Leo Khawarizmi channel

هەموو شتێک چۆن دەسپێکی هەیە ئاواش کۆتایی هەیە دوای بیست و شەش ساڵ ژیان، ئەزمونی پەنجا ساڵ ژیانم کرد، زۆربەی قۆناغ و ئاست و بارودۆخە خۆش و ناخۆشەکانم بینی، زۆربەی تەمەنیشم لەناو جیهانی دیجیتاڵی و کۆمەڵگای مۆدێرن بەسەربرد، ئیدی لە کۆتاییدا سەرو بنی سیستەمەکەم دیت و لێی تێگەیشتم، ئێستاش کە تەمەنێکی کەمم ماوە لە ژیان، تێڕوانین و بیرکردنەوەم بەرامبەر هەندێک شت سەد و هەشتا پلە گۆڕاوە، درکم بە شتانێک کرد خۆزگە زووتر زانیبام، رق و خۆشەویستیم بۆ زۆر شت پێچەوانە بۆوە، وە عادەتەن مرۆڤ لە کۆتاییەکانی تەمەنیدا یان قۆناغی پێش مردن دەگاتە واقعی تێگەیشتن لەو بابەتانە و ژیان بەگشتی، ئەوانەی کە دەگەنە کۆتا ساتەکانی تەمەنیان، برۆ لێیان بپرسە خۆزگەت چیە (پێش ئەوەی تۆش بگەیتە ئەو قۆناغە و ئەوکات درەنگبێ) کەسیان خۆزگە ناخوازن کە دەوڵەمەند بوبان یان پارەیەکی زیاتریان کۆکردباوە، خۆزگەی هیچ کامێکیان ماددی نین، لە کاتێکدا ئێمە هەموو تەمەنمان هەوڵمان بۆ مادە و ڕووکەش و سامانە چونکە وەدەزانین کاتێک ئێمە غەریزەکانمان تێر دەکەین و خواستەکانمان پڕ دەکەینەوە ئەوا بەختەوەر دەبین، لە راستیدا پێچەوانەکەی ڕاستە، سروشتی ژیان وایە هەرچەندە نیعمەتە مادیەکانت زیاتربن دەبێ باجەکەی بە بەختەوەریەکەت بدەی. نازانم کەی تۆش دەگەیتە ئەو قەناعەتە، بەڵام دڵنیابە ئێمە ئێستا بە هەڵە ژیان بەڕێ دەکەین، ئەو تێڕوانینەی خەڵک بۆ دونیا هەیانە سەدا نەوەدو نۆیان هەڵەن، چونکە هەمویان تێگەیشتنێکی ڕوکەشی و مادیان بۆ دروست بوە کە بۆتە هۆی لادانی مرۆڤ لە فیترەت. هیچ جار پرسیارت لەخۆت کردوە؟ دنیایەک پرسیار کە بە پێشگری چۆن و بۆ و کەی و کوا دەست پێ بکات؟ هەر بە جدی بۆچی تۆ مۆبایلێکت بەدەستەوەیە؟ خەریکی سۆشیال میدیای، شازدە ساڵە دەخوێنی، خەریکی پارە پەیداکردنی، بیر لە بنیاتنانی داهاتوێکی مادی دەکەیەوە، وە بیر لەوە دەکەیەوە کە چۆن پێویستیەکانت دابین بکەی، ئەمانە و کۆمەڵێک شتیتر کە دەیانکەی، گەر لەخۆت بپرسی بۆ دەیانکەی وەڵامت چیە؟ تەنها چونکە هەموو خەڵک دەیکەن بۆیە دەبێ تۆش بیکەی؟ من لێرە بە دواوە یەکەم هەنگاوم ئەوەیە تا پێم بکرێ لە جیهانی تەکنەلۆجیا دوور دەکەومەوە و وازی لێدێنم بە تایبەت سۆشیال میدیا، بە ڕادەیەک کە ئەگەر منتان بینی سۆشیال میدیا بەکاردێنم ئەوا من نیم، بەم زوانە هەموی دادەخەم. سوپاسی هەموو ئەوانە دەکەم کە هەواڵیان پرسیوم، وە ئەوانەشی کە لە سۆشیال میدیا ناسیمن بە باش و بە خراپیانەوە. دەمویست بە ئەندازەی ڕۆمانێک شت بنووسم، بەڵام با ئەوەندە بەس بێت! بە خواتان دەسپێرم Escape the matrix