Dr.Suzan El-Shaf3y...د.سوزان الشافعي

نفسية الطفل بتبقى عاملة زي لوح الزجاج، أي حاجة بسيطة ممكن تخدشها حتى لو كان الصوت العالي

اللهمَّ وَقَد أشْرَقَتْ عَلينَا شَمسُ العَامِ الهِجْري الجَدِيد، نَسْألُكَ أنْ تُبارِكَ لجَمِيعِ مُتَابِعِي مِنصَاتِ الدُّكتُورَة سُوزَان، وَأنْ تَجْعَلَ لَهُم النَّصِيْبَ الأَحْسَن مِن الطَّاعَاتِ، فَيَتَقَرَّبُون مِنْكَ بِمَا تَصْطَلِحُ بِهِ أمُور دِينِهِم ودُنيَاهُم وَيَجْمَعَهُم مَعَ الدُّكتُورَة سُوزَان فِي الفِردَوسِ الأَعْلَى 🤲 لمتابعة دروس هجرة الحبيب ﷺ للدكتورة سوزان https://youtube.com/playlist?list=PL5Xk7Vsi_wgXG6b6TDoCSmb8dUZQ-6Q_3&si=Y74Foukhc8zEUNDP

★ الصَّلاة على المُلحد ؟؟ ----------------- - هسألكم سؤال ..﴿هل يجوز الصَّلاة على المُنتحر ؟؟؟﴾ الإجابة = "فيها اختلاف".. - طيب و الصَّلاة على المُلحد ؟؟؟؟؟🤔 - الموضوع ده كان مولَّع الدُّنيا على السُوشيال ميديا بعد قصة البنت اللي كانت أعلنت إلحادها و هى مُقيمة في انجلترا لوحدها و عائلتها في مصر.. - البنت دي كانت عملت فيديو من ٤ سنين و كانت مع مُلحدين بتحكي قصتها مع الإلحاد.. - بتقول فيه إنَّها اتربت في الخليج و كانت في مدارس انترناشيونال بتصوم وبتصلِّي و بتحفظ قرآن لدرجة إنَّها لمَّا بلغت حبت تلبس الحجاب أهلها رفضوا و اتحجبت غصب عنهم.. - بعد ما أخدت الثَّانوية العامة أهلها بعتوها لانجلترا علشان تكمل تعليمها .. - فبتقول أول ما راحت لندن دورت على المركز الإسلامى و اشتركت في أنشطة كتير هناك .. - و بعدين بدأت تقرأ عن الإلحاد ..و هل في إله؟ و هل محمد ﷺ قدوتنا ؟ و اكتشفت إنُّه لأ 😡🤨 - هى ما قالتش بقى إيه السَّبب اللي دفعها للتَّغيير ده ..نقطة التَّحول يعني.. - طبعًا مش ممكن يكون بحثها و القراءة عن الإلحاد على النت🙂‍↔️ ..لازم في ناس حواليها فتنوها.. - علشان كده بحذر الأهالي اللي بيجهزوا ولادهم علشان يكملوا تعليم في الخارج و همَّ لسة في سن صغير ، العيال بيرجعوا مُلحدين مهما كان تديُّنهم 😔 الفتنة عليهم كبيرة - ربنا ما يكتبها على ولادنا إنِّنا نضطر نبعتهم بره في سن صغير 🤲🏻 - البنت في الفيديو بتحكي إنُّهم (المُلحدين) مُضطهدون في عائلتهم و بلدهم و مضطهدون من المسلمين و من أديان أخرى كمان.. - فبتقول ليه كده ما تخلُّونا كل واحد حر. ..و بتشكر طبعًا النَّاس اللي هى وسطهم إنُّهم اتاحوا لها فرصة إنَّها تتكلم و تعبر عن مشكلتهم..🙃 - المُهم البنت دي فجأة و هى بتتكلم مع والدتها على سكايب يعني شايفاها و اذا بها تطب ساكتة "ماتت" فجاة 😶 - اللي ولَّع الدُّنيا إنُّه اتكتب على السُوشيال ميديا إن أصحابها "التَّنوريين "صلُّوا عليها صلاة الجنازة في لندن "!!! - لا احنا عارفين مين دول و كلمة "تنوريين" دي طبعًا كلمات مطاطة جدًا.. - و اللي ولَّع الدُّنيا أكتر إن بعض رجال الدِّين عندنا استُدرِجُوا للكلام في الموضوع (اللي هو إنُّهم صلُّوا عليها..) - و ناس تانية أخدت المواضيع شتيمة في البنت وأهلها .. - و ناس قلبتها تريقة اللي يقولك لمَّا أروح أعزي بدل ما أقول البقاء للَّه أقول البقاء للطَّبيعة 😶... - و ما فيش أي مُراعاة لمشاعر أمها وأبوها وأهلها المفجوعين بموت بنتهم.. - دلوقتي الفيديو اللي عمَلِتُه كان من ٤ سنين ماحدش عارف هيَّ ماتت على إيه.. - وارد قبل ما تموت بثانية تكون رجعت ..ما يمكن ربنا هداها ..ده احتمال وارد...اللَّه أعلم - ليه بقى النُّفوس القاسية دي 😔 احنا مالنا نعلق على حاجة زي كده ليه.. - الحالات دي من الحاجات اللي ما ينفعش نتكلِّم فيها..🤐 #دكتورة_سوزان_علمتني

**التَّربية بالسِّياسة (٢)* -------------------- مافيش حاجة اسمها أنا مخصماه ومش بكلِّمه.. يعني إيه تقعدي شهر مش بتكلِّمي ابنك/بنتك وماتعرفيش عنهم حاجة؟!!! وتيجي تقولي أنا زعلانة أكتر إنُّه/إنَّها مش بييجي يصالحني، زي ما يكون لمَّا صدَّق إنِّي مش بكلِّمه.. ولَّا واحدة تيجي تقول:- "ابني رايح يتجوِّز واحدة و ولا أنا ولا باباه موافقين عليها؛ وبرضه مُصمم وزي ما يكون بيقول اضربوا راسكم في الحيط".. ما هو ده نتيجة تربيتك الغلط من الأول.. إنتِ اللي كُنتِ وهو صغير بتزعقي على أي حاجة وتتنرفزي وتضربي وتتريقي.. إنتِ اللي ماكنتيش بتسمعيه وتحتويه وتبطبي عليه.. فأول ما بقى بيعرف يعتمد على نفسه، استغنى عنكم وبِعِد ومابقيتوش فارقين معاه.. الصَّح إنُّه والطِّفل صغير، إنِّي أبقى حنينة عليه، أطبطب وأحضن وأسايس لغالية ما يبقى بيحبني وبيخاف على زعلي مش من زعلي.. لمَّا أقوله أنا زعلانة منك، يبقى هيتجنن كده وييجي يصالحني.. *طيب أعمل إيه لو عمل حاجة غلط؟ -الجفاء مش الخصام.. *يعني أعمل إيه؟ -تعملي زي ما رسُول اللَّه -صلَّى اللَّه عليه وسلَّم- عمل مع سيدنا "كعب بن مالك" (واحد من الثلاثة الذين خُلِّفوا).. لمَّا كان سيدنا كعب يدخل المسجد ويقول:- "السَّلام عليكم" كان الصَّحابة يردوا لكن رسُول اللَّه مايردش عليه.. لكن لمَّا ييجي يسأله عن حاجة في الدِّين، يرُد عليه رسُول اللَّه -صلَّى اللَّه عليه وسلَّم- ماقطعش حبيبنا رسُول اللَّه -صلَّى اللَّه عليه وسلَّم- حبل الوصال.. فإنتِ مع ابنك، لمَّا يعمل حاجة غلط، تعمليله الفطار زي كل يوم ولمَّا يسألك في فطار يا ماما؟ تقوليله:- عندك في المطبخ.. -ورِّيني أخدت إيه في المدرسة النَّهارده.. -أخدنا درس ساينس جديد وأخدنا درجات امتحان الشَّهر -طيب جبت كام؟ -جيبت ١٠ من ١٠ -طيب (وماتعلقيش بأكتر من كده ولا تقوليله مبروك ولا شاطر ولا حاجة).. فهو يحس بالتَّغيير ويحس إن مافيش المودة اللي في التَّعامل ما بينكم.. لكن تخاصميه!!! تقاطعيه!!! تقعدي فترة مش بتكلميه وماتعرفيش عنه حاجة!!! لأ ماينفعش.. #دكتورة_سوزان_علمتني

**التَّربية بالسِّياسة (١)* ------------------ أساس التَّربية إنِّنا نسايس الولاد.. مش أوامر وزعيق وأقوله:- "هو كده" وخلاص.. للأسف الأهل دلوقتي مابقاش عندهم خُلْق.. كل ما الولد يقول حاجة، مامته تتريق عليه.. كل ما يقول كلمة؛ تقوله:- "اخرس إنتَ، هو إنتَ بتفهم حاجة"⬅️ فالولد تطلع شخصيته مهزوزة وماعندهوش ثقة في نفسه.. وبعد كده في سن المراهقة، يبقى مش طايق من مامته كلمة وعلى طول طفشان برة البيت أو قافل أوضته على نفسه وقاعد على الموبايل ولَّا الكمبيوتر.. وغلطة تانية كتير من الأمهات بيعملوها،وهي: المقارنات.. تقعد تقارنه بأصحابه أو قرايبه ويطلع حاقد وكاره كل اللي حواليه.. "اشمعنى مش بتفهم من أول مرة زي ابن خالتك؟" هترميه يعني علشان مش بيفهم من أول مرة!! ده بدل ما تحتويه وتفهِّميه!! واوعوا تعاتبوهم أو تزعقوا لهم قدام أي حد ولا حتَّى جدته أو خالته أو عمته.. خُدوا ولادكم في حُضنكم.. سايسوهم.. شجعوهم.. أصله بيكركب الدُّنيا⬅️ مايكركب وتفهميه إزاي ينظم المكان تاني بعد ما يلعب.. قال رأيه في حاجة⬅️ عندك حق يا حبيبي، بس عارف لو عملنا كده كمان هيبقى حلو أوي ولَّا إنتَ شايف إيه؟ سايسوهم وادُّوا لنفسكم وقت معاهم. مثلاً :- نازلة تجيبي لبنتك لبس وجيبتي جُونيلَّة بُني ولاقيتِ بنتك عاجبها بلوزة حمراء وهي أصلاً سمراء.. ما تقعديش تقوليلها لأ إنتِ مش شايفة نفسك سمراء إزاي، إزاي تنقِّي اللون ده!!! ⬅️ بدل ما تقوليلها كده؛ قوليلها:- بصي حبيبتي الأحمر بيبقى أحلى على حاجة لونها أسود، إنَّما البُنِّي هيبقى أحلى لو اختارنا بلوزة لونها مثلاً بيچ أو أبيض.. مين من الأمهات دلوقتي عندها خُلْق تعمل كده.. التَّربية عايزة وقت وعايزة صبر.. وإن ماكُنتيش إنتِ تستحملي ولادك وتصبُري عليهم، مين هيستحملهم؟!! #دكتورة_سوزان_علمتني