БСТ | Яңылыҡтар

Стәрлетамаҡта тәүлек дауамында еңел атлетика эстафетаһы ойошторолдо Спорт сараһы «Экологик именлек» милли проектының «Таҙа һауа»федераль проекты сиктәрендә ҡаланың һаулыҡ паркында уҙғарылды. Йүгерәктәр ярышында профессиональ спортсылар ҙа, һәүәҫкәрҙәр ҙә ҡатнашты.Хатта сабыйҙар ҙа ата-әсәләренә ҡеүәт биреп, дәртләндереп торҙо. Спортсылар дистанцияларҙы үтеүҙән тыш, махсус «йәшел ғәҙәттәр зкотрекерында» балдар йыйып, экологик яуаплы булған йәмғиәт формалаштырыуға үҙ өлөшөн индерҙе

Республика мәғәриф учреждениеларының яңы уҡыу йылына әҙерлеге тикшерелә Мәктәп һәм балалар баҡсаларында ремонт эштәре башҡарыла, кабинеттар тәртипкә килтерелә,йыһаздар, ҡормалардар,уҡыу әсбаптары яңыртыла. Хәүефһеҙлек ҡағиҙәләре үтәлеше тикшерелә. Өфө районы белем биреү усаҡтарының яңы уҡыу йылына әҙерлек кимәлен беҙҙең ижади төркөм дә өйрәнде.

Башҡортостанда хәрби хеҙмәткә контракт төҙөүселәрҙе ҡабул итеү дауам итә Өфөлә «Защитник» үҙәгенә республика район-ҡалаларынан ғына түгел, Рәсәйҙең башҡа төбәктәренән дә килеүселәр өсөн бөтә шарттар булдырылған. Үҙәктә банк хеҙмәткәрҙәре финанстар буйынса аңлатыу эштәре алып бара, табиптар тикшереүҙәр үткәрә, ә инструкторҙар хәрби әҙерлек буйынса эш алып бара. Бер көн эсендә тулыһынса хәрби хеҙмәткә һайлау тәртибен үтергә була.

Благовещен ҡалаһында яңы физкультура-һауыҡтырыу комплексы файҙаланыуға тапшырылды Бөгөн Благовещен ҡалаһында бассейн менән йыһазландырылған яңы физкультура-һауыҡтырыу комплексы файҙаланыуға тапшырылды. Спорт объекты «Башнефть» компанияһының финанс ярҙамында Башҡортостан менән «Роснефть» араһындағы хеҙмәттәшлек сиктәрендә төҙөлгән. Коплексты асыу тантанаһы республика башлығы ҡатнашлығында үтте. Радий Хәбиров шулай уҡ төбәктең иҡтисади үҫеш мөмкинлектәре менән дә яҡындан танышты.

Өфөлә быйыл 8 дауаханала ремонт үткәреү күҙаллана Баш ҡалала медицина учреждениаларын тәртипкә килтереү өсөн 400 млн һум аҡса бүленгән. Был турала Башҡортостан башлығы Радий Хәбиров аҙналыҡ оператив кәңәшмәлә хәбәр итте. Көн тәртибендә ураҡ кампанияһы барышы һорауҙары ҡаралды. Республика аграрийҙары ужым бойҙайы уңышын йыйып алып борсаҡ һәм арпа урып-йыйырға әҙерләнә.

Башҡортостанда 122 мең тонна ашлыҡҡа иҫәпләнгән заманса элеватор сафҡа индерелде «Урожай» агрохолдингы ивестицияларына төҙөлгән проекттың хаҡы 2 миллиард ярым һум. Элеватор әленән үк уңыш ҡабул итә башлаған. Шулай ҙа ярҙамсы объекттар төҙөлөшө дауам итә. Ауыл хужалығы министры әйтеүенсә, юғары технологиялы заманса элеваторҙар аграрийҙарға һауа торошона ҡарамай ашлыҡ тупларға ярҙам итә. Сөнки бөртөклө культураларҙы яландарҙа киптереү талап ителмәй. Иң мөһиме комбайндар ғына баҫыуҙарға инә алһын.

Башҡортостанда һунарсылыҡ итеүгә квоталар билдәләнде Ҡырағай хайуандар аулауға рөхъсәтте Башҡортостандың тәбиғәттән файҙаланыу һәм экология министрлығы бирә. Республика башлығы ҡул ҡуйған документҡа ярашлы, 1 августан алып киләһе йылдың ошо осорона тиклем республиканың һунарсылыҡ биләмәләрендә 3256 мышы, шул уҡ сама себер ҡоралайы, 77 һеләүһен, 16 болан ауларға мөмкин. Айыуҙарҙың саманан тыш артыуын иҫәпкә алып уларҙы атыуға 600 квота бирелә. Шулай уҡ 880 бурһыҡҡа һунар рөхсәте бирелә. Дөйөм тәғәйенләнештәге һунарсылыҡ биләмәләрендә ауға сығыу өсөн рөхсәт ҡағыҙҙары йәрәбә нигеҙендә таратыласаҡ.

Башҡортостан мәктәптәренә капиталь ремонт эшләнә Республикала мәктәп һәм колледждарҙа 15 авгусҡа тиклем капиталь ремонт тамамланырға тейеш. Һүҙ “Йәштәр һәм балалар" милли проектына ярашлы төҙөкләндерелгән белем усаҡтары тураһында бара. Быйыл 35 мәктәп, 3 колледж һәм 2 балалар баҡсаһы яңыртыла. Бының өсөн 2 миллиард һумдан ашыу аҡса бүленгән.

Башҡортостан юл сифаты буйынса рейтингта бер баҫҡысҡа күтәрелеп 16 урынды биләне Күрһәткестәр буйынса, республикалағы төбәк, муниципаль-ара һәм урындағы юлдарҙың 68 проценттан ашыуы нормативтарға тап килә. Рейтингтың тәүге урындарын Мәскәү, Ханты- манси автономлы округы һәм Силәбе өлкәһе бүлешкән. Был төбәктәрҙә мең квадрат километрға тура килгән ҡаты япмалы юлдар күләме Башҡортостан менән сағыштырғанда күпкә әҙерәк. Волга буйы федераль округында республика был күрһәткестәр буйынса беренсе урында.

Зөһрә Гордиенко Башҡортостандың эшҡыуарлыҡ һәм туризм министры вазифаһынан бушатылды Был турала Радий Хәбиров аҙналыҡ оператив кәңәшмәлә белдерҙе. Республика башлығы әйтеүенсә, Зөһрә Мәүлитбай ҡыҙы икенсе эшкә күсерелә. Министр вазифаһында ул бер йылдан ашыу эшләне. Эшҡыуарлыҡ һәм туризм министрлығын быға тиклем иҡтисади үҫеш һәм инвестиция сәйәсәте министры урынбаҫары булып эшләүсе Светлана Верещагина етәкләйәсәк.

Үҫмерҙәр Ағиҙелде матурлауҙа ҡатнаша Ҡала хакимиәте башлығы Динис Ирназаров ошо турала социаль селтәрҙә яҙа. Йәштәрҙе берләштергән хеҙмәт отряды йәй аҙағына тиклем ҡаланы таҙартыу һәм йәшелләндереү эштәрен башҡара. “Был уларҙың тәүге тәжрибәһе. Беренсе тапҡыр аҡса эшләп ҡарау мөмкинлеге. Шулай уҡ ҡалалары өсөн яуаплылыҡ тойоу, уны тағы ла йәмлерәк итеү форсаты. Теләгәндәрҙе эшкә саҡырабыҙ. Ҡала хакимиәтенә мөрәжәғәт итегеҙ”, - тигән Динис Ирназаров. Быйыл Башҡортостанда 3 мең ярым студент хеҙмәт урыны менән тәьмин ителгән.

Туймазылағы тимер юл вокзалы мәҙәни мираҫ тип танылды Ул республика әһәмиәтендәге ҡомартҡылар исемлегенә индерелде. Бина 1959 йылда төҙөлгән. Ул әле лә ҡулланыуҙа. 1964 йылдың авгусында ҡалаға илдең Министрҙар Советы рәйесе Никита Хрущев килә. Ул ошо бинала ла була. Тимер юл вокзалы яңыртылған, әммә биҙәлешендә Совет йылдарындағы үҙенсәлектәр һаҡланып ҡалған.

Башҡортостандың 36 районында хужалыҡтар иген һәм ҡуҙаҡлы культуралар урып-йыйыуға тотонған 1 авгусҡа игенселәр 77,7 мең гектарҙы һуғып алған. Был дөйөм күләмдең 5,5 проценттан ашыуы. 300 мең тоннанан ашыу ашлыҡ ырҙын табаҡтарына оҙатылған. Республика хужалыҡтарында ужымды урып йыйыу барышы хаҡында тулыраҡ киләһе яҙмала.

Өфөнөң Дим биҫтәһендә ҡулайлаштырылмаған һәм тыйылған һыу инеү урындарына сираттағы рейд үтте Был юлы Башҡортостандың Ғәҙәттән тыш хәлдәр буйынса дәүләт комитеты хеҙмәткәрҙәре үҙҙәре менән 11 йәшлек Кәрим Хәбибуллинды ла алды. Мәктәп уҡыусыһы йәмәғәт контролен башҡара һәм ул бындай рейдтарға йыш сыға. Инде биш йыл самаһы ул ведомствоның ирекмәне булып тора.

Учалы районы Бәләкәй Ҡаҙаҡҡол ауылында модулле фельдшер-акушерлыҡ пункты асылды Һаулыҡ һаҡлауҙың тәүсел звеноһын яңыртыу программаһы буйынса быйыл республикала 134 модулле фельдшер-акушерлыҡ пунктын урынлаштырыу күҙаллана. Былтыр ҙа ошо уҡ күләмдә медицина учреждениеһы файҙаланыуға тапшырылған. Учалы районы Бәләкәй Ҡаҙаҡҡол ауылы улар иҫәбендә.

Өфөлә Өршәк йылғаһы аша һалынған күперҙе ремонтлау ваҡытынан алда тамамланды Өфө районы Булгаково ауылы эргәһендәге объектты төҙөкләндереү эштәре план буйынса август урталарына тиклем күҙалланғайны. Әммә транспорт хәрәкәте әле үк тулыһынса тереҙелде. . Хәтерегеҙгә төшөрәбеҙ, 1980 йылда төҙөлгән һәм авария хәлендә тип танылған объектта ремонт һуңғы тапҡыр бынан 11 йыл элек яһалған. Өршәк йылғаһы аша күпер республиканың күпселек райондарына һәм туристик урындарға илткән трассала урынлашҡан. Көн һайын унан 58 меңгә яҡын автомобиль үтә.

Махсус хәрби операцияла ҡатнашҡан яҡташтарыбыҙ ялдан һуң йәнә фронтҡа юлланды Отпускыға бергә ҡайтҡан кеүек, махсус хәрби операция биләмәһенә лә яугирҙар ойошҡан рәүештә юллана. Ир-егеттәрҙе хеҙмәт урынына «Башавтотранс» автобустары алып бара. Маршрут республика башлығы Радий Хәбиров ҡушыуы буйынса ойошторола.

Рәсәй Геройы Руслан Ғәрифуллинға «Алтын Йондоҙ» тапшырылды Данлыҡлы 116-сы махсус тәғәйенләнештәге «ҡорос» бригадаһы командиры хәрби хеҙмәт барышында күрһәткән батырлығы һәм ҡаһарманлығы өсөн дәүләттең юғары наградаһы менән билдәләнде. Руслан Ғәрифуллинға «Алтын Йондоҙ»ҙо Росгвардия етәксеһе Виктор Золотов тапшырҙы. Награданы Рәсәй геройы тәүгеләрҙән булып яҡташтарына күрһәтте. Йәрмәкәй районында үткән осрашыу тураһында киләһе сюжет.

Рәсәйҙә һауа-десант ғәскәрҙәре көнө билдәләнде Бөгөн Рәсәйҙә һауа-десант ғәскәрҙәре көнө. Ҡанатлы гвардия ветерандарын һәм шәхси составты байрам менән Башҡортостан башлығы Радий Хәбиров ҡотланы. Төбәк етәксеһе «Патриот « хәрби - илһөйәрлек паркында Рәсәй геройы Максим Серафимов иҫтәлегенә һәйкәл асыу тантанаһында ҡатнашты һәм бер төркөм ир-егеттәргә дәүләт наградаларын тапшырҙы . Өсөнсө йыл рәттән ошо майҙанда уҙғарылған байрамда пилотаж төркөм әҙерләгән сағыу тамаша күрһәтелде.

Махсус хәрби операция яугирының ғаиләһендә ҡыуаныслы ваҡиға - ҡыҙҙары тыуған Сабый Республика клиник перинаталь үҙәгендә 3 килограмм 170 грамм ауырлыҡта, буйы 53 сантиметр булып донъяға килгән. Уға Алһыу тип исем ҡушҡандар. Ҡыҙҙың атаһы әлеге ваҡытта алғы һыҙыҡта ил һағында тора. Әсәһе - Лениза ханым махсус хәрби операцияла ҡатнашыусыларҙың ҡатындарына ярҙам итә, гуманитар ылау туплауҙа ҡатнаша, төрлө саралар ойоштора.