عابر

يتوقف النشر في القناة لمدة لا يعلمها إلا الله... المنشورات المهمة موجودة بالرسائل المثبتة، وكل شيء بالقناة منظم تحت الهاشتاجات في فهرس القناة... أستودعكم الله يا كرام، السلام عليكم.

لو بتفكر تتقدم لبنت وأنت طالب تعمل اي؟ كل نقطة ذكرتها ليها موقف سمعته وشوفته بعيني، فكلهم مهمين.. لو افتكرت حاجة تانية مهمة هضيفها، بس عالعموم شوف الأكبر منك الثقة واستشيرهم ف كل حاجة متسيبش نفسك للأيام..

▪️متبقاش قمّاص بتزعل من أي كلمة صغيرة حتى لو بدون قصد عشان بتبان عيّل.. خليك متغافل، سر نجاح العلاقات عموما التغافل (تسعة أعشار حسن الخلق) ▪️اقعد كتير مع والدك وصاحبه، مع أعمامك ومع كبير العيلة، احضر القعدات بتاعت الرجالة الكبيرة، شوف بيتكلموا ازاي ويحلوا المشاكل ازاي الناس الكبيرة دي هتعلمك كتير، مش يبقى آخرك قعدتك مع صحابك عالقهوة! يعني احتسب نفسك رجل راشد بالغ هيفتح بيت ويصرف على أطفال وأمهم، فخلي اهتماماتك أكبر شوية، خلي في جانب من النضج في حياتك يعني، روح مع والدك المناسبات السعيدة والحزينة والعزايم وشوف بيتكلم ازاي وبيتعامل مع الرجالة ازاي وهكذا... ▪️متلغيش أهلك، متلغيش والدك، في حاجات زي الاتفاقات بتاعت المهر والحاجات دي الآباء هم اللي بيتكلموا فيها (اللي أعرفه)، مينفعش يكون والدك بيتكلم وتقاطعه أو تلغي كلامه. ▪️مش كل كلامك يبقى عن أهلك برده، خاصة والدتك عشان مصطلح (ابن أمه) اللي يوحي إنه لسه متفطمش مش يعني مش بار بأمه.. يعني متقولش ماما قالتلي أعمل كذا، أو أي حاجة تحصل تقولها لمامتك، أو لو في قرار هتاخده مع خطيبتك يخصكم أنتم فقط متقولش هشوف رأي ماما، حاول ميكونش في مشاكل أصلا بين والدتك وخطيبتك، لكن لو حصل مش دايما تقف ف صف والدتك، خليك طرف محايد متجيبش الغلط من عندك، يعني لا تخسر والدتك ولا تخسر خطيبتك. طيب يعني هي لازم تفهم إنه أهلي كل حاجة عندي، هي هتفصلني عن أهلي يعني؟ =عاوز تاخد رأي والدتك ف حاجة (ملهاش قرار فيها أصلا) تقولها بلطف بينك وبينها من باب إنك عاوزها ف حياتك مش بتلغيها بمجرد ارتباطك. =دايما وصّل لوالدتك إنه خطيبتك بتقول كلام حلو عنها، ولخطيتك كده برده، عشان تكون العلاقة دايما كويسة... المهم خليك ناضج ف تصرفاتك وحيادي مش منحاز، وعاقل حتى لو في أي خناقة تعرف تتصرف مش تزعق وخلاص، وتحاول تصلح بين الاتنين مش تنحاز لطرف وتخاصمه عشان الطرف التاني. ▪️متعاملش البنت إنها واحد صاحبك، ومتقولش أي كلمة سيئة (المفروض مطلقا) ▪️اتعلم عن العلاقات، اقرأ، وافهم طبيعة المرأة وتفكيرها ازاي، ازاي تتعامل مع مشاعرها.. وازاي تحتويها.. وهي مختلفة عنك قد اي التأهيل للعلاقات مهم جدا، متمشيش بالبركة كده.. ✨ كنت رشحت حاجات كتير تقدر ترجعلها ف البوست ده كلها أهم من بعض ✨اسمع م. أيمن عبد الرحيم، و د. جاسم المطوع ▪️اهتم بمظهرك ف العموم، وتابع قنوات شباب مخصصة لكده، تكتب بس يوتيوب (ملابس مناسبات رجالي...) أو أيا كان، هيطلعلك ناس كتير جدا، اللي تحسه مناسب عليك جربه. ▪️متقلقش وتقول هتزوج منين وأنا لسه صغير، ربنا أعطى وعد للشاب اللي يريد العفاف إنه يعينه، مفيش حاجة اسمها أصل الظروف أصل أحوال البلد... أنت عليك تسعى وسيب التيسير ده لربك عليك اي؟ تسعى ▪️خليك هادي ومتتعصبش بسهولة، ولو اتعصبت خليك راقي حتى ف أوقات الخناق، يعني متغلطش ف حد نهائي ولا تعيب فيهم.. تقدر تنتقد وتلوم وتعاتب ف وقت تاني وبهدوء.. مش تشتم! الغضب من وجهة نظري من أكتر الحاجات اللي بتبين الشخص عاقل ولا لسه صغير، لما بيتضايق بيؤذي الناس ويغلط؟ ولا حتى في غضبه عاقل؟ ▪️لو اترفضت متتقدمش تاني ومتسألش ليه. ▪️لو اترفضت تقبل الرفض عادي جداااا، ممكن تكون مناسب، بس مش ليها... وهي مناسبة، بس مش ليك الأرواح جنود مجندة... مفيهاش قواعد، فيها قبول.. مواصفات.. أيا كان. وبارك الله لكما وبارك عليكما وجمع بينكما في خير مقدما.. #عابر #زواج •-------------------------• ✿↳ @moroor_abir

لو بتفكر تتقدم لبنت وأنت طالب تعمل اي؟ في نصائح كتير بتتقدم للبنات بخصوص الرؤية الشرعية لكن هقولك حاجات بسيطة بلاحظها بالنسبة للشباب يعني.. وده من وجهة نظري، من وجهة اي؟ نظري -ف الرؤية الشرعية أول انطباع هو اللي بيدوم، ويمكن شاب يترفض عشان شكله؟ أيوة طبعا ▪️مش معنى إنك طالب ومتعود على إنك تغسل وشك بصابون الأطباق وتلبس كل حاجة من ناحية إنك تروح كده اهتمامك بشكلك مهم لأبعد حد وبيعطي فكرة مبدئية هل هتكون راجل نظيف ولا لا.. حاجات بديهية لكن مش الكل بيعملها للأسف، عشان يمكن أول مرة تتحط ف موقف زي ده وتتعامل مع بنت غير أختك.. شوف الشباب الأكبر منك واسألهم ألبس اي وأعمل اي قبل ما تروح مع نفسك كده.. ●اختار لبس شيك ومناسب ليك، مش استايل أول مرة تشوفه أو تجربه ف حياتك يعني ●ثيابك تكون مكوية ●الحذاء بتاعك يكون نظيف ومتلمع، مش كله طين وتراب، الإنسان النظيف بيتعرف من حذاؤه خد بالك. ●الشراب يكون نظيف، عشان البنات بتركز ف الحاجات دي أوي وعشان لازم يكون نظيف أصلا مفيش أوبشن تاني. ●بلاش تفتح القميص ولا تلبس حاجة مقطعة ولا حظاظات ولا سلاسل(ف الرؤية أو غيرها عموما). ●العطر مهم جدا ومش حاجة ترفيهية من وجهة نظري، بتعطي إيحاء إنك جنتل مان وراجل نظيف. ●مزيل العرق طبعا لا غنى عنه، وطبعا بعد ما تغتسل مش تحطه على عرقك لأن ده بيخلي الموضوع أسوأ. ●تقدر تلبس ساعة شيك ك إكسسوار. ●لازم تحلق، مش تحلق لحيتك، تحلق الزوائد اللي عالخد، شنبك، تظبط شعرك وتسريحة تليق بيك. ⬅️ شوية نصائح تانية: ▪️دور على شغلانة بجانب دراستك حتى لو بألف جنيه ف البداية، كونك قررت تدخل بيوت الناس فمش شكلها حلو أبدا تبقى شاب بطولك ده ولسه بياخد مصروفه من والده طب لو مش بشتغل أو ف كلية طبية هعمل اي؟ =في شغلانات كتييييير حتى لو دخلها بسيط بس اسمها بشتغل، بكوّن مستقبلي، مش عيل صغير حتى لو هتعتمد على أهلك بنسبة كبير لكن ممكن تشتغل ف حاجة أونلاين مثلا ملهاش علاقة بمجالك بس بتجيب فلوس مؤقتة لحد ما تتخرج. جاوبني... لو تزوجت الصبح هتعمل اي؟ اعتبر إنك هتخطب وتتزوج ف كام شهر هتقول لباباك هاتلي مصاريف أجيب اتنين كيلو طماطم؟ مفيش كده، ف دور على شغل بأي شكل واعمل زي ما دكتور علي حسيب بيقول (قوله ي عمي أنا لسه ف بداية حياتي والمستقبل قدامي، وبص بعيد وافتح دراعك كده، وهو هيصدقك متقلقش). ●ولازم تعرف إنه الزواج مسئولية وليلة كبيرة حضرتك، مش مجرد فرح وهيصة.. وكونك محتاج للزواج نفسيا وجسديا ميخليكش تنسى المسئوليات اللي عليك وواجبك كرجل اللي يطبطب ويصرف ويحتوي ويتحمل مسئولية أسرة! ▪️كونك طالب ولسه صغير فأنت محتاج تثبت للعروسة وأهلها إنك خلاص راجل مش (عيل) ..يعني •لو قولت حاجة مترجعش فيها، متبقاش متردد، عشان كده تمهل ف قراراتك وكلامك وفكر كويس أوي قبل ما تتكلم، عشان الراجل مش بيرجع ف كلامه مش كده ولا اي؟ •خليك تقيل عارفة في بنات هتتخانق معايا، بس في فرق بين الراجل التقيل والراجل اللي معندوش مشاعر(مش هتكلم ف النقطة دي) بس من الآخر متبقاش أهبل، خليك رزين وعاقل وكلامك موزون، البنت وقتها تقدر تعتمد عليك مش من أول مرة تعطي كل مشاعرك للبنت، أولا ده حرام عشان الضوابط، ثانيا البنت مش هتصدقك عشان مفيش حاجة حصلت أصلا ولا مواقف ف البداية خلتك تعطيها كل الحب ده، ثالثا هتقول إنك مش ناضج عاطفيا ف أي واحدة غيرها تقدر تفتنك بسهولة ف مش هتثق فيك بسهولة برده. ✨يعني أعمل اي برده؟ وأكون تقيل ازاي؟ وأوضح إني لطيف ازاي من غير ما ألغي الضوابط؟ •يعني هم أعطوك معاد تلتزم بيه. •لو حصل خطوبة يبقى في مواعيد محددة للكلام، حفاظا على الضوابط وعشان ميبقاش في هبل في العلاقة، مترنش ف أي وقت ▪️تبين إنك لطيف ازاي بس تقيل ف نفس الوقت وبتعرف تتحكم ف ردود أفعالك؟ =خلي ابتسامتك خاصة في أول لقاء جميلة، تبسمك هادي وحضورك قوي، مش بتضحك بصوت عالي الضحكة بتاعت الرجالة المصريين دي وأنت لسه أول مرة تقعد معاهم (ولا عاشر مرة والله بس يلا). =حركاتك هادية، مش طفولية، يعني لغة جسدك تبين إنك واثق ف نفسك بس مش متكبر، يعني دايما على وشك ابتسامة خفيفة، ظهرك مستقيم، مش مربع إيدك ولا منطوي على نفسك، مش بتتحرك كتير بلا سبب. =تعرف تقول شكرا وحاضر ومن عينيا... وكله بما يرضي الله.. اه ي فندم احنا ابننا أهم حاجة عنده الضوابط. =لو أكلت عندهم قول تسلم إيد اللي عمل الأكل، وأنت ماشي اشكرهم على ضيافتهم ليك مع ابتسامة جميلة... كده يعني يعني من الآخر عبر عن مشاعرك لكن بأدب ورُقيّ وحسن خلق.

صباح الجمال والكريستال ما تيجي ننسى محاولات امبارح الفاشلة، وأول امبارح كمان، والشهر اللي فات وكله نفتح صفحة جديدة؟ بكلمك بأمانة، مش مهم قصرت قد اي ولا ضيعت وقت قد اي، النهاردة يبقى النهاردة، يوم جديد يعني؟ =برافو، إنسان جديد، بمحاولات جديدة عادي •ولو فشلت يا عابر؟ =عادي يعني هي أول مرة بهزر، تحاول تاني وتالت ورابع، وتفشل وتاخد على قفاك وتحاول تاني وتاخد على قفاك، يعني أنت فاكر الدنيا اي؟ الدنيا لا تؤخذ إلا غِلابا.. هي كده، ومش هترتاح إلا لما تفهمها على طبيعتها، وتعيش بسنن الله في الكون.. سنة الحياة بتقول إنه مع كل شروق شمس يوم جديد في فرصة جديد بتتولد المصدر: عابر عادي المهم... لننسى الماضي ونركز في النهاردة، وخير ما نبدأ به يومنا يا عزيزي هو وردك، أذكارك، التلاوة الجميلة للقارئ اللي بتحبه.. وعيش #صباحيات #عابر •----------------------------• ✿↳ @moroor_abir

الصورة بتأمل فيها من ٣ سنين، وبعايشها زي ما بعايش جملة (نقاوم ما نحب ونتحمل ما نكره)، من مفضلاتي... #مجاهدة

يا غالي لا تؤخَذ الدنيا إلا غِلابًا.. آه والله زامبقولك كدهو.. #الحالة

قيام الليل يا كرام ولو بركعة.. #مقتطف •------------------------------• ✿↳ @moroor_abir