینیر کی اوغوز مسلمان اولدوغوندان، اوندان اولدوغو ‏اوشاقدا مسلمان اولاجاق. اوغوزون آودا اولدوغو بیر گون، آتاسی قاراخان، ‏اؤلکه سینین بوتون ایلری گلنلرینی چاغیریب، کانکاش ‏ قورار. دورومو ‏آنلادار. هامی اؤفکه له نر، کیمسه بو ایشی گؤتورمز. سونوندا، اوغوزون ‏آردیندان چارماقون ‏ گؤندریب، اونو آودا ایکن اؤلدورمگه سؤز کسیلیر. ‏آنجاق قادینی کسیتی ‏ اؤگرنمیشدیر. اوغوز چوخ سئون بیر ایگیدی چاپار ‏سالیر، اوغوزا دورومو بیلدیریر.‏ @parvizshahmarasi