Samarqand viloyati bojxona boshqarmasi | Rasmiy kanal

Bojxona qo‘mitasida 2026-yil 1-yarim yillik yakunlari muhokama qilindi Bojxona qo‘mitasida 2026-yilning birinchi yarim yilligi yakunlariga bag‘ishlangan Hay’at majlisi bo‘lib o‘tdi. Unda sohada amalga oshirilgan ishlar tanqidiy-tahliliy ruhda ko‘rib chiqilib, Davlatimiz Rahbari tomonidan berilgan topshiriqlar ijrosi hamda ikkinchi yarim yillikdagi ustuvor yo‘nalishlar muhokama qilindi. Yig‘ilishda Bojxona qo‘mitasi raisi A.Mavlonov davlat budjetiga bojxona to‘lovlari tushumini oshirish, iqtisodiy xavfsizlikni ta’minlash, kontrabanda va bojxona qonunbuzilishlariga qarshi kurashish, raqamlashtirishni kengaytirish hamda tadbirkorlar uchun qulay shart-sharoitlar yaratish bo‘yicha amalga oshirilgan ishlar yuzasidan axborot berdi. Ta’kidlanganidek, Prezidentimiz tomonidan sohani rivojlantirish uchun yaratilayotgan imkoniyatlardan kelib chiqilsa, erishilgan natijalar yetarli emasligi oydinlashadi. Shu bois har bir ko‘rsatkich ortidagi samaradorlik va sifatga alohida e’tibor qaratish zarurligi qayd etildi. Hisobot davrida 10 mingdan ortiq tadbirkorga 28 trillion so‘mlik bojxona to‘lovlari bo‘yicha imtiyoz va preferensiyalar qo‘llanildi, 4 trillion so‘mlik to‘lovlarni kechiktirib to‘lashga ruxsat berildi. Davlat byudjetiga o‘tkazilgan bojxona to‘lovlari 41 trillion so‘mni tashkil etib, o‘tgan yilning mos davriga nisbatan 19 foizga yoki 7 trillion so‘mga oshdi. Iqtisodiy va jamoat xavfsizligini ta’minlash doirasida 1,7 tonna giyohvandlik vositalari hamda 156 dona o‘qotar, pnevmatik va sovuq qurollar ushlab qolindi. Sohani raqamlashtirish natijasida deklaratsiyalarning 53 foizi soddalashtirilgan tartibda rasmiylashtirildi. Jumladan, eksport deklaratsiyalarining 42 foizi va import deklaratsiyalarining 9 foizi inson omilisiz amalga oshirildi. Bu 7 mingga yaqin eksportyor va 37 ming nafar importyorning vaqt va ortiqcha xarajatlarini tejash imkonini berdi. Yig‘ilishda ijtimoiy soha obyektlarini qo‘llab-quvvatlash, huquqbuzarliklarning oldini olish, yashirin iqtisodiyotni qisqartirish hamda tadbirkorlikni rivojlantirish bo‘yicha olib borilayotgan ishlar ham tahlil qilindi. Xususan, Sergeli tumanida olib borilgan o‘rganishlar davomida aniqlangan 3 772 ta muammoning 3 373 tasi hal etildi. Shuningdek, bojxona organlarida korrupsiyaga qarshi kurashish samaradorligi muhokama qilinib, yil boshidan buyon xodimlar ishtirokida qariyb 2 mingta profilaktik va tarbiyaviy tadbir o‘tkazilgani qayd etildi. Yig‘ilish yakunida «Hushyorlik va sadoqat orqali jamiyatni himoya qiluvchi bojxona» tamoyili asosida sifatli ma’lumotlar va sun’iy intellekt ko‘magida xavflarni boshqarish, malakali kadrlar va xalqaro hamkorlikka tayangan zamonaviy bojxona tizimini yanada rivojlantirish bo‘yicha ustuvor vazifalar belgilab berildi.