Невядомая Беларусь

На гарадзкой маршрутцы нумар 20 можна даехаць да пэрлы Берасьцейскага края - сядзібы Нямцэвічаў, у якой цяпер месьціцца музэй, прысьвечаны гэтаму роду. Улюбёныя для фатасэсій, вясельляў і плянэраў будынак і парк, як высьвятлілася, ня надта карыстаецца папулярнасьцю ў жыхроў Берасьця - усе чулі, але далёка ня ўсе даехалі да сядзібы канца 18ст. Упершыню я трапіла сюды ў клясе 5-6, калі на мастацкай практыцы нас адвезьлі маляваць маляўнічую сядзібу, а потым правялі невялічкую экскурсію. Вядома ж, часу прайшло столькі, што я й забылася на ўсё, што там бачыла. Акром чароўнага балькону-тэрасы зь відам на клюмбу. Гэты балькон не даваў мне спакою, то й справа паўстаючы ў памяці. І толькі ў сталым узросьце, зацікавіўшыся вандроўкамі, я паставіла сабе мэту даехаць да Скокаў. Але ўлетку на гэтую слаўню зямлю я трапіла падчас роварнай вандроўкі ў панядзелак - акурат у выходны музэйны дзень. А зямля тутака запраўды слаўная: першая згадка адносіцца ажно да 16ст. І вось, сёньня я дабралася да ўнутранага ўбранства сядзібы Нямцэвічаў і засталася задаволеная, таму дзялюся некаторымі кадрамі з вамі. Раскоша шляхецкіх заляў, дзе некалі пражывалі Нямцэвічы: паслы, старасты, судьдзя, пісьменьнік... І я настойліва кажу: да Скокаў варта даехаць кожнаму берасьцейцу.

ТОП-5 МУЗЭЯЎ ЗЬ НЕВЕРАГОДНАЙ АТМАСФЭРАЙ🖤 1.Музэй старажытнага чалавека ў Белавескай пушчы 🌲 Гэты музэй уражвае сваім маштабам - цэлы мікрараён (калі ня больш) мог бы ўмясьціца на гэтай тэрыторыі. Для стварэньня атмасфэры там ёсьць усё: і дзікая прырода, і антуражныя хацінкі, і прадметы быту ў іх. 📌 Коратка: музэй стаянак чалавека ад 9 тыс. да н.э. да 10 ст. н.э. 💰10р (без экскурсіі). 2.Музэй беларускай маляванкі ў Заслаўі🎨 Сучасны музэй уражвае сваімі стыльнымі цёмнымі залямі са сьвятлом-акцэнтам на аб'екты. У музэі прадстаўлены творы як вядомых, так і невядомых творцаў. Можна заказаць экскурсію, у т.л., на добрай беларускай мове, а яшчэ ёсьць экран, дзе можна самастойна азнаёміцца зь інфармацыяй пра музэй і экспазыцыі. 📌Коратка: заля невядомых народных творцаў, заля Язэпа Драздовіча, аля Алёны Кіш. 💰5р (без экскурсіі). 3.Музэй "Бярэсьце" на тэрыторыі Берасьцейскай крэпасьці 🏚️ Асноўная экспазіцыя музэя - раскапаныя рэшткі старжытных хатак і маставых, над якімі й быў пабудаваны сам купал музэю. Акром таго, вакол самаго рамкопу разьмешчаны палічкі з рознымі археалягічнымі скарбамі й макеты старажытнага гораду. 📌Коратка: раскоп сярэднявечнага горада з хаткамі 13ст. і экспазіцыі з ≈ 1200 экспанатамі. 💰6.60р (без экскурсіі й фота). 4.Музэй-сядзіба Адама Міцкевіча ў Звосьсі (Баранавіцкі р-н)✒️ Арыгінальны маёнтак пацярпеў ад пажараў у 1916г. У 1998г. сядзібны комплекс быў адноўлены да 200-годьдзя са дня нараджэньня паэта па малюнках і на аснове кнігі Міцкевіча "Пан Тадэвуш". Нягледзячы на навбуд, музэй уражвае сваёй атмасфэрай. 📌Коратка: музэй прадстаўлены сядзібным домам, гаспадарчымі пабудовамі й домікам паляўнічага на беразе ставочка. 💰≈ да 5р. (без экскурсіі й фота). 5.Этнаграфічны комплекс "Млын" у Заслаўі ⚖️ Уключае некалькі будынкаў: кузьню (перавезена зь іншага месца), млын, сьвіран і хату завозьнікаў. Млын адносіцца да 1910г. і лічыцца адным з найзахаваўшыхся паравых млыноў на Беларусі. Яшчэ ў 1989г. ён дзейнічаў. 📌Коратка: прадстаўлены арыгінальнымі будынкамі з унутраным інтэр'ерам, знаходзіцца прам у горадзе, таму атмасфэры адчужанасьці няма. 💰3,5р (без экскурсіі).

Цяпер хачу распавесьці вам пра досыць малады музэй пад адкрытым небам, які прысьвечаны быту людзей 9 тысячагодзьдзя да н.э — 10 ст. н.э. Знаходзіцца ён у турыстычнай частцы Белавескай пушчы. Прадстаўлены быт некалькімі паселішчамі з прадметамі быту ўнутры: посуд, коміны, вогнішча, печкі, інструмэнты, элемэнты дэкору, адзеньня, зброі й гд. Каля кожнага будыначку вы можаце азнаёміцца з функцыяналам тых ці іншых будынкаў, а таксама з адсылкай на прататып гэтага будынку: кожны афармляўся на аснове праведзеных раскопак у бліжэйшай мясцовасьці, у т.л. на ўкраінскіх тэрыторыях. Асабліва ўражвае маштаб музэя: па сучасных мерках гэта цэлы мікрараён горада. Паселішчы знаходзяцца на адлегласьці, што стварае асаблівую атмасфэру, бо перасячэньні зь іншымі турыстамі мінімальныя. Да відавочнага для мяне мінуса аднясу выкарыстаньне ў дэкаратыўных мэтах жывых жывёлаў: трусікаў і авечак. Безумоўна, гэта дадае антуражу музэю, але ж наўрад ці зьяўляецца этычным: жывёлы ўвесь час знаходзяцца на віду. Музэй адназначна апраўдвае свой кошт - 10р. (без экскурсавода). Час знаходжаньня на тэрыторыі не абмежаваны (у працоўныя часы, вядома ж).

Прапаную вам цікавы маршрут (≈ 90км 🚴🏼‍♀️), які пачынаецца ад станцыі Ўладава - канчатковай станцыі ў аграгарадку Тамашоўка Берасьцейскай вобласьці. Сама станцыя будавалася на пачатку 20ст. (здымак 1) На старых здымках можна ўбачыць цікавую вялікую прыгожую вежу, якая сустракала падарожнікаў з боку мястэчка. Вежа не захавалася, хутчэй за ўсё, пашкоджаныя вайной, а вось брукаваначка перад станцыяй дадае аўтэнтычнасьці гэтаму месцу. Яшчэ адна цікавінка Тамашоўцы - жаўнерскія могілкі Першай сусьветнай вайны. Там жа ж захавалася старая цаґляная брама й такі ж помнік салдатам 1915-16гг (здымак 2). На помніку ганарліва пільнуе леў. Далей рушу на Дамачава цераз вёскі, таму асфальт хутка зьмяняецца гравійкай, але ж прыемным сюрпрызам становіцца від на польскі касьцёл сьв. Аўгусьціна ў Ражанцы над Бугам. Але ж у Страдзечы я выехала назад на асфальт і да Дамачава хуценька дакаціла па Р94. У Дамачава цікавостак больш, але асабліва мяне зацікавілі лютэранскія могілкі (здымак 3), пра якія я пісала асобны допіс і раю азнаёміцца зь ім. Там жа ж захавалася драўляная царква сьв. Лукі 1905г. (здымак 4), касьцёл Панны Марыі (здымак 5) таго ж году й яшчэ некалькі дробных помнікаў. Наступная кропка - станцыя Дубіца (здымак 6), пра якую я таксама пісала цікавы допіс са здымкамі зь кіно. Але на шляху да Дубіцы я сустрэла яшчэ адну важную рэч - шыльду, якая нагадвае пра бессэнсоўную жорсткасьць нацыстаў у дачыненьні да дзяцей (здымак 7). Вельмі прыгожыя дарога вядзе мяне да Белага возера, але там так шмат баз адпачынку, што й адпачываць там ня вельмі хочацца. Едзем на Медна, дзе на могілках яшчэ стаіць старая Спаса-Праабражэнская царквушка 18-19стст (здымак 8). Цікава, што яна адна зь нешматлікіх ня сініх цэркваў у навакольлі. Пад Медна варта завітаць да мясцовых вазёраў: Мяднянскага й Страдзецкага (здымак 9). Асабліва апошняе ўражвае сваёй дзікай прыгажосьцю. Далей доўгая, але роўная й прыемная дарога да Прылукаў. Там на самым ускрайку стаіць драўляная Пакроўская царква 1870г. (здымак 10). Далей можна заехаць у Гершоны, паглядзець цэрквы й 5 форт, але ж я рушу дадому, бо ня так ужо й цёпла кастрычніцкімі вечарамі.