Cinquième "05" année médecine "TLEMCEN" 🩺💡🩹🤍

دعيولنا معاكم كي تتفكرونا .. امسية طيبة لكم ✨

وشوفوا واسم قريت دروأ مباشرة سبحان الله 🤭: "توك صغير السِّن والعُمر ما شاب إنّ فاتك شيء اليوم بكرا تجيبه 🪄" ~• الآنسة شغاف.

ان شاء الله تعجبكم هاذ القصة .. وتكونوا فهمتوا قصدي من هذه الرسائل.. وتطلعوا لريسانكم المورال كي تتفكرو بلي حنا كامل نقدو نفيدو .. رغم كل العيوب والنقص لي يكون عندنا ") 🥲😭 الله يعلمنا جميعا.. والله ينفعنا وينفع بينا

نحكيلكم قصة آخر مرة حضرت فيها فحص مع طبيب مقيم في طب الجلدية جا عندنا طفل .. أنا قبل مانشوف فواسم جا يشكي كمشكل جلدي .. بانتلي بلي الطفل مقارنة بعمره يبان غي قليول أي أنه يعاني من RSP retard staturo-pondéral وواسم هو أول واكثر شيء معروف نخمموا فيه عند طفل يعاني من شيء كهذا ؟ Maladie cœliaque الطبيب بدا الفحص تاعه .. وكانت عندنا بقع بيضاء باين الفرق بينها وبين لون جلده الطبيعي .. المهم كان إستعمل lampe de wood باش يشوف les lésions مليح ويقد يفرق .. وأنا غي على حساب واسم بانتلي ( مازال ماقرينا الموديل ههههه ") حسيت بلي الأمر عنده علاقة ب vitiligo المعروف أنه عموماً الإنسان الحامل لاصابة كهذه يكون عنده Un terrain immunologique معنتها عنده اصابات أخرى مناعية .. و طبعا كاين بزاف ومنها Cœliaque طبعا أنا ماكانتش مهمتي نعرف التشخيص كان خاصني نسأل أكبر قدر من الأسئلة يقد يعاوني نعرف بالمقابل الطبيب راه يسمع منداك كان لاهي نسهل عليه المهمة ( وهاذ الهدرة حكاتهالي ماماه منداك سقسيتها بصّح الطبيب كان مفتون بين لي برا والضغط ماكانش بخاطره باش يسقسي بالتفصيل الممل ) أيا سقسيتها قلتلها مادام ولدك راه يتبع عند بيدياتر على شي حاجة؟ قالتلي كان يظل يشكي من الوجع في المصران .. أيا عبيته قلتلها ويشكيلك من Diarrhée wla constipation ? هو جاوبني قالي diarrhée بزّاف أيا قلتله يادرا الماكلة يادرا النمو قالتلي مراهش يزيد كامل والماكلة عنده ماكاين حالة. هنا استنتجت واسم قلتلكم الفوق عاود سقسيتها قلتلها والطبيب تاعه واسم قالك؟ قلتلها جبدلك على maladie cœliaque هي مسكينة ماكانتش فاهمة قالتلي لا قالي ماعندهش قلتلها صحا طلبله شي حاجة؟ قالتلي ييه عيارات .. و طلب منه يعمل خا الريجيم 3 اشهر هنا قبطت بلي هي ماكانتش عارفة بلي راه عامله Essai thérapeutique وراه يسيي معاه régime sans gluten ويشوف الدعوة كيفاش هنا الطبيب قلتله ها واسم قالتلي ( كان خرج وولى ) أيا قالي هذا الشيء قادر يفسر أكثر الأمر.. وقالها بلي راه شاك في Vitiligo وطبعا حتى يتأكد ملبعد هو تايناك منداك كاين Dgs Différentiel whdokhrin وباينة مانجزموش مباشرة... بصح بداله بعلاج تقريبي يشوف كيفاش دوك يغياجي . هي انخلعت قالتلي علاش كاين علاقة بين هاذ الزوج؟ أيا قالها نعم قادر تكون وكان يفهمها وبالمقابل يفهمني تايناك . هاذ القصة حكيتهالكم باش نقولكم ماتطيحوش بريسانكم و الفكرة لي تجي في بالكم هدروها وسقسيو وكي ماتعرفوش قولوا أنا هاذي مانيش قابطها .. طبعا كاين بزاف صوالح باقيلنا نتعلموهم وعن نفسي كل يوم نزيد نتأكد بلي عندي. بزااف فراغات وخاصني نزيد نزير وراني ناسية بزاف أشياء أخرى بصّح بالمقابل هذا لا يعني بلي نستنقص من راسي كل يوم رانا نبنيو ونطلعوا في بنياننا .. ومعليش الdefaut لي نصيبوه نسقدوه في طريقنا . 🤍

أهم شيء حبيت نهدر عليه ... تعلموا تكونوا عنصر فعال في المكان والحاجة لي تكونوا حاضرين فيها .. ماتمشيوش بنية جيت غي نشوف روحو بنية جيت نتعلم ونعاون ونخدم ونفهم و نبني les réflexes تاعي ونطرح وجهة نظري أيضا.. ماتحشموش وماتشوفوش ريسانكم عالة ولا تقولوا بصّح أنا علاش نهدر وقدامي بروف ولا résident ولا أيا كان .. كلما تحضروا les consultations خصيصا تبنيو منطق تفكير شباب .. وتبداو تخدموا بشحال من موديل في مخكم وتتعلموا تربطوا ..

من ناحية أخرى... ماتهربوش من الصوالح لي تحسوا ريسانكم ماقابطينهمش مليح ولا ماتقدوش تعملوهم لي عارف راسه مايعرفش يتعامل مع المرضى ويهدر ويسقسي و يجيري اللقاء معاهم يزدم يتعلم ..: السلام سيدي تفضل ييه حكيلي واسم عندك وهكذا تصيب راسك تتعلم .. حتى تولي تعمل الحاجة تلقائيا علابالك بلي نقطة ضعفك درس ما ... موديل ما .. الأدوية مثلا أو او بدا تخدم على الأمر .. شحال ماتواجهوا دروأ شحال ماتنحيو عليكم ملبعد ان شاء الله وحتى حاجة ماتقولوا عليها طفرت .. دائما كاين مجال للتدارك ان شاء الله

أول شيء... راكم تعرفتوا على لي سارفيس.. شفتوا واسم فيهم وعلابالكم دروأ الخيارات المتاحة فيه .. بالمقابل ماهو الموديل لي دوك يعاونكم فيه باش تفهموا وتقبطوا انطلاقا من هذا وملبعد ان شاء الله كي يمدولنا les carnets de stage عملوا لريسانكم أهداف .. باش تستغلوه كما يجب ..وباش ماتبقاوش غي تخلطوا كل شيء تالفلكم . كاين تايناك نقطة أخرى ... الصباح مثلا كان يومي الاول في السطاج تاعي وبديت بسارفيس تاع rééducation كان نهار مليح الحق الحمد لله بدينا ب TD استفادينا منه بزاف وملبعد عملتنا الطبيبة دورة تعريفية على السارفيس ووراتلنا الآلات ودورها وهدرتلنا شوية على المرضى.. الحق سبحان الله دوك الآلات وكامل يخليوك تندهش في العلم كيفاش بإذن ربي راه يتطور ووصل للشيء لي راه عليه.. ولوهلة مور ماخرجنا قلت بصح زعما حنا كاكستارن نقدو نقبطو غاية بالمستوى تاع المعلومات لي راه عندنا محدود وهاذو صوالح تاع تخصص؟ الإجابة هي نعم ! ماتقولوش هاذي حاجة ماتفيدناش بزاف على خاطر هاذ الحاجة بالذات هي لي تصنع الفارق 🤍 كون حنا مثلا نقبطو غي اسماءها وادوارها ونشوفوا كيفاش الحصص تفوت ونضربوا طلة على الملفات ونحضروا consultation رانا في الربح وقس على ذلك .. ويكذب عليك واحد شاف حاجة وواحد لا ماشي كيف كيف.. غي كمثال قادر زوج فاهمين غاية مثلا درس appendicite aiguë بصّح واحد غي نظريا واحد داخل البلوك .. شايف لاكلينيك ... عامل الفحص تاعه كاملا قرا les bilans ووو .. تبانلكم كيف كيف؟ لا طبعا فالشيء الاول لي نحبكم تعملوه .. الشيء لي ترفدوه فراسكم رفدوه .. حتى وماتخدمش بالمعلومة تهدر بيها ياك راكم أطباء وكامل يسناو منكم على الأقل تشرحولهم حتى وماتعاونوهمش 🤍

مبدئيا كامل راكم بديتو في السطاج فعليا.. وجا في بالي نهدر على وحد النقاط المهمة لي كنت نخمم فيها اليوم قلت بلاك تفيدكم تايناك 🙏

السلام عليكم ورحمة الله تعالى وبركاته أرجو أن تكونوا جميعا بخير وعافية جماعة الأطباء ... ✨🔥

+ ماتبقاوش تخليو الركض يخليكم تعملوا الأشياء بالطريقة الصحيحة.. قراو ... مارسوا .. شوفوا الحالات... مارسوا هواياتكم بدلوا الجو نوعوا .. عيشوا كما يجب.... مانحتاجوش دائما ل cat تاع كيفاش نعيشوا ونتعلموا .. ( طبعا ني نهدر في كل مايرضي الله) مانحتاجوش دائما لي يوريلنا كل شيء.. الامر يحتاج انكم تأمنوا في ريسانكم وتبنيو تجاربكم وحدكم.. اطلبوا التوجيه نعم بصّح ماتطلبوش لي يوصلكم حتى للوجهة .. هاذي هي توكلوا على الله .. ثم آمنوا بأنفسكم . وماتخليوش المجتمع يخليكم توليو بعقلية نسخة طبق الأصل عن الجميع. وفقكم الله لكل خير

كاين حاجة أخرى... مانيش عارفة بلاك دوك نبان نهدر بغضب بصّح الحقيقة راني نهدر تاع ( طفح الكيل ! ) إلى متى يبقى طالب طب من المفترض يكون عنده شخصية و ثقة براسه و ثبات على الرأي الريح لي تجي تعبيه ؟! يقولك هذا القروب خير من هذا أيا صايي يزعزعوك .. يقولك هذا البروف خطيك منه أيا ماتمشيلهش بلا ماتشوف أصلا وتحكم .. يقولك هذا الموديل مايتبلعش أيا تتبناو الفكرة واسم هذا الامتصاص بدون فلترة ! لهذه الدرجة كاين لي مايحبش يخمم بعقله ويحكم ويتبنى الافكار كأنها حاجة جات في الوحي غير قابلة للنقاش .. لي فوقك يهدرلك اي هدرة ماشي نيشان تزعزعك .. ؟ نعم أنا مع سماع مختلف الآراء .. نتونسوا بيها لي صحيح ويخرجنا منها تبارك الرحمان لي لا قيس عليك

اعط للامور دائما فرصة وزوج وعشرة .. اليوم السارفيس راه خاوي .. غذا يكون ناشط .. بلاك تتعلم مع مريض واحد لي ماتتعلمهش مع شحال من واحد .. هاذ الصوالح رزق .. العلم رزق ونتوما منكم السعي ومن الله التوفيق

مستحيل استحالة تامة تدخل سارفيس ماتتعلمش فيه . بصّح كي تبقى تسمع هدرة من قبيل مراه كاين والو ... الأمر مخيب .. واسم نقعدو نعملوا .. وأنت تتأثر وتمشي مع التيار عرف بلي هنا راك خسرت بزاف..

مانيش نقولكم كونوا انانيين كاين فرق كبير بين هاذ الزوج .. كونكم متحررين من الارتباط بالاشخاص والافكار و الشائعات وكثرة الهدرة لي تسمعوها .. عاونوا لي تشوفوه حاب حتى هو ينشط معاكم وتعلموا كيف كيف.. بصح شفتوا ماكانش لي عينه يتحرك... مايثبطوكمش تمشاو وحدكم

جيت حابة نقولكم شيء ... بما أنه ردولنا البارح وعرفنا كامل خيارات السطاج تاعنا .. كونكم متأكدين بلي الشي لي طاح فيكم هو الأفضل ليكم ولابد 🤍 علابالي كاين لي كان حاب حاجة صاب حاجة وكاين لي كان حاب مجموعة صاب راسه في مجموعة أخرى. شوفوا .. والله كي تجيو تشوفوا مايهمش فاين تكونوا يقدر مايهم كيفاش تكونوا نتوما ! نتوما تخليو السطاج يفوت شباب ماشي لا لي معاكم لا فاين راكم لا والو ✨ هي تاع بصّح الرفقة تصنع الفرق كي تكونوا مع ناس تحبوهم وموالفين بيهم .. بصّح لا يعني عدم وجودهم بلي صايي دوك تفوتوها كارهين . علابيها حبيت نقولكم تعلموا شيء.. تعلموا نكونوا independents... كي يتعلق الأمر بالسطاج.. كل واحد يشوف مخروجه .. أهدافه ... رغباته وعلى واسم راه يحوس

السلام عليكم ورحمة الله تعالى وبركاته أرجو أن تكونوا جميعا بخير وعافية 🙏✨ بداية... ان شاء الله تكونوا بديتو هذا العام بقوة .. وصبتوا ريسانكم وراكم بديتو بالفعل في السعي وعجبتكم الحالة 🤍

لي كان عنده شي سؤال زافطهولي ولا وماشفتش الرسائل ولا سهيت ماعاودش وليت رديت عليه فضلا يعاود يزيفطلي ( في البريفي رابط الngl مراش باقي ) .. ولي عنده سؤال آخر تايناك يزيفطلي (في بريفي مجددا )... وقتا طيبا لكم .