وَجْد || مش أيمن المهدي

عارف انت الميم بتاع: يا بني ما كلنا كدا. يلا ربنا يشق على من شق على هذه الأمة. وزي ما دكتور أحمد خالد توفيق بيقول الشاب العربي لا يجد الحق الذي يجده قط في زقاق، بيت وزوجة. البيت والزوجة دول حلم بتسعى لهم عمرك كله، مش حق من حقوقك الطبيعية كإنسان، تخيّل القط لو عايز يتجوز هيفضل يزن على دماغك لغاية ما تجوزه في نفس اليوم، إنما انت كإنسان هتعيش بالـ ١٥ والـ ٢٠ سنة مستني تجمّع فلوس علشان تتجوز سنة وتطلق علشان دا الغالب.

مجرد الكتابة وغموض الشخصية بيكون شيء أفضل، علشان القارئ ميحكمش على شكل ولا سن الكاتب، وتبقى المعلومة خالصة، وأظن أكتر ناس بتابعهم وبشوف كلامهم عميق اللي معرفش شخصياتهم تماما زي الأثير والشيخ بدر. لسه كان صديق معايا الوقتي بيقول لي نبّه إن قناتك مساحة شخصية، لأني بلاحظ إن الناس داخلة خارجة والموجودين مش شبه بعض. لكن دا راجع إن القناة نفسها محتواها سمك لبن تمر هندي، وفي النهاية هي فعلا مساحة شخصية، هي مدونتي، والفيس بوك بالنسبة لي، وانستجرام، وتيك توك، ويومياتي، وكل حاجة، مساحة قريبة لدرجة إن أحيانا بعض محتواها لو حد اتكلم معايا فيه بحس بحَرَج، اللي هو دي حاجة أنا رميتها وخلاص متقفش معاها كتير. علشان كدا بتلاقي الناس داخلة خارجة، واحد جه على منشور ديني، وواحد جه على منشور فكري، وآخر لمنشور متعلق بالزواج، ورابع جه علشان ميم ضحّكه، وخامس جه علشان مشاركة، ولما يلاقوا القناة ملهاش سلك منتظم شبه اللي تصوره يقوم ماشي، أو يقول انت بتعمل دا ليه! يعني مثلا فترة منشورات الزواج أكتر فترة كان فيها ازدهار، بس أنا بنتبه دائما إني مكتبش اللي يجيب ريتش، بل أكتب ما أؤمن به، وههزر بطريقتي حتى لو مش عاجب بدل مفيش محظور شرعي، وبتعمد دا رغم إنه عكس شخصيتي علشان مكونش أسير الناس. مع إن دا مضر بالنسبة لي جدا، يعني مثلا كان المشتهر عن طلاب هندسة إنهم بيشيلوا المسطرة حرف T ويمشوا بها قدام كلية آداب، أنا كنت ساكن جنب كلية آداب، فكنت بكره اليوم اللي عندي رسم فيه، علشان هشيل مسطرة حرف T وهعدي من قدام كلية آداب، وكنت بحس بالعار وأنا معدّي قدام الكلية، مع إن عكسي بيعمل دا متعمدا على سبيل الفخر، وكان أسعد يوم في حياتي لما عديت أول سنة وعرفت إني خلاص مش هشيل المسطرة دي تاني. وعلى نفس دا من الأمثلة كان ممنوع أروح الجيش بدون لبس الجيش، فكنت ملتزم بدا جدا، لغاية ما طفل فضل يجري ورايا ويقولي يا عمو انت ضابط؟ من بعدها بقيت بخالف الأوامر وألبس لبس الجيش عند المكان، مع إن فكرة المخالفة دي عمرها ما خطرت لي على بال، وفي شركة عسكرية في كل مكان لو عرفوا إني مجند وماشي بلبس مدني هتعاقب، لكن تعليق طفل طلّع الفكرة في دماغي. وأي حد تاني ممكن يشوف دا موقف لذيذ وعمو انت ضابط، لكن أنا بكره أي حاجة فيها شيء أشبه بلبس الشهرة كدا حتى لو إيجابي، لذلك أنا شخص تقليدي ونمطي جدا عن عمد، أكتر تسريحة شعر تقليدية في العالم هعملها، حلاقة زي حلقة الموليت دي أكتر اثبات بالنسبة لي على لباس الشهرة مثلا، اللي بيعملها مما أعرفهم على الأقل بيعملها علشان معندوش شخصية دي رقم واحد، وعلشان يكون أشبه بمجموعة معينة من السرسجية، وهتلاقي طريقتهم في التصوير شبه بعضها، في ماكينة بتطلع الناس غالبا، إيه الموضة ونمشي وراها، أنا إمَعة وطالب لأنظار الناس في وقت واحد، سواء بالمدح أو اللعنات كالذي بال في بئر زمزم. كل التمهيد دا؟ علشان أقول أوضّح إن الأريح بالنسبة لي إني مهزرش، وإني منزلش صور، ولا فيديوهات، ولا أي حاجة، وألتزم سياق واحد يزداد عليه نوع معين من المتابعين، بدل ما الناس داخلة خارجة، بس لا مش هعمل كدا مع سبق الإصرار والترصد. اشمعنا بقول دا مع رسالتك؟ علشان رسالتك دي هتأكد بعض الظنون، مع إني ممكن مكنتش أنشرها عادي 😅 وممكن أنا اللي أكون باعت الرسالة دي لنفسي مثلا؟! افتراضية قوية جدا على فكرة

حُسْنُ البيانِ يُرِي الظَّلماء كالنُّورِ ابن الرومي

خُلِقَ النّاسُ للبَقَاء فضَلّت أمةٌ يحسبونهم للنفاد إنما يُنقلون من دار أعمال إلى دار شِقوةٍ أو رشادِ أبو العلاء المعري

المجد للمصاعد، والذلة والهوان والصغار للسلالم. خاصة لو ساكن في التامن.

اليوم السادس والثلاثون بدون فيديوهات قصيرة سيأتي اليوم الذي تسند فيه ظهرك إلى الجدار متعبا، تترك مثاليتك الخاوية التي كنت تتظاهر بها أمام الناس، وتستلم أخيرا لظنونهم وطعنهم، لن تقاوم، لن تعيد تعريف نفسك، لن تُحمّل نفسك ما لا تحتمل لأجلهم، فقط ستستسلم وتترك نفسك لله، إن كان يعلم هو ما في قلبي، فلا يهمني الظنون، لا يهمني التظاهر حتى لو بحقيقتي، من أراد أن يعلم فليعلم، ومن أراد أن يظن فليظن، وهكذا كل نفس متعبة يظهر جمالها الحقيقي في تعبها، وكل مثالي كمالي حتما سيتعب في يوم ما، ويأتي له من يحبه على تعبه لا على كماله، ويقول أحبك أنت كما أنت، لا كما تحاول أن تبدو جاهدا.

فرضية أن العرب لم يكونوا يعرفون الأسباب الكونية للظواهر التي أخبرهم القرآن بما وراءها من أمور غيبية هي فرضية عبثية؛ فقد كان القرآن يخبرهم أن كثيرًا من الأشياء التي يرونها ويعرفون أسبابها الكونية المباشرة أن لها جانبا غيبيا، وتقف وراءها أيضًا إرادة الله وتقديره. كما أخبرهم أيضا بأمور غيبية تتعلق بظواهر لم تكن أسبابها المادية المباشرة معروفة لهم آنذاك، ثم تكشّف لنا بعد ذلك جانب من هذه الأسباب. فمعرفة السبب الدنيوي لا تعني إلغاء الأمر الغيبي الكامن وراءها، ولا يصح أن يُشبَّه هذا بما يسمّيه بعضهم «إله الفجوات»؛ لأن القرآن لم يقتصر على تفسير ما يجهله الناس بالغيب، ثم يصمت عما يعرفون أسبابه، بل نسب إلى الله ما يعرفون أسبابه وما يجهلونه معًا. ولو كانت المسألة مجرد ملء لفراغات المجهول، لما كانت هناك حاجة إلى تذكيرهم بالله وبالغيبيات عند الحديث عن ظواهر يعرفون أسبابها المباشرة بالفعل. وهذا يشبه أن تقول لشخص: إن الله هو الذي خلقك، فيجيبك: بل أبي وأمي هما من أنجباني! وكأن إنجاب الأب والأم ينفي خلق الله، مع أن الأمرين لا يتعارضان؛ فالأب والأم سبب مباشر، أما الله فهو خالق الإنسان وخالق أسبابه والقوانين التي تجري بها هذه الأسباب. وعمومًا، فهذا الخلط بين السبب المباشر والفاعل الأعلى ليس جديدًا. يَا أَيُّهَا النَّاسُ ضُرِبَ مَثَلٌ فَاسْتَمِعُوا لَهُ ۚ إِنَّ الَّذِينَ تَدْعُونَ مِن دُونِ اللَّهِ لَن يَخْلُقُوا ذُبَابًا وَلَوِ اجْتَمَعُوا لَهُ ۖ وَإِن يَسْلُبْهُمُ الذُّبَابُ شَيْئًا لَّا يَسْتَنقِذُوهُ مِنْهُ ۚ ضَعُفَ الطَّالِبُ وَالْمَطْلُوبُ (73) مَا قَدَرُوا اللَّهَ حَقَّ قَدْرِهِ ۗ إِنَّ اللَّهَ لَقَوِيٌّ عَزِيزٌ (74)

يا إما عضو جديد في القناة، يا إما حد معانا ومبيقرأش، الأولى عادي، التانية تزعّل أوي. صديقي لما دخل السكن سألني نفس السؤال والمفروض إنه بيقرأ كل حاجة بكتبها، فقلت له ازاي تسأل سؤال زي دا! لأنه بالفعل سؤال كاشف جدا. عموما المنشور بعنوان الخديعة، لكن علشان أنا رجل طيب هقول لك الخلاصة، الرجل بتاع السوبر ماركت اداني بنبوني علشان كان لسه لي باقي، بدل ما يديني فكّه، فقلت أكيد بيحبني، فاحتفظت بالبنبوني لأنها ذكرى الحب ومشلتهاش من وقتها.

من الأشياء المزعجة جدا أن صديقا يقابلك ثم يشكو لك همه، أو يرسل لك على الواتسآب في البداية مرحبا ثم يبدأك ببث شكواه، يا سيدي أرسل على Tellonym حتى الناس تقول ما شاء الله يبدو أنه طيب القلب، انظر كيف يواسي الناس، أما ماذا أفعل في محادثتك؟ هل أشاركها كلها هنا على هيئة سكرين شوت؟ ستبدو مزعجة بعض الشيء للناس، ثم ستأتي لي في الخاص وتقولي أنت تفضحني، يا سيدي ما أردت فضحك ولكن أردت مدحي، فأنت جيت في الرجلين، فهل هذه مشكلتي؟ أحيانا عندما يجالسني صديق ويقول لقد أتيتك وأنا حزين وأذهب عنك الآن وأنا مسرور أشعر بالندم الشديد، ليتني سجّلت هذه الجلسة ونشرتها، هذا الجانب الذي لن يعرفه الناس عنّي، مخاسر تذهب بعيدا ووقت ضائع، لماذا أيها الوغد لم تُرسل على Tellonym من البداية، أم لأنك صديقي تستغل صداقتنا. وعندما يضيق صدري فلا أرد على عليه، فيذهب إلى Tellonym يراسلني فأواسيه بمقالة، يقول لي: لعلمك أنا المرسل! ونفس الشكوى بثثتها لك هنا في الخاص فلم تجبني! فما الفرق؟! إنه الـ Show يا عزيزي؟! حتى وإن واسيتك، حتى وإن قلت لك الكثير والكثير، هل سيراه الناس؟ هل سأجد جدوى من هذه المواساة؟ أما نشرها للجميع فيه فائدة متعدية، لأني أشك في ذكاءك. لن أخبركم طبعا عن أصدقائي الذين يقولون عندما نراك ونحن حزانى يزداد حزننا، ولن أخبركم عن من يشكوني، لن أخبركم أبدا شيئا من هذا لأن هذا يدمّر صورتي التي أبنيها، كل ما أريده من أصدقائي الأعزاء كفّوا عن الشكوى إلا في Tellonym

اليوم الخامس والثلاثون بدون فيديوهات قصيرة شفت لما بطلت ريلز وشّك نوّر ازاي 😅

هيه، الأولاد كبرونا، مشمش بقى طولي، اتجوزا بدري يا شباب، اتجوزوا بدري علشان تبقوا قريبين من سن أولادكم فاهمينهم، تعرفوا تتواصلوا معاهم، يكون لسه فيكم صحة تلعبوا معاهم، بجد الجواز بدري بيفرق جدا.

متجوز ومخلف عندي مشمش وسكرة. مشمش 9 سنين، وسكرة في حدود 4 شهور كدا. بس ممكن أتجوز تاني عادي الفلوس كتير، والعيال مصاريفهم في الشهر مبتعديش ألف جنيه، والعيل بيجي برزقه. أي حد يخوفكم من الجواز والخلفة علشان المصاريف والحاجات دي متصدقهوش. بالنسبة لمصاريف المدارس المفروض مشمش يكون في رابعة ابتدائي علشان عنده 9 سنين وكدا، بس أنا بصراحة بتبع موضوع التعليم المنزلي دا كويس جدا، وكمان موفّر، ومبجبش له مدرسين في البيت، بشرح له أنا كل حاجة.

مسمعتش من الدورة غير محاضرتين تلاته. والجروب برضه دخلته مرة مرتين بإرادتي، وبعد كدا مدخلتوش تاني إلا كام مرة حَرجَا من بعض الأصدقاء لما بيبعت لي لينك منه. وأنا في البداية مكنتش عايز أدخل الزواجي، مع إني معنديش مشكلة إن الشخص يتعلم في هذه الأبواب كما قلت من قبل. لكن علشان أكتر من صديق كانوا داخلين البرنامج وأكتر من حد قال لي ادخل هتخسر إيه يعني دخلت، وكان قرار غير صحيح في الوقت الحالي على الأقل. وأظن لو كنت دخلت دورة الشيخ عمرو بسيوني بتاعت المدخل إلى العلوم الإسلامية كنت هبقى أسعد، مع إني سمعت وقرأت أكتر من حاجة في مداخل العلوم، لكن أظن من كتابات الشيخ عمرو الموضوع هيبقى عرضه مختلف وفيه جديد ليس في الدورات الأخرى. لكن على كل حال الواحد بعد كدا يتبّع قلبه، ميتبعش الترشيحات. وفي صديق سألني ترشّح الدورة ولا لأ، قلت له اسأل شلبي هو اللي تابع وسمع، أنا لا تابعت ولا سمعت، اتقفلت تقريبا من أول يوم ❤️ يمكن الحاجة الوحيدة المفيدة اللي خرجت بها، الكام منشور اللي كتبتهم وقتها من اللي شوفته، والحمد لله إني خرجت من قوقعة الكتابة عن الزواج والمرأة لأني كنت خايف تستمر وتبقى منحى القناة.

4 - لو توقفت عند جزء معيّن من المقال وخرجت، فإنه سيزامنه على حسابك، وعند فتح المقال مرة أخرى يعود من مكان ما توقفت.

صديقي القارئ إليك بعض التحديثات المحسّنة لتجربة القراءة التي هي لُب الأمر: 1- شريط على اليسار يصحبك أثناء القراءة وفيه: أ- تكبير الخط وتصغيره. ب- توسعة المسافة بين السطور أو تقليلها. ج- وضع القراءة المريح والذي يُبعد أي شيء من الشاشة سوى المقال. 2- شريط بالأعلى يظل يزداد مع مرورك في المقالة، وينتهي بانتهاء المقالة، بحيث يشير لنسبة تقدّمك بالمقالة. 3- تسجيل القراءة في سجل قراءتك بمجرد الانتهاء، أو اختيارك بأنك أنهيتها من الأسفل، وإن لم تختر فستسجل تلقائيا. قراءة ممتعة ❤️ https://www.wajd.blog/

بقول يوتيوب ضارب إيه علشان يجيب الاقتراح اللي فوق على الشمال دا، خاصة إنه أكتر موقع دقيق في الاقتراح. طلع في الآخر بلال فضل😁