Multaqa-😍 الملتقى 💖

عرفت إن ليا صاحب لما حصل خلاف بيني وبين صاحب تاني وراح يشتكيله مني راح رادد عليه وقاله حقك تزعل فعلا لو الكلام زي ماواصلك كدا لكن أحمد في الحتة دي تحديدا كان يقصد كذا وكذا وكذا ومستحيل يقصد اللي واصلك دا ، معامش على عومه ولا غلطني قصاده ولا حتى قاله طب استنى أروح أسمع منه وأجيلك! هو عارفني على إيه فبدأ يبررله مكاني ويتكلم بلساني أكني حاضر بالظبط وكل دا من غير مايرفع عليا سماعة التلفون حتى يسألني الكلام دا حصل ولا لا مع إني مكنتش هلومه والله لو عمل كدا لكنه شاف إنه مجرد سؤاله ليا في حاجة زي دي عيبة في حقه! احنا اتصالحنا واتغدينا سوا احنا التلاتة تاني لكن كنت لأول مرة ساعتها أحس إن قاعد مطمن إني ليا ضهر مأمني في وجودي وغيابي ومش خايف ولا قلقان تظهر مساوئي في مرة قدامه لأنه بدون أي شك هيسترها عليا..❤️

والله الأندومي ده الأكله الوحيده اللي مينفعش معاها افتكاسات غير طريقته العاديه اصل ميبقاش اسمه مكرونه سريعه التحضير وانتوا تسلقوه وتحمروه وتحطوا عليه بصل وتوم وجزر بالله ما استحيتم وانتوا بتعملوا كده

السلام عليكُم و رحمة ﷲ و بركاته يُستحَب التبَسُّم عِندَ تلاقِي النظَر الرجال للرجال والنساء للنساء 😁 عشان متفتحهاش ع البحرى ي عسل

واحد صاحبي مرتبط ببنت بيحبها جدا ولابس دبلة في ايده .. لما واحدة تحاول تتعرف عليه يقولها بمنتهى الوضوح (خاطب) أو لو حس ان واحدة بتحاول تجيبه سكة بطريقة غير مباشرة حتي لو بنظرات بيرفع ايده يعدل أي حاجه في وشه فا بتشوف الدبلة وتتهد .. مفيش مرة تحتاجه غير وتلاقيه، مش بيسيبها علشان بيلعب بلايستيشن معانا عادي بيكلمها ويسيبه وهي لما تعرف انه بيلعب بتقدّر ده وتسيبه يلعب، مفيش مرة قالها (مشغول) حاجات كتير بتحصل قدامي، راجل من وسطنا عادي مش من عالم موازي وعنده صحاب ومعاهم دايما وبيشتغل بس هي في أولوياته. ❤️

شعور إن حد يلعبلك في شعرك دا شعور أندرريتيد أوي ومأخدش حقه من المديح والتقدير لغاية دلوقتي.. أعتقد إن بعد الحضن دا أحن وأنعم شعور في الدنيا، حاجة كدا شبه السحر بجد، أديله 200 من 10 ونجمة

- أبويا لما كان يجي يصحينى علشان صلاة الفجر ؛ وفى عز الشتا مكنش بيطبطب عليا ؛ هو شلوت كنت بلاقى نفسى فى الجامع. 😂 - إمبارح فى صلاة الفجر.. فكرت ؟..هو أنا لو اتجوزت ؛ وزوجتى كانت من النوع الطيب تيجى تصحينى علشان صلاة أقولها سيبينى أنام فتطبطب عليا وتقولى نام !!! - القَسَم إللى هكتبه هنا هو إللي هخلي زوجتي تاخده إسكرين شوت لما تيجى أقسم بالله العظيم لو جيتى تصحينى لصلاه وقلتلك لاء ؛ مش هزعل تضربينى باى حاجة فى ايدك او تضربينى بالقلم او الشلوت زى أبويا أو حتى تفرضى عليا مكلمكيش ولا اقرب ناحيتك اسبوعين ؛ وانتى تقسمى كذلك انك عمرك ما هتزعلى لو يوم صححت ليكِ غلط بعتاب او بغيره ، متفقين ! - أنا هتزوج علشان لما أضل ألاقى اللى يساعدنى أفوق ؛ لما أغفل ألاقى اللى يساعدنى أصحى ؛ لما أتكبر ألاقى اللى يقولى أخرتك ايه شوية تراب يابن الناس. مش هتجوز اللى تقولى انت احلى راجل ف ى الكون ونسهر نتفرج على The Fault in Our Stars ؛ ونقعد نسمع فى اغانى رومانسى .. مش هو ده الحب عندى ..الحب عندى هو إن اللى يحبني ياخد بإيدي للجنه 💛 - علامة المحبين إن كل واحد منهم ينور الجزء المظلم بتاع التانى .. والجزء المضلم بتاع معظمنا هو الغفله .. محتاجين كلنا إللى يمسك لينا كرباج المحبه ويستخدمه فى إصلاح فساد القلب - وأكيد مش هنزعل لما يقسوا أو يشدوا علشان نفوق .. لإن القسوه ساعات كتير بتكون من أكبر علامات الحب وصدقينى لو سبت حقوق ربنا عليا متتوقعيش منى أحفظ حقوقك. - "سلامٌ عليكِ أينما تكوني". 💛

انا بحلق عند حلاق تقريبا محدش بيحلق عنده غيري .. راجل كبير فى السن فاتح في محل تقريبا يادوب واخد الكرسى الى بقعد عليه ونا بحلق .. اخدت كل صحابى على القهوه وروحنا عنده عملنا زحمه قدام المحل و اتخانقنا قدامه على مين يحلق الاول ولمينا الشارع علينا الراجل من فرحته بينا عيط

لسه سامعة شيخ بيقول "انت المفروض تحمد ربنا علي نعمة الحمد" ففي شخص بيسأله ازاي يعني مش فاهم! فقاله ربنا سبحانه وتعالي قال في كتابه العزيز "لَئِن شَكَرْتُمْ لَأَزِيدَنَّكُمْ " يعني لو شكرت ربنا وحمدته هيزيدك وده وعد من ربنا وربنا مبيخلفش وعده يعني لو حمدته هتلاقي زيادة في "الصحة، المال، العمر، الاطفال، البركة، الحسنات، حب الناس، نعيم الآخرة" تخيل ان ربنا اصطفاك من بين ملايين الناس علشان تحمده وتقول جملة "الحمد لله" فأنت المفروض تحمد ربنا انه الهمك الحمد، والحمد لله انك قاعد تسمع كلامي دلوقت علشان تحمد ربنا.. "الحمد لله علي نعمة حمده، الحمد لله حمداً كثيراً طيباً مُباركاً فيه".

عارف لما تقعد تحاول وتحاول وتعدي وتيجي على نفسك وتعمل المستحيل وتروح وتيجي وتعيط وبعدين تكتشف بعد كل دا ان برضو مفيش فايده ولا عمر هيكون في فايده

"إياك وأن تخاف شيئا قبل حدوثه.. لا تتخيل، اصرف فكرك وخوفك عن الغيبيات فهي في علم الله، واعلم أن البلاء إذا نزل على العبد ينزل معه اللطف، فإذا تصورت البلاء قبل أن يقع فقد أستقبلت البلاء بدون لطف وأهلكت روحك"

" عاوزة أقولكم حاجة كنت أتمنى حد يقولهالي من بدري أوي وده يُعتبر من أهم الدروس اللـ اتعلمتها الفترة اللـ فاتت؛ " متديش لحد مكانة فـ حياتك هو مش مديهالك" المُبالغة فـ حُب الناس وتقديرهم بيعلمهم الغرور والتكبُر، وأول شخص هيبدأو بيه هو أنت. وحابة أفكركم بـكلام الإمام الشافعي: ما رفعتُ أحدًا قطّ فوق قدره إلّا حطّ منّي مقدار ما رفعتُ منه .."

لسه شايفه فيديو لبنت ملخص كلامها اللي قالته انك لو هتفضلي قاعده على سريرك ف اوضتك 24 ساعه بتعيطي و عايشه دور الضحيه الحزينه بتسمعي/بتنزلي حاجات حزينه فـ متجيش فـ النهايه تقولي واءء ليه محدش أوبسيسد بيا و بيحبني علشان obsessed with what ؟ ايه اللي موجوده علشان يبقى اوبسيسد بيه ؟ دموعك و دور الضحيه و ضعف شخصيتك ؟ هيبقى مهووس بحزنك و درامتك ؟ للدرجادي معندهوش حياه ؟ يجماعه دي حياه واقعيه مش مسلسل درامي والنبي فوقوا لنفسكوا شويه علشان البطل الطويل الوسيم الغني مش هيظهر فجأه و يشوف تعاستك جذابه .

بابا معلم لغة عربية قد الدنيا وليه في المسائل النحوية فزميلة اتصلت بيه تسأله على حاجة قالها أديني وقتي هدورلك وأقولك الإجابة.. المهم قعد يدور في كتبه وفي الوقت ده رنت واحدة كانت جارتنا ،هي ست بسيطة جدا وأمية غالبًا، راح بابا بالغلط أتصل بالست جارتنا، وقعد ساعة يشرحلها رأي النحاة الكوفيين ورأي البصريين وليه كذا وليه كذا . بعدين سكتت شوية وقالتله : ربنا يهديهم على بعض يا أستاذ محمد.🙂 ~الشيماء سعيد.

الطفل الي كان بيتمني يشوف الاهلي في كأس العالم ف اليابان كبر و كل حاجة ف حياته اتغيرت حتي تشجيعه لفريقه ، بدل ما كان بيتمني يشوفه مشارك ف البطوله ، بقا بيتمني يشوفه بطل الكاس .

الحرام لايوجد فيه وِجهات نظر ولا نيَّات. رَحِم الله من عَرف الحرام بلا مماطلة ولا مجادلة، فإما يهجره وإما يجاهده حتى يتوب الله عليه.

" بحب أوي الناس اللي مهما تغيب عنهم ترجع تلاقي العلاقة بينكم واقفة عند آخر مرة كنتو فيها سوا مع بعض والدنيا بينكم سهلة مفيش كلاكيع مش محتاج تعمل مجهود .."

كيف أحقق التوكل على الله ؟ ج/ أن تستشعر أن الأمر كله بيد الله، وأن كل ما حولك ومن حولك من الناس لا يملكون لك ضرًا ولا نفعًا إلا بإذن الله، فما شاء سبحانه كان وما لم يشأ لم يكن، وأن تعلم أن رزقك الذي كتب لك سيأتيك كاملًا وافيًا قبل أن تستكمل أجلك، وعليك السعي وبذل السبب. أكثر من هذه الأذكار: حسبي الله لا إله إلا هو عليه توكلت وهو رب العرش العظيم. حسبي الله ونعم الوكيل. لا حول ولا قوة إلا بالله.

إنت مش عايش على التلميحات. " أصله ابتسملي وشكله ييحبني " " أصله بيجر ناعم وعاوزنا نتصالح " كم من وقت وأفكار ضاعت وسط التلميحات دي. كم من فرص ضيعناها على نفسنا علشان كنا بنعيش وهم ومصدقينه. اللي مش قد الكلمة إنه يقولها مباشرة في وشك يبقى متقراش ما بين السطور اللي متقالش. اللي فاكره بيحبك من مجرد ابتسامة ممكن جدا يكسفك. واللي فاكره هيصالحك ممكن جدا تكون مش في دماغه. وآلاف المشاعر اللي كنا فاكرينها حاجة وضيعتنا. اللي عاوز حاجة هيقولهالك. إنت تستاهل إن اللي قدامك يكون جريء كفاية فَيعترف تجاهك بكل مكنون ليك. تستاهل إنك تاخد أشياء حقيقية مش تاكل الوهم وتحاول تصبّر نفسك. فوق لنفسك وبطل تجود باللي مش موجود، بطل كرم على حساب حياتك وقلبك.

ف تالته اعدادي اشتريت هديه الvalentine لصاحبتي المهم امها قفشت الهديه معاها والبت اعترفت عليا من اول كلمه راحت امها واخده الهديه وجايلنا البيت وادت الهديه لابويا وقالتله ربي ابنك واول مرجعت البيت لقيت ابويا بيديلي الهديه وبيقولي الجماعه بعتولك الدهب وبيقولولك كل شئ قسمه ونصيب.

بص هو يمكن يكون مش مكانا ولا زمانا، بس إحنا هنكمل سعي وخلاص عشان مفيش أوبشن تاني .. قشطة.......؟!