ادبیات ائوی

#5 #موسیقی #بو_گئجه موغام: شوشتر ریتم 3/4 موسیقی: #امین_ثابت_اوغلو سؤزلر: #زینال_خلیل اوخویور: #جاوید_تبریزلی ترتیب ائدن: #یوسف_شیرین_پور فیکریمده آیلی، اولدوزلو آسمان وار بو گئجه قلبیمده کؤرپه قوزو تک بیر عمان وار بو گئجه (بیر تک سن یوخسان عزیزیم بیلیر عالم بو گئجه نه اوچون اولمادین دئ ای یار منه همدم بو گئجه)2 همدمیم سیلدیریم داغلار بولودلاردیر بو گئجه قوناغیم قیرمیزی گول‌لر گؤی اوتلاردیر بو گئجه (بیر تک سن یوخسان عزیزیم بیلیر عالم بو گئجه نه اوچون اولمادین دئ ای یار منه همدم بو گئجه)2 شیمشه‌یه چاخما دئسم من اینان چاخماز بو گئجه آرازا آخما دئسم من اینان آخماز بو گئجه (بیر تک سن یوخسان عزیزیم بیلیر عالم بو گئجه نه اوچون اولمادین دئ ای یار منه همدم بو گئجه)2 #ادبیات_ائوى @AdabiyatEvi

سون یئددی ایلده هر سئری و همشه اونا زنگ آچاندا ائوده‌دیر. سون یئددی ایلده بلکه یئتمیش سئری اونا زنگ آچمیشام و بو یئددی ایلده او همشه تئلفون دسته‌یین گؤتوروب. منیم تئلفون آرامالاریم اونونلا قایداسیز و دئمک تصادفی اولوب. زوردو؟ هر هاچان کی عشقیم چکسه اونا زنگ آچیرام. بارماغیمی یئددی سئری تئلفون دستگاه‌ینین نؤمره‌لرینه باسیرام، تئلفون دسته‌یی‌نین اوتاییندان بیردن یولداشیمین سسینی ائشیدیرم: الو! تئلفون دانیشیق‌لاریمیز او قدر ده اؤنملی دئییل. اؤنملی اولان مسئله بودور کی او همشه تئلفون زنگیمی جاوابلاییر. هردن سحر چاغی و هردن گئجه لر اونا زنگ آچیرام. دئییر کی ایشه گئدیر، آنجاق سوروشورام بو سؤزونو نئجه اثبات ائده بیلرسن کی؟ دئییر کی ائولی‌دیر آنجاق هئچ زامان اونون حیات یولداشینی گؤزومله گؤرمه‌میشم و اونون حیات یولداشی سون یئددی ایلده هئچ زامان تئلفونو جاوابلاماییب. بو گون ناهاردان سونرا ساعات 13:15 یاخین اونا زنگ آچدیم. دئمه‌میش بللی‌دیر کی اؤزو تئلفونو جاوابلادی. تئلفونو یالنیز بیر سئری بوق وورموشدو. یاواش-یاواش بو نتیجه‌یه چاتیرام کی او 1972جی ایل‌لریندن بویانا ائودن چؤله چیخمیر و اونون تکجه ایشی بودور کی ائوده هر گون اونا زنگ آچماغیمی گؤزله‌سین... یازیچی: #ریچارد_براتیگان چئویرن: #ایلقار_موذن_زاده #ادبیات_ائوى @AdabiyatEvi

#اؤیکوجوک #حیکایه تئلفون آراماسی یازیچی: #ریچارد_براتیگان چئویرن: #ایلقار_موذن_زاده #ادبیات_ائوى @AdabiyatEvi

بیر گون کافکا پارکدا گَزَرکَن کیچیک بیر قیزین آغلادیغینی گؤرور. اونونلا دانیشیب نییه آغلادیغینی سوروشدوغوندا آنلاییر کی، بو قیز قولچاغینی ایتیریب. کافکا قیزا اومود و اورک وئرمک اوچون ایتیریلمیش قولچاغینی تاپاجاغینی دئییر و ارته‌سی گون اوچون گؤروش بللی ائدیب ساغوللاشیرلار. کافکا قولچاغی تاپماق اوچون چوخ چالیشا دا، چابالاری سونوجسوز قالیر. سونرا قولچاق آدیندان قیزا مکتوب‌لار یازماغا قرار وئریر. قیزا یازدیغی ایلک مکتوبوندا یازیرکی؛ «خواهیش ائدیرم منیم اوچون اوزولمه، من دونیانی گؤرمک اوچون اوزون بیر یولجولوغا چیخدیم. باشیما گلن‌لری سنه یازاجاغام.» کافکا هر دؤنه بالاجا قیزی گؤرن‌ده اونا قولچاغین یازدیغی مکتوب‌لاری اوخویور و قیزین هیجانی گئتدیکجه داها دا آرتیردی. آیلار کئچیر و اونلارین سون گؤروشو گلیر. سون گؤروش‌لرینده کافکا فیزا بیر قولچاق وئریر و دئییرکی: «بو سنین ایتَن قولچاغین دیر»، آنجاق قیز هئچ اونون قولچاغینا بنزه‌مه‌ین بو قولچاغی گؤردویون‌ده تعجب‌له‌نیر. آنجاق کافکانین قولچاغا یاپیشدیردیغی کیچیک نوت قیزین تعجب‌لنمه‌سینی آرادان آپاریر؛ «سیاحتیم منی چوخ دَییشدی». ایللر سونرا قولچاغینی ایتیرن قیز بؤیویور و یئتیشکین بیر قادین اولور، گون‌لرین بیر گونو، او، قولچاغینین ایچینده گیزلی بیر کیچیک کاغاذ پارچاسی تاپیر. او کاغاذدا کافکا طرفیندن بو سؤزلر یازیلمیشدی: «گئج-تئز سئودییین هر شئیی ایتیره‌جک‌سن، آنجاق سئوگی سنه باشقا بیر شکیل‌ده قاییداجاق»‌. یازیچی: #جوردی_سییرا‌_ای_فابرا چئویرن: #ادبیات_ائوى @AdabiyatEvi

#اوشاق_ادبیاتی کافکا و قولچاغین ایتیرن قیز یازیچی: #جوردی_سییرا‌_ای_فابرا  چئویرن: #ادبیات_ائوى @AdabiyatEvi

#شئعیر سن آخی بیلمیرسن داریخماق نه تهر اولور شئعیر: #شهریار_دل_گرانی سس: #لمان_مرریح #ادبیات_ائوى @AdabiyatEvi

اینسان شعورلو فعالیتینده دائم خئیر و شر ایله قارشیلاشمالی اولموشدور. خئیر و شر آنلاییشی‌نین یارانماسی ایله ائرکن تصوّرلرده خئیری آلقیشلاماق، شری ایسه قارغیشلاماق آنلاییشی دا یارانمیشدیر. آرزولاماق، بَیَنمک آنلامیندا باشا دوشولن «آلقیش»ین عکسینده «قارغیش» و شَر وار. خئیری آلقیشلایان اینسان، شَری پیس‌لمک ایله قارغیش یاراتمیشدیر. خالق آراسیندا یاشاماقدا اولان آلقیش و قارغیش‌لار، اوچ دسته‌یه بؤلونور؛ ۱- مراسم‌لرله باغلی یارانان آلقیش و قارغیش‌لار ۲- معیشت ایله باغلی یارانان آلقیش و قارغیش‌لار ۳- میفولوژی و دینی تصوّرلرین تأثیری ایله یارانان آلقیش و قارغیش‌لار مراسم ایله باغلی یارانان آلقیش و قارغیش‌لار؛ بو آلقیش و قارغیش‌لار مراسم ریتوآل‌لاری (مختلف ژئست‌لرین، حرکت‌لرین، سؤزلرین و ستایش ائدیلن اوبیئکت‌لرین استفاده‌سی ایله کئچیریلن دینی و اجتماعی مراسم) ایله باغلی‌دیرلار و خالق آراسیندا گئنیش یاییلمیش‌لار. «بَی‌لیک حامامینا گئده‌سن» «توی شیرنینی یئییم» «گلین‌لیک چیراغینی/اوجاغینی یاندیریم» «آدین داش‌لارا یازیلسین» «آدینی آدلارا قویوم» «آغ بخت اولاسان» «چال-چاغیرین اولسون» «حلال سود اممیش بختینه چیخسین» «ایشیغین یانسین» «مبارک قدم اولاسان» «اووون قانلی (دادلی) اولسون» «اووون یاغلی اولسون» «اوغوللو- قیزلی اولاسان» «پایین چوخ اولسون» «توی- بایرامدا اولاسان» «آوازیییب اؤله‌سن» «آداما اوخشاماز جانینی قارا یئر آپارسین» «آنان وایینا اوتورسون» «باغلی بوخچان آچیلماسین» «بازارلیغین بوخچادا قالسین» «بارسیز- بهره‌سیز کؤچه‌سن» «باشیندان قارا اؤرتوک آچیلماسین» «بَزه‌یین پوزولسون» «بَلَک باغلاییب آچمایاسان» «بختین باغلانسین» «بیچیلی پالتارین اییْنه گؤرمه‌سین» «بیش-دوشون اوجاق اوسته قالسین» «جماعت اوستونه پول آتسین» «جئهیزین باغلی قالسین» «جلّاد الینه دوشه‌سن» «جنازه‌ن یئرده قالسین» «چَنَن باغلانسین» «دالینجاق قارا داش آتیلسین» «دیری-دیری قبره باسدیریلاسان» «دوواغین آچیلماسین» «ائوینده شادلیق سوفره‌سی آچیلماسین» «حالوان چالینسین» «خمیرین یوغرولسون» «خینالی ال‌لرین‌له باشینا قارا اؤرته‌سن» «کؤینه‌یین یاخاسیز بیچیلسین» و... معیشت ایله یارانان (عمومی) آلقیش و قارغیش‌لار؛ بو نوع آلقیش و قارغیشدا گئنیش یاییلمیشدیر و معیشت کاراکتئری ایله سئچیلیر؛ «ائوین آباد اولسون» «دوز-چؤرکلی اولاسان» «سوفرَن آچیق اولسون» «ائوین ییخیلسین» «اوجاغین سؤنسون» «یوردونا سوپورگه چکیلسین» «آبادلیغا چیخاسان» «آچیق اوره‌یینه قارا خال دوشمه‌سین» «بزک- دوزَکلی اولاسان» «برکه-بوشا دوشمه‌یه‌سن» «درمان- داواجات تانیمایاسان» «نئیلیم- نه‌ائدیم دئمه‌یه‌سن»، «اوجاغین کؤزَریسین» «وطن گؤزونده اوجالاسان» «بند-بند دوغراناسان» «بیردن ایکی‌یه خئیر گؤرمه‌یه‌سن» «بوغولوب اؤله‌سن» «بورجسوز گونون اولماسین» «بوغدا چؤره‌یینه حسرت قالاسان» «چای- چؤرک‌سیز قالاسان» «چارخین چئوریلسین» «چؤرک تاپیب، دیش تاپمایاسان» «دَیَر- دَیمَزین ساتیلسین» «دیری گؤزونله اؤلو بدنینه باخاسان» «باهار عؤمرونو خزان وورسون» «فله‌یین الینده یاخان قالسین» «گئدیشین اولسون، گلیشین اولماسین» «گئده-گوده الینده قالاسان» «گلیر- چیخارین بیلینمه‌سین» «هاوادا نَم چکن باشین یوخ اولسون» «حاصارین داغیلسین» «خیشین داشا دوشسون» «ایینه- درمانا محتاج اولاسان» «ایچمه‌یه سو تاپمایاسان» و... میفولوژی و دینی تصوّرلرین تأثیری ایله یارانان آلقیش و قارغیش‌لار؛ اینسان حایاتی درک ائتدیکجه آیری-آیری قوّه‌لری، اوبرازلاری اینانجا چئویره‌رک، بو اینانجلاردا آلقیش و قارغیش‌دا اؤز یئرینی تاپمیشدیر؛ «شردن اوزاق اولاسان» «بخت اولدوزون سایالی اولسون» «اوجاغین سؤنمز اولسون» «حضرت عابباس/ابلفض کؤمه‌یین اولسون» «اولدوزون آخیب گئدن اولسون» «قاپیندا بایقوش اولاسین» «ابلفض سنه غنیم اولسون» «دادینا خیدیر-الیاس یئتیشسین» «دیری‌لیک سویو ایچه‌سن» «روحون شاد اولسون» «ثوابا چاتاسان» «سو کیمی آیدینلیغا چیخاسان» «یئرین جنّت اولسون» «چاپارکن آغ-بوز آتین بودره‌مه‌سین» (دده قورقود آلقیشی) «آلله باشینی قویوب آیاغینا داش سالماسین» «آلله سنه قوتور وئرسین، دیرناق وئرمه‌سین» «جهنم اودونا یاناسان» «جین- شئیطان ییغناغینا دوشه‌سن» «چؤرک آتلی اولسون سن پیادا» «دیلینه آند-آمان گلمه‌سین» «دین‌سیز-ایمانسیز اؤله‌سن» «حکیمین عزراییل اولسون» «خئیر-دوعانی عزراییل وئرسین» «کلمه‌ی شهادت دیلینه گلمه‌سین» «کرم کیمی یاناسان» و... آلقیش و قارغیشلارین قایناغی: آذربایجان شفاهی خالق ادبیاتی (بو کیتاب نرگس خانیم ابراهیمی‌نین کؤچورمه‌سی و اوستاد اومود اوغلونون دوزه‌لیشی و تعلیقی ایله چاپا گؤنده‌ریلیب) یازیچی: #شاهین_مرادی #ادبیات_ائوى @AdabiyatEvi