BIM-KHE ENGINEER

ការសាងសង់ថែមជាន់ ឬប្ដូរមុខងារប្រើប្រាស់ ជាពិសេសទៅលើសំណង់ចាស់ គឺជារឿងដែលចាំបាច់ត្រូវមានការវិភាគ គណនា និងត្រួតពិនិត្យដោយវិស្វករជំនាញ។ លើសពីវិធានការជន្លៀសបឋម វិធីសាស្រ្តនិងបច្ចេកទេសពង្រឹងបឋមនៅកន្លែងគ្រោះថ្នាក់ត្រូវមានភាពជាក់លាក់ និងត្រូវធានាបាននូវប្រសិទ្ធភាពខ្ពស់។ កុំធ្វើតាមទម្លាប់ ជៀសវាងការយកវិធីសាស្រ្តនិងបច្ចេកទេសពង្រឹងបឋមពីករណីផ្សេងៗពីមុនមកអនុវត្តដោយគ្មានការវិភាគវិស្វកម្ម ព្រោះវិធីសាស្រ្តពង្រឹង គឺប្រែប្រួលទៅតាមរចនាសម្ព័ន្ធគ្រឿងផ្គុំដែលមានស្រាប់ និងរចនាសម្ព័ន្ធគ្រឿងផ្គុំដែលថែមថ្មី។ វិស្វករគ្រឿងផ្គុំត្រូវសង្កេតមើលរចនាសម្ព័ន្ធបញ្ជូនបន្ទុកនិងផ្ទេរបន្ទុករបស់គ្រឿងផ្គុំ (Structural Load Path and Load Redistribution) ទើបផ្ដល់វិធីសាស្រ្តនិងទីតាំងដែលត្រូវទប់ពង្រឹងបឋម។ ការវិភាគនិងសម្រចបឋមនេះ គឺត្រូវការពេលខ្លីណាស់ មិនអាចយកកម្មវិធីកុំព្យូទ័រមកវិភាគលម្អិតនោះទេ ដូចនេះហើយចំណេះដឹងនិងបទពិសោធន៍ត្រឹមត្រូវពីវិស្វករជំនាញគឺជារឿងសំខាន់បំផុត ព្រោះវាជាការសង្រ្គោះបន្ទាន់ ដើម្បីបង្ការនិងបន្ថយកម្រិតនិងទំហំគ្រោះថ្នាក់។