ناشيونال جيوغرافيگ

تخيل إنك ماشي في غابة بجنوب أو جنوب شرق آسيا، وفجأة لقيت نحلة لونها أزرق كهربائي لامع كأنها متصممة بالجرافيك أو طالعة من فيلم خيال علمي. أول حاجة هتيجي في بالك إن اللون ده أكيد بسبب صبغة نادرة، لكن الحقيقة أغرب بكتير. نحل النجار الأزرق مفيش في جسمه أي صبغة زرقاء أصلًا، واللون المبهر اللي بنشوفه ناتج عن تركيب مجهري في شعيرات جسمه بيعكس الضوء بطريقة مميزة، فيظهر باللون الأزرق القزحي اللي بيخطف العين. الحشرة دي ممكن يوصل طولها إلى حوالي 28 مليمتر، وده بيخليها من أكبر أنواع النحل في العالم. والغريب كمان إنها، على عكس نحل العسل، لا بتعيش في خلايا ولا بتصنع العسل، لأنها حشرة انفرادية بتحب تعيش لوحدها. كل أنثى بتحفر نفقها بنفسها داخل الأخشاب الميتة أو المتحللة، وبتجهزه بعناية علشان تضع فيه بيضها وتحمي صغارها. ورغم شكلها الكبير وألوانها اللي ممكن تخوف أي حد يشوفها لأول مرة، فهي في الحقيقة هادئة جدًا، ومش بتلسع إلا لو حسّت إن في خطر مباشر عليها أو حد حاول يمسكها. والأهم من كل ده إنها بتؤدي دورًا مهمًا في تلقيح الأزهار والنباتات، وده بيساعد على استمرار الحياة النباتية والحفاظ على التوازن البيئي #ناشيونال_جيوغرافيك