مَطلع

حط ربي فيك زين وجامع اوصافٍ حميده ‏ما حواها غيرك انتي من جميع المغرياتي ‏حتى لو ماخذت من دنياي كل اللي اريده ‏بس اخذتك وانتي اخذتي من الدنيا غلاتي ‏لاجلك اودع قديم جروح واستقبل جديده ‏راضيٍ باللي يجيني منك ، يا كل امنياتي ‏يوم دمعي يسقي اوراقي وتنبت لك قصيدة ‏انتي اولا من جميع الخلق ببداعي وذاتي

‏حُرية الفكر هي أبسط حقوق الحياه ‏و العاقل اللي يعرف - حدود حريته ‏من سكر أبواب قلبه لا تفتش وراه ‏من حقه يعيش بـ الدنيا خصوصيته ‏فقير الأدراك أفعاله ٫ تأكد رداه ‏تكشف لك أسراره السوده و ماهيته

‏والله إنك سالفة قلبي الوحيده ‏كل ماجيت أنزعك منه هربتي ‏ياعيون اللي محاضيبه بعيده ‏مادريت إني أحبك لين غبتي

ياليت لو بالي أطول من ظفايرها ماكان صدري خذا من خصرها الضيّق

ودي أرد قلبي بالغزل يا غزاله ‏لايسوي سوات اللي يمثل رفيقه ‏الهوى لذته في طيشه وفي هباله ‏ولذّة أول شعور وربكة أول دقيقه ‏وجه اللي يشوفه ينبهر من جماله ‏وطلّة تجعل الرجال يشرغ بـ ريقه ! ‏ودي أمثل مثول المتهم للعداله ‏ما علي دامني بين اليدين الرقيقه العفو يا شبيه اللي جفل من ظلاله نظرتي في التفاصيل الدقيقه دقيقّه أنت حتى الذهب يزهاه جيدك لحاله ويتلاشى على غيرك ويفقد بريقه

ضمّني والله إن قلبي ملاه الجفاف ‏وعطني من السوالف مايبلّ الحشى ‏ناظر عيوني بتلقى لبحرك ضفاف ‏أنت أول بشر داخل هدبها مشى ‏ استحليتني ماهو بحدّ الرهاف ‏بشعورٍ غمر قلبي إلييين أنتشى ‏أذكر اني قبل أعرفك كنت أخاف ‏ومن بعد مابكيت بحضنك .. لا حشى

ليه أسجل عن أنواع الطباع إنطباعي ‏والبشر ماتبي تسمع وش نقول عنها ‏ملّت الناس من ديكورها الإجتماعي ‏و إنتقادات يدفع كل واحد ثمنها ‏النصايح لها وقت و طريقه و داعي ‏كل مازدت جرعتها تسمم بدنها

‏عودتك اني في رضاي وفي زعلي ‏انك المبدأ دون كيف ودون ليه ‏اقول اسف لاجل ما تزعل علي ‏وانا ماني بـ اسف انا يؤسف عليه

مرّني عامين بين احساسي و ظلّ اغترابي ‏وأنت طرقي عجول وشاعرك راعي طويله

حبيبي أنت يا سبّة شقاي وعلّتي ودواي ‏دخيلك لاتمادى في جفاك وتقتل أزهاري ‏دخيل الشعر واحساس الشعور وعزوتك واعداي ‏دخيلك وين أولّي عن عذابك واهجر أسواري ؟ أمانه لا غزتك الذكريات ومرّتك ذكرياي ‏تذكّر من هدر دمع الفراق إن جاب لك طاري ‏كتبتك يلعن أسلاف القصيد وتنكسر يمناي إذا إني ما قدرت أرضي غرورك بأصدق أشعاري ‏سرى ليل المواجع والتحف صمتي صهيل الناي ‏على لحن الفراق أكتب حروفي واعزف أوتاري ‏أفجّر للحزن صمت المواجع وإن ضمنت بكاي أغنيها على لحن انكساري واسر يا ساري

جديد الغلا ياليت لو تمسح الأرشيف ‏فالأرشيف كذبه بإسم الأشواق تنهكني ‏الأحباب قبلك في حياتي سحابة صيف ‏تبرّيت من ماضي مع الغير يشبكني ‏إذا كنت تجهلني أخذ مني التعريف ‏“ أنا درب ما تقدر بوجهين تسلكني “ ‏أنا لك حقيقه ماهي بشك ولا زيف ‏ولغيرك سراب يبطي بيوم يدركني

مانشدت الشمس عن حزن الغياب علمتنا الشمس نرضى بالرحيل

أنت الملاذ أنت الطريق أنت الجهات ‏أنت الشعور اللي ماكنت اتصنّعك ‏أنت أول أحبك تهجّتها الشفات ‏أنت اللي لاسولفت قلبي يسمعك ‏أنت الوحيد المستحل الذكريات ‏ما كنّ عندي ذكريات إلّا معك !

‏مرّيت مثل الشقى المُلقى على ما أدري ‏متهيّب من الكلام ومن تفاصيله ‏يغفر لي الله كثر ما شلت في صدري ‏اللي ما ودّي أعلّم به ولا أشيله

كل ما ادخل مع باب الغلا و التغلي ‏اطلع بـ ذنب ولا اطلع بـ مطلع قصيده

الشاعريه ، تبطّء مشيتي في الحياه حتى وأنا هاوي الوقفه وتطويلها مافيه عابر يمر ، الا وعيني وراه مافيه كلمه تقال ، الا ومصغي لها كني على رعاية العالم موصّى وصاه ولا موصّى على الكلمه وتعليلها أوّل خطأ في حياة الشاعر الانتباه وأخطاءه الباقيه تلقى مداخيلها لو الشعر يوهم الشاعر بـ طوق النجاه في النفس حاجه ما ظنّي يقدر يشيلها