ر.

الوقت اللي أنت بتعيشه في الصبر مش وقت ضايع أبدا. جهادك إنك تتقبّل وضع صعب عليك برضا وقلب مطمئن، وصبرك في انتظار العوض من ربنا مش وقت ضايع أبدا. الوقت اللي أنت بتحاول فيه تظهر بأفضل حالة نفسية عكس اللي أنت حاسس بيه من جواك وبتصبّر نفسك وتأكدلها إن الجاي مليان أيام حلوه مش وقت ضايع أبدا. الوقت اللي أنت بتشتغل فيه على نفسك عشان تطلع أحسن نسخه منها مش وقت ضايع أبدا. خليك متأكد إن مفيش وقت بتحتسبه عند ربنا وبيضيع، لأ ده انت ربنا هيجازيك عليه بأحسن مما تتخيل وأعظم من صبرك كمان ! ركّز في الآية دي كويس جدًا : (وَلَنَجْزَيَنَّ الَّذين صَبَرُوا أجْرَهُم بِأحْسَن مَا كَانُوا يَعْمَلُون)

لو قررت تدعي بالمطر ، لازم تعمل حسابك وتتعلم تتعامل مع الطين اللي ممكن يحصل. بمعنى إن أي حاجه هتتمنى حدوثها وتدعي ربنا بيها .. لازم يكون عندك إدراك للجانب السئ اللي ممكن يترتب على حدوثها و تستوعب ده و تستعد ليه كمان و ده طبيعه الدنيا في كل حاجه لكن فعلا الأهم إن الواحد يحمد ربنا إن حصل الحاجه اللي بيتمناها وعاش تفاصيلها حتى لو هتقابلنا عثرات بعدين ، و ده يعلمنا كمان ما نستعجلش حدوث شئ معين لإن بجد ربنا رحيم بينا جدا و بيكون حاطط خطه مثاليه لينا و من خلال الخطه ديه بيخلينا نمر بأحداث معينه بحيث نكون مستعدين نفسيا بعدين عشان لما الحاجه ديه تحصل نكون مؤهلين بكل الأحوال إننا نستقبلها بالطاقه اللي تستحقها و نفرح بيها وفي نفس الوقت نعرف نتعامل مع عقباتها. #خربشات_يوستينيه

بنفترض حاجات بدون أي سبب واعي مننا وبنفضل مصدقينها لحد ما نفتكرها حقايق للأسف.

أوقات كتير الناس اللي بنحبهم ممكن يطلبوا مننا طلبات بايخه في لحظات تعبنا أو و إحنا مش نايمين كويس و فاصلين فعلا ، زاي إنهم يطلبوا مننا المساعده في حاجه أو يعتمدوا علينا في أمر ما مهم ليهم .. و ممكن بجهل مننا نفتكر إنهم عايزين يرخموا علينا وخلاص ، لكن اللي بيحصل فعلا إنهم بيكونوا عايزين يختبروا غلاوتهم عندنا و يتأكدوا إننا بنحبهم و معاهم في وقت ما هما محتاجين ده وبيطلبوا ده مننا بشكل واضح ، فبيحبوا يشوفوا هل فعلا ممكن حتى في عز تعبنا نشوف ايه يرضيهم ونعملوا و لا هنأجل و نقولهم بعدين .. ! حقيقي الحاجات ديه مش بتتنسي وبيفضلوا فاكرينها ، مع إننا ممكن نكون فاكرين إن ده موقف و عدى وخلاص .. لكن حقيقي الواحد بيندهش و بيتبسط جدا لما تيجي سيرة الموقف والاقي إنهم فاكرين ده ليا و إن آد ايه اليوم والتصرف ده مش ناسيينه. 💜 #خربشات_يوستينيه

قال رسول الله صلى الله عليه وسلم : "من قال حين يأوي إلى فراشِه : ( لا إله إلا اللهُ وحده لا شريك له ، له الملكُ ، وله الحمدُ ، وهو على كلِّ شيءٍ قديرٌ ، لاحولَ ولا قوةَ إلا بالله العليِّ العظيمِ ، سبحان اللهِ، والحمدُ لله ، ولا إله إلا اللهُ ، واللهُ أكبرُ ) ؛ غُفِرَتْ له ذنوبُه ولو كانت مثلَ زَبَدِ البحرِ." ربنا كريم أوي إنه يغفر لك ذنوبك عشان قلت ذكر واحد بس قبل ما تنام .. احفظه وقوله كل يوم وفكر بيه غيرك.

بمر ب أزمه .. I should have achieved more in this age

هو إحنا ممكن مانبقاش عارفين وجهتنا ايه لكن ده ما يمنعش إننا كل يوم بنمشي ، بمعنى إننا أغلبنا مش عارفين إحنا بنعمل ايه في حياتنا بالظبط لكن في المقابل المفروض بنعمل مجهود وبنحط خطط على الأقل على المدى القريب جايز تصيب وجايز تخيب لكن الأهم هو توكلنا على ربنا.