កម្រងបទដ្ឋានគតិយុត្តិពាក់ព័ន្ធវិស័យដីធ្លី សំណង់​ &ផ្សេង​ៗ

ទំនាក់ទំនងរវាងសារការី និងលិខិតប្រគល់សិទ្ធិ (Power of Attorney - POA) លិខិតប្រគល់សិទ្ធិ គឺជាលិខិតគតិយុត្តដែល អាណត្តិទាយក ប្រគល់អំណាចឱ្យ អាណត្តិគាហក ធ្វើសកម្មភាព ឬអនុវត្តនីតិកម្មជំនួសខ្លួន ក្នុងវិសាលភាព និងលក្ខខណ្ឌដែលបានកំណត់នៅក្នុងលិខិត។ ជាទូទៅ លិខិតប្រគល់សិទ្ធិអាចបែងចែកជា លិខិតប្រគល់សិទ្ធិទូទៅ (General Power of Attorney) និង លិខិតប្រគល់សិទ្ធិពិសេស (Special Power of Attorney) អាស្រ័យលើទំហំ និងគោលបំណងនៃសិទ្ធិដែលត្រូវប្រគល់។ ដើម្បីឱ្យការប្រគល់សិទ្ធិមានសុពលភាព ភាគីទាំងពីរត្រូវមានសមត្ថភាពតាមផ្លូវច្បាប់ និងការប្រគល់សិទ្ធិត្រូវធ្វើឡើងដោយស្ម័គ្រចិត្ត ស្របតាមលក្ខខណ្ឌដែលច្បាប់កំណត់។ នៅក្នុងការអនុវត្ត សារការីមានតួនាទីធ្វើនីត្យានុកូលកម្មលើលិខិតប្រគល់សិទ្ធិ ដោយបញ្ជាក់អត្តសញ្ញាណ សមត្ថភាពតាមផ្លូវច្បាប់ និងភាពស្ម័គ្រចិត្តពិតប្រាកដរបស់ភាគីក្នុងការចុះហត្ថលេខាឬផ្តិតស្នាមមេដៃ ដែលជួយបង្កើនភាពជឿជាក់ និងតម្លៃជាភស្តុតាងខ្ពស់របស់ឯកសារ។ ទោះជាយ៉ាងណា ការទាមទារឱ្យលិខិតប្រគល់សិទ្ធិត្រូវធ្វើនីត្យានុកូលកម្ម ឬអត់ អាស្រ័យលើប្រភេទនីតិកម្ម និងបទប្បញ្ញត្តិច្បាប់ ឬតម្រូវការរបស់ស្ថាប័នដែលពាក់ព័ន្ធ។ 🔔នេតិភាល័យ 🔔https://t.me/nephealay 🔔អេតមីន