Asser Media ኣሰር ሚድያ

ጋዜጠኛ ፍቕሩ ወልዱ ካብ ኣብኡ ኣይተ ወልዱ ኣፅብሃ ኣዲኡ ወይዘሮ እህታለም ደመናን 2 መስከረም 1979ዓ.ም ኣብ ከተማ ወልድያ ተወሊዱ። ንኣስታት ክልተ ዓመት ኣብ ከተማ ወልድያ ምስ ፀንሐ ምስ ቤተሰቡ ናብ ከተማ መቐለ ብምምፃእ ኣብ ቤት ትምህርቲ ሃፀይ ዮውሃንስ ካብ ቀዳማይ ክሳብ ዓሰርተ ክልተ ክፍሊ ተማሂሩ። ድሕሪ እዚ ኣብ ዩኒቨርስቲ መቐለ ብጆርናሊዝምን ኮሙኒኬሽንን ብቀዳማይ ዲግሪ ተመሪቑ። 2001ዓ.ም ናብ ዓውዲ ስራሕ ጋዜጠኛኝነት ዝተፀንበረ ጋዜጠኛ ፍቕሩ ወልዱ መጀመርያ ኣብ ጋዜጣ ወይን፣ ብምቕፃል ቴሌቭዥን ትግራይ፣ ድሓር ድማ ኣብ ሬድዮን ቴሌቭዥንን ፋና ብሮድካስቲንግ ኮርፖሬት ብጠቕላላ ን8 ዓመታት ምስ ኣገልገለ ብፍላይ ካብ ምምፃእ ናይ ለውጢ ሓይሊ ኣብ ልዕሊ ህዝቢ ትግራይ ብዝስርሑ ናይ ሚድያ ናይ ፀለመ ፕሮፖጋንዳታት ብምቅዋም ካብ ስራሕ ለቒቁ ናብ ድምፂ ወያነ ቴሌቭዥን ተፀቢሩ እዩ። ኣብ ድምፂ ወያነ ቴሌቭዥን ድማ ብላዕለዋይ ኣሰናዳእነትን ድምፂ ወያነ ቴሌቭዥን ጨንፈር ኣዲስ ኣበባ መተሓባበርን ጋዜጠኛን ኾይኑ እናሰርሐ ፀኒሑ እዩ። ብድሕሪ እውን እቲ መንግስትነት ሒዙ ዘሎ ጉጅለ ኣብ ልዕሊ ድምፂ ወያነ ጨንፈር ኣዲስ ኣበባ ብዝወሰዶ ናይ ምዕፃው ስጉምቲ ናብ ዋና ቤት ፅሕፈት ድምፂ ወያነ መቐለ መፂኡ ክሳብ ዕለተ ሕልፈቱ እናገልገለ ፀኒሑ። ጋዜጠኛ ፍቕሩ ወልዱ ድምፂ ንዝስኣኑ ብሄር ብሄረሰባትን ህዝብታትን እዛ ሃገር ድምፂ ኾይኑ እዩ። ዘይድፈሩ ቦታታትን ኩነታትን ዝደፈረ ውፉይ ንሞይኡ ኩሉ ዓይነት ዋጋ ኸፊሉ ዝሰርሕ፤ ክሳብ ኣብ ጐንፅን ምፍንቓልን ዞባ ጉጂ ኣብቲ ቦታ ብምኻድ እቲ ኣብ ልዕሊ ህዝቢ ኣጋጢሙ ዝነበረ ሕስምን መከራን ንህዝቢ ዓለም ኣቓሊሑ እዩ። ህዝቢ ሲዳማ መሰል ዓርሰ ምምሕዳር እንተልዕል ክሳብ ሃዋሳን ከባቢኡን ተጓዒዙ ድምፂ ውፅዓት ህዝብታት ምዃኑ ዘረጋገፀ ጋዜጠኛ እዩ ነይሩ። ክሳብ ጉባ ግድብ ህዳሰ ብምኻድ ድሕሪ እቲ ዝብሃል ለውጢ ግድብ ዘጋጠመ ማሕለኻ እንታይ ከምዝመስል ንተመልከቲ ኣገንዚቡ፤ ሕዚ ኣብ ስልጣን ዘሎ መራሒ ኣብይ ኣሕመድ ኣብ ጋዜጣዊ መግለፂ ተረኺቡ እቲ ካብ ዝተፈላለዩ ደጊፎምኒ ዝብልዎም ዶላራት ሓገዝ ኣበይ ከምዝወዓለ ብንፁር ቋንቋ ሓቲትዎም እዩ። በሊሕ፣ ለባምን ትዕግስተኛን ዝነበረ ጋዜጠኛ ፍቕሩ ወልዱ ኣብ ኩሉ ዝተዋፈረሉ ዓውዲ ብልዑል ሞያዊ ብስለትን ሰሪሑ ዘዐወተን ንፉዕ ጋዜጠኛ እዩ ነይሩ። ጋዜጠኛ ፍቕሩ ወልዱ በዓል ሓዳርን ኣቦ ሓደ ቆልዓን ዝነበረ እንትኸውን፤ ብዝሓደሮ ሃንደበታዊ ሕማም ኣብ ዓይደር ሪፈራል ሆስፒታልን ጥቁር ኣንበሳ እስፔሻላይዝድ ሆስፒታልን ክትትል ሕክምና ይግበረሉ ድሕሪ ምፅናሕ ትማሊ 23 ነሓሰ 2012ዓ.ም ኣብ መበል 33 ዓመቱ ዓሪፉ :: ኣባላት ኣሰር ሚድያ ንመላእ ቤተሰቡ፣ ፈተውቱ፣ ናይ ሞያ መሓዙቱን ፅንዓት ንምነ።