من خوڵامی ئەو کەسەم، ئیشی هەموو مەردانە بێ
وەک گوڵی مەجلیس بە چەشنی نەرگس و ڕێحانە بێ
بێتە سەر بازاڕی نووسین، گفتوگۆی پیاوانە بێ
عەیبە شاعیرلەم زەمانە، یاری زوڵف و شانە بێ
یا سوپاسی قامەت وگوڵزاری ڕووی جانا نەبێ
بیرو هۆشی شوعلەوەر بێ هەروەکوو نووری قەمەر
هۆزی هەستێنێ لەخەو، لایدا لە سەر ڕێگەی خەتەر
دەستە ئەژنۆ دانەنیشێ، دڵ پڕی شین وچەمەر
هەرکەسێ لافی ئەدیبی و شاعیری بێنێتە سەر
حەیفە ئەشعاری خەرافی، یا قسەی ئەفسانە بێ
بۆ ئەدیبان عارە لای من ترسی بەند و دار و گیر
هەر ئەبی ئامادە بێ دایم لە بۆ زنجیر و شیر
عەیبە باسی قەوسی ئەبرۆ و چاوی مەست، برژانگی تیر
شاعیری بیکەی بە کوردی،یانی: خاوەن هۆش و بیر
چۆن ئەبێ هۆشیار و زانا هونەری لەرزانە بێ؟
کاکی شاعیر بۆ ژیانت بێرە بەزمی هات و چوو
تێ بکۆشە بەڵکوو بێیتە ڕیزی خەڵقی زووبەزوو
لابە نەفس و ئارەزوو، دەربێنە بۆ خۆت ئابڕوو
هەر ئەدیبێ خووی لەسەر خاڵ و خەت و ئەگریجە بوو
من لەحەق داوا ئەکەم خوا بیبڕێ، با هەر نەبێ!
قەت نەڵێی داخی گرانم، حاڵی گەنجیم چوو لە دەس
تازە پیر و داوەشاووم ، ناگەمە هاوشانی کەس
عەیبە بۆ خۆت حوڕ نەبی ، خۆت کەی بە تەیری ناو قەفەس
پیاو کەسێکە بۆ ژیان و جیفە تا ئاخر نەفەس
نۆکەری شێخ وخوڵامی بەگلەرو ئاغا نەبێ
نانی مەردانە بخۆ ، ئیقرار ئەکەم حاتەم کە تۆی
بۆ هەوانتە تێ مەکۆشە ، ئەو زەمانە هاتو ڕۆی
لابە، تێی هەڵدە براکەم، نانی مننەت قەت نەخۆی
خۆشەویستی خوایە هەرکەس قاچ و شان ودەستی خۆی
تووشی زەحمەت کات و لای کەس مل کەچ و ڕیسوا نەبێ
عادەتی دنیا وەهایە هەر لە عەسری ئادەما
پیاوی دانا گێژ ئەخوا دایم لە گێژی ماتەما
قەد نەبوو عاقڵ بژی ڕۆژێ بە دڵ لەم عالەما
تێگەیشتوو هەر ئەناڵێنێ لەژێر باری خەما
بێ مەراقی بۆ کەسێکە سەرسەری و دێوانە بێ
قانعا، لەم عەسرەدا هەرچی ئەڵێی باسی سەرە
سەد هەزار شاعیر لە تۆ چاکتر لە گیتی نۆکەرە
بەینی بەینەڵڵا کەلامی مفتی شەهد و شەککەرە
مفتی! هەر چەند تۆ کە هۆنەر نیت و ناوت هۆنەرە
تاوەکوو مردن ژیانت ژینی ئینسانانە بێ
"مامۆستا قانع"