رَيَّـــآنـة|نصرٌ من الله وفتح قريب❤️.

كيف أكون أخ كويس؟ شفت علاقات أخوية كتيرة في حياتي منها السمحة ومنها السيئة. لاقييت بنات بتمنوا أزواجهم يكونوا زي أخوانهم وبنات بتمنوا يعرسوا عشان يرتاحوا من أخوانهم وشتان ما بين دا ودا. 🔹طيب كيف أصلح علاقتي بأُختي وأكون أخ بتفتخر به؟(حاجة تراكمية طبعاً ما حتحصل طوالي لو علاقتك ما أسحن حاجة) عموماً الموضوع دا مُعقد شديد بس في Tips صغيرة بس حتفرق في علاقتك مع أختك وحتصلحها بإذن الله 💙. -خليك صحبها قبل كل حاجة: (طبعاً الصحبة لا تعني عدم الإحترام) عموماً البنات بميلوا للحنان واللطف والضحك فحتى لو أختك هادئة إتونسس معاها طوالي وأحكي ليها عن حياتك كدا هي بتطمن وبتحكي ليك يعني خليها آمنة. -ما تضربها:طبعاً المشاكل بين الأخوان حاجة عادية بالعكس بتقوي العلاقة بس مهما كان ما تمد يدك لإنه بكدا حتخليها تحس إنك مستقوي عليها وبتكرهها، لمن تجوا تتشاكلوا حتى لو إستفزتك شديد ما تضرب ولو إنت من النوع اليدك قريبة أول ما تتشاكل معاها وتحس روحك خلاص فاض بيك أمشي خليها. -جيب ليها هداية:ما هو ما ممكن تكون مُغرق. حبيبتك هدايا وأختك ولا قلم ما جبته ليها. من قروش شغلك جيب ليها أي حاجة إن شاء الله حلاوة بقرة ولو في حاجة عاجباها وإنت بمقدورك تجيبها جيبها ولو ما عندك وجبت ليها حاجة قدرتك صدقني حتتبسط شديد وحتكون مُتأكدة إنه لو عندك ما بتتأخر عليها 💙. ولو ما عندك ولا مليم كلمة طيبة بتفرحها شديد وزي ما بقولوا الكلمة الطيبة جواز سفر. "+" -ما تخنقها:بلاقي أولاد كُتار بخنقوا أخواتهم (ما كلهم تحت مسمى الخوف لا في ناس بكونوا خايفين من الفضيحة) وما بخلوهم يمشوا لصحباتهم مثلاً ودا غلط، مدام بتخاف عليها وديها براك وصلها وأمشي وتعال ليها راجع. برضوا ما تخنقها وتمنعها تصاحب ويكون عندها علاقات إجتماعية، صح الأولاد. ما بحبوا حوامة البنات بس هي ما كل حتمشي(الخنقة بتجيب الإنطلاق - زي ما بنقول بالسوداني-) -ساعدها بالبتقدر عليه:دا طبعاً قصدي به مساعدتك في البيت فلو بتقدر ترتب الصالون خير وبركة، لو بتقدر تعمل العشاء بركة كبيرة. طبعاً الحاجة دي ما حتكون طول السنة بس لو ساعدتها مرة صدقني ما حتنساها ليك. -- -خليك حنين عليها:ما تنهرها قدام الناس ولو غلطت مرة وإتنين سامحها وأنصحها بالتي هي أحسن، لو في شغل شايفه مُجهد وهي بتعمله ساعدها. -إدعمها :لو أختك جات وقالت ليك عايزة أعمل كدا ولقيته موضوع كويس إدعمها وناقشها في التنفيذ عشان تجيك مرة ثانية. لو أختك جات وورتك درجتها أفرح بيها ومعاها وشجعها معنوية ومادياً لو بتقدر (تهادوا تحابوا). -💙 أُختك هي عرضك وحبيبتك وصحبتك الثانية (بعد والدتك) ليه تخليها تتمنى بُعدك، الأخت نعمة في حياتك حافظ عليها وصونها💙. البنات كائنات حنينة (ولكل قاعدة شواذ) فعاملهم كويس بحبوك وبحترموك (ما حصل أختك غطت عليك لمن جيت مُتأخر، عملت ليك العشاء). ما تحرم أختك من حاجات وتديها لبنات الناس ما ممكن تكون حياتك كلها بتشاكلها وبرا راقد رُز للبتحبها، ما تكون زي ما بقولوا باب النجار مُخلع. أصغر فعل بكون عنده معنى عندها فما تحرمها لذة حبها لأخوها💙. أُختك ما عيب ولا غلط، أُختك تفتخر بيها قدام كل الناس وتفتخر إنها أختك 💙. خليها تحب كونها عندها أخ موش تكرهك وتكرهها في جنس الذكور، خليها تخاف عليك ما منك. #عشان_نتعلم #آيه_حسن

مساءً حين تضع رأسك على الوسادة ظنًا منك أنك سترتاح ولو جسديًا على الأقل، تجد أن رأسك بدأ بسرد الأخبار ونثر الذكريات الواحدة تلو الأخرى يلوح أمامك طيف شخص-أو دعنا نسميه شبح- عبر من حياتك أو عبر من الحياة ذكرى مكانٍ كان مُكتظ بالضحكات والأُنس، لحظة إنجاز مُزدانة بقرب الرِّفاق، الرِّفاق وطُرق السير الطويل والطُرق كذلك كل ذلك يدور في ذهنك تختلط عليك الصور والأحاسيس والذكريات تتخبط بين الحزن والفرح والقلق والطُمئنينة تود لو أن بإمكانك إغلاق رأسك -أو على الأقل- مسح ذاكرتك تود لو أنّ بإمكانك النجاة أو أن تجد مواساة تبحث لنفسك عن شيءٍ يُلهيها تُمسك هاتفك، تُقلب بين صفحاته تعثُر على رسالة هنا وصورة هناك لتبدأ شريط الذكريات مرة أخرى تقفل شاشة هاتفك تتقلب بنظرك في انحاء الغرفة تسمعُ صوت بقايا الضحكات وسعيد اللحظات وسرعان ما تقتنع أنّ هذا أيضًا لا يُجدي نفعًا تُودع فراشك وتُغادر علّك تُريح رأسك من ثقل الأفكار وضجيجها ما هيّ إلا لحظات وتجد أنك مُتعب قبل سُويعات كان أكبر آمالك أن ترتاح جسديًا الآن من سيُغمض النار التي اشتعلت بقلبك وعقلك!؟ من سيُنقذك من الذكريات التي ما فتئت أن تلتهمك!؟ من سيُخرجك من دوامة الحزن التي ستُسلبك النوم وراحة كاهلك!؟ الآن انت هنا تقاتل وحدك بمفردك __ #ريّــان_حسن

صدقيهم لو قالوا لك أي كِدبة عن حياتي بس أوعي تصدقيهم لو قالوا لك إنه كان كذاب معاي محبكيش💔

للسّادة المُمتحنين ثالث ثانوي لو في أي حاجة وقفت ليك إتواصل معاي في مُعرفي (حأخته ليكم تحت) وإن شاء الله بشرحها ليك وتفهمها💙 كذلك بقية ناس الثانوي ناس أولى، ثانية وثالثة 💙. شير للبوست عشان يصل للمحتاج له💙. @AYA_HASSAN20 #عشان_نتعلم #آيه_حسن

أُحِبُّ الندوبَ التي زيَّنتْ ‏وجهَ قلبي ‏كرسمٍ قديمْ! ‏تُذكِّرني ‏كلَّما خارَ عزمي ‏بأنِّي محاربةٌ ‏واجهَتْ خوفهَا ‏وانكساراتِها ‏في شموخٍ عظيمْ! ‏أُحِبُّ الندوبَ التي ‏كلَّما أطفأتني الحياةُ ‏استحالتْ نجوماً ‏وظلَّتْ تُضيء ‏فلم أنتبهْ لانطفائي ‏ولا لعواتمِ ليلي البهيمْ ‏أُحِبُّ الندوبَ ‏التي طبَّبتها الحكاياتُ ‏والشِعرُ ‏والخاذلونَ ‏الأُلى آزروني بخُذلانِهم ‏حينما لم أجدْهم ‏فصادقتُ نفسي ‏فطوبى لها من صديقٍ حميمْ! ‏أُحِبُّ الندوبَ التي ‏كُلَّما أوشكتْ غربتي ‏أن تشُدَّ وثاقي انبرَتْ ‏تفتحُ الروحَ باباً ‏على ألفِ أفْقٍ ‏فسيحٍ رحيمْ ‏أُحِبُّ الندوبَ التي كلَّما ‏ارتجفَ القلبُ ‏قالت له ‏لا تَخَفْ ‏ورَقَتهُ ‏بحاءٍ وميمْ! روضة الحاج

" ‏"مَنْ عَفَّ قَلْبَه عن الحَرام رَزَقَه اللهُ جميلَ الحَلال" 🖇️❤️

"‏لَولا الأصدقاءُ ما طابت ليالينا ولا ضَحِكنا بليلٍ كانَ يُبكينا ."))

RED FLAGS تخليك تفسخ/ي علاقتك بخطبيك أو خطبيتك: >< في الإستفتاء الفات سألت سؤال مُهم جداً وهو عن الحاجات البتخليك تفسخ خطوبتك عن المرتبط/ة به ونسبة التصويت كانت مُتفاوتة تبعاً لإختلاف وجهات النظر بس يلا نتكلم عن الحاجات دي.(الحاجات دي كلها بتخليك تنهي العلاقة بس حنشوف واحد واحد). -- عدم الإحترام :واحدة من أهم الأسباب عدم الإحترام فحقيقي في فترة الخطوبة لو ظهرت أي علامة بتدل على عدم إحترام ليك أو لأهلك خليه. وعدم الإحترام بتمثل في حاجات كثيرة منها التقليل من أهلك ومنك وينهرك وغيره بل في ناس ممكن تصل للضرب!. عدم الرضا والمقارنة بالغير:حقيقي لو إرتبطت بشخص ما مُقتنع بك من أي ناحية خليه. فالمقارنة بالناس مثلاً من الناحية المادية بالنسبة للطرفين كارثة فمثلاً لمن تقارني خطيبك بشخص أقل منك حتفقديه ثقته في نفسه وإنتِ ما حتكوني حاسة به كفاية وحتحسي نفسك كتيرة عليه أما مثلاً من الناحية العاطفية فالموضوع واحد فمقارنتك لخطيبك بخطيب صحبتك اللي مغرقها دلع وحب حيجيب ليك عُقد نفسية(نتفق إنه الراجل السوداني ما مّيال إنه يعبر عن مشاعره). موضوع المُقارنة بمثل دا عدم رضا بالطرف الثاني وما حتستمر العلاقة حتى لو إتزوجتوا إلا بصعوبة وشوفي حولك وعلى فكرة الموضوع دا مُنتشر أكثر بين البنات صح ممكن خطيبك يقارنك بفلانة السمحة بس دي نسبة بسيطة بمقارنتك لخطيبك بفلان الجاب لزوزو قفة فرح!(نكون مُنصفين يا شباب) 😆. --_-- العند:طبعاً الحاجة دي بتغطس حجر العلاقة فمثلاً في أقرب مشكلة ممكن تقعدوا بالأيام خلي الشهور وإنتوا قافلين من بعض وأي زول راجي الثاني يجي ويعتذر حتى لو غلطان، فلازم يكون في زول بيرخي لمن الثاني يشد . حقيقي كمية علاقة خلصت بسبب العند حاجة رهيبة فلمن تخش علاقة حاول صلح من الحاجة دي فيك. -- البخل والتكبر :ديل لو لقيتيهم في الشخص الثاني في العلاقة موش تخلي العلاقة دا تهرب عدييييييل فالبخيل بخيل في كل حاجة من قروش ومشاعر وغيره ودا ما كلام ساي فالزول البستكتر فيك القِرش بستكتر في الكلمة البتفرح أو حتى الهدية البتبسطك. أما لو طلع مُتكبر فدي مُشكلة ثانية فحيحس إنه كتير عليك ويعاين ليك بدونية وتبدأ دوامة المشاكل بتاعت أنا وأنا وأنا قريت في لندن وإنتِ قريتي في الخرطوم (مثال يا شباب والتحية لكل شباب الخرطوم 🤩) وأهلي وأهلك ومصروفي ومصروفك ومُرتبي ومُرتلك يعني الحياة عنده صعبة صعبة وحيقارنك بناس ثانيين ودي مشكلة براها. -'- قِلة الأدب:فترة الخطوبة للتعارف ففي ناس بتعودوا على بعض لدرجة كبيرة وبحكوا خصوصيات بعض (ما هنا مشكلتي الكُبرى بعيداً عن موضوع ضوابط الخطوبة) وبتطور الونسة لحِتات ما مفروض تتقال في التوقيت دا فلو لقيت/ي الشخص الثاني بعمل الحاجة دي أهرب/ي فدا بالنسبة لي شخص شهواني وما بقدر يتحكم في نفسه وحيكون شكّاك وحيكرهك عيشتك. 💥_💥 نتفق إنه الخطوبة لها ضوابط وهي فترة للتعارف فضروري تعرفي الحاجات المُهمة بالنسبة ليك من دين الشخص، ميوله، طموحه، خُلقه وخِلقته. لو حسيت نفسك ما مُرتاح من الشخص الثاني حاول إتكلم معاه مرة وإثنين بس إتذكر إنه ما مطلوب منه يتغير عشانك ولو ما نفع خليه ما هي زي ما ربنا خلق شخص ما مُناسب معاك خلق شخص مُناسب معاك.ما تحس إنه عشان كل الناس إتخطبت لازم تتخطب بغض النظر عن عمرك والناس الحولك. يا سعد من كنتِ أنتِ نصيبه💙. #عشان_نتعلم #وجهات_نظر #آيه_حسن

ممكن اعمل vote على كل الاسباب دي😂؟