غير حياتك

‏﷽ ۝ إِنَّ اللَّهَ وَمَلائِكَتَهُ يُصَلُّونَ عَلَى النَّبِيِّ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا ۝ ﷺ

3 سنة بتمتحن لتخصص جراحة المخ والأعصاب و ما بتنجح لما جاها يأس و أحباط كدة مزعج ، وغيرت خططها الكانت مليانه شغف و طموح و رغبة في الإنجاز ، في ذات الفترة اتقدم ليها واحد امو زميله امها في الشغل وامها عشان عارفاها ما دايره العرس دا و بقت تكره سيرتو بالله واحد ، فكلمتها فى شكل ونسة و اصلا ما كانت راجيه من بتها تركز معاها ؛ وإتصدمت بانها قالت ليها موافقة خليهو اليجي يتقدم ، امها تعجبكم سماحة الفرحة و بتى عملها اتفكا والحمدلله و البكى و ضربو لخالتها في كوستى و خالها في بورسودان و خدمة سودانى مدورة، هى تقريبا دخلت في مرحلة احباط خلتها تغير حياتها و شافت انها امكن الصاح تبدأ اولوياتها من ورا ، بعد اسبوع الولد جاهم تعارف وعشان يشوفها وتشوفو لانها لوقتها ما عارفاهو كحلى ولا برتقالي ون بيس او همتارو ، قالت لى كنت بجهز بضمير ياصحبتى وانتى عارفانى ما لى في تعب المكياج و التظبط دا ، بس نفسي كانت مفتوحة للجيهه زى التقول كنت صايمه وح افطر بيهو ، اول ما دخلت اتعمدت اعاين ليهو في عينو، والله لا عرفتها قوة عين ولا قهارة ولا قلة ادب ، انا اساسا وافقت اتخطب و اعرس دحين بغلبنى اعاين ليهو في عيونو! كلو ضارب في بعضو ، كنت زعلانه عليها جدا ، اصحابها هم الوحيدين الحاسين بيها لانهم ادرى برغبتها لما كنا في السوق بنجهز ليها في حاجاتها كانت بتتعاور و تضحك واول م تسكت ملامحها تبكي الزول ، يجماعة والله التنازل عن الرغبة دا مميت وما بعرفو الا العاشو ، امكن هى اكتر زول عرسو تمو بسرعة وما احتاجت تتحبس اصلا لانها طبيعى محبوسة بتقرا او نائمة كنت خائفه عليها جدا العالم كلو وصاها تقريبا الا انا ، ما كنت عارفه اقول ليها شنو الحاجة الوحيدة الطلعت منى هي ( اسمتعي بسويسرا اهو فسحة مجانية ) ضحكت وقالت لى على قولتك ان شاء الله م افضحكم مع ود الناس دا ، قلت ليها والله اهو انا بقي خائفه على ود الناس دا ما عليك ، جرت لى نور مسافة ، ما تحدرى لى قلت ليها ، الله يصبرو و يحفظو من جلطة 3D ، تمو شهر في سويسرا و مشى السعودية لاخوانه وعدى زى اسبوعين ورجعو يجماعة صحبتى الرجعت ما زي المشت ، انا اقسم ليكم بالله اننا اديناهو مره ارملة ولدها الوحيد مات و هى حادة عليهو دهر و رجعها لينا عروسة لو ما قلت بسم الله ما شاء الله لا قوة الا بالله ما تعاين ليها ، كنت شفقانه جدا اعرف التفاصيل سر التغير و الضحكة المن جوه قلبها ، نظراتها ليهو كشفت كل حاجة تقريبا ، قالت لى انا مبسوطة انى ما نجحت في الامتحان عشان ربنا ادانى راجل فرحتى بيهو تسوى الدنيا كلها ، قلت ليها كدى براحة ، ع قول امك ما يكون سوى ليك عرق المحبة؟ ضحكت وقالت : اريتو! هو انا باباهو! وفضلت تحكي المواقف موقف ورا موقف وكيف وراها انو عارف هى وافقت عليهو ليه و انو فاهم هى حاسه بشنو ، محاولاتو الامتناهية عشان تضحك خوفو عليها و غيرتو ، والحاجة الاهم من دا كلو انو ما باخر فرض وما اصبح ولا امسى ليل الا وهو بحصنها ، اخلاقو خلتها مفتونة و عرفت انو ربنا كان بسوق الاقدار لاجل مسمى ، صحبتى دى نفسها حاليا نائب اخصائي جراحة المخ و الأعصاب ، امتحنت فى نفس السنة الاتزوجت فيها و كانت حامل ، امكن كلنا كنا خائفين عليها بس انا كنت مطمئنه لانو زوجها هو الشجعها تمتحن تاني وكان بساهر يشتغل في حاجاتو او يطبخ او يسمع اخبار وقت هى بتقرا ، بمشي معاها طلعات النقاش مع الممتحنين معاها و بنتظرها لما تخلص ، زوجها هو الدعمها عشان تبقي زولة عظيمة ماف قوة على وجة الأرض قادرة توقف في طريقها ، ربت بتها احسن تربية و شغالة بضمير و علاقتها بزوجها افضل ما يكون ، هي اقدار وربنا بكتبها بوقتها ولحوجتها ، ابدا ما تتضايق لو ما صابت امكن الحكمة انها ما تصيب عشان يصب الاحسن منها و يساعدك في انك تصلها بعدين ، ثق بالله يؤتيك أضعاف ما تتمني 💙

‏لا تكُن إلاّ مَع مَن يَفتخِرُ بوجُودِكَ ، ويَفتقِدُ غِيابكَ ، ويصُونُ فُؤادَك ، كُن مَع مَن لا يَكونُ بِدونِكَ .. 🖤

‏﷽ ۝ إِنَّ اللَّهَ وَمَلائِكَتَهُ يُصَلُّونَ عَلَى النَّبِيِّ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا ۝ ﷺ

‏انا أكبر غلطة بعملها في حياتي إن لسة بستني الناس تعاملني زي ما بعاملهم. 😔✋

رغبتُك في الرحيل قد تأتي فجأة دۈن مُقدمات .. لٲن الٲسباب القديمۃ أيقظتها أسباب جديدة !🖤