የጥቅምት 29 ማኅሌተ ጽጌ
†††
ሰላም፡ ለኵልያቲክሙ፡ እለ፡ ዕሩያን፡ በአካል፤
ዓለመክሙ፡ ሥላሴ፡ አመ፡ ሐወፀ፣ ለሣህል፤
እምኔክሙ፡ አሐዱ፡ እግዚአብሔር፡ ቃል፤
ተፈጸመ፡ ተስፋ፡ አበው፡ በማርያም፡ ድንግል፤
ወበቀራንዮ፡ ተተክለ፡ መድኃኒት፡ መስቀል ፡፡
ዚቅ
ሃሌ፡ ሉያ፡ ትወጽእ፡ በትር፡ እምሥርወ፡ ዕሴይ፤
ወየዓርግ፡ ጽጌ፡ ይእቲ፡ በትር፡ አምሳለ፡ ማርያም፤
ቅድስት፡ ይእቲ፡ ወጽጌ፡ ዘወጽአ፡ እምኔሃ፤
አምሳሉ፡ ለወልድ፡ ኀደረ፡ ላዕሌሃ፤ ቃል፡ ሥጋ፡ ኮነ፡ ወተወልድ፡ እምኔሃ፡፡
†††
ኢየኃፍር፡ ቀዊመ፡ ቅድመ፡ ስዕልኪ፡ ወርኃ፡ ጽጌረዳ፡ አመ፡ ኃልቀ፤
ዘኢየኃልቅ፡ ስብሐተኪ፡ እንዘ፡ እሴብሐኪ፡ ጥቀ፤
ተአምርኪ፡ ከመ፡ አጠየቀ፤
ጸውዖ፡ ስምኪ፡ ያነሥእ፡ ዘወድቀ፤
ኃጥአኒ፡ ይሬሲ፡ ጻድቀ፡፡
ወረብ
ኢየኃፍር፡ ቀዊመ፡ ቅድመ፡ ስዕልኪ፡ ወርኃ፡ ጽጌረዳ፡ አመ፡ ኃልቀ፤
ዘኢየኃልቅ፡ ስብሐተኪ፡ ስብሐተኪ፡ እንዘ፡ እሴብሐኪ፡ ጥቀ ፡፡
ዚቅ
እለ ትነብሩ፡ ተንሥኡ፡ ወእለ፡ ታረምሙ፡ አውሥኡ፤
ማርያምሃ፡ በቃለ፡ ስብሐት፡ ጸውዑ፤
ቁሙ፡ ወአጽምዑ፡ ተአምረ፡ ድንግል፡ ከመ፡ ትስምዑ፤
ጸልዩ፡ ቅድመ፡ ስዕላ፡ ለቅድስት፡ ድንግል ፤
መርዓተ፡ አብ፡ ወእመ ፡ በግዑ፡፡
†††
ኦዝ፡ መንክር፡ በዘዚአኪ፡ አምሳል፤
ኮከበ፡ ትንቢት፡ ዘቦቱ፡ መልክአ፡ ሕጻን፡ ስዑል፤
ሠረቀ፡ ያርኢ፡ ተአምርኪ፡ ድንግል፤
ወመርሆሙ፡ ለሰብአ፡ ሰገል፡ እምርሑቅ፡ ደወል፤
ጽጌኪ፡ ኀበ፡ ሀሎ፡ ሰኪቦ፡ በጎል፡፡
ወረብ
ኮከበ፡ ትንቢት፡ ዘቦቱ፡ መልክአ፡ ሕጻን፤ ሠረቀ፡ ያርኢ፡ ተአምርኪ፤
ኀበ፡ ሀሎ፡ ጽጌኪ፡ ይሰክብ፡ በጎል፡ መርሆሙ፡ ለሰብአ፡ ሰገል፤
ዚቅ
ቡርክት፡ አንቲ፡ ማርያም፡ ወቡሩክ፡ ፍሬ፡ ከርሥኪ፤
ፀሐይ፡ ብሩህ፡ ወወርኅ፡ ንጹሕ፤ ኮከብ፡ ሥርግው፡ ኀበ፡ ማርያም፡ ኀደረ፡፡
†††
እንዘ ፡ ተሐቅፊዮ ፡ ለሕጻንኪ ፡ ጽጌ፡ ፀዓዳ ፡ ወቀይሕ ፣
አመ ፡ ቤተ ፡ መቅደስ ፡ ቦእኪ ፡ በዕለተ ፡ ተአምር ፡ ወንጽሕ፣
ንዒ ፡ ርግብየ ፡ ትናዝዝኒ ፡ እምላህ፣
ወንዒ ፡ ሠናይትየ ፡ ምስለ ፡ ገብርኤል ፡ ፍሡሕ፣
ወሚካኤል ፡ ከማኪ ፡ ርኅሩኅ ፡፡
ወረብ
ንዒ፡ ርግብየ፡ ትናዝዝኒ፡ ንዒ፡ ርግብየ፡ ምስለ፡ ሚካኤል፤
ወንዒ፡ ሠናይትየ፡ ምስለ፡ ገብርኤል፡ ገብርኤል፡ ፍሡሕ፡ ሊቀ፡ መላእክት፤
ዚቅ
ንዒ፡ ርግብየ፡ ሰላማዊት፡ ንባብኪ፡ አዳም፡ ከመ፡ ፍህሶ፡ ቀይህ፡ ከናፍሪሃ፤
እሞሙ፡ ለሰማዕት፡ ወእኅቶሙ፡ ለመላእክት፤
አልቦ፡ ዘይመስል፡ ዘከማኪ፡ ክብረ፤
እግዚአ፡ ለሰንበት፡ በማኅፀንኪ፡ ተፀውረ፡፡
†††
ክበበ ጌራ ወርቅ ፡ ጽሩይ ፡ እምዕንቈ ባሕርይ ፡ ዘየኃቱ፤
ዘተጽሕፈ፡ ብኪ፡ ትእምርተ፡ ስሙ፡ ወተዝካረ፡ ሞቱ፤
አክሊለ፡ ጽጌ፡ ማርያም፡ ለጊዮርጊስ፡ ቀጸላ፡ መንግሥቱ፤
አንቲ፡ ኵሎ፡ ታሰግዲ፡ ሎቱ፤
ወለኪኒ፡ ይሰግድ፡ ውእቱ፡፡
ወረብ
ክበበ፡ ጌራ ወርቅ፡ ጽሩይ ፡ ክበበ ጌራ ወርቅ ፡ ዘየኃቱ፡ እምዕንቈ፡ ባሕርይ፤
አክሊለ፡ አክሊለ፡ ጽጌ፡ ማርያም፡ ለጊዮርጊስ፡ ቀጸላ፡ መንግሥቱ፤
ዚቅ
አክሊል፡ ዘእምጳዝዮን፡ ተደለወ፤
ጌራ፡ ባሕርይ፡ ወቀጸላ፡ ወርቅ፡ ጽሩይ፤
በቤተልሔም፡ ተወልደ፡ እምድንግል፡ ብሥራትክሙ፡ መሃይምናን፤
እም አፈ፡ ዮሐንስ፡ ሥርግው፡ ተቀስመ፡ አፈው፤
ሰባኬ፡ ወንጌል፡ ነዋ፡ በማእከለ፡ አኃው፡፡
†††
ኅብረ፡ ሐመልሚል፡ ቀይሕ፡ ወፀዓድዒድ፤
አርአያ፡ ኰሰኰስ፡ ዘብሩር፤
ተአምርኪ፡ ንጹሕ፡ በአምሳለ፡ ወርቅ፡ ግቡር፤
ተፈጸመ፡ ናሁ፡ ማኅሌተ፡ ጽጌ፡ ሥሙር፤
አስምኪ፡ ቦቱ፡ ንግሥተ፡ ሰማያት፡ ወምድር፤
ከመ፡ በሕጽንኪ፡ ያሰምክ፡ ፍቁር፡፡
ወረብ
ተፈጸመ፡ ናሁ፡ ማኅሌተ፡ ጽጌ፡ ሥሙር፡ ተፈጸመ፡ ናሁ፤
አስምኪ፡ ቦቱ፡ አስምኪ፡ ቦቱ፡ ንግሥተ፡ ሰማያት፡፡
ዚቅ
ሃሌ፡ ሃሌ፡ ሉያ፤ ሃሌ ሉያ፡ ጥቀ፡ አዳም፡ መላትሕኪ፡ ከመ፡ ማዕነቅ፤
ይግበሩ፡ ለኪ፡ ኰሰኰሰ፡ ወርቅ ፡፡
†††
ተመየጢ ፡ እግዝእትየ ፡ ማርያም ፡ ሀገረኪ ፡ ናዝሬተ፤
ወኢትጎንድዪ ፡ በግብጽ ፡ ከመ ፡ ዘአልብኪ ፡ ቤተ፤
በላዕሌኪ ፡ አልቦ ፡ እንተ ፡ ያመጽእ ፡ ሁከተ፤
ለወልድኪ ፡ ዘየኃሥሦ ፡ ይእዜሰ ፡ ሞተ ፤
በከመ ፡ ነገሮ ፡ መልአክ ፡ ለዮሴፍ ፡ ብሥራተ፡፡
ወረብ
ተመየጢ ፡ ተመየጢ ፡ እግዝእትየ ፡ ማርያም ፡ ሀገረኪ፤
ወኢትጐንድዪ ፡ በግብጽ ፡ በግብጽ ፡ ከመ ፡ ዘአልብኪ ፡ ቤተ፡፡
ዚቅ
ተመየጢ: ተመየጢ፡ ሰላመ፡ ሰጣዊት፤
ወንርአይ፡ ብኪ፡ ሰላመ ፤
ምንተኑ፡ ትኔጽሩ፡ በእንተ፡ ሰላመ፡ ሰጣዊት፤
እንተ፡ ትሔውጽ፡ እምርኁቅ፡ ከመ፡ መድበለ፡ ማኅበር፤
ሑረታቲሃ፡ ዘበስን፡ ለወለተ፡ አሚናዳብ፡፡
ወረብ
ሃሌ ፡ ሉያ ፡ ተመየጢ ፡ ሰላመ ፡ ሰጣዊት፤
ሑረታቲሃ፡ ዘበስን ፡ ለወለተ ፡ አሚናዳብ፡፡
†††
መዝሙር
ሃሌ፡ ሉያ፡ ትወጽእ፡ በትር፡ እምሥርወ፡ ዕሴይ፤
ወየዓርግ፡ ጽጌ፡ ይእቲ፡ በትር፡ አምሳለ፡ ማርያም፤
ቅድስት፡ ይእቲ፡ ወጽጌ፡ ዘወጽአ፡ እምኔሃ፤
አምሳሉ፡ ለወልድ፡ ኀደረ፡ ላዕሌሃ: ቃል፡ ሥጋ፡ ኮነ፡ ወተወልድ፡ እምኔሃ፡፡
†††††††††
https://t.me/joinchat/AAAAAFUB9M2mcL-d_kA7mA
ኅብረ፡ ሐመልሚል፡ ቀይሕ፡ ወፀዓድዒድ፤
አርአያ፡ ኰሰኰስ፡ ዘብሩር፤
ተአምርኪ፡ ንጹሕ፡ በአምሳለ፡ ወርቅ፡ ግቡር፤
ተፈጸመ፡ ናሁ፡ ማኅሌተ፡ ጽጌ፡ ሥሙር፤
አስምኪ፡ ቦቱ፡ ንግሥተ፡ ሰማያት፡ ወምድር፤
ከመ፡ በሕጽንኪ፡ ያሰምክ፡ ፍቁር፡፡
ውድ የቻናላችን ተከታታዮች፤
እንኳን ለማኅሌተ ጽጌ ፍፃሜ በሰላም አደረሳችሁ አደረሰን፤
እመቤታችን ለአባቶቻችን ዝማሬያችቸውን ቁመታቸውን ትቀበልልን፤
ለዘመርነው ዝማሬ መላእክት ያሰማን፤
ሀገራችንን ሰላም ያድግልን፤
የተቃጣብንን መቅሰፍት በቸርነቱ ይመልስልን።
🙏🙏🙏አሜን 🙏🙏🙏