- هِمَّتِي لِأمَّتِي ࠝ

أنا بقالي فترة طويلة مش بعمل أي حاجة أنا بحبها.. كل حاجة بعملها بقت عشان لازم، عشان مضطرة، عشان مفيش اختيار تاني.. لحد ما نسيت نفسي وسط كل ده. نسيت أنا بحب إيه، وبحب أعمل إيه، وإيه الحاجات اللي كانت بتفرحني من قلبي.. حتى مش فاكرة آخر مرة جبت لنفسي حاجة أنا بحبها كانت إمتى، أو آخر مرة عملت حاجة لمجرد إني عايزاها أنا، مش عشان حد ولا عشان مسؤولية. بقيت أصحى أعمل اللي عليا، وأخلص اللي ورايا، وأشيل اللي لازم أشيله، وأكمل يومي.. بس فين أنا وسط كل ده؟ أصعب إحساس مش إنك تكون مضغوط أو تعبان، أصعب إحساس إنك تفضل فترة طويلة بتدي من نفسك لكل حاجة ولكل حد، لحد ما تيجي في يوم تبص لنفسك وتكتشف إنك نسيت الشخص الوحيد اللي كان المفروض تهتم بيه.. نسيت نفسك! أنا مش عايزة حاجة كبيرة من الدنيا، أنا بس نفسي أرجع أحس بيا، أفرح بحاجة صغيرة، أجيب لنفسي حاجة بحبها من غير ما أحس إني مقصرة في حاجة تانية، وأعيش يوم يكون فيه جزء صغير ليا أنا.. مش كله واجبات ومسؤوليات. يمكن كل اللي محتاجاه إني أفتكر نفسي تاني.. قبل ما أنسى أكتر أنا مين، وإيه اللي بيفرحني، وإزاي كنت بعرف أفرح من قلبي.