ڤِينْكَا

مفيش شخص صح هيبقى ليه فرصة تانية . الفرص التانية دي للناس الغلط اللي بتدخل حياتنا وبعدين يدعوا بالتغيير فيطلبوها للاصلاح . الشخص الصح مبيسيبش الفرصة الأولي تضيع منه وبيفضل محافظ عليها وحاططها جوا قلبه علشان ميخسرهاش . - الفرصة التانية دي ليك أنت علشان تختار بيها الشخص الصح اللي يمحي الفرص من قاموس حياتك . بسنت سيد .

أنا مش عايزة واحد بيشجع كورة لأ أنا عايزة واحد يشجعني أنا بس . بسنت سيد .

وأنا بجيب النتيجة بتاعتي امبارح دخلت على الموقع وكتبت بياناتي والچيميل ورقم موبايلي (كل دا ع أساس إني دي خطوات أجيب بيها النتيجة) وكان في الخطوات دي بدعي على الكلية أنهم صعبوا علينا نجيب النتيجة وتعب أعصاب وبتاع لأنهم كانوا كتير🤡 - المهم خدلتي حوالي نص ساعة في الحوار دا من ضمنهم ربع ساعة بدور على وصل المصاريف علشان أصوره وأبعته لأنه كان مطلوب . - المهم بعد ساعة إلا تلت الموقع عليه ضغط والبيانات كتير ورايحة جاية بقى وصحابي مسدجات عملتي أي عملتي أي وخلصت ودوست تم! - لقيت في النهاية إني كنت في موقع طلب الالتماس (تظلم) مش موقع النتيجة🤡🤡🤡🤡🤡 " العبرة من دا كله " متخليش توترك وخوفك يخليك تفقد تركيزك عن اللي بتعمله، أنا ربنا سترها معايا علشان دي حاجة تبع الكلية ومفيهاش ضرر عليا، لكن ممكن في حاجة تانية بكل البيانات اللي بعتها دي محدش عارف كان أي ممكن يحصل! - مهما كان حجم قلقك من حاجة معينة اركنها على جمب وركز في كل خطوة بتعملها حتى لو كانت بسيطة🤍

تقريبا أنا الوحيدة اللي بكره كلمة (اها) . عمري ما حبيتها ولا حبيت اللي بيقولوها! ما تقولوا آه عادي يا جماعة! هو انتوا بتقولوا في الحقيقة اها! مش عارفة ليه بتمشوا ورا التغيرات حتى وهي مش لايقة عليكم! - خليكم بطبيعتكم وحريتكم بلاش تصنع علشان تبانوا روشين . بسنت سيد .

لولا الماضي ما كان ليا حاضر . كل ما تكبر يوم كل ما هتتعلم لسنة . التغيير عمره ما هيقف ولا حياتك هتفضل ثابتة، المهم ميبقاش الحاضر هو بقايا الماضي! بسنت سيد .

مين قالك إني مش محتاجة التحفيز! أنا نفسي ألاقي حد يحفزني ولو بكلمة! أنا بحفز علشان أنا معنديش اللي يقولي الكلام اللي أنا بقوله! أنا بكتب الكلام وبقرأه بصوت عالي علشان أحس إن مش صوت نفسي اللي جوايا هو اللي بيتكلم لأ أنا عايزة أسمع صوت عالي بوداني يقولي كملي أو استمري أو أي حاجة تخليني أتقدم! - أنا بشكرك جدا على المسدج دي بجد من كل قلبي ومتأكدة إن روايتك هتطلع أعظم مني ومن أي روائي وكاتب كبير🤍 شكرا بجد شكرا🤍🤍

أنا نجحت في حاجات كتير بس فشلت فإني مخليش الحزن يسيطر عليا وعلى مستقبلي . - في 2021 أتعمل معايا حوار في جريدة ما وأتسألت سؤال؛ هل أنا الظروف والبيئة بتأثر على الكاتب ولا لأ؟ كانت إجابتي لأ وقولت إن اللي عايز يعمل حاجة بيعملها وعمرها ما كانت عامل تأثير . - أنا في 2023 بقول إن الظروف عامل مهم جدا لو مكنش السبب الرئيسي! - أنا بقالي سنتين مش عارفة أكمل الرواية اللي كنت متحمسة ومحمساكم معايا بيها . - أنا متقدمتش خطوة علشان أنا مش عارفة أعيش حياتي بالشكل اللي أنا محتجاه وفشلت في كل محاولاتي، بس اللي أنا متأكدة منه إني هفضل أحاول حتى لو قعدت سنة كمان أو اتنين أو عشرة!

كل أد تجاربك الفاشلة على أد ما هتفضل تتعلم دروس أقوى وأكبر من اللي قبلها . مهما كانت محاولاتك لتكون إنسان مثالي لازم هيحصل غلط أما بقصد أو بغير قصد، بس المهم حجم الغلط إيه! هل هتفضل ندمان عليه طول عمرك؟ ولا تقدر تصلحه وكأنه محصلش! - كل الناس الغلط اللي دخلت حياتي هما اللي ليهم الفضل في الإنسان اللي أنا عليه دلوقتي، لو مكنتش غلط مكنتش هفهم الحياة ولا هبص لقدام ولا هفكر في نفسي وأعيد حساباتي . - التجربة كانت غلط لكن النتيجة كانت صح وهي إني كسبت نفسي . بسنت سيد .

كل حاجة كويسة عملتها وملقتش مقابلها أو العوض بتاعها متزعلش . ربنا عمره ما نسي حد وعارف كل واحد بيعمل إيه وعمل إيه ونواياه إيه . يمكن أنت مخلوق في الدنيا علشان تمتحن وبس وكل اختبار أقوى من اللي قبله وملكش نتيجة على الأرض! بس خليك واثق إن نتيجتك محفوظة في الآخرة ومستنياك . اصبر، وكمل طريقك، واسعى في الخير ومتستناش أي مقابل ولا عوض ربنا مدبرلك حياتك وبيساعدك علشان تعدي كل صعب فيها بس أنت مش حاسس . بسنت سيد .

أنا بقرأ كتير بوستات عبارة عن (دي غيرانة مني، دي هتولع مني، دي مش عارف أي، ودا منفسن، ودي حسداني، إلخ ..) كون إن أنت إنسان مراقب مين مولع منك ومين بيحسدك يبقى أنت إنسان ناقص وفاضي ومعندكش ثقة في نفسك وبنسبة كبيرة جدا أنت اللي غيران منه . الشخص اللي واثق من نفسه بيشق طريقه علشان يوصل لحاجة معينة مش بيبقى عارف مين ماشي جمبه، مش هيفضل يبص يمين وشمال هيمشي طريقه بثقة . - جو التلقيحات والكلمات نفسها رجعية جدا ومش حلوة في حق نفسك لأن دا بيعكس انطباع الناس ليك . - حتى لو في حياتك شخص من دول ف أنت اللي بأيدك الحل تتخلص منه بكل هدوء واحترام ولو مش هتقدر يبقى تتعامل معاه بطريقة خاصة مش تفضل تنزل عن نفسك إن أنت محور الكون أنتو أساسا معفين كدا كدا . وآخرًا: لا حد بيغير منكم ولا بيحسدكم ولا أصلا شايفكم بلاش فضا واشغلوا بالكم بحاجة مفيدة بدل ما أنتوا مركزين على حاجات ملهاش أي ستين لأزمة . بسنت سيد .

كل الدول حاضرها أفضل من ماضيها إلا مصر سواء شعبًا أو دولة! بسنت سيد .

مببحبش غير المصري عمتا لكن في كذا حاجة شدتني من ضمنهم - الطفولة والصبا والشباب ل " ليو تولستوي " قلب ضعيف، الليالي البيضاء ل " دوستويفسكي " آخر اقتباس مستحيل أفتكره كله علشان الفقرة كانت كبيرة ل كتاب " جلسات نفسية " كان ف جزء " التوازن النفسي " - لكي نتوازن نحتاج إلى ثقة عالية بالنفس، قلة التوتر والعصبية، الشعور بالكفاءة الذاتية، حاجة كمان معناها أن أنت قادر تظبط كل أمورك .

والله أنتو اللي ناس جميلة بجد🤍🤍

آخر يوم بقى وكدا😂 ممكن تبقى تكلمني/تكلميني ونتقابل وناخد صورة للذكرى🤍 @passantsayed

دي محتاجة سؤال😂🌚 طبعا روحت ورايحة بكرة كمان🤍

http://passant213.sarhne.com بقالي كتير مش بنزل صراحة ومفيش تواصل بيني وبينكم زي الأول🌚 اللي عنده مشكلة أو أي حاجة عايز يقولها أو تطور وفكرة للقناة يقولها متاح بكل شيء وأنا معاكم🤍

سيكون الفرج قريبًا، وإن تأخر فلعله قادم بِبشرىٰ ستطيب جُرحى قلبك وكأنه لم يُخدش بعد . بسنت سيد .

أنا مش حزين أنا وحيد! الزعل بيروح مع الوقت لكن الوحدة محدش بيسد مكانها . بسنت سيد .

كل ما مودي يتغير بدخل القناة علشان أشوف الريأكت على أي بوست وحقيقي الريأكت بيفرحني جدا جدا🤍 شكرًا في محاولتلكم لانبساطي من غير ما نعرف بعض🤍🤍🫶🏻

كل الناس قلوبها بتعشق كل جميل إلا قلبي مبيعشقش غير الحنينين حتى لو مش حلوين . بسنت سيد .