الخَريــــطــة || Daamii's map ✨

هذا الدكتور اسمو بن سواڤ 😔.

هذا مكان 🩵🌠.

الفقرة الثالثة والأخيرة لي تخص الريزيدنا بحكم أنو ضيف الحلقة تاعنا اجتاز هذ الامتحان وخلص أول سنة ليه من بعدها: __ •السؤال الأول: كيفاه الواحد لازم يحضر للريزيدانا؟ وهل تنصح واحد حاب يكون جينيراليست برك بأنو يعڤبها؟ وهل كاين فرق بين طريقة التحضير ليها إذا كان الطالب يحوس على تخصص طبي ولا جراحي ولا بيولوجي؟ ←الإجابة تاعو بخصوص الجينيراليست هي أنو حتى لو ما كانش حاب يكمل يقرا من بعد الريزيدانا بصح عالأقل كي يكون حاط فراسو بلي رايح يعڤبها رايح يعاود يراجع وش قرا طيلة السبع سنوات كامل وهذ الشي يعاونو باه يسترجع المعلومات ويخليه يكون طبيب كُفء فالمستقبل خير من واحد ما راح يراجع والو.. ومن يدري ممكن حتى يبدل قناعاتو ويڤول نتخصص أحسن تسما كي يلڤا روحو ديجا عڤب الاختبار تاع الريزيدانا رايح يكون قطع شوط كبييير بزاف وما يحتاجش أنو يعاود يقرا من دارا وجديد ويزيد يعڤبها مرة أخرى. أما بخصوص الفرق بين طريقة التحضير بالنسبة لواحد حاب تخصص جراحي ولا طبي ولا بيولوجي ڤال بلي مكانش فرق حرفيا وإنما الواحد لازم يسيي قدر المستطاع يدي معدل عالي باه يكون عندو الفرص بزاف يطيرلو التخصص لي راه حابو سواء جراحي طبي ولا بيولوجي. ولازم التحضير ليها بطبيعة الحال يكون من السنة السابعة فقط بسك كاين بزاف ناس يحضرولها من السنة الخامسة ومام السنة السادسة وهذ الشي يخليهم يهملو العام الدراسي لي كانو يقراو فيه. السؤال الثاني والأخير: كيفاه الواحد يخير التخصص تاعو بعد الريزيدانا؟ هل لازم يتبع ميولاتو الشخصية ولا وش يحتاج المجتمع تاعو فالبلاصة لي يسكن فيها ولا يشوف أكثر واحد ساهل يروح ليه وخلاص؟ ←ڤاللنا لازم يتبعهم كامل مع بعض يعني يشوف ميولاتو ويشوف فنفس الوقت أسك هذ التخصص يقدر يمد فيه ولا نو كيما هو عطانا مثال على نفسو بلي كان حاب يدير تخصص وحدوخر بصح بسبب مرض عندو محبش يديرو مالڤري يحبو وباينة لازم يشوف البلاصة لي راه ساكن فيها وش من تخصص يحتاجوه باه يكون خدام.

الفقرة الثاني تاع الجانب التطبيقي: __ •السؤال الأول: وش هي أهم حاجة لي لازم نتعلموها فالسطاج تاع Les soins ونحتاجوها لبقية السنوات فالمشوار؟ ←الإجابة تاعو كانت أنو لازم نتعلمو كلش ونركزو عليهم كامل وإن كان هذا كامل خدمة تاع les infirmiers بصح لازم نتعلموها سيرتو خياطة الجراح وليسيتير. •السؤال الثاني: وش هي الاستراتيجية لي لازم نطبقوها باه نخرجو بأكبر قدر ممكن من المعلومات فالسطاج في جميع السنوات مام حتى السنة السابعة؟ ←ڤاللنا أنو لازم الواحد يتعلم يزدم ديراكت ويسقسي ويشوف ويجرب، حتى لو كان السارفيس لي يسطاجي فيه فارغ لازم يسيي يتعلم وحدو ميش حتان يستنى الطبيب ولا الفرملي ينعتلو. وڤاللنا مكانش منها هذيك الهدرة تاع أنو الطبيب ولا الفرملي بحد ذاتو ميحبش كي تكثر عليه الأسئلة وإنما بالعكس كاين لي ينعتو ويعاونو فالسطاج أما الباقي فهي حالات شاذة والشاذ لا يُقاس عليه. •السؤال الثالث: أسكو Les formations لي يتندارو الخارج الكلية يغنيو عن السطاج كامل ويعوضوه سيرتو فالحالة تاع أنو البرومو تاعنا كبيرة بزاف وصعيبة باه الواحد طيرلو الدالة أنو يسطاجي؟ ←ڤاللنا بلي الدورات هذو يدعمو السطاج ميش يعوضوه، بمعنى أنو السطاج هو الصح ولا غِنَى عنه بالدرجة الأولى من بعد لي حاب يتوسع كثر يروح يحضر هذ الدورات باه يدعم السطاج تاعو. وڤاللنا بلي أفضل طريقة باه الواحد يقدر يسطاجي حتى في ظل الضغط الكبير تاع برومونا هو أنو يزيد السطاج volontaire فالفترات لي ميكونش كاين فيهم الغاشي مثلا.

الفقرة اللولة كانت عبارة عن الأسئلة لي تخص الجانب النظري: __ •السؤال الأول: عرفنا أكثر شكون هو مزعاش سيف الإسلام؟ ←طالب طب فالسنة الأولى تخصص أمراض المفاصل والروماتيزم اجتاز اختبار الريزيدانا صانع محتوى تعليمي على قناة اليوتيوب. •السؤال الثاني: كيفاه كانت الصعوبات لي واجهاتك في مسيرتك الدراسية خصوصا فالسنوات الأولى من حيث التأقلم؟ ←ڤاللنا بلي السنة الأولى كانت صعيبة بالنسبة ليه بزاف كيما هو متوقع، وهدر على الدروزياماني ثاني بلي كانت نوعا ما صعيبة خطركش تبدل السيستام تاع القراية فوڤ ما أنو البرومو تاعو كاملة كانت هي أول برومو لي تعامل لأول مرة مع السيستام الجديد (بكري كانت القراية فالميد تبع سيستام مختلف مقارنة بالسيستام لي رانا نقراو بيه ضكا) وهذا الشي لي خلى ليبروف والإدارة ميعرفوش ينظمو الحالة معاهم من أول مرة وبالتالي كانت كاينة صعوبات بزاف حتان والفو من بعد. •السؤال الرابع: كيفاه كانت السنة الثالثة بالنسبة ليك ووش هي نصيحتك لأي واحد مقبل ليها؟ ←الإجابة تاعو كانت بأنو أهم حاجة لازم نديوها بعين الإعتبار فالطروازياماني هي تنظيم الوقت بالدرجة الأولى.. بسك رايحين نقراو إينيتي وموديل مع بعض en parallèle ونعڤبو الكونطرول تاعهم في وقت متقارب.. يعني الواحد لازم يعرف كيفاه يمد الأولويات. •السؤال الخامس: بعد سبع سنوات وعام بعد الريزيدانا وش هي طريقة الدراسة تاعك لي خلاتك جيب نتائج مرضية؟ ← طريقة الدراسة تاعو كانت عبارة عن أنو يدير الكوش اللولة فيها جميع المعلومات يركز على جميع ليديطاي فيها ويديشيفري الكور سوا بنفسو ولا بشات جي بي تي، مباعد يبدا يحفظ الكور تاعو بحيث أنو الكور رايح يكون أكيد مقسم إلى أجزاء.. يحفظ الجزء اللول من بعد يحفظ الجزء لي بعدو، مباعد ينتقل للجزء الثاني يزيد يحفظو وكي يخلص منو يروح يعاود يولي للجزء اللول يزيد يحفظو ويحفظ معاه الجزء الثاني مباعد يروح للجزء الثالث يويد يحفظو ويعاود يحفظ معاه جزء اللول والثاني وهي رايحة حتان اللخر يعاود يحفظ الكور كامل بجميع أجزائه ضربة وحدة.. هذا كامل يديرو في كوش وحدة مباعد يروح لليكسيام يعاود يحلهم ويشوف طريقة الأسئلة وأكثر العناصر لي يركزو عليهم ليبروف فليكونطرول.. مباعد الكوش الثانية والأخيرة يديرها قبل ربع يام ولا خمسة من الكونطرول يعني فالسومان بلوكي يعاود يقرا ليكور تاوعو بعينيه باه يڤعد شافي. هذي هي. •السؤال السادس: كيفاه قدر الدكتور مزعاش يوفق بين الدراسة وصناعة المحتوى؟ ← ڤاللنا بلي هو كان فالأغلب يسجل هذوك الفيديوهات فالصيف يعني بعدما يخلص القراية يعاود يراجع وش قرا عن طريق أنو يدير فيديوهات يشرح فيهم، وساعات كان يديرهم وقت القراية بالضبط يعني يقرا كور وباه يقدر يثبتو يروح يسجل عليه فيديو وهو يشرح فيه ويحطو للفائدة على منصة اليوتيوب. وڤال على حساب وش فهمت بلي صناعة المحتوى بالنسبة ليه كلي هواية تسما حتى في أوقات الفراغ تاعو لي نورمالمو يستراح فيهم من القراية يروح يستغلهم باه يشرح لغيرو ويزيد يثبت المعلومات لنفسو أكثر. •السؤال السابع: وش هي أكثر خرافة شائعة فالطب تقدر تصححهالنا؟ ← ڤاللنا الخرافات ساعات يقدر يكون فيهم جانب مليح أنو يخليو الإنسان يسعى باه يصححهم ويخدم على أنو يبدل وجهة نظر المجتمع ليهم وبالتالي تزيد الإنتاجية تاعو.. ڤاللنا بلي مكانش خرافة معينة يقدر يهدر عليها بالمعنى الحرفي وإنما الواحد لازم وين ما يسمع بكاش حاجة غالطة كيما الحكاية تاع واحد كي تكون عندو نوبات الصرع يروحو يديرولو مفتاح فيدو.. هنا الطبيب ولا أي شخص فالمجال الطبي لازم يصحح هذ الخرافة ويسيي يوعي الناس بلي مكانش منها. •السؤال السابع: كيفاه يڤعد الشخص بعد عام دراسي كامل شافي على المعلومات لي قراهم؟ وهل طبيعي أنو الشخص يكون ناسي أغلب المعلومات كي يخلص العام؟ ←ڤاللنا حاجة طبيعية جدا أنو الواحد ينسى بسك البروڤرام شارجي بزاف وكاين حوايج مفصلين ولي يتنساو أصلا مع مرور الوقت، بصح الواحد لازم عالأقل يڤعد شافي على الفكرة العامة تاع الكور لأنو إذا زاد توسع فيه مستقبلا في السنوات القادمة رايح يلڤا روحو واجد باه يقراه وما تتخلطش عليه. •السؤال الثامن: لو يرجع بيك الزمن للوراء هل رايح تمد لنفسك فرصة باه تتعلم مهارات جديدة؟ ووش هوما هذ المهارات؟ ← جاوبنا بأنو الدفعة تاعو قرات في وقت الكورونا وهذ الشي لي أثر سلبا على الجانب التطبيقي والسطاج بسبب الحجر الصحي، أيا ڤاللنا كون نقدر ندير سطاج volontaire باه نعوض بيه هذوك السنوات لي ما سطاجيناش فيهم ولي كان الآداء تاعنا فيهم ناقص بزاف بسبة الحجر. هذي الفقرة اللولة راني كتبتلكم فيها وش ڤال كامل بالتفصيل ضك نزيدلكم الفقرة تاع الجانب التطبيقي والأجوبة تاوعو بخصوص الريزادانا 🩵.

• سألني أحدهم عن علاج الخمول وعدم الرغبة في العمل والدراسة رغم معرفته اليقينة بمصلحته وما عليه فعله، وطلب مني ما يمكنني نصحه به، فأردت الإيجاز والاختصار عليه حتى لا يتشتت، وأحببت نقل ما نصحته به عسى أن يكون رحمة من ربي للمسلمين: 📌 المكابدة الآن بطيب نفس أهون من الحرمان لاحقاً التعب كدا كدا موجود والمشقة حاصلة شئنا أم أبينا! تعبك ومكابدتك وسعيك وصبرك لتحقيق ما تريده في النهاية أفضل من الراحة والكسل والتأخر والتسويف الآن ثم الحرمان من الفرص وضياع الأرزاق، ثم تجد نفسك مجبراً بعدها على بذل ضِعف الجهد والوقت لاستدراك ما فاتك "رغماً عنك" وحتماً ستفعل ذلك لأنه لن يكون لديك خياراً آخر، فاختر لنفسك المكابدة والصبر عليها "حالياً" أفضل من بذل ضِعف الجهد والتعب "لاحقاً"، وأنت رهين سعيك في النهاية! »» نافع | Nafe3

هكذا خير وخير 🩵.

هكذاك وحاسة كاينة حاجة غالطة فالجديد بصح معلاباليش وش هي.

تخلصنا من هذاك الـlogo الڤديم لي يعمي 😍💔.

تخلصنا من هذ الـlogo الڤديم لي يعمي 😍🌠.

ضك نسيي نحطلكم ملخص عليها ويكون فيه وش راني شافية كامل بإذن الله.

عندكم وحد الزهر يطرطڤ الحجر أجمل حصة فـMedTalk راحت عليكم بسك صرات غلطة ومقدرناش نسجلوها 😍💔.

هياا نكملو نحكييو على سطاج لي ما قرا بارت 01 يروح يقراه 👀 حكينا فلبارت 01 على الناس لي مهيش متعلمة والو يعني أول مرة سطاج ليها ضكا نحكيو على

الفئة لي ديجا دارت سطاج

فبروميار وتعلمتو les soins وضكا تحوسو تسطاجيو فلي سارفيس ولا مؤسسات أكبر هنا جماعة مليحة بزاف أنكم تعلمتو فلبروميار 🫶 ضك كي تدخلو رايحيين تعرفو وش ديرو لي حابين يسطاجيو فلي سارفيس هنا يسطاجيو فسارفيس لي حابينو هوما وكاين لي يروحو لدي سارفيس بصراحة منشوفش فيها فايدة لأنو مزلتو مقريتوهمش كيما chirurgie و هد الأمور لي سارفيس لي ننصحكم بيهم هوما لي قريتوهم فعامكم مثلا gastro / cardio .. هنا مطالب منكم انكم تشوفو وفقط ومتتلاحو لوالو طبعا سقسيو و هزو معاكم كناشة كي العادة وكيما قلت مفضل عندكم تكون كاينة كنكس اي cas ابعثوها لشات جبت يشرحهالكم وسجلوها فنوت تاعكم هكا ممكن فطروازيام تقراو عليها وتفهموها كثر لأنكم شفتو هديك الحالة من قبل سقسيو ليزانتارن و ليزيكستارن أيضا ✅ هنا لازم تتعلمو تلاحظو المالاد وكفه يهدر معاه الطبيب كيفاه يتعامل معاه وأيضا عقلية لي مالاد تاعنا ( جايين سبيسيال😂 ) رايحيين تبداو تتعلمو تتحكمو فالأعصاب تاعكم والعمل تحت الضغط و رايح منا وطالع تشوفو بزاف حالات لازم من كل حالة عالأقل تخرجو منها فائدة ليكم ✅ بالنسبة أيضا بزاف سقساوني وين نديو الورقة وكذا كيما قتلكم جماعة تروحو لل chef de service تديو فوطوكوبي تاع لاكارت ناسيونال en cas دومونداوها وتديو كارت ايتيديو 🤍 نتوما تحددو المدة فالورقة هديك تاع سطاج جينيرالمو تاع دوزيام عندكم 21 jr يعني ثلث سمانات +منحسبوش الجمعة والسبت لخاطر متسطاجيوش فيهم بالنسبة للتوقيت كيما قتلكم كاين مستشفيات عندهم ضغط بزاف يديرو ايكيب صبح وايكيب لعشية وكاين لي من 8 ل 4 كيما les epsp دورو بين ليسارفيس عادي روحو للراديو روحو للابو ليزيرجونس سقسيوو كلشي متخافوش برك كون تخافو متتعلمو والو🫶 أي أسئلةة ولا ابعثو فكمنتس 😍❤️ وهكا نكونو كملنا ولي مقراااش part 01 يروح يقرااه😡

بما أنها العطلة خليوني نرشحلكم زوج كتب تقدرو تقراو كل واحد فيهم من أول جلسة وتخلصوهم ومستحيل بعدما ما تقراوهم ما تستفادوش من واش فيهم ✨🩵. الكتاب الأول لي هو "الروح والجسد" للكاتب مصطفى محمود يتدبر فيه معاني القرآن على ضوء الأسئلة الوجودية خصوصا المسألة تاع كون الإنسان هو روح أم جسد.. سيرتو الفصل الأخير فيه لي يتحدث عن الحياة لي كنا عايشين فيها قبل الولادة من خلال القرآن. https://foulabook.com/ar/book/%D8%AA%D8%AD%D9%85%D9%8A%D9%84-%D9%83%D8%AA%D8%A7%D8%A8-%D8%A7%D9%84%D8%B1%D9%88%D8%AD-%D9%88%D8%A7%D9%84%D8%AC%D8%B3%D8%AF-pdf الكتاب الثاني هو كتاب "رحلتي من الشك إلى الإيمان" لنفس الكاتب ولي هو مصطفى محمود يحكي فيه على كيفاه أسلم من بعد ما كان ملحد وكان يدعم الإلحاد فالمؤلفات تاوعو. https://foulabook.com/ar/book/%D8%AA%D8%AD%D9%85%D9%8A%D9%84-%D8%B1%D8%AD%D9%84%D8%AA%D9%8A-%D9%85%D9%86-%D8%A7%D9%84%D8%B4%D9%83-%D8%A5%D9%84%D9%89-%D8%A7%D9%84%D8%A5%D9%8A%D9%85%D8%A7%D9%86-pdf

من بين أكبر الأسباب في نظري لي تخلي أي واحد يقرا ويتعب بزاف وعلاخر ميطلعش مليح ولا ميديش مليح.. حتى لو كانت طريقة الدراسة تاعو صحيحة وما فيهاش غلطات هي الستراس تاع النتيجة. يعني تكون تقرا وتراجع ونتا فنفس الوقت راك تخمم على نهار الكونطرول بلي لازم تخدم فيه وتدي فيه العلامة الفلانية وتضغط على نفسك بالتخمام بدل من أنك تخلي ذهنك صافي وتركيزك موجه غير للحظة لي راك تقرا فيها وبلي لازم تهز أكبر قدر ممكن من المعلومات وفقط.. بلا ما تخمم فالنتيجة وتعطيها جهدك وتخمامك. يعني تقرا باه تقرا، ميش تقرا باه تدي العلامة الفلانية. لأنو التخمام فالنتيجة رايح يخليك تركز على نهار الكونطرول ومتركزش على اللحظة لي راك تقرا فيها وبالتالي متقدرش تكون مركز مع قرايتك 100% وهذ الشي لي يخليك تحس روحك مشتت وفي كل مرة تقرا تحس روحك ناسي كلش حتى وتعاود تروكوشي من دارا جديد وتجرب ألف من طريقة لأنو ذهنك بطبيعة الحال رايح يكون مركز على زوج حوايج مع بعض (اللحظة والنتيجة) بدل من حاجة وحدة برك لي اللحظة لي راك تقرا فيها وفقط. وكي يلحڤ الكونطرول الكونطرول أصلا رايح تكون مقلق والستراس يكون level max مباعد تحير لاه مكش مطلع مليح مالڤري قريت، وهي كامل سبتها أنو نتا نفسيا مكش stable بسك من سابع المستحيلات واحد يكون يقرل وهو مقلق وهو خايف رايح يكون مركز مع قرايتو ويا لوكان بنسبة تاع 10% وبالتالي حاجة طبيعية جدا أنو ميقدرش يطلع ولا حتى أنو يدي العلامة لي يستاهلها على ڤد مجهودو.