𝑺𝒊𝒎𝒑𝒍𝒆 𝑪𝒐𝒓𝒏𝒆𝒓 || رُكن بسيط

💙💙

بعد أي مشكلة بينك وبين صاحبك أو قريبك، بلاش تقلّل منه، ولا تفضحه، ولا تحكي للناس اللي كان بينكم.. دي مش من الجدعنة ولا من الأخلاق.

«الحُرُّ مَن راعى وِدادَ لحظة».

«وَإِذَا خَاصَمَ فَجَر».

يعني الخلاف ما يدفعكش إنك تظلم، أو تفضح، أو تنكر كل خير شفته منه. الخصومة ممكن تبعّد المسافات، بس المروءة والأخلاق تمنعك إنك تهدّ كل حاجة حلوة اتبنت بينكم. الجدعنة الحقيقية إنك حتى وإنت زعلان، تفضل فاكر الود، وتحفظ السر، وتصون العِشرة.💙

— رُكن بسيط

🖤🖤

شريف: طب كده بدأت أفهم ليه ربنا ذكر البعوضة أصلًا. عبدالله: بالظبط، والمهم هنا إننا منستعجلش نحكم على حاجة في القرآن لمجرد إننا مش فاهمينها من أول مرة. ممكن أنت تشوف المثل بسيط، لكن ربنا سبحانه وتعالى يضرب به مثلًا لحكمة، والمؤمن يتعامل مع كلام ربنا بالتصديق والتدبر، مش بالاعتراض. شريف: يعني الآية نفسها بتعلمني إزاي أتعامل مع القرآن، مش بس بتشرحلي موضوع المثل؟ عبدالله: أيوه، ودي من أجمل الحاجات فيها. شريف: طب في الآخر، نستفاد إيه من الآية دي؟ عبدالله: نستفاد حاجات كتير. أول حاجة: منستقلش بحاجة ربنا ذكرها في القرآن لمجرد إنها صغيرة في عيننا، لأن العبرة بالحكمة والمعنى، مش بحجم الشيء. وكمان نتعلم إن عدم فهمنا لحكمة حاجة مش معناه إن مفيش حكمة. المؤمن لو قابل حاجة مش فاهمها، يصدق إن كلام ربنا حق، وبعدها يسأل ويدور ويتدبر. ونتعلم كمان إن نفس كلام ربنا ممكن يكون سبب هداية لإنسان، وإنسان تاني يعرض عنه ويزداد بعدًا، والفرق بيكون في موقف القلب من الحق. والأهم من ده كله، إننا لما نقرأ القرآن منبقاش هدفنا نحفظ الآيات وبس؛ نحاول نفهمها ونتدبرها ونسأل نفسنا: الآية دي بتعلمني إيه؟ وإيه اللي محتاج أغيّره في نفسي بسببها؟ شريف: يعني أنا كده كنت بحفظ الآية ولساني بيقولها، بس دلوقتي بقيت فاهمها. عبدالله: وده اللي كنا عايزين نوصل له من البداية.. إن الآية لما تفهمها، مش بس بتثبت في دماغك، ممكن كمان تثبت في قلبك. شريف: طب استنى بقى.. هسمّعهالك من أولها تاني. عبدالله: اتفضل يا شيفو. شريف: ﴿إِنَّ اللَّهَ لَا يَسْتَحْيِي أَنْ يَضْرِبَ مَثَلًا مَا بَعُوضَةً فَمَا فَوْقَهَا ۚ فَأَمَّا الَّذِينَ آمَنُوا فَيَعْلَمُونَ أَنَّهُ الْحَقُّ مِنْ رَبِّهِمْ ۖ وَأَمَّا الَّذِينَ كَفَرُوا فَيَقُولُونَ مَاذَا أَرَادَ اللَّهُ بِهَٰذَا مَثَلًا ۘ يُضِلُّ بِهِ كَثِيرًا وَيَهْدِي بِهِ كَثِيرًا ۚ وَمَا يُضِلُّ بِهِ إِلَّا الْفَاسِقِينَ﴾ عبدالله: أهو كده بقى.. حفظتها وأنت فاهمها....❣️

𝑾𝒓: 𝑬𝒃𝒓𝒂𝒉𝒊𝒎 𝑺𝒂𝒃𝒆𝒓

عبدالله: إيه يا شيفو، حفظت ورد النهارده؟ شريف: آه الحمدلله. عبدالله: طب يلا هسمعلك. شريف: يلا بينا. ويبدأ شريف يسمّع من سورة البقرة، لحد ما يوصل للآية رقم 26، وهنا يتوقف وينسى باقي الآية. عبدالله: عطّلت ليه؟ شريف: الآية دي دايمًا بنساها، مش عارف ليه. عبدالله: طب بص، أنا مقتنع إن لو فهمت الآية ومعانيها، هتثبت في راسك وفي قلبك أكتر من مجرد إنك تحفظ ألفاظها. شريف: أيوه، أنا حاسسها مش مفهومة بالنسبالي. عبدالله: طب تعالى نفهمها واحدة واحدة، وبعدها جرّب تسمّعها تاني. شريف: ماشي، يلا. عبدالله: ربنا بيبدأ الآية بقوله: ﴿إِنَّ اللَّهَ لَا يَسْتَحْيِي﴾... شريف: هنا مش فاهم.. ربنا مش بيستحي من إيه؟ عبدالله: بص، لازم نفهم الآية في سياقها الأول عشان المعنى يوضح. المقصود إن ربنا سبحانه وتعالى لا يمتنع ولا يترك إنه يضرب مثلًا استحياءً من ذكر حاجة صغيرة أو حقيرة في نظر الناس. يعني ربنا يضرب الأمثال بما يشاء، لأن المهم مش حجم الحاجة اللي اتضرب بيها المثل، المهم المعنى والحكمة اللي ربنا عايز يوصلهالنا من خلالها. عبدالله: وعشان كده ربنا قال بعدها: ﴿أَنْ يَضْرِبَ مَثَلًا مَا بَعُوضَةً فَمَا فَوْقَهَا﴾. شريف: طب إيه حكاية البعوضة بقى؟ وليه ربنا ذكرها أصلًا؟ عبدالله: قبل ما نكمل، فيه حاجة مهمة نخلي بالنا منها. ورد في سبب نزول الآية روايات إن بعض الناس استنكروا ضرب القرآن للأمثال بمخلوقات صغيرة، زي الذباب والعنكبوت، وقالوا: إيه المقصود من ذكر الحاجات دي؟ فجاء الرد من ربنا سبحانه وتعالى: ﴿إِنَّ اللَّهَ لَا يَسْتَحْيِي أَنْ يَضْرِبَ مَثَلًا مَا بَعُوضَةً فَمَا فَوْقَهَا﴾. يعني ربنا سبحانه وتعالى لا يمتنع من إنه يضرب المثل حتى بحاجة صغيرة جدًا، لأن المعتبر مش حجم الشيء، لكن الحكمة والمعنى اللي ربنا عايز يوصله من المثل. شريف: يعني الاعتراض كان على إن إزاي القرآن يذكر حاجة صغيرة كمثال؟ عبدالله: أيوه، وده اللي الآية بترد عليه.. إن ربنا يضرب الأمثال بما يشاء، صغيرها وكبيرها، طالما فيها بيان للحق وحكمة. وبالنسبة لقوله: ﴿فَمَا فَوْقَهَا﴾، ذكر المفسرون فيه أقوالًا، ومن أشهرها: ما هو أكبر من البعوضة، وده من الأقوال اللي رجّحها الطبري.

عبدالله: بعد ما ربنا ذكر المثل، بدأ يوضح لنا إن الناس مش كلهم بيستقبلوا كلام ربنا بنفس الطريقة. قال سبحانه: ﴿فَأَمَّا الَّذِينَ آمَنُوا فَيَعْلَمُونَ أَنَّهُ الْحَقُّ مِنْ رَبِّهِمْ﴾. يعني المؤمن لما يسمع كلام ربنا، حتى لو في حاجة مش فاهم حكمتها من أول مرة، بيبقى عارف إن كلام ربنا حق، وإن أكيد وراه حكمة، فيحاول يفهم ويتدبر ويسأل أهل العلم. شريف: يعني مش لازم أفهم الحكمة كلها عشان أصدق؟ عبدالله: بالظبط. عدم فهمك للحكمة مش معناه إن مفيش حكمة. المؤمن بيصدق إن ده كلام ربنا، وبعدها يحاول يفهم ويتدبر. شريف: طب والكافر؟ عبدالله: ربنا قال: ﴿وَأَمَّا الَّذِينَ كَفَرُوا فَيَقُولُونَ مَاذَا أَرَادَ اللَّهُ بِهَٰذَا مَثَلًا﴾. يعني بدل ما يتعامل مع المثل على إنه من كلام ربنا ويحاول يفهم الحكمة منه، يبدأ يعترض ويقول: إيه لازمة المثل ده؟ وربنا عايز يقول إيه من وراه؟ شريف: يعني نفس المثل، واحد يتقبله ويدور على حكمته، والتاني يعترض عليه؟ عبدالله: أيوه، ودي من أهم الحاجات في الآية. المشكلة مش دايمًا في اللي قدامك، أوقات المشكلة في طريقة استقبال قلبك للحق. وعشان كده ربنا قال: ﴿يُضِلُّ بِهِ كَثِيرًا وَيَهْدِي بِهِ كَثِيرًا﴾. يعني المثل ده يكون سبب في هداية ناس، وناس تانية بسبب إعراضها واعتراضها ما تنتفعش بيه، بل يكون سببًا في زيادة ضلالها. شريف: طب إزاي نفس المثل يهدي واحد ويضل واحد؟ عبدالله: لأن الناس مش كلها بتستقبل كلام ربنا بنفس القلب. اللي بيطلب الحق وبيصدق كلام ربنا، المثل بيكون سبب في هدايته وزيادة إيمانه. أما اللي بيقابل كلام ربنا بالإعراض والعناد، فالمثل بدل ما ينتفع بيه، يزداد بيه ضلالًا. وعشان كده ربنا ختم الآية بقوله: ﴿وَمَا يُضِلُّ بِهِ إِلَّا الْفَاسِقِينَ﴾. والفاسقين هم اللي خرجوا عن طاعة ربنا، فالآية بتبين إنهم هم اللي يكون المثل سببًا في ضلالهم بسبب موقفهم من الحق وإعراضهم عنه. شريف: طب العلماء والمفسرين قالوا إيه؟ عبدالله: بص، السعدي رحمه الله بيبيّن إن ضرب الأمثال من طرق القرآن في توضيح الحق، وإن الله سبحانه لا يمتنع من ضرب المثل ولو كان بشيء صغير، لأن المعتبر هو الحكمة والمعنى اللي في المثل. وكمان بيبيّن إن المؤمن لما يسمع مثلًا من القرآن، يعرف إنه حق من عند ربنا، فيقبله وينتفع بيه، حتى لو مش فاهم كل تفاصيل الحكمة منه من أول مرة. والطبري رحمه الله ذكر إن الله لا يمتنع من ضرب الأمثال، صغيرها وكبيرها، وبيّن اختلاف الناس في استقبالها، وذكر أن ﴿فَمَا فَوْقَهَا﴾ من معانيها ما هو أكبر من البعوضة.