ماڵی كتێبخانە ™ 📖🤍

خوێندنەوەی دروست چۆنە؟ خوێندنەوەی دروست، خوێندنەوەیەکە کە مەبەست و ئامانجەکەی دیاری کرابێت؛ خوێنەر بزانێت چی دەخوێنێتەوە و، بۆچی دەیخوێنێتەوە. خوێندنەوەیەک کە تێیدا خوێنەر هەست بکات پەیوەندیی ئەو لەگەڵ ئەو کتێبەی دەیخوێنێتەوە، وەک پەیوەندیی هاوڕێیەک وایە لەگەڵ هاوڕێیەکی دیکەیدا؛ بۆیە با مرۆڤ سەیری ئەوە بکات چی دەخوێنێتەوە، وەک چۆن سەیری ئەوە دەکات هاوڕێیەتیی کێ دەکات. گرنگترین مەرجی خوێندنەوەی دروست ئەوەیە کە خوێندنەوەیەکی ورد و قووڵ بێت؛ خوێنەر تێیدا چێژ لە ڕستەیەک یان لە بەشێکی کتێبەکە وەربگرێت، وەک چۆن چێژ لە خواردنێکی خۆش وەردەگرێت، بە باشی دەیجوێت و، بە باشی هەرسی دەکات. دوای خوێندنەوەی وردی هەموو بەشێک، لە خۆی دەپرسێت: نووسەر چی دەوێت؟ ئایا هەڵەی کردووە یان ڕاستی کردووە؟ لە چیدا هەڵەی کردووە و، لە چیدا ڕاستی کردووە؟ ئەگەر هەڵەی کردبێت، ئەوا ڕاست و دروستیی ئەو شتە چۆنە کە ئەو هەڵەی تێدا کردووە؟ خوێندنەوەی کتێبێک بەم شێوەیە، باشترە لە خوێندنەوەی چەندین کتێب بە شێوەیەکی سەرپێیی کە قووڵی و بیرکردنەوەی تێدا نەبێت. ئەم خوێندنەوەیە پێویستی بەوەیە کە خوێنەر هەموو عەقڵ و دەروونی خۆی تەرخان بکات بۆ ئەوەی دەیخوێنێتەوە؛ هیچ شتێکی دیکە سەرقاڵی نەکات و، هیچ بەربەستێک ڕێڕەوی بیرکردنەوەی نەبڕێت. لە کۆنەوە وتوویانە: «زانست کەمێک لە خۆیت پێ نادات، تاوەکوو بە تەواوی خۆتی پێ نەدەیت». • ئەحمەد ئەمین #مەعریفەتخانەی_ئاستانە