သတင်းထူး သတင်းဦး

ဒေါ်အောင်ဆန်းစုကြည်ကို ခြွင်းချက်မရှိလွှတ်ဖို့ အမေရိကန် တောင်းဆို ဧရာဝတီ၊ ဩဂုတ် ၆၊ ၂၀၂၆ ဒေါ်အောင်ဆန်းစုကြည်ကို အပြည်ပြည်ဆိုင်ရာကြက်ခြေနီကော်မတီ (ICRC) နှင့် ဩဂုတ် ၃ ရက်တွင် တွေ့ဆုံခွင့်ပေးသည့်အပေါ် ကြိုဆိုသော်လည်း ဟန်ပြလုပ်ရပ်မျှသာဖြစ်ပြီး မလုံလောက်သေးဘဲ ခြွင်းချက်မရှိ လွှတ်ပေးရန် အမေရိကန် အထက်လွှတ်တော် နိုင်ငံခြားရေးကော်မတီ (Senate Foreign Relations Committee) ဥက္ကဋ္ဌ ဂျိမ်းစ် ရစ်ရှ်က တောင်းဆိုလိုက်သည်။ စစ်အုပ်စုအနေဖြင့် မိသားစုနှင့် အဆက်အသွယ်လုပ်ခွင့်ပေးပြီး သူမ၏ ကျန်းမာရေးနှင့်ပတ်သက်သည့် အချက်အလက်များကို ထုတ်ပြန်ပေးရန်နှင့် ခြွင်းချက်မရှိ ချက်ချင်း ပြန်လွှတ်ပေးရန် လုပ်ဆောင်ရမည်ဟု ၎င်း၏ X လူမှုကွန်ရက်တွင် ရေးသားထားသည်။ အသက် ၈၁ နှစ်အရွယ် ဒေါ်အောင်ဆန်းစုကြည်နှင့် ICRC တို့ တွေ့ဆုံသည့် ဓာတ်ပုံများကို ထုတ်ပြန်ခဲ့ခြင်းသည် အချိန်လွန်မှ လုပ်ဆောင်ခဲ့ခြင်း ဖြစ်သကဲ့သို့ အကွက်ချ စီစဉ်ထားခြင်းလည်း ဖြစ်ကာ မင်းအောင်လှိုင်သည် အဓိက နိုင်ငံရေး ဓားစာခံတဦး အသက်ရှင်ကြောင်း သက်သေကို ထုတ်ပြခြင်းဖြင့် ၎င်း၏ လိုလားချက်အတိုင်း နိုင်ငံတကာ စင်မြင့်ထက်သို့ ပြန်လည်ဝင်ရောက်ရန် ရည်ရွယ်ကြောင်း၊ အဓိက နိုင်ငံရေးဓားစာခံတဦး အသက်ရှင်ကြောင်း သက်သေပြခြင်းသည် လူသားချင်းစာနာမှုဆိုင်ရာ လျှော့ပေါ့ပေးမှု မဟုတ်ဘဲ ဘန်ကောက်သို့ မလာရောက်မီ ရက်ပိုင်းအလိုတွင် ထုတ်သုံးလိုက်သည့် တန်ဖိုးနည်း သံတမန်ရေး အမြတ်ထုတ်မှုတခုဖြစ်ကြောင်း အများက ယူဆနေကြသည်။ #Theirrawaddy #HPC