اللـُطـْف

مفيش وجه مقارنة خالص بين إن يكون الشخص: حنين وأسلوبه ليِّن ومعاملته طيِّبة وعِشرته جميلة وكل الصفات دي.. وبين إنه يكون: ضعيف الشخصية! دي حاجه ودي حاجه تانية خالص. الشخص لما يكون حنين وجميل بيكون دا اللي شخصيته قوية، واللي هنسمع كلامه ونديله عينينا وقلبنا وحبنا بدون خوف.. وهسمع كلامك لإنك كويس معايا وبتعاملني بما يُرضى الله، وبـ تربيتك وأخلاقك! مش عشان بتزعقلي أو ترسم التكشيرة أو تمسكني تهبدني في الحيطة وتستخدم قوتك عليَّ! اللي بيكون كدا أصلًا، بيكون في قمة ضعفه وبيداري عليه بـ صوته العالي عشان شخصيته الحقيقية متظهرش. فـ مش معنى إنك تبقى متربي وبتتعامل بحدود ربنا وأسلوبك ليِّن وفاهم إزاي تتعامل مع البنوتة اللي معاك تبقا-ضعيف- ومش راجل! وياريت البنات كمان متستخدمش وتستغل دا في نطاق غلط! كَونه مديكِ الآمان وشخصيتك مُعزَّزة في وجوده ومعاكِ كامل الحرية والثقة وبيحتويكِ يبقا تشوفيه-ضعيف- وتتمادي في الغلط وكسر الحدود! احترمي كونه في النهاية-راجل- لو الغلط اتكرر أو حَس بـ رجولته بتقع أو بتستغليه غلط، يبقا إنتِ بنفسك اللي بتحضَّري الشخصية اللي متحبيش أبدًا تشوفيها. الكلام عمومًا يمشي مع: والدِك، خطيبك، زوجك، أخوكِ. أيًّا كان فيهم، متخسريش حبهم وثقتهم واحترامهم ليكِ.

زينب'محمد.