ادبیات سئونلر

  صادیق شوکور اووو خاطیرلاییرام، تمیز اینسان ایدی، عالیم آدی‌یلا. اونون سینه‌سینده قاینار بیر ایلهام، دایم مشغولویدو تدقیقاتی‌یلا.   ائله کی، دئییردی نریمان اوودان پرستیش ائدیردی او بؤیوک آدا. بلکه، آلوولانیب یانیردی، اینان نورو پاشانی دا حاللاندیراندا.   ایللر وار، سسله‌ییر بیزی آرخادان، ایللر تزه‌لنیر آرادا، آنجاق عالیم وار، حؤرمتله کئچدیم یانیندان، من غبطه‌‌ ائله‌دیم بو آدا، آنجاق‌.   «زیارت یولو»   حؤرمتلی صنعتکار ائلشاد معلّیم ناغی‌یئوه   باکیدا بیر یول وار، زیارت یولو، اوردا دا، بیر ائوین بیر داروازاسی درمانلار دوزه‌لدیر بیر وطن اوغلو دیلینده- دایمی-خئییر دوعاسی.   «معلّیم» چاغیریلیر اوستادین آدی، اونودوب خئیلی وار او، صینیف نه‌دیر. او سئویر چمنی، چیچه‌یی، اوتو، درسی ده اوتلارین اؤزدیلینده‌دیر.   ائوده ماوی گؤزلو آغ پیشییی وار، دئییر: نه ائو بیلیر، نه ائشییی وار. لووغادی، شیر قولاق، سرت کئشیکچی‌دی، خصوصی خیدمتده فخری ایشچیدی.   ائلشاد اختراع‌چی بیر ایستعداددی، ایکی قیز اؤولادی، اوچ ده نوه‌سی! بس اونون خانیمی؟ سئوینجدیر آدی، اونون عشقینه‌دیر بونون هوسی!   او دا عوضسیزدی، بو دا عوضسیز، اوندا دا، بوندا دا طالعین الی، بوردا بیر عائله‌‌ یاشاییر سسسیز، شؤهرتی اوجادیر، آدی شرفلی.   باکیدا بیر یول وار، زیارت یولو، اوردا دا، بیر ائوین بیر داروازاسی. درمانلار دوزه‌لدیر بیر وطن اوغلو، دیلینده- دایمی- خئییر دوعاسی‌   «آغلات، سن منی آغلات»   «عاریف مئهماندوست»ا («قاراگیله... آغلاما، بسدی»)ماهنیسینا   بیر عصرین غم سسیدی یا دا عکسینه عاریف! نئجه دؤزدون، یانمادین، سن اؤز سسینه عاریف!؟ سسینده بیر اود-آتش، بیر چاغیریش، بیر عصیان، آغلاما دئیه-دئیه سن یئنه آغلادیرسان. اویادیرسان بیزده‌کی، همن او بیزی عاریف! گؤستریرسن سیرادا اؤز یئریمیزی، عاریف! آراز-کور داشیر، عاریف! ائی، «قاراگیله»، هئیهات! آغلاما، بسدی، دئمه، قوی بیر آز یونگوللشیم رحم ائله اوره‌گیمه، آغلات، سن منی آغلات!   ۲۰۲۴ «دئییر»   سئویملی صنعتکاریمیز منسوم ایبراهیم اووون آد گونونه   منسوم هاوالانیب اوخویور یئنه نفسی بنؤوشه قوخویور یئنه. سسین ایپه‌یینی توخویور یئنه، رنگلری یادداشدان-یادداشا دئییر.   هر سؤز، هر قافیه‌، هر کلمه یانیر، دگمه، من یاندیغیم بو غمه یانیر. یانیب کول اولموشام، کولومه یانیر، چکدییی هر ناله سن یاشا دئییر.   ائلچین  یئره قویما الیندن تاری، ائلنورون کامانی گؤینه‌دن تاری. قاراباغ تاریدی، او وطن تاری، بو آغدام دئینده، او شوشا دئییر.   نه‌دیر او پرده‌نین، او سیمین سسی، دویغومون سسیدی، حیسّیمین سسی. آللاهیم، نه دئییر منسومون سسی؟ میللتی قویمایین داشداشا، دئییر   دئیین، ال ساخلاسین تاریخی یازان   «ظفر داستانی» اثری‌نین مولیفی حؤرمتلی راحیله سولطان‌قیزینا   قلبه یولوموز- «ظفر یوللاری»، بو یول دا، او یول دا بیر حاقدان کئچیر. سنگرده میللتین گنج اوغوللاری، آللاهیم، نه آغیر سیناقدان کئچیر.   ایتیریر هوشونو بیری قفیلدن، بیری‌نین قولو وار، قیلچاسی یوخدو. قاباقدا دوشمن‌دی، آرخادا وطن، چکمه‌یه بیر رسام فیرچاسی یوخدو.   بئله ایتیریریک مرد اوغوللاری، قویمور آییلماغا بیزی بو اووسون. ائی دوشمن جبهه‌سی، نامرد یوللاری، سیزی یارادانین گؤزو کور اولسون.   دئیین، تلسمه‌سین فرمان صاحبی، دئیین، ال ساخلاسین تاریخی یازان. ائی داعوا آختاران، بیر آن صاحبی، سونونجو آددیمی آتاندا دایان؟   «اولسون»   آغ یئل، آغ یئله‌نلی سنین آغ آتین: شیمشکلر اووجوندا قانتارغان اولسون. آیاغین آلتیندا یئر جیدیر دوزو، باشی‌نین اوستونده گؤی قالخان اولسون.   آغ بولود چیینینده بیر آغ یاپینجی الینده بابکین میصری قیلینجی. بو یولون سونوندا دؤردیول آیریجی، ایرلی! چاغیران سس آرخان اولسون.   منه دئمیشدیلر داش آتما قوشا، داشا توتولوبدو داش‌آلتی، شوشا ائله زیروه‌دن اوچ، https://t.me/Adabiyyatsevanlar

قاراباغ تاریدی، او وطن تاری، بو آغدام دئیه‌نده، او شوشا دئییر... «نریمان حسن‌زاده» کؤچورن: ویدا حشمتی حاضیرلایان: ادبیات سئونلر «اولو اؤندره ایلک گؤروشده اوخودوغوم شعر» ائی عشقیم، ووقاریم، صنعتیم جانیم! آنا چاغیردیغیم آذربایجانیم! آچیب قوللاریمی مهری-اولفت‌له باغریما باسیرام سنی حؤرمت‌له   سن ده، ائی آدییلا فرحله‌ندیییم، شانلی صداسی‌یلا اورکله‌ندیییم، خالقیمین ایستکلی، عزیز اولادی، شعریمین-سؤزومون قولو-قانادی، سنین هر ایسته‌یین، سنین هر آرزون حیاتدا قوی شؤهرت چلنگی اولسون!   قالدیردین آدینی بو مملکتین آندین موقدّسدی، سودون تمیزدی، منیم طالعیمدی سنین شؤهرتین، تاریخده تاریخی مرحله‌‌میزدی.   گلین، آددیملایاق سیخ جرگه‌لرده گلین، قاباقلایاق دؤورو، زامانی، دایم آلقیشلایاق یالنیز ظفرله آنا دئدیییمیز آذربایجانی.   ۱۹۶۹   «دونیانین سیرّی»   -شاعر، یئنه یازیرسانمی؟ - سوال وئردی بیری، منه. تانیتماق ایسته‌دی یقین، منده‌کی شاعری منه.   آخشام اولو، صاباح اولور، من یازماسام، گوناه اولور، یازان زامان آگاه اولور بو دونیانین سیرّی منه.   سویوماسین اود نفسین، عوضی یوخدو هئچ کسین. اولو تانریم چوخ گؤرمه‌سین اؤز وئردییی شعری منه.   «اوغلوم ناظیمه»   ناظیم، او ایللری سالیرام یادا، اوغلوم، اونودولمور هئچ نه دونیادا. سنین ساچلارینی من آغارتمیشام اینفارکتدان یاتاندا آلمانییادا!   اوزوندن گؤروردوم، فیکرین قطعییدی، دؤنده‌رن اولمازدی سنی بو یولدان. اؤزون او یئرلره نابلد ایدین بلدچیم اولموشدون، آی سنه قوربان!   بیلمیردیم، حیاتا نه‌یدی سوالیم، قوهومدان-قارداشدان یوخویدو هئچ کیم. منیم آغ‌ساققالیم، قاراساققالیم سن ایدین اوندا یوخ من سونرا بیلدیم.   آرادا گؤروردوم، سن بیرتهرسن، اوره‌گیم گلمیردی، دوزو، سوروشام من سندن قورخوردوم، خسته‌لنرسن سن مندن قورخوردون، دؤزه‌نمز آتام   گنجه یازیچیلار فیلیالیندان بیر دوستوم وارییدی-   قارداشوزی. گئدیب یاشاییردی آلمانییادا، دادیما چاتمیشدی او دا تلسیک.   سیماخ شیدا، امین، او حساس شاعر، شانلی اولاد ایدی بیر عشقین آندین. او کؤچدو دونیادان، دونیا یاشاییر، گیزلن‌پاچ اویونودور- بو دا حیاتین.   اوغلوم، قاراخانی اونوتما بیر آن، نه دئییم، آرتیقدی بو سؤز، بلکه ده. قاتارلا گلمیشدی آوسترییادان، سنه حیان اولدو قریب اؤلکده.   یاخشی اینسانلارا یاخین اول، مودام عنوانی چاشدیرما، عنوان ایچینده. بعضا، من اؤزوم ده سندن دانمیرام، انسان آختارمیشام انسان ایچینده.   «چاغیریش»   دونیانین بیر طرفی یئنه اود توتوب یانیر. گونشین گلیشینی خبر وئریر طبیعت. یئرلر-گؤیلر، نه وارسا، یوخوسوندان اویانیر. گونشدن سس- بیر آلقیش! - یاشاماغا چاغیریش، یاراتماغا چاغیریش. اینسان فعالیّتی گونشله ال-اله‌دی ديیشیر طبیعتی گونش گئده‌نه کیمی. یاشاییر تا قدیمدن بو، بیر عنعنه‌ کیمی.   «آبیده»   «کور دمیرلی» بیر ایگید شهید اولدو داوادا. «کور دمیرلی» بیر قیزین گؤیه قالخدی ناله‌سی معجزه‌لر وارییمیش سن دئمه، بو دونیادا،- میثالمی؟ یادیگارین یادیگار آبیده‌سی؟   «حیاتین بیر آنی»   شابرانداییق  پوسله‌ییر بالا-بالا اوتاقدا دا اوشویوردوک بیز آز قالا. سئوینج خانیم سوفره آچیر،  چؤرک قویور، عاریف تزه بسته‌سینه اورک قویور. عوضی یوخ سسینده‌کی ملاحتین، حاقدان گلن ثروتیدی بو میللتین سئوینج خانیم سئوینجیندن آشیب-داشیر، یئرده سولار، گؤیده قوشلار پیچیلداشیر.   ۴ آوقوست  ۲۰۲۴   «میر جلال معلّیمین خاطیره‌سی»   شاعر، میر جلالین ایستی نفسی منه حاقدان گلن بیر ایلهام ایدی. من آتا گؤرمه‌دیم، آتام عوضی حیاتدا یئگانه بیر آرخام ایدی.   «مینّت‌دارلیق»   نییه نرمینه دئییرم؟ - بیلیرسنمی، نه دئییرم: خئییرخواهدی، رحیملیدی بیر عؤمورده نئچه ایلدی- کیمسه‌سیزه کؤمک دورور دئدیییم، باخ، ائله بودور!   «چیراققالا»   آمیل معلّیمه   ساسانی ایگیدلری قالخدی چیراققالادان، شابران قالخدی آیاغا نیزه چیخدی یاییندان، قالخان قالخدی آیاغا! هونر قالدی یادیگار اولو بابالاریندان. یاشا، یاشات، دئدیلر بو دیارین آدینی. شرفله حصر ائله‌دین سن ده اؤز حیاتینی. بیر نسیل آلقیشلادی نسیللرین آدییلا. اینسان قالخیر، اوجالیر آدییلا، سوی‌آدییلا. آمیل، دئیه-سئویله‌دین ائل-اوبانین یانیندا. قدیم چیراققالانین ان یئنی عونوانیندا.   «ایل‌لر، طالع‌لر»   گؤرکملی عالیم، تدقیقاتچی صادیق شوکور اووون خاطیره‌سی   نییه ساغلیغیندا یاد اولور بیزه، گؤرموروک او بویدا بیر ایستعدادی؟ ائله کی، گئتدیلر چیخیرلار اوزه، یوکسک کورسولردن چکیلیر آدی. نییه یوخودادی، شؤهرت تانریسی، نییه قاریشدیریر آغی ساری‌یلا؟ نییه او کسلرین اوغلو، یا قیزی خلوتده فخر ائدیر، آتالاری‌یلا!؟ https://t.me/Adabiyyatsevanlar

نریمان حسن زاده شعیرلر....

چیلله گئجه سینده، بایاتی اوخوما دبی ✍️:علیرضا صرافی چیلله گئجه‌سی ایلین ان اوزون گئجه‌سی، هم ده قیشین ان قدّار و اوغلان چاغی‌نین باشلانقیجی‌دیر، بو گئجه‌دن اعتیبارا  رسما قیش باشلانیر و  هر کس بایرام آیینا کیمی قان‌دوندوران، بارماق قیران سویوقلا ال‌به‌یاخا اولمالیدیر. قدیملردن بری چیلله گئجه‌سی قارا قیشین شرلرینی سووماق اوچون هامی آغزینی خئیره آچمالی ایدی، بو گئجه‌نین قارانلیغینی بایاتیلارین ایشیغیندا سووارمیشلار، آرزولارینا ساری بایاتی فالی آچماقلا بیر آددیم داها یاخینلاشماق اوچون روحیه‌لرین گوجلندیررمیشلر.   گوزل و خوش‌گؤرولو بایاتیلار اوخویوب، قیشین آغیر شرطلرینه قاتلانماق اوچون روحی حاضیرلیق الده ائدرمیشلر، بایاتی دیلی‌یله  بیر-بیرینه اورک‌-دیرک اولارمیشلار. آشاغیدا ائشیده‌جگینیز بایاتیلاری👇 ساوا شسونلرین اولان علی بگ حاجیلی بیزیم خواهیشیمیز اوزره اوخویوب گؤندریبلر، علی بی حاجیلی بو گونه کیمی ساوا دا یاییغین فال بایاتیلاریندان بیر کتاب (ایکی جیلدده) نشر ائدیبلر. او هم ده ائل بیلیمی عاییله‌سینین دگرلی عضولریندن اولوب توپلادیقلاری فولکلور نمونه‌لریندن ائل‌بیلیمی درگیسی (مرکزی اوستانلار اؤزل سایلاریندا) نشر ائدیبلر. اشاغیدا اونون چیلله گئجه‌سی مناسبتی ایله اوخودوغو بیر نئچه بایاتینی اؤز سسی‌یله دینله‌یه بیلرسینیز. بایاتیلار دیلیمیزین گؤزل شیوه‌لریندن اولان ساوا شیوه‌سیله  (لهجه‌سیله) اوخونوب. بو خوش‌گؤرولو بایاتیلارلا بایراما کیمی اورکلریمیز قیزیشیب، قیشین قارا قاییدین جانمنیزدان آتیب،  گله‌جگه محکم و اراده‌لی آددیملارلا ایرلیله‌‌مک آرزوسویلا. قایناق:ائل بیلیمی https://t.me/Adabiyyatsevanlar

چیلله موبارک اولسون

ذکیه ذولفقاری بیزیم چیلله گئجه‌میز بیر دوستلا چتلشیردیم. بیر آز دردلشندن سونرا، دئدیم واللاه بیز یانمیش نسلیک،  نه یاز گوردوک نه یارپیز نه قیش گوردوک نه قارپیز... بو گونده مثلاً چیلله‌میزدی. آللاهین قاری دا بیزدن کوسوب. ائله بو سوزده‌یدیم، گوردوم اَریم بیر دانا بوتون قارپیز بیر قولتوغاندا، بیرده نایلون ایچینده پارچالانمیش قارپیز الینده، قاپیدان گیردی. الینده‌کیلری یئر‌به یئر ائلیندن سونرا دئدیم : - آی بالام نه خبردی؟  میه کیفلتیمیز باشینا قالیب، قابیق گمیره‌نیمیز چوخالیبکی،  ایکی قارپیز آلمیسان، ماشاللاه قارنین دا اوستووه آغاج گوتوروب بیرینی یولدا چیرپیبسان داشا، بیر تیکه‌سینی ده هورپولدتمیسن. دئدی: -گینه آی خانیم کولگه‌وه داش آتیسان ها، معده گوجونه دانیشیرسان،  باشلامیسان دئر -دئر دئینماغا. اوزون اولچوب اوزون بیچیرسن، دیل بوغازا سال، دئییم جریانی. دئدیم: -یاخجی سن بئین گوجونه دانیش گورم قضیه نمنه‌دی. دئدی: -هئش زادبابا دا گینه دیلیمه باغلاندیم. گلیردیم گلستان باغی‌نین قاباغیندا خطای عظیم اولدو داشقا اوسته  قارپیز ساتانا بیر سلام وئریب، دوردوم قارپیزلارینا باخماغا.  آخی قارپیزلاری ائله گوزل دوزموشدو داشقا اوستونه، بیر ایکی دانا دا ایشیقلی چراغ چکمیشدی اوستن وروردو،  قارپیزلار اولدوز کیمی یانیردیلار، آشکارا آداما  گوز وروردولار . هله قارپیزچی‌ ائله قارپیزلارین شاءنینه گوزل اوخویوردو، آدام سسینه واله اولوردو. کس آپار، یئ آپار... چیلله قارپیزسیز ائو آروادسیز اولمااااز... سوروشدوم قارداش قارپیزلارین شیریندی؟ بونو دئمک همان، الینه دونوم، قیر موم سوواشدی قوپمادی، منی تعریفلیه- تعریفلیه، نم سنین تایین دونیادا  یوخدی، بوردا سنسن بغداد‌دا کور خلیفه، باشین شاه باشینا اوخشور فیلان،  ایکی قارپیزی وئردی قولتوقلاریما، منده اوزون بیلیرسن مقید بابانین بیری، قالدیم کسیله-کسیله، بیر سوز دئینمدیم.  ال آتدیم جیبیمدن پول چیخاردام، قارپیزلارین بیری زویروشدو  تاپیلدیلا دوشدو یئره پارچالاندی. پارچالارین هره‌سی بیر طرفه قاچدی. منله قارپیز ساتان بیر آز قووالا قاچدی اوینادیق، گئدیب اونلاری توتوب قویدوق نایلونا.  دا جانیم بوینومایدی ایکی قارپیز پولون وئریب یولاندیم. یولدا کالا پئت وروردوم، بترده سوسوزودوم. دوزون آختارسان گله- گله بیر تیکه‌سی‌نین دادینا باخدیم. آللاه ریضاسی عومرومده بئله دادلی، شیرین قارپیز یئمه‌میشدیم. اونون دا آلدیغی آنا سوتو کیمی حلالی اولسون. جانیم بئله اولدو گئدیب آیری چیلله یئر یئمیشی آلا بیلمدیم. اوزوم قره. دا من بو سوزلره نه دئیه‌بیلردیم دیلیمی قویدوم دینمز یئریمه اوتودوم. گتیردیم ایکی قاری- قوجا  چیلله قارپیزی‌میزی وردوق بدنه و بئله‌لیکله چیلله‌میزی خوشلوقلا  باشا  وردوق. اوزون گئجه‌لر کئچیب گئده‌جک، آیدین صاباحلارین گلیشینه ایناناق. 1403/9/30

سحره اینان(چیلله گئجه‌سی مناسبته) ✍یازان: افروز خانیم نقل اولوبدور قدیم زامانلاردا بیر بیچینچی کیشی یورغون- آرغین، آج- سوسوز ائوه گلر. قولونون آلتیندا کی یاتسیقچالارا دیرسکله‌نر چاغیرار: - آرواد بیر نئچه بؤیوک استکان چای گتیر سوسوزلوقدان دیلیم آغزیمدا یانیر. یوخ، زحمت‌دیر ائله چاینیکی گتیر، دده- بابانا رحمت. آرواد تزه دمله‌دییی چایی، چاینیک‌، استکان-نعلبکی‌نی بیر سینی‌یه قویوب گتیرر. کیشی: به آرواد بونون قندی هانی؟،- دییر. آرواد: آی کیشی، بئله های باسدین، قند یادیمدان چیخدی، الان گتیریم،- دییر. آرواد آیاغا قالخار قند گتیرمه‌یه، گؤرر ائوین تیکیلسن فلک، قند یوخدور. - آی کیشی قندیمیز قورتاریب. کیشی:" بالامسان گولناز، نینیمیزدن قارا تویوغون یومورتاسینی گؤتور،  قاچ کوچه باشیندان باققال رمضان دایی‌دان بیر اوووج قند آل، دئنن دده‌م دئدی: تاخیلیمیز ساتیلسین، حسابلاشاریق. قیز حیه‌طه نینه ساری یوللانار، اورادان های باسار: - آی دده... آی دده... قارا تویوق یومورتاماییب. کیشی حیرصلی باشینی تووولاییب دییه‌ر: " آی بالا ائی... قارا تویوغون نه گؤتونه دیر مهرعلی سوسوزلوقدان یانیر... ایندی ایسه بو حیکایه‌نی یازماقدان منظوروم، ایستی اوتاقدا یاشایان، یومشاجیق یاتاقدا یاتان، آل- الوان چئشیدلی نعمت‌لردن یارارلانان‌لار بیز فاغیر کوتله‌نی نه قاناجاقلار؟! دردسیزلر، آغ گونلولر بیزی نه دوشونه‌جکلر؟! عزیز ائلیم، من ده یاخشی بیلیرم چوخوموزون احوالی مادی باخیمدان خوش دئییل، اقتصادی جهتدن آغزیمیز آجی‌دیر، سئودییمیز کیمی یاشایا بیلمیریک، کال آرزولاریمیز یئتیشمه‌میش چورلاییب تؤکولور، آمما خواهیش ائله‌ییرم الینیزه کئچن هر نعمت‌له، حتا بیر اووج قووورقایلا، توملا چیلله‌نی قوتلایین، کیچیک دیلخوشلوقلاری اؤزونوزدن، عائیله‌‌نیزدن اسیرگه‌مه‌یین. اُسکار وایلد ایرلندلی شاعیر و یازیچی دئییر: "من کیچیک دیلخوشلوقلارین وورغونویام، نئیه کی اونلار حوزونلو جانلارین سون سیغیناجاغی دیر". بونو اونوتمایین کی: اوزون، ظولمت گئجه‌لرین سونو "سحر" دیر. اومود، ایشیقلیق، آیدینلیق، سئوینج هئچ زامان ائوینیزدن، اوره‌یینیزدن اسکیک اولماسین. آمین. چیلله بایرامینیز موبارک اولسون. سیزی سئویرم. https://t.me/Adabiyyatsevanlar

خوی دا چیلله گئجه سی سید ابوالقاسم انجوی شیرازی تورکجه یه تر جومه ائده نی :علیرضا ذیحق. جماعت كاسيب دان دولتلي‌يه لازم بيلرلركي بازاردان پشمك و حالوا آليب ائوه آپارسين‌لار.  چيلله‌يه گؤره بير مئجمه‌ئي حاضيرلايارلار كي ايچينده پشمك، حالوا و قارپيز اولار. شامادا تويوق پيلوو يا پيلو و خوروش پيشيره‌رلر. شامدان سورا ائوين بؤيويي يئمه‌لي‌لري بؤلوشدوروب اوتورارلار صؤحبته. نيشانلي قيزلارا يوللانيلان خونچادا اون ايكي بشقاب اولار. بو بشقاب‌لارا پشمك، ميلاخ، جوربه‌جورحالوا، قارپيز، شيرني و آيري- آيري ميوه‌لر  دوزوب اورتادا بير بوخچا اولاركي خلعت دئييله‌ر و عبارتدير گلين دونو نان قيزيل دان. قيز ائوي چوخ احتراملا خونچالاري قوناق اوتاقينا قويوب حامبالا انعام وئريب يولاسالارلار. سورا دوست تانيشا و قوهوم‌لارا خبر وئره‌رلركي خونچالاري گليب گؤرسون‌لر. قوهوم قونشو خونچالاري گؤردوكده شادليق ائده‌رلر و اونون يئمه‌لي لريندن يئييب دئيه‌رلر:  «ائولري آباد». چيلله گئجه سينده اوقيزلاراكي تزه أر ائوينه گئديب‌لر، عائله‌لري طرفيندن چيلله ليك يوللانار و عقيده بونادير بئله ليك‌له چيلله‌نين آغزي شيرين اولوب قيش خوشلوق ايله كئچر. خونچالارا دوزوله‌ن حالوا لار اوچ جوره اولار:  1- چونجود‌ حالواسي   2- جه‌ويز حالواسي  3- كئشير حالواسي «خوي‌» ون «پره» سينده، چيلله گئجه‌سي نيشانلي اوغلانلار آتا آنا‌لاري‌له بيرليكده آداخلي‌سي گيله گئديب اؤزلري‌له بير قوغون‌دا آپارارلار. قوغونو اوتاقين وسطينده بؤيوك بير مئجمه‌ئي‌يه قويارلار. گلين‌ين آتا آناسيندان باشقا آيري قوهوم‌لار‌دااولارلار. سونرا گلين پرده داليندان ائشي‌يه چيخيب سلام وئره‌ركن چوخ مؤدب حالدا بير بوجاق‌دا اي‌له‌شر و واختي چاتاركن بيچاقي أْله آليب قوغونو ديليم- ديليم بؤلوب پايلايار. رسم‌دير كي قوغون بير ديليميني كوچه قاپيسي‌نين آغزينا قويارلار تا يوخسول بير آدام اونو گؤتوروب يئمك له ائوده‌كي اوغلان قيزلارين بختي آچيلا و گلين ايله داماد قوشا قاري‌يالار. اوغلان آناسي بو آندا نيت ائده‌ركي اوغلو، آلديقلاري گليني بوشامايا. بو ائلين سئويملي رسم‌لريندن بيري بودوركي هئچ كيشي گرك آرواديني بوشامايا. هابئله رسم ديركي چيلله گئجه‌سي شريت دن پالتار آسالار. صوبح اذاني‌ناچان پالتارلار شريت‌دن دوشورسه، بو اينام‌دا اولارلاركي بو ايل قيشي سويوق و قار- بورانلي اولاجاق و گرك‌كي أيين‌لريني بركيديب پالتار‌لاريني چوخالدالار. ................... كيچيك چيله‌نين باشلانيشي پيشيك لرين «ميروو» واختينا دوشر و خويلولارين عقيده‌سي بوناديركي ديشي پيشيك اركك پيشي‌يه دئيه‌ر: « نوروز، نوروز» و اركك پيشيك «جوابيندا «نرگس، نرگس» دئيه‌ر. اوزامان كي جماعت بو سسلري دويوب بيلديلركي پيشيك‌لر حامله‌دير آرزوسو اولان لار بيريئره ييغيشيب باشلايارلار خيديرنبي قاووتي دوزه‌لتمه‌يه كي چوخ دا يئمه‌لي‌  اولار. قاووتي دوزه‌لتمه يه آرپا، بوغدا، مكه، چدنه، گونه‌باخان توخومي، چونجود، قارپيز و قوغون توخومي و ايي‌ده‌ني بير- بيرينه قاتيب اويودمك ايچون دييرمانا آپارارلار. اونوتماياق كي اي‌يده و توخوم‌لاري قابيق‌لي اويوده‌رلر. رسم دير كي دييرمانچي اويودمه‌يه پول آلمايا و عوضينه كفله‌ايله بير آز  آرپا- بوغدا گؤتوره. اونو ائوه گتيريب تاباقا بوشالتديقدان سونرا نيت ائديب أل ده‌يمز بير يئره قويارلار.  دؤوره‌سينه‌ده آينا، داراق، سورمه‌دان و مولچو دوزوب گئجه دن سحره‌جان كيمسه اورايا دولانماز. اگر نذرلري قبول اولورسا سحري بالاجابير أل يئري اونون اوستونده گؤرونه‌ركي دئيه‌رلر حضرت خضرين أل يئرسيي دير. البته او قادين‌لار كي بو ايشي گؤره‌لر گرك كي شرعي نظردن تميز اولالار و مستحب ديركي دسته‌مازلي اولسون‌لار.  حضرت خضرين أل يئريسي ني گؤروب سئچن، سئوينجك اولار و آللاها شوكر ائتمك ايچون نماز قيليب باشلايار قاووت لاري پاي- پؤلوش ائتمه‌يه كي قاپي قونشو و ياخين قوهوملارا پايلاسين. قاووتي آلانلاردا يئرينه قند، يومورتا، دوز و يا پول قويوب قابلاري بوش قايتارمازلار. قاووتي يئمك ايچون عائله‌لر اونو بير كاسايا تؤكوب بال، دوشاب و يا شيره ايله قاتارلار. https://t.me/Adabiyyatsevanlar

چیلله حاقیندا معلومات

✍🏻:«لیلی خیاوی» چیلله دیر، بَزه ییر ماسانین اوستون جان آتیر گؤرونه هامی دان اوستون چیخاردیر گؤزونو دوشمانین، دوستون یا رببیم! وئر شفا گؤرمه میش لره آل_الوان مئیوه نی، ژله نی دوزور اولمایان کیمسه نین باغرینی اوزور سانالدا پایلاشیب، آلقیشلار گَزیر یا رببیم! وئر شفا گؤرمه میش لره شکیلده قارپیزلا، قول_بویون اولور سانکی سئوینجینی میللت له بؤلور یوخسول بالاسینین گؤزلری دولور یا رببیم! وئر شفا گؤرمه میش لره اصیل کیمسه لرین عقده سی اولماز هر آن خوش گونوندن شکیل لر سالماز اوره یی، نخوت له، غرورلا دولماز یا رببیم! وئر شفا گؤرمه میش لره https://t.me/Adabiyyatsevanlar

ادبیات سئونلر چیلله بایرامینیز موبارک اولسون.

چیلله موبارک اولسون https://t.me/Adabiyyatsevanlar

اوشاق ادبیاتی گؤزل بالالار! صاباح گئجه «چیلله» گئجه‌سی اولاجاق. ادبیات سئونلر سیزین چیلله پاینیزی بو گون گؤندره‌جک. چیلله گئجه‌نیز اوغورلو اولسون. چیلله گئجه‌نیز آیدین سحره آچیلسین. جئیران بالالار «چیلله» بیلیرسیز یانی نه؟ هر زادین سون درجه‌ده چکیلمه‌سینه چیلله دئمک اولار. اؤرنک: یایین چیلله‌سی، یانی یایین سون درجه‌ده ایستی گونو. کمانین چیلله‌سی، یانی کمانین سون درجه‌ده چکیلمه‌سی. قیشیدا چیلله گئجه‌سی، یانی بیر اوزون گئجه بوتون گئجه‌لردن اوزون اولان گئجه... چیلله گئجه‌سی‌نین اؤزونه گؤره عادت-عنعنه‌سی وار. ۱-جی اود یاندیرماق‌دیر، تا ایشیق اولسون، ایستی اولسون تا قارنلیغا، سویوغا، غالیب اولاق. ۲-جی‌سی عائیله‌لرین بیر یئره یغیشماسی‌دیر، تا دئییب گولمک‌له، شب‌چره یئمکله بیرلیکده اوزون گئجه‌یه نردوان قویسونلار. بو گئجه آتا-آنالار اوشاقلارینا ناغیل دئیرلر، شعیر اوخویارلار. بو گئجه‌نین یئمکلرینده قیرمیزی قارپیز، نار، کیشمیش، گیرده‌کان، ایده، بادام، چوغوندور، پخله...دن آد آپارماق اولار. آما هامی‌سینی بیر یئرده یئمزلر ها... https://t.me/Adabiyyatsevanlar

اوشاق ادبیاتی هر هفته پنجشنبه گونو ادبیات سئونلر کانالیندا اوشاق ادبیاتینا دایر یازیلارینیزی بیزه گوندرین . چیلله آخشامی «سئویلی اوشاقلار اوچون» ............... پاییز گئدیر قیش گلیر قار گلیر یاغیش گلیر گلدی چیلله بایرامی قیشین اوّل آخشامی آنام سوفرا سالیبدی آتام قارپیز آلیبدی قوناق گلیر قار بیزه خوش گلیبدی نار بیزه چایلارین بوزی چیخدی قارپیز قیرمیزی چیخدی https://t.me/Adabiyyatsevanlar

اوشاق ادبیاتی سایین کانالداشلار چیلله گئجه سینه عایید، اوشاق شعری ، ناغلی ... بیزه گوندرین . https://t.me/Adabiyyatsevanlar