Вже доступно! Дослідження Telegram за 2025 — головні інсайти року 
ادبیات سئونلر
Відкрити в Telegram
بوکانال ادبیات سئونلر قوروپونون سئچیلمیش اثرلری دیر کانالدا کی یازیلاری کانالین لینکینی وئرمک شرطی ایله پایلاشماق اولار.
Показати більше3 087
Підписники
Немає даних24 години
Немає даних7 днів
-1430 день
Архів дописів
3 088
سینه دولوسو ایکی آغیز آسقیردیم. باشیم- بئینیم آیازیدی. گؤز قاپاقلاریم قالخیب، قاشلاریمین چپرلرینی سؤکوردو. دیلیمی دوداقلاریمین اوستونده گزدیردیم.
بو نهدی؟ قورولوق، آجیلیق نه تئز یوخا چیخدی! زنبق عطیرلی، زنبق شیرهلی هاوا، قارا جییاریمدا اؤدون آخارینی ثابتلشدیریب. زققوم کیمی آجی دیلیم- آغزیم بال دادیر. دوستومون دئدیکلری ثابت اولدو. بوردا معالجهلر حیهطه آیاق باسدیغیم آندان باشلاندی.
بؤیوک زحمتین بهرهلری حیهطین هر قاریشیندا گؤرونوردو. یاماجلار، درهلر، تپهلر، زنبقدن دولویدو. دمیر حاصارلار اوزاندیقجا زنبق اکینهجهیی ده اوزانیردی. ماشین یولونا یاخین یئرلرده زنبقلر شیپور باشلارینی حاصاردان آشیریب، آسفالتین یاپیشقان بوخارینی، اوتومبیللرین اگزوزلاریندان آسقیرا- آسقیرا چیخان توستو توپلارینی اؤز ظریف قوخولاری ایله زنبقلشدیریر دیلر. چوخ گومان کی تجربهلی بیر مهندسین الی ایله آغاجلارین دیبلری ایله آخان آرخین یولو یوز دفعه اؤلچولوب، بیر دفعه دقیق بیچیلیب.
تورپاغین قارین وئرن یئریندن چیخان، قاباغی آیاقلار آلتیندا سویولموش، یارالی کؤکلره تنظیف کیمی ساریلان سولار، حکیملرین ایشینی گؤروردو. آرخین دیوارلارینا چاپا- چاپا چیرپینان دالغالار قاوال شاپپیلتیلارینی خاطیرلادیردی. اویناق ریتملرین عکس صدالاری جیغیرلار، کئچیدلر بویو نیمکتلرده دینجهلن خستهلرین سوموکلرینه دوشوب، روحلارینی دینقیلدادیردی. درمانلار کؤهنهلیب، حبلر قوتولاردان چیخمیردی.
حیهطین خیرمان کؤلگهلی آغاجلاری، سولاری قابیغی سییریلمیش کؤکلره تور کیمی سارمانان آرخلاردا شفقت باجیلاری، حکیملر کیمی حؤرمته مینیردی گؤزومده.
قبول اوتاغیندا سندلریمی یوخلایان بورنو باتیق، قابوی سسلی اوغلان، خستهلیک کارتیمی، شخصیت وثیقهمی، لابراتور، عکس- سونوگرافی اوتاقلارینا دا ایجازه کاغیذیلاریمی منه طرف اوزاداراق باشینی آرخایا فیرلاتدی.- آی گولناره خانیم، بو تزه قوناغیمیزا بلدچیلیک ائله، اوتاغینی گؤستر- دئدی.
- قوناق؟! خالام گیلده، داییم گیلده قوناق چاغریلا بیلهرم... آنجاق بوردا...
-" آی یولسوز، اؤزونو داغا- داشا سالما! بیر دفعه باشا دوش کی" چینار"دا " خسته"،" بیمار" کلمهسی ایشلنمیر. لاپ عجب ائلهییرلر. عصبلری قیجیقلاندیران" خسته"، سوزونو قصدا ایشلتمهدی اوغلان.
خستهیه خسته اولدوغونو تئز-تئز باشینا چیرپماق، یئتیشمهمیش چیبانا نشتر وورماق دیر. گؤرونور اوغلان حکیملردن داها چوخ حکیملیک ائلهییر، خستهلرین عصبلرینی قورویور.
بعضی اوتاقلارا گیریش نوبهسیز ایدی. حکیملر اوز- گؤزومه دیققتله باخیب،" سنده هئچ نه یوخدور"- دئییب کاغیذا قول چکیردی. آنجاق کاردیوگراف وفا خانیمین قاپیسیندا اوزون نوبه گؤردوم. قانیم قارالدی. بو گؤروشو سونرایا ساخلادیم. واخت ایتیرمهدن اومبا سومویومون آراسیندا اوتورموش باکتریلرین الینه دریل، کولونگ، لوم وئریب داغینتیلارا امکان یاراتماقدی. من ده انضباطی بینایا تلهسیردیم. آمما آللاه اوزاق ائلهسین، آغزیمدان کولکلر آپارسین!
کاش بورانین حکیملری اللیمین روبلا طب اوینورستینی بیتیردیکدن سونرا دا ایینه وورماغی باجارمایان اوزوقارا حکیملردن اولمایایدی. آمما آللاهجاسینا دانیشساق ائله او واختلار دا عالی مکتبلره اؤز باشی ایله گیرنلر آز دئییلدی.
یولوم قوواق آغاجلارینین آلتیندان کئچیردی. هاوا رنگی پالتاری، اتهیی دیزلرینی توتان گولر اوز اوغلان اوزون ساپلی سوپورگهنی، اؤزوندن ایکی- اوچ متر ایرهلی آتاراق ساغا، سولا توولاییر، دوه پنجهسینی خاطیرلادان یارپاقلاری سوپورگهنین اوجویلا قارشیسینداکی خزل توپاسینین اوستونه اؤتوروردو.
الیمله دروازا طرفی گؤستریب: اوردا دا کوکنارلارین، چینارلارین آلتیندا خزل توپالاری وار. سونرا بونلاری یاندیراجاقسیز، ائله می؟ توستو خستهلری بوغاجاق. اوغلانین دوداقلاری قاچدی. دیشلرینی ساناماق اولاردی. باخیشلاری الیمدهکی قوولوقدا دوندو. -تزه گلمیسن ائلهمی؟
- لاپ تزه!
- آنجاق آی قوناق معللیم، باخ او گؤیده - دئیهرک، الینی باشی اوسته قالدیردی.
- هه، او گؤیده بیر " ازن قاتی" دئییلن ساحه وار. اگر یاندیرسام... شاعیر صمد وورغونون وصیت مکتوبوندان خبرینیز وار یقین کی!
- سیز ادبیاتچیسینیز؟
- یوخ. بیتکی بیلیمچیسییم.(گیاهشناس). توخومسوز بیتکیلرین ژنتیکی اوزهره علملر نامزدییم. آتام منی داش بینالارین ایچینده لابراتور رهبری قویدورموشدو. خوشوما گلمهدی. آمما بوردا سودا بالیق، گؤیده قوش کیمییم. اراضیده چوخلو شابالید، پالید آغاجلاری وار. پاییزین آخیرلاریندا میوهلری یئره تؤکولور. من میوهلری چوواللارا دولدورورام. زنبقلرین بوروشموش لچکلرینی، قوروموش چؤر- چؤپلرینی ده خصوصی قوتولارا ییغیب باکیدا کی باش داوا ساتانلار ادارهسینه یوللاییرام. او ادارهدن ده خستهلرین رژیمی بودجهسینه چوخ آراجلار داخل اولور.
3 088
من یانماسام، سن یانماسان، بیز یانماساق/ نئجه چیخار قارانلیقلار آیندینلیغا؟
یاشا دولدوقجا حیاتین اتهییندن برک- برک یاپیشیریق. آمما الیمیزده ساخلایا بیلمیریک. منیم داوام- دیوانیم دا کسکین آغریلار- سانجیلارلا آساییشیمی پوزان، هله حکیملرین ده دقیق باش تاپمادیغی خستهلیک دیر.
نئچه واختدی کی تعجیلی یاردیم، خستهخانا، یوللاریندا هلاک- یورغونام.
حبلر آتمیشام، ایینهلر ووردورموشام، خستهلییمین هئچ توکو ده ترپنمهییب.
یوز فاییز امینم کی، آنامی آغلادان دا او میرعلی کیشینین دئدییی باکتریلردی کی، بیر نئچهسی بوینوما، الیمه داراشیب، قانیما کئچیب.
" یوز ایماما یالوارینجا، بیر آللاها یالوار" دئییبلر. امکانلاریمی گوتور- قویدان سونرا منه تانیش خسته خانایا گلدیم. دردیمی سوروشمادیلار. قولوما گیریب قان وئرمک اوتاغینا گتیردیلر. دئدیم آخی کئچن هفته مندن قان آلیبسیز، آنالیزلرین جاوابی جیبیمده دیر، گلدیم کی بو دفعه اللی روبلا اینستیتو قورتاران یوخ، بلکه ساوادلی بیر حکیم او آنالیزلره باخسین، منی ساغالتسین.
اوزومه ایریشن هَوَه دیش حکیم" خیر"- دئدی.- او آنالیزلر کوهنهلیب. بو دفعه قانینیزی اوچ نکته نظردن یوخلاییریق.
دیابت، پروستات، بیر ده قارا جییارین سیروزونا گوره.
دوزدو، بیرآز قیمت آرتاجاق! عیبی یوخ، جان ساغلیغی هر شئیدن قیمتلی دیر.
- آی دکتر، دئییرلر آخی، خسته ویروسلارلا دولو سما، یورغان کیمی اوستوموزه چکیلیب. بلکه او باکتریلرین نئچهسی قانیما کئچیب؟
- اولا بیلر! اوزون موددت ایرانین هر یئرینده حکیم ایشلهمیش آغایی فردوسی لقمان بیر- ایکی اوتورومدا سیزی ساغالدار.
آغزیمی دولدورموشدم" یالان دییهنین آتاسینا لعنت!"- دئییب هَوَه دیشه بیر تورشولو آش یئدیرتمک ایستهدیم. آنجاق گؤیرچینین جانی بارداقدادی، بارداق دا دئوین الینده. مئشهدن چیخانا کیمی آیییا دایی دئمهلییم." تزه حکیمین درمان نسخهسینده بیر دنه ده تزه درمان گؤرمهدیم. عمومی آغری کسیجیلر یازمیشدی. یوخلاما حکیمی قیمتی باها اوخودو. سببینی سوروشدوم. ساچلاری بوینوندا خوروز پیپییی کیمی قیزاران اوغلان دئدی کی، دایی بو صادراتی آپاراتلاری اؤز شوتوما گتیرتدیرمیشم. اورگانلاری سوپر گؤستریر.
حبلری آتدیم، ایینهلری ووردوردوم، خئیری اولمادی. کؤهنه حامام، کؤهنه تاس! بلکه درمانلار ساختادیر؟ دئییرلر کی باکینین زیرزمیلرینده دولدورورلار، یانمایان یئردن توستو چیخماز. الده دوزلتمه اولسا دا عیبی یوخدور، آز- ماز تاثیرینی گؤستریر. آمما ناراضیلیغین، اللیمین روبلا دینسیز حکیملردن دیر کی، تشخیصلری دقیق اولمور.
خستهنی رام ائتمک اوچون مینبیر جیلده گیریرلر.
هیروشیما و ناکازاکی شهرلرینین هرهسینده بیر آتوم بومباسی پارتلادی. یوزمینلرله اینسان دونیاسینی دییشدی. بمبالارین پارتلاییشیندان یارانان سونرا کی تاثیر، سَرت اقلیم دییشیکلییی " ازن قاتیندان" یان اؤتمهدی. بو طبیعی قورونما قاتینین کؤکو، سطحی ده مختلف درجهلی زدهلر آلدی. آز سونرا " چرنوبیل" آتوم- الکتریک ایستگاهی قضایه اوغرادی. " ازن قاتی" مقاومتینی بیرآز دا ایتیردی.
سیلاح کارخانالارینین باجالاریندان" ازون قاتینین" درمانینا سو یوخ، بول- بول گاز بیرلشمهلری آخیدیلدی، ایستیلشمهلر گوجلندی.
خستهلیک چللکده شراب دئییل کی، ساخلاندیقجا سویو چکیلیب توندلشسین!
اؤز باشینا بوراخیلان ویروسلار ساعاتلارلا یوخ، ثانیهلرله، اؤزو ده هندسی سلسلهیله چوخالیر، پهلوان جسّهلی اینسانلاری ایینهدن کئچن ساپا دؤندریر.
- نفتالانا وئر اؤزونو. " چینار" معدن سولارینین حیهطینه کی گیردین معالجهلر باشلاییر. اؤزو ده طبیعی واسطهلرله آپاریلیر. کوکنار، قوواق آغاجلارینین آلتیندا شیریلتیلا آخان آرخ سولارینین گاه ائشیدیلن، گاه دا غیب اولان حزین سسی پنجرهلریندن ایچری دولور، خستهلرین یوخولارینی شیرینلشدیریر. بوداقلاردا پیچیلدایان یارپاقلار یوخوسو قاچان خستهلری ناغیل دونیاسینا قوووشدورور.
باغ- باغچانین آغاج دلنلری ده خیدمتچی ایشینی گؤرور. بورا تئز- تئز گلیب - گئدن بیر تانیشیم دئدی.
نئیلهییدیم آدام چاره- علاج اومیدی ایله یوز یئره ال آتیر، امکانی اولان دونیانین او باشینا گئدیر. دمیر دروازانین قاپیسینی تاققیلدادیر. قاپی آچیلدی. ایچریدن غریبه عطیرلی، یومشاق بیر کولک اوزومه چیرپیلدی.
ایکی- اوچ آددیملا آغ، ساری، چهرایی زنبقلرین دیوارینا دیرندیم. بویلاری مندن ده اوجا زنبقلر اَییلیب- دوزهلیب، باشیمی سیغاللاییردیلار. نهدی بو ایلاهی! رحمتلیک فضولی بابامین" حئیرت، ائی بُت، صورتین گؤردوکده لال ائیلر منی" میصراعی قولاقلاریمدا سسلندی. شیرین- آجی قوخو بورنومو سانجیب، اورهییمی اوچوندوروردو.
3 088
یوبلئی کمسیونون صدری رسول رضا الیندهکی ظرفی هامییا گؤسترهرک:
- صمد وورغون مکتوب گؤندریب،- دئدی.
شاعیر ان چتین آنلاردا دا حساسلیغیندان، اینسانپرورلیییندن قالمیر. قولاق آسین، گؤرون بیزه نئجه جان یاندیریر. قورباغا گؤلونه داش آتدیلار سانکی. رسول معللیم بؤیوک شاعیرین ثقلتی چوخ سایلی جیلدلره سیغمایان ایکی جملهلیک مکتوبونو اوخودو.
-" آخیر واختلار هاوالار چوخ ایستیلشیب! سیزه جان ساغلیغی آرزولاییرام".
صمد وورغون اثر مذاکرهلرینده و رسمی چیخیشلاریندا دا سؤز آلتی سوزلره، ایدئوماتیک ایفادهلره داها چوخ یئر وئریردی. یوز اؤلچوب بیر بیچن شاعیرین آغزیندان بیشیریلمهمیش بیر سؤز چیخمازدی. ایستیلشمهلردن گلن ناراحاتلیغینی دا ثقلتی قالین توملارا سیغمایان، ایکی ساده جملهیله" قیزیم سنه دئییرم، گلینیم سن ائشیت" ضرب المثله رغمن یوبلئی اشتراکچیلارینا دئییب، دونیانین قولاغینا چاتدیردی.
قوناقلار تعجوبله بیربیرینه باخدیلار. - هاوا ایستیلشمهسینین جانساغلیغینا عایداتی وارمی؟- سوروشوردولار بیربیریندن.
- وار! اوزو ده اساسلی دخلی وار- تیترهین چنهسینی الیله قامارلایان قوجا دئدی.
-- صمد وورغون" هاوالار ایستیلشیر" دئیهنده اونا ایشاره وورور کی، یئردن گؤیه قالخان توستولر، شیمیایی توللانتیلار، ضررلی گازلار اتمسفرین" اوزون قاتی"نی سوکوب داغیدیر! ایستیلشمهلر گوجلندیکجه خستهلیک داشییان باکتریلرین دوغولوب تؤرهمهسینه مثبت شرایط یارانیر." دونوز گریپی" نین قلیچاسینی قیردیق، " قوش گیریپی" سونگوسونو بوغازیمیزا دیرهدی. ایندی ده " کرونا ویروس"ون الینده عاجیز قالمیشیق. اوستاد بیزی دونیامیزدان موغایات اولماغا چاغیریر- دییه هاوانی یومروقلایان قوجا، بیردن فاغیرلاشدی، دولوخسوندو:
- آی پیر اولموش صمد آغا! جان ساغلیغی آرزولاییرسان، چوخ یاخشی!
آنجاق اونو نئجه الده ائدهک؟ بیلیرسن سه یئرینی گؤستر. دوکاندا، بازاردا ساتیلیرسا بیز ده آلاق، اوشاقلارین قاباغینا تؤکک. بیر ایکیسینی ده آغزیمیزا آتاق. یوخدو بئله بیر حب. آمما فاجعهدن قورتولماق یولو وار. بیولوژی عالیمی میرعلی دئیرلر منه. گلوبال ایستیلشمه و پارازیتلرین آرتماسی بارهده یوزلرله مقاله چاپ ائتدیرمیشم. قوجا اوزو شیر دریسی کیمی قاریشان چانتاسینی آغزی آشاغی چئویردی.
ماسانین اوستونده ال بویدا نُت کاغیذلاری، جیلدلی کیتابلار، رنگی سولموش قزئت و ژورنال نسخهلری اوست- اوسته قالاقلاندی.- بو نئجه ایشدی آی بالام؟ عاییداتلی شخصلر سوسورلار. آنجاق آللاه سنین جانینا دیمهسین آی صمد آغا. "نه؟ خسته حوجئیرهلر؟" لوو خبر. خسته حوجئیرلرله یوکلنمیش سما قالین بیر یورغان کیمی اوستوموزه چکیلیب. ایلدیریم کیمی باشیمدا چاخدی! جانیما قورخو دوشدو." واخسئی ایشیمیز بیتدی! ائویمیز ییخیلدی کی! او یورغانین آلتیندان سالامات چیخا بیلهجهییک می؟ دوشونوب اوزولوردوم.
-" معرفتلی دانیش! آغزینی یویوجولار یوسون. بیزی دیری- دیری تورپاغا باسدیرما".
اؤز عالمینده هدهلهییردی قوجانی. های- کوی سالیب بایکوت ائلهمک ایستهدیم.
آمما دییهسن حقیقت واردی سؤزونده. البته او باکتریلرین بیر نئچهسی قارنیما کئچیب. بئل تیریمی، یانچاق سوموکلریمی، اویناقلاریمی گمیرن ده ائله او باکتریلر دیر.
مکتوبون مضمونوندان وجده گلهرک " یاشاماق گوزل شئیدیر، قارداشیم"-دئدی، دونیا پوئزییانین اوزاق ووران توپچوسو، شاعیر ناظم حکمت.
آمما او " گوزل یاشاماق، فراوان، گئنینه- بولونا تامیناتلا، شسسوتکا ماشینلارلا، باغ ائولری ایله یاشاماق، وظیفه پیللهلرینی قالخا- قالخا یاشاماق گوزل شئی دیر" دئمهدی.
ناظم افندی چوخ ساده و عادی یاشاماغا اوستونلوک وئردی.
سحر تئز اویانسان آینابندین پنجرهلرینی حیهطه طرف ایتهلهییب آچاسان. یارپاقلارین اوستوندن سویروشَن شئه دامجیلاری اللرینی سانجا. بو گیجیتیکان ایینهلری کیپریکلرینین اوجوندا اولان- قالان یوخونو قاچیرا. قوللارینی چارخ تکرلری کیمی فیرلادیب، خیرمان وَلی کورهکلرینین سیغناغیندا بوزوشن دامارلارینی جانا گتیرسین! جوشا گلن قانین بدنینین بوتون ناحیهلرینه فوارهلرله آتیلسین! سینه دولوسو نفس آلاسان، اوددوغون کؤورهک هاوا کئچن آخشام ایچدییین راکینین چؤکونتولرینی یویوب نفس یوللارینی تمیزلهیه. او هاوا- ملحم هیسی- پاسی اوزه چیخان ایچرهلیلرینی یاخشی- یاخشی قالایلایا! باشینی شیرین آلتینا توتاسان، شاققاشاقلا آخان سولار کورهگیندن قاییش یئرینه سوزوله، بیلهسن کی یاشاییرسان!
ناظم حکمت اوستاد سایدیغی صمد وورغونون ایکیجملهلیو مکتوبونو گلوبال ایستیلشمهیه قارشی مبارزه پروگرامی کیمی قبول ائتدی.
" من"، "سن"، " بیز" دئیرکن یئر اوزونو بو مبارزهده اَلبیر اولماغا چاغیریردی.
3 088
جان ساغلیغینین سوراغیندا(حئکایه)
✍یازان:«یوسیف حسنبَی»
کؤچورن:«سحرخیاوی»
حاضیرلایان:«ادبیات سئونلر»
اونوتماق مومکون دئییل. یانغیسی قورا بیشیرن یوخ، داش قاینادان او ایستیلرین گؤینرتیسی یادیما دوشنده، باشیمدان توستو چیخیر. یئر کورهسینین هر یئرینده، او جوملهدن باکیدا جولان ائدن ایستیلشمهلر گئت- گئده قیزیشیردی. حرارت گئجهلر ده سنگیمیردی. هاوانین قورولوغو تنگنفسلیک و بوغولمالارلا مشایعت اولونوردو. آرکتیکادا نئچه میلیارد ایل بوندان اوّل اؤزونو توتان بوز داغلارینین زیروهلری اریمهیه باشلادی. ایستی سئللر قوجامان بوزلارین اساسلارینی لاخلادیر، بندلرینی سؤکوردو.
بوز قایالاری بوز داغیلارین بئلینه بؤیرو اوسته چیرپیر، گورولتویه افقلر تیترهییر، آغ آییلارین قولاقلاریندان قان آچیلیردی. آمما اینسانلار گویا بو اقلیم دَییشمهسینی گؤرمور، گورولتولری ائشیتمزلییه ووروردولار.
اقیانوسلاردا قاسیرغالار گمیلری باتیریر، سئللر، قابارمالار ساحیل شهرلرینی آلتینا آلیردی. طبیعتین بئله آجیشماسینا سبب نه ایدی؟
گونشی یارادان، او گونشین تاجیندان قوپوب اطرافا سپهلهنن کؤسوو پارچالارینین، آلوو دیلیملرینین قارشیسیندا مدافعهچی- قالخان رولونو اوینایان بیر " اُزُن قاتی"نی دا یاراتمیشدی. مین دفعه احسن! اوستادینا مین بیر برکاللاه! او سون درجه قیزمار کوتله" ازن قاتی"نین فیلتریندن کئچرکن بیر نوع یویولور، تمیزلهنیر، ملایملهشیر، حیات اوچون یارارلی حالا سالینیر. یئر اوزونده جانلیلارین و طبیعت قوّهلرینین هماهنگ، باریشیق شرایطینده یاشاماسینا زمینه یارانیر.
دورنا گؤزلو سویونو ایچیب، کریستال هاواسینی اودوب، میوهلری ایله قیدالانیب خوشبخت گونلریمیزی یاشایارکن، چوخ تاسوف کی اطراف محیطدن موغایات اولماغی اونوتدوق. داهی علیاکبر صابیر دئمیشکن: "اؤز قوموموزون باشینا انگل- کَلَف اولدوق".
نتیجهده" ازن قاتی" نین سطحی یئردن اوزو یوخاری شیغییان گاز، توستو سونگولری ایله دئشیم- دئشیم اولدو، سوزهیه دؤندو. کیمیاوی توللانتیلارلا پارچالاندی، سمامیز داغینتیلارا معروض قالدی. نفسی، تاماهی قودوزلاشان بعضی گوجلولر، داها چوخ تورپاق ضبط ائتمک، سئچیلمک، زنگینلشمک یولویلا دونیایا حاکیم اولماغا جان آتیردیلار. سیلاح- سورسات کارخانهلرینین باجالاریندان قالخان شیمیایی توللانتیلار، راکت باشلیقلاریندان، بمب و خمپاره پارتلاییشلاریندان اتمسفره آتیلان قورقوشون، بنزول، کوکورد گازلاری، وولکان پوسگورمهلریندن یارانان هیدروژن، کلر بیرلشمهلری ده " ازن قاتی" نی سؤکور، شعاعلارین سربست آخینی یئر- گویو یاندیرماقدا داوام ائدیردی..
آمما بشری فاجعهدن خبرسیز دونیا عیش- عشرتینده دیر. توی- تویا قاریشیر، محصول بایراملاری ائل شنلیکلرینه چئوریلیردی. آرابیر تئلویزیون کاناللاریندا گؤرونن عالیملر بو حادثهنی طبیعتین "شیلتاقلیغی" کیمی قلمه وئریردیلر.
چوخ نفوذلو دین و مسجد عالیملری بو وضعیتین آللاه طرفیندن تئزلیکله نظاملاناجاغینی سؤیلهییر، خالقا تسللی وئریردیلر. آمما بعضی باشبیلنلردن و ضیالیلاردان فرقلی اولاراق، اوزاق گؤرهن شاعیر "صمد وورغون" جمعی اینسانلیغا قنیم کسیلن ایستیلشمهلره قارشی باریشماز موقع نمایش ائتدیردی.
خالق شاعیری صمد وورغون جئیرانا، قوشا نه قدر گولله آتسا دا، پاترون داشی داییم دولو اولسا دا، اووچو صمد وورغون قلمی اثردن- اثره پختهلشن، ایلهام بولاغی بوشالدیقجا دولان شاعیر ایدی. اونون ایکینجی دونیا محاربهسی عرفهسینده یازدیغی" واقیف" پیئسی اوشاقلی- بؤیوکلو خالقین تاماشاسی ایدی. هیتلر فاشیزمی ایله اؤلکهمیز آراسیندا گئدن محاربهنین آغری- آجیلاریندان یاخا قورتارماق ایستهین، تئاترلارا دا گئدیردیلر. صیفتینده بارماق قالینلیغندا قیریشلاری تیترهین، باشیندا کی شاه تاجیندا رنگارنگ داش- قاشلاری برق ووران شاه قاجار وحشی گؤرکمی ایله واهمه دوغوروردو.
اوغلوندان قارا کاغیذ آلان آنالار، نیشانلیسیندان نیگاران گلینلر، قاجارین تمثالیندا هیتلری گؤرور، ناحاق قانلار آخیدان او فاشیسته لعنت یاغدیریردیلار. اونون آتشفشانلیقلا پارلایان" زنجینین آرزولاری" اثری قارا دریلیلرین آزادلیق یوللاریندا مایاکا چئوریلدی.
شاعیرین 1956- جی ایلین باهاریندا اُپرا و باله تئاتریندا کئچیریلن اللی ایللیک یوبلئیینده ادبی عالمده یاخشی تانینان قلم دوستلاری دا گلمیشدیلر.
تدبیر عرفهسینده شاعیرین صحتینده پرابلئملر اوزه چیخمیش،" داغینتیلار" یارانمیشدی. تدبیر اشتراکچیلاری، یوبلئیاری اوز یانلاریندا گورمک ایستهدیکلرینی بیلدیردیلر. بو ایستک باش توتمایاندا " هئچ اولماسا سسینی ائشیدک" دئدیلر. مرض شاعیرین بوغازینی توتموشدو. خیریلتیلی سس ائشیدنلری شوکا سالار، سارسیدا بیلردی.
3 088
Repost from ادبیات سئونلر
«نادر الهی» ادبیات سئونلر گوزگوسونده
موضوع: مفهوم ومحتوا نادر الهی نین شعیرینده
اوزمان: دوکتور:«سلیم زحمت دوست»
زمان: سه شنبه1402/10/26
ساعات: 10
آپاریجی: کریم قربانزاده
https://t.me/Adabiyyatsevanlar
