الذكاء الاصطناعي لأجلك

حكاية نوبل الطب 2026 ولا في الخيال --- الملهم في هذه القصة كائن صغير جدا طحلب وحيد الخلية قدر يخلي العلماء تتحكم في خلايا المخ بالضوء، وساعد شخص كفيف إنه يسترد جزء من بصره من جديد؟ الطحلب اسمه Chlamydomonas وهو طحلب اخضر عبارة عن خلية واحدة بس وبيعيش في المياه وحجمه بين 10 و 20 ميكرومتر يعني اقل من سمك شعرة الإنسان اللي هي في المتوسط حوالي 50 ميكرومتر. الطحلب ده عنده ذيلين صغيرين بيستخدمهم علشان يسبح ويتحرك في اتجاه الضوء. والأغرب إنه بيعرف الضوء جاي منين وده مهم جدًا بالنسبة له، لأن الطحلب بيعتمد على ضوء الشمس علشان يعمل عملية البناء الضوئي ويصنع الطاقة اللي محتاجها. فبيقدر يتحرك ناحية الضوء المناسب، أو يبعد عنه لو الضوء شديد زيادة عن اللزوم. طبعًا الطحلب معندوش عين ولا مخ ولا جهاز عصبي، فإزاي خلية واحدة تعرف إن الضوء جاي من الناحية دي وتتحرك ناحيته؟ هنا بدأت الحكاية. بيتر هيجمان قضى سنوات بيدرس السؤال البسيط ده، لحد ما وصل مع زملائه لبروتينات حساسة للضوء موجودة في الطحلب. وبعدها بالتعاون مع جورج ناجل اكتشفوا المفاجأة وهي ان البروتين ده مش بس بيحس بالضوء، ده عبارة عن قناة صغيرة جدًا في غشاء الخلية ممكن فتحا او غلقها باستخدام الضوء. طيب لو الضوء يقدر يتحكم في كهرباء خلية طحلب… طب ما الخلايا العصبية في مخنا أصلًا بتشتغل بالكهرباء، فهل يمكن استخدام الضوء في التحكم في الخلايا العصبية للإنسان؟ ومن هنا بدأ شغل الرجل الثالث كارل ديسيروث في جامعة ستانفورد. في 2005 فريق ديسيروث أخذوا الجين اللي بيحمل تعليمات صنع البروتين الحساس للضوء، وأدخلوه إلى خلايا عصبية. الخلايا قرأت التعليمات وبدأت تصنع البروتين بنفسها، فأصبح عندها نفس "الباب" اللي يفتحه الضوء. بعدها وجه الفريق نبضات من الضوء الأزرق للخلايا، وكانت المفاجأة وهي ان كل ما يشغّلوا الضوء، يقدروا يشغّلوا الخلايا العصبية. يعني ببساطة، قدروا يحولوا الضوء إلى شيء يشبه ريموت كنترول للخلايا العصبية. ومن هنا بدأت مجموعة من التجارب كانت فعلًا أقرب للخيال العلمي. العلماء بدأوا يستخدموا الضوء كأنه ريموت كنترول صغير للمخ. يوجهوا الضوء لخلايا معينة، يشغلوها أو يوقفوها، وبعدين يشوفوا إيه اللي يحصل. في تجارب اخرى على الفئران، قدروا يتحكموا في خلايا مسؤولة عن الحركة والخوف والنوم والمكافأة وحتى الذاكرة. على سبيل المثال، في تجربة على فئران عندها أعراض تشبه مرض باركنسون (الشلل الرعاش) ومش قادرة تتحرك بصورة طبيعية، العلماء استخدموا الضوء للتحكم في خلايا معينة في المخ، فتحسنت حركة الفئران بشكل واضح. لكن يمكن أغرب التجارب كانت مع الذاكرة. تخيل فأر مر بتجربة معينة وكون عنها ذكرى. العلماء قدروا يعرفوا أنهي مجموعة من خلايا المخ خزنت الذكرى دي، وبعد فترة استخدموا الضوء علشان يشغلوا نفس الخلايا مرة تانية. المفاجأة إن الفأر بدأ يتصرف كأنه افتكر التجربة من جديد، رغم إن الحاجة اللي كان بيفتكرها مش موجودة قدامه أصلًا. لحد هنا كل التجارب دي كانت على الحيوانات في سنة 2021 وفي بحث تم نشره في nature medicine بدات التجارب على البشر مع رجل عمره 58 سنة كان بيعاني من مرض وراثي في شبكية العين اسمه Retinitis Pigmentosa بقاله حوالي 40 سنة. الخلايا المسؤولة عن استقبال الضوء في عينه ماتت تقريبًا، وبالتالي فقد القدرة على رؤية الأشياء. لكن بعد العلاج والتدريب أصبح قادر باستخدام العين المعالجة والنظارة إنه يشوف وجود بعض الأشياء أمامه، يحدد مكانها، يلمسها، وفي بعض الاختبارات يقدر يعدّها. المستقبل مع هذه التقنية فوق الخيال ...