أرشيف الإمتياز 👩‍⚕️🤷‍♀️

حاول تثبت دول كبداية في الECG هيسهلوا قراءته بعد كدا تذاكر بقا التفاصيل من أي مصدر د.محمد السيد.

نتابع مت أول هنا، لإمتحانات مزاولة المهنه. بالتوفيق.

من الحالات المشهورة فى استقبال الباطنة هيا ال Hypertensive pulmonary edema، وعلاجها فى كلمة PONDM : 1️⃣Position: لازم العيان قاعد، حتى لو هيعمل ECG يبقي وهو قاعد مينامش 2️⃣Oxygen: بتدى high flow، يعنى بتفتحوا على الاخر + تعمل جلسات اتروفينت وبلميكورت 3️⃣Nitrate: بتدى Dinitra 10 تحت اللسان + Nitroderm patch وفيه دكاترة بتزود capoten تحت اللسان او يبلعوا لان ال acute pulmonary edema من الحاجات اللى لازم تعمل ليها rapid lowering of blood pressure 4️⃣ Dirutics: بتدى امبول lasix 40 + تركب قسطرة 5️⃣ Morphin: بتحل الامبول على ١٠ سم وتدى ٢ سم ب ٢ سم كل ٥ دقايق د.أحمد خلف.

جماعه ناخد بالنا ضروري من البطيخ والتوت والخوخ الايام دي الوحدات مليانه اطفال عندهم نزله معويه بسبب الفواكه دي النزله بتاعتهم عباره عن نازله فيروسية بتبدأ بترجيع وبيقف ويكمل باسهال جامد مياه خالص ومرات كتير . اهم حاجه ف العلاج اكياس معالجه الجفاف او بيديالايت ضروري جدا لان الخوف بيبقى من الجفاف مش من الاسهال مش لازم انتينال لو الطفل مش عايش ف الحمام يعني لو الموضوع متحمل الاسهال هيخلص الجسم من الفيرس ممكن ناخد زينك 10 لمده 14 يوم بيعيد بناء جدار الامعاء بلاش مضاد حيوي دي عدوى فيروسيه الاكل يبقى حاجات ممسكه واكل مسلوق زي الرز والبطاطس والمكرونه ياريت نحمي اطفالنا ونعطي للبيبهات الى تحت 3 شهور ونص تطعيم الروتا هيحميهم من النزلات المعويه ولو جالها هتبقى بأعراض خفيفه ربنا يحمي كل ولادنا ويبارك فيهم #يوميات_طبيب_ف_الوحده

For Last guidelines and internal medicine materials https://t.me/DrAhmedElaskary صفحة الفيسبوك: https://www.facebook.com/AAlskary?mibextid=ZbWKwL

الكفاءة = الموهبة x التدريب فإذا كان أحدهما يساوي صفرا فالناتج يكون صفراً . . و إرتفاع أحدهما قد يعوض قصور الأخرى . . و العبقرية = موهبه عظيمه x تدريب عظيم . . و أحدهما دون الأخرى لا تخرج عبقرياً مهما علت . . د. أشرف زكي. غفر الله له وتقبل عمله واسكنه فسيح جناته.

نصيحة لكل اطباء الامتياز: Never underestimate patient complaint in Emergency department, specially in governmental or university hospitals Those patients have no luxury of complaining and of course, of going private hospitals Don’t be shy to ask for senior opinion Leg pain could be limb ischemia and lead to amputation Abdominal pain could be MVO numbness could be brain hemorrhage Bad things happen, and it it is better to save life than to lose it د.أحمد الحديدي. باختصار .. اتقوا الله فيما وكِّل إليكم ومتستهونوش بشكوى مريض.

كتاب لدكتور/ أحمد جابر بريشه.

أول نصيحة لأطباء الامتياز والنواب الجدد حابب أقولها هي First do no harm وعشان تعمل كده (خد الموضوع جد ...وخليك واثق في احساسك...واوعي ايدك تلوث بدم المريض) الناس كلها بتتكلم عن ال clinical sense  وأن ده هيجي بعد سنين من الممارسة والخبرة فازاي انا بقولك ثق في احساسك وانت لسه معندكش خبرة ؟ لان أنا مقتنع أن فيه حد أدني من ال clinical sense ...او لو عاوز تقول من ال sense لازم يبقي موجود عندك ...أنك تكون انسان بتحس ده اول شرط عشان تقدر تكمل في الطب الاحساس ده مش محتاج تكون دكتور عشان يكون عندك ...اغلب الناس العادية عندها الاحساس ده (لما يقولك الحقني فلان قريبي بيموت ..لما يجيب قريبه الساعه ٢ بالليل الاستقبال فهو عارف انه مينفعش يقعد للصبح..انه يكون مدرك ان قرييه في حالة حرجه ...فمينفعش الدكتور ميبقاش مدرك الحقيقة دي ) باختصار ...أما تشوف العيان من النظرة الأولي ...تقول ده generally well or not well ..... ده اول سؤال لازم تسأله لنفسك وأنت داخل علي أي عيان جاوب علي السؤال ده قبل ما تدخل في اي تفاصيل ... قبل ما تقولي اصله ضغطه كويس وسكره كويس فيبقي هو well ..... لا انت الاول هتقول هو كويس ولا لا لو شايفه كويس ...فامشي معاه وشوف العلامات الحيوية وخد الهستوري براحتك وو... طيب لو من الأول انت شايفه مش كويس ... call for senior help .... وبعدين افحصه...طيب لو لقيت ال vital كويسه ....ده ميلغيش احساسك الاول ان العيان مش كويس ....كل ما في الموضوع ان العيان مش كويس بس انت اللي لسه مش عارف ايه اللي عنده ....ولما تيجي تبلغ بيه حتي لو كل الداتا اللي بتقولها كويسه بس انت شايفه مش كويس بلغ اللي اكبر منك انك شايف المريض مش كويس ...... أول ممارستك للطب ...لما تدخل عليك الاستقبال بنت ويغمي عليها ...هتلاقي نفسك اتخضيت وجريت عليها (وخدت الموضوع جد)....بعد شويه هتلاقي نفسك بتقول دي سيكك فانا بقولك النصيحة دي ...خد الموضوع جد مهما كبرت ومهما زادت خبرتك لو مش عاوز تظلم عيان You should respect patient complaint دي أول نصيحة سمعتها في نيابتي من أستاذي د طارق البياع ...... طيب حد هيسأل ..معقوله فيه ناس بتسيب الحد الأدني من ال clinical sense ده اللي هو حتي عند الناس العادية ؟ اه موجودين وكتير للاسف ... هو بيسيب احساسه ...عشان نصف معلومه سمعها وغالبا فاهمها غلط ...حالة ال mi اللي شخصتها اللي كان هيلغبط زميلي فيها أنه ساب احساسه (قدامه حد بيتألم ..وبيعرق وجاي الساعه ٣ الفجر ) ومسك في المعلومه او في نصف المعلومة اللي بتقول طالما حرقان المعدة ده جاي بعد الأكل يبقي gastritis مش  mi.. وكان بيقولي الراجل واكل بتنجان اهوه يعني  typical ! زميلي اللي دخلت عليه الاستقبال لقيته بيعمل جلسات للحالات وقاعد ...اما نزلت نايب الصدرية حالتين منهم طلعوا respiratory failure ومحتاجين عناية ...ايه اللي خلاه يغلط ومينزلش حد اكبر منه ؟ انه شايف اغلب الحالات بتاخد الجلسه وبتفك وتمشي .... زمايلي واللي كان منهم حتي نواب اللي بيقولوا علي الحالة سيكك ...واللي اكتشفنا بعد كده انها واخدة سم ...اللي خلاه يغلط ان عنده خبرات كتير ان البنت اللي عندها ١٧ سنة دي في النهاية بتطلع سيكك ....اللي خلاني اشخصها مش لاني اشطر منهم ..بالعكس لأني وقتها كنت لسه بتخض لما أشوف حالة بتشتكي او حالة مش قادرة تاخد نفسها او حالة مغمي عليها فنصيحتي ليكم واللي بفكر نفسي بيها دلوقتي ..حافظ علي احساس البدايات ..حتي بعد ما يبقي عندك خبرة ...دايما خلي فيه احتمال ان فيه حاجه متعرفهاش الطبيعي أنك تخاف ...وكل ما تكبر لو انت بتتعلم صح اه هيبقي عندك ثقة في نفسك بس بردو هتخاف أكتر ...اللي بقاله شهرين بيمارس الطب وتلاقيه واثق في نفسه اتأكد تماما ان ايده هتلوث بدم المرضي ...وللاسف بعد شوية بتصيبه لعنة الدم...وبيبقي من الناس اللي بتظلم وهم يحسبون أنهم يحسنون صنعا ..... أساتذتنا اللي بيقولوا لو بطلت تتعلم هتاكل حرام ..مفيش اي مبالغه في كلامهم .... بفكركم النهارده وكل يوم تلات بمرور استاذنا د محمد الالفي بمستشفي سيد جلال الدور الحادي عشر من الساعه ٢ ل ٦ مساءا ويمكن ده يكون افضل حاجه ممكن تعملها في امتيازك بصرف النظر ناوي تتخصص ايه.

صباح الخير.. البوست السنوي لأطباء الامتياز اللي استلموا ١- الفترة دي ممكن تكون احسن وممكن تكون اسوأ فترة في حياتك.. صدّق او لا تصدّق انت اللي بتحدد. ٢- الديرتي! لفظ حقير جدًا لوصف مجهودك الفترة دي فأرجوك دوّر على الحلو مهما كان صعب. ٣- شهادة الامتياز من اهم شهاداتك وانت مسافر😄. ٤- الطوارئ.. الطوارئ.. الطوارئ.. كنز لو ضاع منك تتعلم فيه كويس  يبقى ضاع منك كتير. ٥- انت مش مديون لأي حد طالما مش بتتعلم منه.. يا رب تفهم. ٦- طبيبات الامتياز ارسمي حدودك مع زمايلك ومع النواب ومع اي حد .. لا شيء يؤخذ بسيف الحياء.. يا رب تفهمي. ٧- اتعلم في كل حاجة قدر استطاعتك واوعاك تستهون باللي هتتعلمه. ٨- اِعرف لصاحب الحق حقه مهما كان مين.. مديون انا طول عمري للتمريض اللي علموني كتير ايام الامتياز. ٩- العيّان .. العيّان.. العيّان.. اتعلم تكون في خدمته وتتفاهم معاه وتتعامل بذكاء مع المرافقين . ١٠- تنويها لله بقى عشان ربنا يكرمك. د/ حازم محمد عبد التواب.