Step to Bac 2027 🚀

📩 دليل المترشح الحر| اليوم 17 🎓

🎖️كيفاه تحافظ على ثقتك بنفسك كي ما تلقاش التشجيع والدعم؟🎖️ بعد ما تصارح داركم بقرارك باش تعاود الباكالوريا، ممكن تلقى ردود فعل مختلفة... 🪷كاين لي يتفهم قرارك ويشجعك، وكاين لي يوافقك بصح يبقى خايف عليك من تكرار التجربة، وكاين لي يرفض الفكرة من الأساس ويحاول يقنعك بلي ما تستاهلش تعاود عام آخر، ولا بلي لازم تتقبل النتيجة لي جبتها وتكمل طريقك. 🪷وهنا تلقى روحك في موقف ما كنتش حاسبلو حساب؛ لأنك ما كنتش تستنى منهم يقراو بلاصتك ولا يتحملو مسؤولية قرارك، كنت تحتاج برك كلمة تشجعك، ولا إحساس بلي كاين لي مؤمن بيك وبالهدف لي راك تسعى عليه.

بصح واش تدير كي ما تلقاش هاد الدعم؟

🎖️أول حاجة لازم تفهمها هي بلي عدم اقتناع الآخرين بقرارك ما يعنيش بالضرورة بلي قرارك غلط. ممكن أهلك يشوفو بلي إعادة الباك مغامرة أخرى، ويخافو عليك من خيبة أمل جديدة، وممكن ما يفهموش علاش ما قدرتش تتخلى على حلمك وتكمل في التخصص لي راك فيه. هما يشوفو الأمور من زاويتهم، وانت تشوفها من زاويتك، وماشي بالضرورة واحد فيكم ما يحبش الخير للآخر. لهذا، حاول: - ما تدخلش في نقاشات يومية باش تثبت بلي قرارك صحيح، وما تستهلكش طاقتك في تبرير نفس القرار كل مرة. - ما تربطش حماسك للدراسة بكلمة تشجيع تستناها من شخص آخر؛ تعلّم تكون عندك دوافعك الخاصة. - ما تخليش كلام الإحباط يتحول لصوت داخلي يرافقك كلما واجهت صعوبة. - حاول تطمّن أهلك بأفعالك، بانضباطك وجديتك، لأن الاستمرارية تقدر تبدّل نظرتهم أكثر من ألف وعد. - قرّب من الناس لي يفهمو المرحلة لي راك تمر بيها، وشارِك رحلتك مع صحبة تعينك على الخير. وبصح، ما تنساش بلي غياب التشجيع ما يعنيش لازم تواجه كلش وحدك؛ اسمع للنصيحة، وتقبل النقاش، وحاول تفهم مخاوف أهلك، بصح فرّق بين لي ينصحك باش يعاونك، ولي يحبطك حتى تفقد ثقتك في قرارك. وحاجة حابة نقولهالكم من القلب... ماشي لازم الناس كامل تصفقلك وانت في بداية الطريق، وماشي لازم كل واحد يفهم علاش اخترت تعاود من جديد. ممكن تبدا رحلتك بلا تشجيع، وممكن تفوت أيام ما يسقسيك حتى واحد واش قريت، ولا يلاحظ التعب والمجهود لي راك تبذلو، بصح هذا كامل ما ينقص والو من قيمة السعي تاعك. راك عارف علاش رجعت، وعارف واش حاب تبدل هاد المرة، وعارف شحال تعني ليك هاد الفرصة. ما تخليش انتظار كلمة من شخص آخر يعطلك على خطوة تقدر تديرها اليوم.

مش كل طريق عظيم يبدأ بالتصفيق، ومش كل حلم يحتاج جمهور يؤمن بيه... مرات يكفي صاحبو يكون صادق في سعيه، مؤمن بربي، وما يتخلاش عليه من أول طريق 🤍

ربي يوفقكم ويكتبلكم فرحة تنسيكم تعب الطريق❤️‍🩹🍃 🥇:https://t.me/step_to_bac