Men ikkinchi sinfman

Esse BUGUNGI KUNDA MUZEYLARGA BORIB TOMOSHA QILISHGA EHTIYOJ QAYDARAJADA DEB O'YLAYSIZ? SIZNINGCHA MUZEYLARGA VIRTUAL SAYOHAT QILGAN BILAN ODDIY TASHRIF BUYURISHNING QANDAY FARQI BOR? Jonli tariximiz koʻzgusi boʻlgan muzeylar hamisha insonlar oʻzligini anglashi uchun katta ibrat maktabi boʻlib kelmoqda.Bugungi rivojlangan zamonda barcha sohalarda boʻlgani kabi muzeylarni borib ekskursiya qilish va hatto virtual tomosha qilish imkoniyatiga ham egamiz.Bu ikki tashrifning qay biri kuzatuvchi uchun afzalroq? Umuman olganda bugun muzeylarni tomosha qilishga ehtiyoj qay darajada? Muzeylar oʻtmish bilan bugunni bogʻlab turuvchi maʻnaviyat koʻprigi sanaladi. Bu maskanga tashrif buyurgan har qanday yoshdagi oʻquvchi boʻladimi yoki boshqa bir soha vakilimi farqi yoʻq.Birdek zavq oladi Statistik maʼlumotlarga qaraganda bugungi kunda dunyoda yuz mingdan ortiq muzeylar mavjud.Birgina Oʻzbekistonning oʻzidayoq 128 ta muzeyning borligi ham yurtimizning tarix sahnidagi oʻrni qanchalik yirik ekanini koʻrsatmoqda.Koʻpchilik insonlar muzeylarni borib oʻz koʻzlari bilan tomosha qilishninafzal bilishadi va hatto uzoq mamlakat muzeylariga ham tashrif buyurishadi.Ularning fikricha eksponatlarni yaqindan jonli koʻrish hamisha oʻzgacha boʻlib , kishiga estetik zavq hamda hayrat baxsh etadi.Muzey xodimlaridan har bir narsa haqida alohida maʼlumotlarga ega boʻlinadi. Masalan , Rossiyaning eng yirik muzeylaridan biri boʻlgan Ermitajning yiliga 3,5million tomoshabin koʻrgani kelishi esa dunyoda tarix ixlosmandlarining koʼpligidan dalolat. Lekin bugungi globallashgan zamonda odamlar ish va kunlik tashvishlar sabab har doim ham muzey va boshqa joylarga borib madaniy hordiq chiqarishga vaqt topa olmaydilar. Bundan tashqari bunday tomoshalar anchagina mablagʻ ham talab etadi.Shuning uchun aksariyat hollarda odamlar bunday goʻzal goʻshalarni online sayohat qilishni maʼqullaydilar ."Zamonamdan oʻrgilay" deganlaridek, bugun istalgan tarixiy majmua yoki muzeylarni uydan turiboq xuddi oʻsha yerda yurgandek tomosha qilish imkoniyatini beradigan ilovalar ham yaratilgan.Masalaning yana bir ahamiyatli tomoni shundaki , bugun muzeylarga talabning kamligi faqat ham vaqt , mablagʻ iqtisodiga borib taqalmaydi.Ayniqsa ,yoshlar orasida bunga xohish kam.Fikrimcha, buning sababi jamiyatimizda muzeylar va tarix haqida yetarli darajada tushuncha yoʻqligi deb oʻylayman.Vaholanki oʻzim ham borib korishdan koʻra u haqida internetdan oʻrganishni tanlayman Soʻzimizni muxtasar qiladigan boʻlsak, kelajagimizning porloq boʻlishi uchun oʻz tariximizni bilishimiz , undan ibrat ola olishimiz kerak Shunday ekan xoh virtual sayohat yoinki, jonli tashrif boʻlsin, ulardan yetarli ilmlarni olishimiz darkor.Zero, Birinchi Prezidentimiz I.A.Karimov taʼkidlagalaridek: ,, Tarixiy xotirasiz kelajak yoʻq ". @esse_insho_namunalari

Online ta’limda nima ayb?! O’quvchilar odatda “online o’qisam kallamga kirmaydi”,-deb qo’yadi. Shuni sabablariga bir qiziqdim. Online darsda o’quvchilardan mikrofoningni yoqib bir gapirchi desam, mikrofonni yoqishi bilan orqa fonda qo’ylarni ovozimiye, pasudalar taqir-tuquri, mashinalar shovqini yana bir nimalar eshitilib yotadi. E, baraka topgur, agar online darsga shundoq kirib qo’ysam kallamga bir nima kiradi deb o’ylasangiz, karantin paytida Zoom orqali o’qigan universitet talabalari hozir Nobel olgan bo’lardi. Shunchaki kirdim degani bo’ldi o’qiyman degani emas! Alohida xonaga kir, kerak bo’lsa xonani qulfla yoki dars qilyapman deb hammani chiqarib yubor. Daftar kitobingni och, telefonni o’rtaga qo’y. Oldingga olmachani to’g’rab, bir choy damla. Dars payti 100% e’tiborni shu darsga qarat-chi, qani o’sha offline o’qiyotganlardan yaxshi natija qilmaysanmi?! “Online yaxshimas” deb qo’yishadi. Undan ko’ra “bir o’zim qolsam, bitta joyda o’tirolmaydigan odamman, tepamda turib cho’p bilan urib turadigan bir odam kerak shu uchun online o’qiy olmayman” deyish kerak. Sharoit, intizom, mehnat - istalgan usulda bilim olsa bo’ladi. Aybni o’zizdan qidiring…

Yuqumli virus: Negativlik- o'tmishdagi salbiy tajribalar, qo'rquv yoki stress kabi turli manbalardan kelib chiqishi mumkin. Ko'pincha bu his - "Coping mechanism" (vaziyatni yengib o'tish mexanizmi) sifatida ko'riladi. Negativlik - judayam yuqumli his, va bu tez tarqaladi, diffuziya holatini bilsangiz kerak, negativ fikr, kayfiyat ham xuddi shunday tarqaladi. Va bir kishini ichidagi zug'um atrofdagilarning ham kunini vayron qilish uchun chiroyli xizmat qilib bera oladi, ha. Nega ba'zi odamlar o'ta negativ? 1. O'zi ko'p tanqidga uchragan va pozitiv fikrlarni ko'p eshitmagan. Dunyodan olgan energiyani dunyoga qaytarish - "mirroring revenge" bilan yashaydi. 2. Fikrlashi qotib qolgan, o'zi 30 da, lekin miyasi maktab bolasinikidan ham battar. Unda hech qachon tepaga siljish bo'lmagan. 3. U g'ird bekorchi. Vaqti shu qadar ko'pligidan ichidagi negativlarini 24/7 sochishga erinmaydi u. Lekin qo'llab-quvvatlashga kelganda, uni bunga vaqti yo'q, chunki u ob-havoni direktori. 4. E'tibortalab. Ko'p insonlar hammadan e'tibor xoxlaydi, va hammani o'ziga qaratishi uchun, negativlik qilishga harakat qiladi. Buyam bitta manipulativ axloqning ko'rinishi. Zaharli. Eng ko'p negativ odamlar qayerda? 1. O'zbekistondagi barcha ijtimoiy tarmoqlardagi videolar va postlarning kommentlarida. Instagrammi u, tiktokmi, telegrammi, farqi yo'q. Toshbo'ronchilar bizda talaygina. Kallangdan biror aqlli gap yozsang, kitobdan o'g'irlagansan. Ko'p post qilsang, bekorchisan. Qilmasang, e'tiborsizzan. Ovqat rasmini post qilsang, ochopatsan. Kiyim post qilsang materialistsan. Kitob post qilsang, "o'zi o'qiysanmi yo faqat rasm tushurishgami?" til bilib, biror skill o'rganib kurs sotsang - "ilmniyam biznes qildilaring". sotmasang - "bilimingni bo'lishmasang nima keragi bor?" raqsga tushsang - "singlim seniyam aka-ukang bordir, e turishingni qara.....#*%+#^ (diskotekada kalyan chekib komment yozadi) Qovun - qovundan rang oladi. Bemaza qovunni urug'i ko'p bo'ladi. Bu mavzuga qovunni aralashtirganim uchun uzr, qovunda ayb yo'q. Shunchaki hayotga qanday qarasangiz, u shunaqa tusga kirib ketaveradi. Siz negativ bo'lsangiz, butun hayotingiz energiyangizga moslashadi. Va bundan atrofdagilar ko'proq jabr ko'radi. Odamlarni aybi nima? Virusingizni bizga yuqtirmang. ©Yupiterlik

🔥🔥🔥🔥🔥🔥🔥🔥🔥🔥 Esse: Pul baxt keltiradimi? Zamon taraqqiy topib,rivojlanib borar ekan, insoniyat ko'p narsalarga ehtiyoj sezadi. Shunday ekan,ba'zi insonlar pul doimo bizga baxt keltiradi desalar,boshqalar pul baxt keltirmasligini aytadi.Xo'sh, aslida, bizga pul baxt keltiradimi yoki yo'q? Bizning pulimiz koʻp ekan, juda katta ishlarni amalga oshirishimiz mumkin. Masalan, Amerika ,Dubay kabi eng mashhur davlatlarga borgimiz keladi.Bundan biz rohatlanamiz va maʼnaviy hordiq chiqaramiz.O'zimizni baxtli his qilamiz.Yaqinlarimiz uchun turli xil narsalarni sotib olib,ularni xursand qilamiz.Buning uchun , albatta,bizda mablagʻ ko'proq bo'lishi kerak.Bundan tashqari biz pulimiz koʻp boʻlsa, yordamga muhtoj odamlarga yordam bera olamiz.Ularning kelajakdagi orzularini amalga oshirishda yordam berish orqali bir oila baxtli boʻladi.Chunki biz birovga muruvvat qo'llarini cho'zib, katta savobli ish qilgan boʻlamiz.Misol uchun, mening tog'am katta daromadga ega inson.U shu boyliklari orqali ota-onasini hajga olib bordi. Bundan tashqari yaqinlariga doimo kutilmagan sovgʻalarni yuboradi. Bundan ota-onasi va yaqinlari juda baxtli his qiladilar. Tanganing ikkinchi tomoni bo'lganidek, biz koʻp narsalarni pul bilan o'lchamasligimiz to'g'riroq. Puli koʻp insonlar boʻladi, lekin ularda oilasi bilan mehr-muruvvat degan tushunchalar bo'lmasa, baxtli his qilolmaydi. Xalqimiz: "Bizning boyligimiz,baxtimiz---sog'lik"-deb bekor aytmagan. Agar biz sog'lom bo'lmasak-u, lekin boyligimiz koʻp boʻlsa, bu bizning dardimizga davo bermasa, ona ôzini baxtliman deb aytolmasa kerak.Shunday insonlar borki, ular doimo hayotlaridan mamnun va rohatlanib yashaydi. Ulardan nega bunday baxtli yurishlarining sababini so'rasang,ota-onasi borligi,yaqin insonlari bunga sababchi ekanligini aytadi. Shunday ekan, har kim uchun baxt har xil birov uchun pul boʻlsa, boshqalar uchun bular o'tkinchi narsa. Mening fikrimcha, pul bizga har doim baxt keltirmaydi, lekin biz mehr-muruvvatli va halol yo'lda sarflasak, odamlarga pullarimiz orqali yaxshilik qilsak, mana shu bizga baxt keltiradi.Doimo tarozining ikki tomonini teng olib borar ekanmiz, biz doimo ôzimizni baxtli his qilamiz. Xulosa qilsam, bizda xoh pul koʻp bôlsin yoki yo'q, muhimi, bizni nima baxtli qila olishini anglashimiz va doimo oilamiz, xalqimiz sevadigan halol inson boʻlib yetishishimizdadir. muallif: Rajabova Sevara Reaksiyalar bilan qoʻllab-quvvatlab turing🤫

XXI asr axborot texnologiyalari jadal surʼatlar bilan rivojlanib borayotgan bir zamon. Bugun qaysi sohaga qaramaylik, qator yangiliklarni koʻramiz. Xoʻsh, ayni damda rivojlangan davlatlarda qaysi sohaga talab ortib bormoqda? Keling, bu xususida atroflicha fikr yuritib koʻramiz. Bugungi kunda rivojlangan davlatlar qatoriga nazar tashlaydigan boʻlsak, ularning aksariyatida raqamli texnologiya --IT eng ommalashgan sohalardan hisoblanadi. Misol uchun, Hindiston, Janubiy Koreya, Amerika kabi davlatlarda IT yaxshi haq toʻlanadigan hamda rivojlanish markazlariga aylantirayotgan sohalardan biri deyishimiz mumkin. Shu oʻrinda savol tugʻiladi, nega aynan IT? Birinchidan, IT sohasida ishlash uchun alohida diplom talab qilinmaydi. Faqat dasturlashga doir ilmlar yoki sohaga oid maxsus kurslarda oʻqish bilan ishlash mumkin. Bundan tashqari dasturlash bilan shugʻullanish ortiqcha narsalar talab qilmaydi, bittagina kompyuter orqali xilma-xil vazifalarni bajarish imkoniyati mavjud. Bugungi kunda raqamli texnologiya har jabhada oʻz oʻrnini egallamoqda. Deylik, taʼlim tizimida ham bank, iqtisod sohasida ham, bozor iqtisodiyotida ham raqamli texnologiyalar katta oʻrin tutmoqda. Bu degani dasturchilik kasbi keyingi yillarda ham ancha ommalashadigan kasbga aylanadi. IT ning yana qulaylik tomoni shundaki, u bilan uydan chiqmasdan turib ishlasa boʻladi. Shu boisdan yurtimizda ham IT ga chuqur eʼtibor qaratilmoqda. Jumladan, IT parklar, ixtisoslashtirilgan maktablar, raqamli avlodni shakllantirish uchun turli saʼy-harakatlar harakatlar amalga oshirilmoqda. Mening fikrimcha, rivojlangan davlatlar qatorida boʻlish uchun raqamli avlodni shakllantirishimiz lozim. Chunki jahon millionerlarining katta qismini dasturchilar tashkil etadi. Bulardan biri siz-u bizning kundalik foydalanadigan Telegram asoschisi Pavel Durovni misol qilishimiz mumkin. Uning bu yaratgan dasturi orqali butun dunyo aholisi foydalanmoqda. Durov esa bundan millionlab dollar foyda oladi. Yana bir misol bu taniqli dasturchi Mark Sukerberg oʻzining kichik maqsadda yaratgan Facebook dasturi bugun uni millionlar egasiga aylantirdi. Xulosa qilib aytadigan boʻlsak, IT sohasi bilan shugʻullanish pul topishning zamonaviy va oson usulidir. Soha sirlarini oʻrganish nafaqat yaxshi daromad manbayi, balki davlatimiz rivojlanishi uchun ham manfaatli boʻladi. @esse_insho_namunalari

Hozirgi kunda fan va texnika yoʻnalishda erishilayotgan yutuqlar mislsiz darajaga koʻtarilmoqda. Rivojlangan davlatlarda aynan qaysi sohaga boʻlgan talab kundan kun oshib bormoqda? Keling, bu masala yuzasidan fikrlarni boʻlishamiz. XXI asr fan va texnologiyalar asri ekanligi hammamizga kunday ravshan. Xususan, IT sohasi rivojlangan davlatlarda xaridorbop sohaga aylanib ulgurdi. Statistik maʼlumotlarga koʻra, har oʻnta sohaning yettitasi aynan shu yoʻnalish bilan uzviy bogʻlik ekan. Qolaversa, bu sohada ishlash uchun sizdan hech qanaqa diplom yoki maʼlumot soʻramaydi. Uyingizda ham bemalol shugʻullansangiz ham boʻlaveradi. Faqat sizdan axborot texnologiyani puxta bilishingiz talab etiladi. Hozirgi kunga kelib yurtimizda ham bu sohaga katta eʼtibor qaratilmoqda. Aynan, oliygohlarning tashkil etilayotgani yoki chet davlatlarga borib malakasini oshirib kelayotgan hamyurtlarimiz ham talaygina ekanligi fikrimiz isbotidir. Yana shuni aytib oʻtishim joizki, bunda yosh, jins yoki millat hech qanday ahamiyatga ega emas, hattoki nogironligi bor insonlar ham bemalol shugʻullana olishi mumkin. Xulosa qilib shuni aytishim mumkinki, IT sohasi koʻp pul ishlab topmoqchi boʻlgan, yaxshi yashashni istayotgan insonlar uchun toʻgʻri tanlov desam adashmagan boʻlaman. @esse_insho_namunalari

Yoʻllar...Inson umrining necha foizi yoʻllarda oʻtar ekan-a? Fikrimcha, bu koʻrsatkich koʻpchilikda salmoqli raqamlar bilan ifodalanadi. Xoʻsh, kundalik yoʻlovchi sifatida biz uchun yoʻllarning ravonligi muhimmi, yoxud jamoat transportlaridagi qulayliklarmi? Davlatimiz qay biriga koʻproq mablagʻ ajratishi toʻgʻri? Tekis, ravon, obod yoʻllar, chiroyli yoʻlaklar har qanday insonga cheksiz zavq bagʻishlabgina qolmay, ertalabdan kayfiyatning aʼlo boʻlishiga, oʻz oʻrnida, ish samaradorligining ortishiga sabab boʻlishi, shubhasiz. Notekis, oʻydim-chuqur, shagʻalli, bir soʻz bilan aytganda ta'mirlanmagan yoʻllar har kimning asablarini buzish, kayfiyatini tushirish barobarida koʻplab yoʻl-transport hodisalariga, shuningdek, avtomobillarning texnik sifati buzilishiga sabab boʻlishi tayin. Demak, yoʻllar uchun sarflanadigan mablagʻ juda muhim va ahamiyatli. Biroq ,,Bir tovuqqa ham suv kerak, ham donʼʼ,-deganlaridek, jamoat transportlaridagi qulayliklarga ham aholining talabi yuqori. Erta tongda ishga yoki oʻqishga shoshilayotgan yoʻlovchi uchun har qanday yoʻnalishli transportning oʻz vaqtida yetib kelishi va manzilga ham belgilangan vaqtda, betalofat yetkazishi eng dolzarb masala boʻlsa, ulardagi qulaylik va tartib kishilar kayfiyatiga ijobiy taʼsir koʻrsatishi lozim. Bu turdagi avtotransport vositalari shaxsiy mashina yoki taksilardan kamxarj va tabiat uchun foydali. Aytaylik bitta avtobusda 15-20 kishi manzilga yetib borishi tayin, ammo har kim shaxsiy avtoulovida borsa-chi? Yoʻllardagi tirbandlik, atrof-muhitga chiqarilayotgan zaharli gazlar, ortiqcha yonilgʻi sarfi, avtoturargohi yoʻq ish yoki oʻqish joylaridagi noqulayliklar bir tomon-u, koʻchalarda sodir boʻladigan avtomobillar toʻqnashuvining ortishi bir tomon. Xullas, hukumat avtobus, tramvay, trolleybus, metro kabi uzogʻimizni yaqin qiluvchi beminnat umumiy dastyorlarimiz faoliyatini qulay, izchil va sifatli yoʻlga qoʻyishi zarur. Xulosa oʻrnida shuni ta'kidlamoqchimanki, har ikkala jabhaga ham yoʻnaltirilgan mablagʻ xalqimiz turmush-tarzini yaxshilashga birdek xizmat qiladi. Etni tirnoqdan ajratib boʻlmagani kabi yuqoridagi muammolarning birini qoʻyib boshqasiga yechim topish ijobiy natija bermaydi. Axir qulay transportda notekis yoʻlda yurish ham, tekis yoʻldagi shalviragan avtobus harakati ham yoʻlovchiga xush yoqmaydi. https://t.me/esse_insho_namunalari

Chet elda yashab life-style yurituvchi blogerlar bor. Qarasangiz, hamma narsasi to‘kis, hayoti adrenalinga boy, eri (xotinidan) yolchigan, farzandlari tarbiyasini qotirgan, o‘z karyerasiga ega. ☁️ 🌙 Bunday idealizatsiyalashtirilgan hayot odamlar ongiga "Chet elda yashash muvaffaqiyat belgisi" degan fikrni singdirishi ham tayin, passiv urinishlarning natijasi o‘laroq. Yoki eng kamida o‘zimizning hayotimiz bilan solishtirib ko‘ramiz. Hozirgi global depressiyaning asosiy sabablaridan biri ham shu. Masalaning yana bir tarafi – ijtimoiy tarmoqlardagi hamma narsa ham haqiqatni aks ettiravermaydi. 📌 Bir-biriga beradigan mehrlari faqat kamera oldidagina bo‘lishi mumkinligi, olingan qimmatbaho sovg‘alar boshqa o‘rtog‘idan ijaraga olinganligi ehtimollari ham bor. Mayli, hammasi o‘ziniki bo‘lganda ham, ammo ular ham kechalari qaysidir qiyinchiliklaridan azoblanib yig‘lashi mumkin yoki boshqa turli muammolariga ega. ⭕️Mana shu teatrga mahliyo bo‘lib aldanib qolsak, demak biz boshqarilishga moyilmiz.. Har bir insonning hayoti individual, yo‘llari turli. Karyera, boylik yoki xorij hayoti doim ham baxtni anglatavermaydi. 📝 🔖Tanqidiy qarashlar filtri bo‘lmagan kishilarga esa bunday bloglarni kuzatish tavsiya etilmaydi. Chunki ruhiy muvozanat hamma narsadan muhim. O‘zingizni va ruhiyatingizni asrang 🤎@esse_insho_namunalari

⚡️Esse mavzusi: Ba'zilar yoshlar tarbiyasida jazo muhim o'rin tutadi, deb hisoblashsa, zamonaviy psixologlar buni rad etadilar. O'z mulohazalaringizni bildiring. Bugungi kunda farzand tarbiyasiga bo'lgan e'tibor yildan yilga ortmoqda. Bu holat bo'yicha nafaqat ota-onalar, balki psixologlar ham o'z qarashlarini bildirishgan. Zeroki, yoshlar har bir millatning kelajagidir. Ba'zi odamlar bola tarbiyasida jazolash muhimligini yoqlasalar, hozirgi kundagi psixologlar buni yoshlar ruhiyatiga yomon ta'sir qilishini inobatga olib rad etadilar. Shunday ekan, yoshlarni jazolash nechog'lik to'g'ri va buning ijobiy hamda salbiy tomonlari nimalardan iborat? Barchamizga ma'lumki, asrlar davomida farzand tarbiyasiga eng asosiy masala sifatida qaraladi. Bu jarayonda jazoni tarbiyani mustahkamlovchi omil sifatida ko'rishimiz mumkin. Misol uchun, biror bola o'g'rilik yoki shunga o'xshash yomon ishlar qilsa, uni jazolab bu yo'ldan qaytarish kerak. Chunki ko'plab bolalarda jazolashga nisbatan qo'rquv hissi yuqori bo'ladi va bu ishdan o'zini qo'rqqandan ham tiyadi. Fikrimizni tanganing ikkinchi tomoniga qaratsak, kasalni davolash emas, uni oldini olish afzalligi ma'lum bo'ladi. Ya'ni yoshlar jazolanish darajasigacha borishiga yo'l qo'ymaslik kerak. Jazo esa ular uchun eng so'nggi chora sifatida qo'llanishi lozim. Chunki uning ijobiy tomonlari bilan bir qatorda salbiy jihatlari ham bor. Birinchidan, "Asalning ham ozi yaxshi " deganlaridek, yoshlar jazolanaversa, ular qilgan ishlarini yashirishga harakat qiladi va o'z-o'zidan yolg'on gapirish ko'nikmasi shakllanadi. "Ursang eti, gapirsang beti qotadi" deb ta'kidlashgan dono xalqimiz. Psixologlarning fikriga ko'ra, yoshlar qancha ko'p yomon so'zlar eshitib, og'ir jazo olishsa, bu bora-bora ular uchun oddiy holatga aylanadi. Mening fikrimcha, biz oltin tenglik - me'yor tushunchasini esdan chiqarmagan holda yoshlarni tarbiyalashimiz kerak. Zeroki, bizning har bir ishimiz yoshlar kelajagiga ta'sir qilar ekan, xoh jazolash bo'lsin, xoh to'g'ri tushuntirish , bu ikkisi ham ularni ma'nan yuksaltirishga xizmat qilishi lozim. Xulosa o'rnida shuni aytish joizki, "Yaxshi otga bir qamchi, yomon otga ming qamchi" deganlaridek, bu holat bolalarning o'ziga ham bog'liq. Har ikki yo'ldan ham maqsadga muvofiq foydalanish esa siz-u bizga havola. 🏷Esse muallifi: Boymurodova Madina

Bugungi kunda farzand tarbiyasiga bo'lgan e'tibor yildan yilga ortmoqda. Bu holat bo'yicha nafaqat ota-onalar, balki psixologlar ham o'z qarashlarini bildirishgan. Zeroki, yoshlar har bir millatning kelajagidir. Ba'zi odamlar bola tarbiyasida jazolash muhimligini yoqlasalar, hozirgi kundagi psixologlar buni yoshlar ruhiyatiga yomon ta'sir qilishini inobatga olib rad etadilar. Shunday ekan, yoshlarni jazolash nechog'lik to'g'ri va buning ijobiy hamda salbiy tomonlari nimalardan iborat? Barchamizga ma'lumki, asrlar davomida farzand tarbiyasiga eng asosiy masala sifatida qaraladi. Bu jarayonda jazoni tarbiyani mustahkamlovchi omil sifatida ko'rishimiz mumkin. Misol uchun, biror bola o'g'rilik yoki shunga o'xshash yomon ishlar qilsa, uni jazolab bu yo'ldan qaytarish kerak. Chunki ko'plab bolalarda jazolashga nisbatan qo'rquv hissi yuqori bo'ladi va bu ishdan o'zini qo'rqqandan ham tiyadi. Fikrimizni tanganing ikkinchi tomoniga qaratsak, kasalni davolash emas, uni oldini olish afzalligi ma'lum bo'ladi. Ya'ni yoshlar jazolanish darajasigacha borishiga yo'l qo'ymaslik kerak. Jazo esa ular uchun eng so'nggi chora sifatida qo'llanishi lozim. Chunki uning ijobiy tomonlari bilan bir qatorda salbiy jihatlari ham bor. Birinchidan, "Asalning ham ozi yaxshi " deganlaridek, yoshlar jazolanaversa, ular qilgan ishlarini yashirishga harakat qiladi va o'z-o'zidan yolg'on gapirish ko'nikmasi shakllanadi. "Ursang eti, gapirsang beti qotadi" deb ta'kidlashgan dono xalqimiz. Psixologlarning fikriga ko'ra, yoshlar qancha ko'p yomon so'zlar eshitib, og'ir jazo olishsa, bu bora-bora ular uchun oddiy holatga aylanadi. Mening fikrimcha, biz oltin tenglik - me'yor tushunchasini esdan chiqarmagan holda yoshlarni tarbiyalashimiz kerak. Zeroki, bizning har bir ishimiz yoshlar kelajagiga ta'sir qilar ekan, xoh jazolash bo'lsin, xoh to'g'ri tushuntirish , bu ikkisi ham ularni ma'nan yuksaltirishga xizmat qilishi lozim. Xulosa o'rnida shuni aytish joizki, "Yaxshi otga bir qamchi, yomon otga ming qamchi" deganlaridek, bu holat bolalarning o'ziga ham bog'liq. Har ikki yo'ldan ham maqsadga muvofiq foydalanish esa siz-u bizga havola 🏷Esse muallifi: Boymurodova Madina @esse_insho_namunalari